清溪川總整理
首爾市中心忙中偷閒最佳地點！一篇文章概括清溪川交通、附近景點、Cafe、餐廳！
Hello，大家好，我哋係由韓國人每日提供最新韓國旅行資訊嘅Creatrip。
講起首爾，其中一個大家第一時間會諗到嘅地方應該就係漢江啦。其實漢江有好多個分支，遍佈全個首爾，而最出名嘅就一定係位於首爾市中心嘅清溪川。大家下次嚟韓國，除咗去漢江公園之外，都可以去清溪川散吓步，享受吓繁忙都市中嘅悠閒。
清溪川位置
- 地址：서울 종로구 청계천로1
- 小Tips：首爾地鐵1號線市廳站（시청역）4號出口行7分鐘就會見到
清溪川介紹
清溪川嘅起點位於清溪廣場，鄰近市廳、光化門、景福宮、德壽宮等等首爾主要地方。呢條橫跨首爾中心嘅河流最終會同漢江第一大支流——中浪川匯合之後流入漢江。所以如果大家沿住清溪川行，就會經過好多出名嘅旅遊景點，例如廣藏市場、DDP、東大門、仲有乙支路。而圖入面嗰個紅藍相間嘅海螺型雕塑就係清溪廣場嘅地標啦，大家喺雕塑附近會見到有條斜路，跟住行就可以落到清溪川。
清溪川就好似城市中心入面嘅一個縮細版大自然咁，水聲配上四周圍嘅花草樹木，令人霎時間會唔記得自己原來身處緊喺亞洲其中一個最繁忙嘅都市。所以無論係遊客定係韓國人，好多人散步嘅時候都非常鐘意嚟清溪川，欣賞吓自然風光，暫時逃離石屎森林。
而韓國人就鐘意喺比較溫暖嘅月份，甚至夏天嘅時候嚟清溪川。佢哋除咗會喺度散步，熱嘅時候仲會除鞋浸對腳落清涼嘅河水消暑。
鐘意歷史嘅朋友嚟到呢度都唔會覺得無聊！因為清溪川兩邊嘅牆上面有好多同韓國歷史有關嘅壁畫，而下面仲會有韓英對照嘅説明，睇完之後相信大家會對首爾，甚至係韓國呢個國家有更加深嘅認知，成個旅程亦都會變得更有意義。
清溪川喺特別節日嘅時候會舉辦傳統燈展，佈置各式各樣嘅花燈。而小編呢次去就咁啱遇上佛誕，所以就見到有呢啲擺設啦。最出名睇清溪川燈展嘅兩個節日分別係中秋節同埋聖誕節，到時候會有好多應節嘅燈飾，大家如果喺呢兩個節日嘅時候身處首爾嘅話，不妨夜晚落嚟清溪川行一行。
喺呢度俾個小Tips大家，如果大家想100%感受到清溪川嘅魅力，小編建議大家就快日落嘅時候嚟到清溪川，咁就可以享受到清溪川嘅日與夜啦！
因為清溪川縱橫首爾，所以沿途嘅商鋪甚至係街道嘅氣氛都截然不同，例如清溪川起點附近就有比較多cafe同酒吧。如果想坐喺cafe俯瞰清溪川，小編推薦大家去清溪廣場附近嘅「dal.komm」，或者行到鐘路區嗰邊望到清溪川嘅「Hollys Coffee」同「The Coffee Bean」。雖然佢哋係連鎖coffee shop，不過亦都係呢度為數不多有天台嘅cafe，非常適合大家悠閒地欣賞清溪川嘅景色。
好似頭先所講，清溪川係一條好長嘅河流，所以真係冇話邊個位睇係最靚，每個area都有佢嘅特色等緊大家去發掘。不過如果大家之後係plan住去cafe或者去酒吧嘅話，停留喺清溪廣場嗰邊會比較好；如果大家想去傳統市場嘅話，就可以行到去東大門嗰邊；而想shopping或者行入啲比較有特色嘅巷仔嘅話，大家可以行到去鐘路區。
如果大家冇咁多時間，不妨可以去搭黃色氣球城市巴士，只要買一張飛，就可以全日遊覽首爾各個景點，一日之內行勻首爾市中心、青瓦台、南大門市場、仁寺洞等等嘅地方！
清溪川附近景點
清溪川博物館
- 地址：서울 성동구 청계천로 530
- 開放時間：星期二至日 09:00-18:00，逢星期一休館
首爾歷史博物館
喺呢度大家可以瞭解到清溪川同附近地區嘅歷史同文化，唔單止沿住清溪川行就會嚟到，仲唔需要入場費，想對韓國歷史有更深認識嘅朋友們可以抽少少時間入去參觀。
廣藏市場
喺清溪川散散吓步突然覺得有啲肚餓？咁就一定要去附近嘅廣藏市場掃街啦！廣藏市場係首爾其中一個最古老同佔地最大嘅傳統市場，入面有各式各樣嘅韓國美食，無論係最基本嘅辣炒年糕、紫菜包飯，定係廣藏市場嘅名物綠豆煎餅，喺呢度都可以搵到。連Netflix都有喺度取過景介紹韓國街頭小食，就知道呢度嘅嘢食有幾好味啦！
除咗掃街，大家仲可以喺度買到高質嘅韓服同棉被添！無論係韓國人定係嚟韓國旅行嘅遊客，有好多人都會專門嚟廣藏市場買棉被，因為價錢唔貴但夠舒服軟熟。如果大家係Creatrip會員，去#156同#88號舖頭買棉被仲可以有discount，千祈唔好錯過啦。
