東大門美食總整理
東大門冇好嘢食? 小編整理好16間！Shopping大出血嘅同時都唔好餓親自己啊！
Hello，大家好，我哋係由韓國人每日提供最新韓國旅行資訊嘅Creatrip。
講到東大門，大家可能只會諗到批發，不過喺度買完嘢，口痕會唔會想搵啲餐廳食飯呢？今日小編就整理咗好幾間，希望可以幫到大家啦！
1. 陳玉華奶奶元祖一隻雞（진옥화 할매 원조 닭한마리）
講到東大門一隻雞，最多人識嘅一定係陳玉華，就算平時唔係食飯時間，長期都係超多人，有時唔好彩，仲要等超過30分鐘以上。
陳玉華一隻雞喺1978年開張，佢可以話係同東大門市場一齊發展，咁多年嚟一直屹立不倒，而且直到今時今日仲係超有人氣。
雖然睇落好清淡，但食完會覺得超補氣！鍋入面除咗一隻雞之外，大家仲可以加自己鍾意嘅配菜落去一齊煮，例如有年糕、薯仔、刀削麵等，食完一定會超滿足！
陳玉華奶奶元祖一隻雞（진옥화 할매 원조 닭한마리）
- 地址：서울 종로구 종로 40가길 18
- 營業時間：10:30 - 01:00（Last Order 23:30 ）
- 價格：一隻雞（닭한마리）₩25,000
2. 鬼怪銅盤烤肉（도깨비 불고기）
鬼怪烤肉係一間喺韓國唔常見嘅24小時烤牛肉餐廳，佢哋嘅烤牛肉係加咗湯、粉絲同大蔥一齊上檯煮。
韓綜《劉QUIZ ON THE BLOCK》之前都有嚟過食，劉大神都認證過嘅餐廳，大家又會唔會想去試吓呢？
呢度除咗有烤牛肉之外，仲有1人份排骨湯、辣牛肉湯、部隊鍋、大醬湯等，就算自己一個去食都冇問題。
烤肉上面擺滿蔥同粉絲，湯底仲要甜甜地，真係超好味！
鬼怪銅盤烤肉（도깨비 불고기）
- 地址：서울 중구 을지로 43길 38
- 營業時間：24小時
- 價格：烤牛肉（깨비불고기）₩17,000
3. 昌信洞辣味豬腳（창신동 매운 족발）
東大門有條好出名嘅豬腳街，昌信洞辣味豬腳係東大門一帶歷史最悠久嘅鋪頭，成日見到好多人都喺呢度排隊買。
一去到鋪頭前面，就會見到有個超大嘅桶，入面裝滿晒滷豬腳，佢哋會先將豬腳燒一次，搽辣醬，再重新燒一次入味，淨係睇到煮嘅過程，就已經流晒口水啦！
呢度嘅豬腳辣得嚟超惹味，如果太怕辣，可以叫碗飯中和返！
昌信洞辣味豬腳（창신동 매운 족발）
- 地址：서울 종로구 창신동 종로51길 23
- 營業時間：10:30 - 00:00、逢星期一休息
- 辣味豬腳 大份（매운 미니족발(대)）₩30,000
4. 東大門精肉食堂（동대문 정육 식당）
嚟韓國旅行又點可以唔食燒肉呢？不過咁多間唔知去邊好？小編推薦大家可以嚟東大門精肉食堂！
精肉食堂有賣各種豬肉同牛肉部位，價錢仲要一啲都唔貴！24小時營業，凌晨行完批發市場，想搵間餐廳都可以去食！
只要透過我哋預約，仲可以有優惠添！有準備中文版/英文版/日文版Menu，同時職員仲識講中文，完全唔需要擔心溝通嘅問題。
東大門精肉食堂（동대문 정육 식당）
- 地址：서울 종로구 종로 46길 7
- 營業時間：星期一、星期三至日 24小時；星期二00:00 - 03:00
- 價格：牛肉VIP（小/450g）（소고기 VIP 소 (450g)）₩95,000
5. 橋村炸雞東大門1號店（교촌치킨）
韓國咁多間炸雞店，講到必食嘅絕對唔可以唔提橋村炸雞！
