Hello，大家好 ，我哋係由韓國人每日提供最新韓國旅行資訊嘅Creatrip。
相信大家早排都有聽過韓劇大熱《The Penthouse》呢套劇，為咗做最上嘅一層就要競爭，每位主角嘅屋企都令人忍唔住「嘩」一聲！今次小編就去咗一間位於釜山西面嘅一間超有Penthouse感覺嘅高級Cafe！如果你有興趣，咁就要繼續睇上去啦！
釜山西面「Space&Mood」介紹
地址：부산 부산진구 새싹로 22-1 13F 스페이스앤무드
營業時間：每日 10:00 - 23:00
小Tip：由西面站9號出口行去大約6分鐘。
最左邊係Space & Mood嘅餐牌，大家只要見到之後跟住入去呢棟大廈就可以。
11-13樓都係Space & Mood嘅，不過13樓先係cafe，所以大家搭𨋢時記住係撳13樓啊！
呢一間Cafe位於一棟大廈嘅頂樓，一出𨋢門就會見到呢一個景，簡潔得嚟會又有一種好高級嘅感覺。
一入到去右邊會見到呢一個Menu，大家可以喺度睇啱再落單，不過有一個缺點嘅就係呢度只得韓文Menu😣
喺等緊嘅期間，呢個大吊燈喺IG見到唔少人嚟到都會打卡，小編趁唔多人嘅時候，亦都唔例外即刻打返幾張卡🤣
頭先講過11-12都係Space & Mood嘅～小編落去睇吓，原來係一個藝術教室！每日...都會有唔同嘅藝術教學，如果大家之後有興趣，都可以掃佢哋QR Code預約課程。
呢度仲有唔同款式嘅餐具賣，每一件都好有特色，有興趣嘅朋友都可以請教職員。
小編覺得最神奇嘅係，呢度竟然連名牌嘅杯、碟都有得賣！
除咗上面吊燈之外，呢條長樓梯，大家都一定要打返張卡啊！
參觀咗一輪，小編叫嘅飲品同甜品都準備好啦！
蘋果紅茶（아이스 원터 애플티） ￦6,000（約HKD41.4）
呢杯蘋果紅茶好特別，喺杯嘅側邊加咗少少鹽同糖，大家只要直接飲就可以，加上佢仲有玉桂條，飲嘅時候會好香玉桂味，甜甜哋又鹹鹹哋，味道同口感都好特別。
花香奶茶（아이스 플로럴 밀크티）￦7,000 （約HKD48.3）
呢杯花香奶茶，雖然小編飲唔到好香嘅花香味（？）但口感好滑，會有一種令人想繼續飲嘅感覺。
橙伯爵紅茶蛋糕 （오렌지 얼그레이 쉬폰）￦7,000 （約HKD48.3）
呢個係職員推薦小編食嘅橙伯爵紅茶蛋糕，蛋糕好鬆軟，同上面層cream一齊食好好味，可能因為加咗橙，食落一啲都唔會覺得膩。
如果大家之後去釜山，喺西面附近想搵一間Cafe坐下，小編幾推薦可以嚟呢一間「space&mood」，價錢一啲都唔貴，而且仲俾人一種好高級嘅感覺！想體驗短暫嘅上流社會生活，呢一間係唔錯嘅選擇。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