東大門設計廣場（DDP）
大家又知唔知原來東大門設計廣場（DDP）都係位於清溪川附近㗎呢？DDP嘅外觀非常有設計感，吸引唔少人嚟打卡，但其實佢仲係一個複合文化空間，成日都會舉辦各種展覽同文化活動，而最出名嘅就一定係韓國Fashion Week。DDP附近仲有遊客成日去shopping嘅商場，大家可以行完清溪川，參觀完DDP就可以順便去掃貨啦！
景福宮
講起韓國宮殿，相信最多人第一時間諗起嘅都會係景福宮。景福宮係首爾五大宮殿之中規模最大，行到入去你會覺得自己好似穿越時空，返咗古代咁。如果天氣好，氣溫又適中嘅話，小編非常推薦大家租套韓服著住入景福宮，可以享受古代氛圍之餘仲可以影返輯靚相，著韓服去參觀景福宮仲唔使俾入場費添啊！
光化門
- 地址：서울 종로구 세종로 세종대로 172
光化門係景福宮嘅正門，同清溪川非常近。而佢面前嘅光化門廣場亦都係一個好多遊客會去參觀嘅地方，而李舜臣將軍同世宗大王嘅銅像就係呢度嘅地標啦。對韓國歷史有興趣，或者想更加深入瞭解嘅朋友們不妨可以去行返轉。
我們洞內照相館（鐘路）
相信唔使小編多講，大家都知道韓國好出名影平靚正嘅證件相。清溪川附近就有一間「我們洞內照相館」，係一間喺弘大同釜山都有分店嘅高人氣影相舖。如果大家想喺韓國影返張好睇但又唔貴嘅證件相，小編誠意推薦大家嚟呢度！
Green韓語學院
學一個語言最好就當然係喺當地學啦！鐘路區近清溪川有一間「Green韓語學院」，提供各種課程俾外國人參加。想講好啲韓文，沉浸喺呢個講韓文嘅環境當中，不妨報名參加。
世宗人參、興遠人蔘
韓國人蔘係其中一個韓國人引以爲傲嘅藥材，好多遊客會慕名而來，專程嚟韓國買人蔘。清溪川附近都有好多賣人蔘嘅舖頭，我哋同其中兩間，分別係「世宗人參」 同「興遠人蔘」都有做合作，大家可以用更加平嘅價錢買到優質嘅人蔘返香港，孝敬屋企人。
清溪川附近餐廳
首爾元祖辣燉安康魚
大家可以喺呢度食到傳統韓國口味嘅辣燉安康魚同辣燉海鮮，而且所有Menu嘅辣度都可以調整，所以食唔到辣嘅朋友都唔需要擔心。係我哋會員嘅話仲可以有9折優惠！
東大門精肉食堂
嚟到韓國點可以唔食返餐韓式燒肉啊！如果沿住清溪川行到去東大門區附近嘅話，小編推薦大家去「東大門精肉食堂」食餐又平又好食嘅燒肉，一定可以令你哋嘅旅程更滿足。呢度仲要係24小時營業，想幾時去食都得！
聖經餃子料理專門店
想食傳統韓國餃子，大家可以去聖經餃子料理專門店。呢度嘅餃子係每日新鮮包，每隻都好大，餡料又夠多，仲有唔同口味任君選擇。去之前記住領取我哋會員專屬嘅9折coupon啊！
橋村炸雞（東大門分店）
夜晚喺清溪川散完步想食宵夜，但又唔知有咩好食？不如就好似韓國人咁食炸雞配啤酒啦！橋村炸雞係最受遊客歡迎嘅韓國炸雞之一，喺清溪川附近都有分店，攞埋下面張coupon仲可以免費得到一份薯角，唔好錯過啦！
聲牛生拌牛肉
韓國人去廣藏市場一定會食生牛肉，想入鄉隨俗嘅朋友可以去市場入面嘅「聲牛生拌牛肉」，挑戰吓自己嘅味蕾。呢度嘅招牌係生拌牛肉同活章魚，出示我哋嘅Coupon仲會有9折優惠，一場嚟到當然要試曬韓國嘅特色美食啦！
鼎點1968
嚟到韓國食厭韓國菜，又掛住香港嘢食？大家可以去位於鐘路嘅鼎點1968食返餐港式點心，味道同香港幾乎一模一樣。出示以下coupon仲會得到9折優惠，唔洗怕喺外國食香港嘢會好貴。
清溪川附近Cafe
Luft Coffee
Luft Coffee位於仁寺洞同鐘閣附近，甜品同麵包都非常出名。喺清溪川行到攰，或者想趁機行埋仁寺洞嘅朋友不妨喺度坐低飲杯咖啡稍作休息。如果係我哋會員，出示以下coupon會有九折優惠。
J. Hidden House
J. Hidden House係一間位於東大門市場同DDP附近嘅韓屋cafe，環境優美。大家可以試吓呢度嘅招牌花生Cream Latte同蔓越莓Cream Latte，記住去之前領取以下coupon，享受9折優惠。
清溪川前往方法
喺市廳站4號出口出。
一直向前行7分鐘。
見到呢個海螺型雕塑之後轉左，就會去到清溪廣場㗎啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
