2024韓國跨年活動總整理
年尾去邊度跨年倒數好？首爾東大門、釜山廣安里都有跨年晚會！
- 普信閣敲鐘活動
- 各大電視台年尾頒獎典禮
- 各地新年日出
- 2024 Seoul Light DDP Winter
- 2024 Countdown Busan
- 濟州神話世界跨年活動
- 首爾樂天塔跨年煙花匯演（未定）
- ❄️難得冬天飛韓國想玩盡佢?❄️
Hello，大家好，我哋係由韓國人每日提供最新韓國旅行資訊嘅Creatrip。
2023年就嚟完，大家準備好迎接2024年未呢？有好多朋友們都會問小編到底韓國有咩跨年倒數活動，今日就等小編幫大家整理好今年會有嘅活動啦！
2024韓國跨年倒數活動總整理
普信閣敲鐘活動
- 位置：鐘閣站（종각역）4號出口
연합뉴스
「普信閣敲鐘儀式」可以話係全韓國規模最大嘅跨年活動，由1953年起開始舉辦，每年最後一日會敲33下大鐘，虔誠祈求出年都會順順利利。有好多人都會去現場睇，亦可以透過電視直播觀看儀式，一齊迎接2024嘅第一日！
各大電視台年尾頒獎典禮
MBC歌謠大祭典資料照片
每到年尾，對韓國人同有關注開韓國文化嘅朋友們嚟講最重要嘅盛事一定唔少得KBS、MBC同SBS電視台舉辦嘅年尾演唱會同頒獎典禮，當中最受到矚目嘅相信係固定每年12月31號舉辦嘅「MBC歌謠大祭典」！今年嘅主持係潤娥、珉豪同黃旼炫，準備同大家一齊開心迎接新一年！
SBS歌謠大戰
各大電視台由12月中開始就會陸陸續續舉辦頒獎典禮，為2023年畫上一個完美句號。小編幫大家整理咗2023年年尾嘅典禮日程，建議大家save低佢，有興趣嘅話更加記住要睇準時機搶飛啦！
| KBS | MBC | SBS |
| 演技大賞 2023.12.31 | 演技大賞 2023.12.30 | 演技大賞 2023.12.31 |
| 演藝大賞 2023.12.23 | 放送演藝大賞 2023.12.29 | 演藝大賞 2023.12.30 |
| 歌謠大祝祭 2023.12.15 | 歌謠大祭典 2023.12.31 | 歌謠大戰 2023.12.25 |
各地新年日出
好多韓國人都會趁12月31號出發去返轉新年旅行，然後喺1月1號迎接第一個日出，放低過去一年唔好嘅回憶，更加會為下一年需要，重新出發！咁韓國到底邊度出名睇日出呢？
1. 浦項虎尾岬相生之手（포항 호미곶 상생의 손）
- 地址：경북 포항시 남구 대보리 225-2
相生之手位於浦項虎尾岬，一直都係韓國最受歡迎嘅日出景點之一，當太陽咁啱停留喺手心位置嘅時候，景色真係會好壯觀同震撼！（而且聽講如果見到5隻手指上面全部都企滿曬雀仔，代表你之後會好lucky！）
2. 江陵正東津海邊（강릉 정동진）
- 地址：강원도 강릉시 강동면 정동역길 17
正東津日出都好出名，喺首爾搭KTX或者一般火車就可以去到！就算係平時都有好多人會專程嚟睇日出，不過相信1月1號可以喺呢度睇日出真係好有意義！
3. 麗水向日庵（여수 향일암）
- 地址：전라남도 여수시 율림리 산7-2
麗水嘅向日庵亦都係最具代表性嘅韓國跨年景點之一！向日庵係一座面向太陽嘅韓國第四大觀音廟，至今已經有成600幾年歷史。呢度每年都會舉辦日出慶典，今年都唔例外！
4. 首爾南山塔/N首爾塔（N서울타워）
- 地址：서울 용산구 남산공원길 105
如果大家1月1號當日會留喺首爾，不妨可以去南山塔所在嘅南山公園！喺呢度唔單止可以睇到超靚日出，仲可以俯瞰到首爾全景，為2024年嘅開始帶嚟一點新意！
5. 濟州城山日出峰（제주 성산일출봉）
- 地址：제주 서귀포시 성산읍 성산리 1
如果大家plan住年尾去濟州島玩，推薦大家一定要去城山日出峰睇日出！望見日出於東海之上，加上濟州島勁靚嘅自然景觀，景色真係超震撼！不過要提提大家，如果大家想喺度迎接2024第一個日出，需要事前喺網上申請（名額有限）。
2024 Seoul Light DDP Winter
- 地點：東大門DDP廣場
- 地址：서울 중구 을지로 281
- 舉辦時間：2023.12.31 23:00~
12月31號晚東大門DDP廣場都會有跨年倒數活動，大家可以睇到超靚燈光show同各種表演，一齊迎接2024年！
2024 Countdown Busan
- 地點：廣安里海水浴場
- 地址：부산 수영구 광안해변로 219
- 舉辦時間：2023.12.31 22:00 - 2024.01.01 00:10
釜山都會搞跨年倒數活動！今年活動由水營區主辦，將會喺廣安里海水浴場舉辦盛大表演，為觀眾帶嚟最燦爛嘅2024新年新氣象。
濟州神話世界跨年活動
- 地址：제주 서귀포시 안덕면 신화역사로304번길 38
- 舉辦時間：2023.12.30 19:00-22:00、2023.12.31 20:30 - 2024.01.01 00:30
- 售票網站：interpark官網
濟州神話世界會喺12月30號到31號，舉辦為期兩日嘅2024跨年倒數party，邀請人氣韓國歌手參與演出。而喺31號當日更加會有充滿活力喺煙花表演，為喺濟州跨年嘅旅客們留低畢生難忘嘅回憶！
首爾樂天塔跨年煙花匯演（未定）
- 地點：首爾蠶室樂天塔
- 地址：서울 송파구 올림픽로 300
首爾樂天塔通常每年跨年嘅時候都會有超精彩嘅煙花表演，不過目前為止都未有官方報導公佈到底今年會唔會有，不過相信會搞嘅可能性好大，有咩最新消息小編都會即刻為大家更新！
以上就係小編整理嘅最新2024韓國跨年活動資訊，如果大家plan住去上述景點感受熱鬧跨年氣氛，記住要注意安全同保暖，開開心心開始大家嘅新一年！
❄️難得冬天飛韓國想玩盡佢?❄️
如果有更多想知嘅內容，都可以隨時留言或者dm話俾我哋知：）
Instagram：creatrip.hk
