田浦「Modern Table」介紹
釜山近期大熱Nutella窩夫，到底係唔係真係咁好食？小編老老實實咁話俾你哋知！
Hello，大家好，我哋係由韓國人每日提供最新韓國旅行資訊嘅Creatrip。
喺釜山有一間好出名食窩夫嘅Cafe叫做「Modern Table」，鍾意食甜品嘅小編當然唔會錯過啦！不過小編食完之後有另一番感覺，想知係咩就要繼續睇落去啦！
釜山田浦「Modern Table」介紹
地址：부산 부산진구 중앙대로680번길 45-9 3층 모던테이블
營業時間：每日12:00 - 23:00 （22:00 Last Order）
小Tips：西面站2號出口行大約9分鐘，或由田浦站行大約8分鐘。
鋪頭喺3樓，大家可以搭𨋢上去。
呢間「Modern Table」喺釜山有兩間分店（田浦店或慶星大店），兩間同樣都係咁受歡迎，小編今次淨係去咗田浦洞店。
小編當日係大約1點半去到，當時都有唔少人嚟度食緊甜品或者休息緊。
舖頭幾闊落，而且都多位，唔知係咪因為好多裝飾、傢俬都係木製，俾人一種好溫暖同好復古嘅感覺。
一入到去職員就會即刻俾一份Menu同一部iPad俾大家，之後大家就可以搵位坐，慢慢睇。
Menu上除咗有韓文解釋之外，仲有英文同簡單嘅圖畫，落單都唔算好難。
最後小編叫咗佢哋主打嘅Nutella窩夫、Daily yogurt同埋detox cleanser juice。
Nutella窩夫 ￦8,500 （約HKD59）
呢一個Nutella係呢間舖頭嘅主打，小編諗都冇諗就即刻叫咗，佢榛子朱古力醬都幾多，上面仲加咗一個雲呢拿雪糕，一齊食都幾好味。不過可能網上評價太高，小編一開始都好期待，不過食嘅時候又唔覺得好有驚喜😣
Daily yogurt ￦7,500（約HKD52）
比起窩夫，小編覺得呢一個乳酪仲有驚喜！除咗有生果同乳酪之外，中間仲有好多堅果，食嘅時候會覺得好健康，而且係用當季最新鮮嘅生果，所以每次去會有驚喜，幾唔錯！
detox cleanser juice ￦8,000 （約HKD55.2）
今次小編諗住試吓佢哋嘅生果汁，呢杯排毒果汁加咗菠菜、野菜、西蘭花、蘋果、奇異果、青提子去製成，唔會太甜，飲嘅時候會覺得好健康🤣
整體嚟講，小編覺得Cafe內部環境係唔錯，不過甜品方面，可能因為期望太高，比起窩夫，小編更推Yougurt😣 如果大家之後會去，不妨話俾小編知你嘅食後感！
如果有更多想知嘅內容，都可以隨時留言或者dm話俾我哋知：）
Instagram：creatrip.hk