Hello，大家好 ，我哋係由韓國人每日提供最新韓國旅行資訊嘅Creatrip。

一提起韓國拉麵，即刻就諗起「辛拉麵」，雖然香港都有得買，但好多人嚟韓國玩嘅時候都會特別買韓國版返去。大家都可能會諗：「韓國拉麵梗係買返韓國版會正宗啲，好食啲」，之不過韓國人就唔係咁諗，佢哋反而覺得喺國外食嘅辛拉麵好食啲！最近更有報導指出呢個唔係心理作用，而係有真憑實據！究竟係點解？等小編話你聽啦！

농심 브랜드/百佳eShop

唔單只海外留學生，就連只係去幾日海外旅行嘅人，食咗幾日外國菜之後，都會突然掛住自己國家嘅嘢食，特別係超邪惡嘅拉麵！呢個時候食總會覺得比平時特別好味！以為係思鄉嘅心理作用，但原來真係唔同味㗎！

原來係穀氨酸鈉（Monosodium L-glutamte）搞鬼，即係味精！出口去海外嘅辛拉麵入面嘅調味粉，同喺韓國嘅唔一樣，所以味道都有分別。

YouTube 「햇살 Haessal」

味精本身有減輕酸味同苦味嘅功能，同時增添鮮味，帶出食物嘅天然風味。不過大家一直都認為味精對身體有害，為咗健康，隨之然追求天然嘅調味料。喺2007年開始，農心、Ottogi（不倒翁）、三養等牌子嘅拉麵製造商，喺製造韓國國內銷售嘅拉麵時，冇再加到味精。

後嚟有證明顯示，過量攝取味精會破壞腦神經細胞等對健康造成不良影響係一個誤解。韓國食品醫藥署喺2014年根據1995年美國食品藥物管理局（FDA）同世界衛生組織（WHO）共同研究得出嘅結果指出「終生攝取味精都係無害」，但據悉因為味精嘅負面形象太深，好難改變，目前喺美國生產嘅辛拉麵都係無添加味精，而喺日本、中國、東南亞等賣緊嘅「辛拉麵」、「火辣雞炒麵」等出口拉麵之中有就有加到味精。

呢個報導一出，好多韓國網友都表示「我都覺得之前喺日本食嘅好食啲」、「我仲以為係因為心情影響，原來係真嘅！」、「本身唔食拉麵，但去到外國食覺得好好食，一定會買嚟食，原來係咁...」、「美國買嘅拉麵真係唔好食...」、「以為喺外國淨係食啲好油膩嘅嘢，所以食拉麵會覺得好味啲，原來唔係。」、「要去外國食拉麵XD」等等。

截取自Instagram@insight_food

當然亦都有網友覺得韓國版好食啲！個個人嘅口味都唔一樣，唔知大家又覺得香港版嘅辛拉麵定韓國版嘅辛拉麵好食啲呢？😋

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購