西面咖啡廳總整理
搜羅釜山西面最有人氣嘅9間Cafe！各有特色，總有一間啱你feel！
Hello，大家好，我哋係由韓國人每日提供最新韓國旅行資訊嘅Creatrip。
唔知講到釜山，大家想去shopping會諗到邊個地方呢？當然就係西面啦！小編覺得佢同明洞都好似，不過只係shopping點都會口痕或者攰，想搵間Cafe坐下，今日小編整理咗9間Cafe，每間都唔同風格，總有一間適合你！
釜山西面咖啡廳推薦
1. Vintage 38（빈티지38）
Vintage 38充滿復古氛圍，每一個人去到都會陷入佢魅力當中，佢有3層樓高，相當闊落，重點係佢開24小時，就算半夜肚餓，都唔需要太擔心！
Vintage 38由工廠改建而成，用咗磚頭、水泥牆、黃光照明同復古擺設去裝修，人一種好溫暖有神秘嘅感覺。佢哋出名多甜品，特別係水果撻，好多人為咗食佢都會排隊買。
Vintage 38（빈티지38）
- 地址：부산 부산진구 전포대로199번길 38
- 營業時間：24小時
- 優惠：下載優惠券，可享9折優惠。
2. Crash商店（크라상점 서면점）
呢一間Crush商店出名賣牛角包，而且口味多，包括有楓糖、檸檬、士多啤梨、抹茶、朱古力、Pizza、紅豆忌廉等，10個只係需要₩9,900，相當之平！不過如果講到最特別，小編想推薦大家食大蒜忌廉口味，食完之後會令人念念不忘！
只要買10個，仲會有一個可愛嘅盒俾大家帶走，就算係自己食，定係送禮都一樣大方得體。
Crash商店（크라상점 서면점）
- 地址：부산 부산진구 부전동 198-12
- 營業時間：11:00 - 22:00
3. Space&Mood（스페이스앤무드）
相信大家早排都有聽過韓劇大熱《The Penthouse》呢套劇，為咗做最上嘅一層就要競爭，每位主角嘅屋企都令人忍唔住「嘩」一聲！位於釜山西面嘅其中一間Cafe，就超有Penthouse感覺！
呢個大吊燈喺IG見到唔少人嚟到都會打卡，趁冇人嘅時候記得要影返幅！另外呢度除咗咖啡同蛋糕之外，仲有提供熟食同早午餐，不過只係得3個鐘（11:00-14:00），有興趣嘅朋友可能就要喺呢段時間去。
雖然睇落好高級，但大家可以放心，呢度價錢唔算好貴，想扮富豪或者富婆，不妨就嚟呢一度體驗一吓啦！
Space&Mood（스페이스앤무드）
- 地址：부산 부산진구 새싹로 22-1 13F
- 營業時間：10:00 - 23:00
4. Modern Table（모던 테이블）
呢間「Modern Table」喺釜山有兩間分店（田浦店或慶星大店），兩間同樣都係咁受歡迎，小編今次要介紹嘅係西面田浦洞店。
Cafe內部座位多而且都算闊落，好多裝飾、傢俬都係木製，俾人一種好溫暖同好復古嘅感覺。
之不過佢嘅甜品可能小編期望太高，食嘅時候反而有啲失望，比起大家都會推嘅窩夫，小編覺得佢哋嘅Yougurt系列更加好食，之後大家去，唔知會唔會都有呢種感覺呢？
Modern Table（모던 테이블）
- 地址：부산 부산진구 중앙대로680번길 45-9 3F
- 營業時間：12:00 - 23:00（Last Order 22:00）
5. Momochi（모모치）
Momochi喺一棟大廈嘅3樓，店入面有唔少可愛有趣嘅裝飾品，加上溫暖嘅照明令人感覺好似返咗屋企咁。
小編個人好鍾意佢哋嘅布甸，配上香濃甜蜜嘅飲品，絕對係每個人都會愛上嘅味道！
Momochi（모모치）
- 地址：부산 부산진구 서전로37번길 18 3F
- 營業時間：12:00 - 22:00、逢星期日休息
6. CUOIANO（꾸오이아노）
以昏黃同感性嘅照明，營造出獨特氣氛嘅呢間「CUOIANO」Cafe，每個角落都會擺滿乾燥花同香氛，俾人一種好舒服同放鬆嘅感覺。
聽講老闆每個星期仲會轉唔同嘅音樂同埋擺設，令人每一次去都會有一種新鮮感。
CUOIANO（꾸오이아노）
- 地址：부산 부산진구 서전로 61 2F
- 營業時間：12:00 - 20:00
7. Bakers' 田浦本店（베이커스 전포본점）
네이버 지도
喺西面商圈嘅另一邊有一條「田浦咖啡街」，唔少年青人都會叫佢做「田理團路」，共中呢間「Bakers'」相當出名，一入到去就會聞到好香麵包味，令人忍唔住每個都想買嚟試。
所以錯過咗就會冇，唔少人為咗可以試到唔同口味嘅麵包，仲會特登早啲去，如果你係麵包控，咁之後一定要嚟試吓啦！
Bakers' 田浦本店（베이커스 전포본점）
- 地址：부산 부산진구 전포대로209번길 15
- 營業時間：10:30 - 20:30、新年、中秋當日休息
8. MOLLE（몰레）
「MOLLE」有超多款唔同口味嘅蛋糕，令人嚟到都會十五十六揀邊一個好，所以小編好推薦同朋友一齊嚟，一人買一款唔同口味，咁就可以開心share！
呢度嘅朱古力、抹茶、彩虹蛋糕都係相當熱門，而喺士多啤梨季節，就更加一定要試埋佢哋嘅士多啤梨蛋糕！因為都幾出名，如果係晏晝去，可能已經賣晒，建議大家可以早啲去！
MOLLE（몰레）
- 地址：부산 부산진구 중앙대로680번길 38
- 營業時間：11:00 - 23:00
9. Matin Coffee Roaster（마틴커피로스터스）
「Matin Coffee Roaster」強調享受當下，所以Cafe入面冇提供WIFI，希望客人可以同朋友自由自在傾偈，唔好只係顧住玩電話。
嚟到一定要試食佢哋嘅水果撻同咖啡，或者叫佢哋嘅樽裝奶茶（個樽可以帶走），一齊食相當夾！
Matin Coffee Roaster（마틴커피로스터스）
- 地址：부산 부산진구 동천로 49 2F
- 營業時間：12:00 - 22:30（Last Order 21:30）
以上係小編整理好嘅9間釜山西面咖啡廳，唔知邊一間係大家鍾意嘅風格呢？歡迎留言話俾我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