東大門橋村炸雞店內部超大，而且擺放得好整齊，甚至有好多大窗，可以望到出面街景。
半半炸雞（原味＋辣味）係最多人叫嘅Menu之一！原味用咗特製醬油去整，辣味加咗大蒜同蜂蜜，超惹味！保證大家一試愛上！
橋村炸雞東大門1號店（교촌치킨）
- 地址：서울 종로구 종로 294 2F
- 營業時間：24小時
- 價格：半半炸雞（반반오리지널）₩17,000
6. Special Duck（별난 오리）
鴨肉可以話係繼雞肉之後，韓國人最鍾意食嘅料理之一，因為鴨肉含有大量蛋白質同不飽和脂肪，減肥一樣食得！不過鴨肉好容易有腥味，如果要搵間滿意嘅餐廳，可以去東大門經營咗17年以上嘅Special Duck！
呢間餐廳仲要得到穆斯林友善認證，好受韓國人同外國人歡迎，只要一到夜晚就超多人去食，經過都要排隊，如果唔想等建議大家早啲去！
呢度除咗可以食辣鴨肉湯，同時仲可以食煙燻鴨肉，配上多款小菜一齊食，超滿足！
Special Duck（별난 오리）
- 地址：서울 종로구 종로 46길 12 2F
- 營業時間：平日 11:00 - 23:00、星期六 11:00 - 22:00、逢星期一休息
- 價格：半隻烤鴨+半隻鴨湯（오리구이반마리+별난오리탕반마리）₩34,000
7. 東廟24小時薯仔排骨湯（조마루 뼈다귀）
東廟24小時薯仔排骨湯係一間具有歷史同傳統嘅當地美食。
餐廳內部好多位，所以唔需要等，韓國人前一晚如果飲太多酒，都會食熱辣辣嘅湯去解酒。
湯唔會太辣，加上肉超嫩，配飯一流！最後仲可以追加炒飯，吸曬湯汁炒出嚟嘅炒飯真係天堂嘅味道！
東廟24小時薯仔排骨湯（조마루 뼈다귀）
- 地址：서울 종로구 난계로 29길 37
- 營業時間：24小時
- 價格：薯仔排骨湯大（감자탕 대） ₩40,000、中（중）₩35,000、 小（소）₩30,000
8. 五花肉大總統DDP店（대통령 삼겹살 DDP점）
五花肉大總統有好多間分店，佢最特別係將五花肉擺喺潭陽出產嘅竹入面，咁做除咗肉會散發出淡淡嘅竹香，同時仲會吸走唔少油，食落會更加健康。
5點左右去到人唔會好多，但只要6點後去就會超多人，不過好彩呢度多位，唔需要等太耐。
食肉嘅時候，大家可以先點鹽食，之後再試吓點黃豆粉，兩款口味都好唔錯！最後一定唔少得加多一碗水冷麵！
五花肉大總統DDP店（대통령 삼겹살 DDP점）
- 地址：서울 중구 장충단로 249-24
- 營業時間：11:30 - 23:00
- 價格：五花肉（구이삼겹살）₩16,000、冷麵（냉면）₩7,000
9. 全州食堂烤魚店（전주집）
東大門市場美食街入面，全州食堂烤魚店最出名，由入口已經聞到超香烤魚味！之前曾經喺韓綜《Live Info Show》出現過7次，可想而知呢度超受歡迎！
呢度將啲魚烤到外脆內軟，唔會太鹹，佢好味嘅秘訣係將啲魚一直翻嚟翻去，同時會將魚中間剪開，咁樣會更加入味。
呢度仲有鹹黃魚乾、鮪魚、青花魚同秋刀魚等， 配埋佢哋嘅小菜一齊食，食完超滿足！
全州食堂烤魚店（전주집）
- 地址：서울 종로구 종로 40가길 5
- 營業時間：05:30 - 21:00、Last Order 20:00、逢星期日休息
- 價格：烤青花魚（고등어구이）₩10,000、烤鮁魚（삼치구이）₩11,000
10. 永順家豬腸（영순이네 곱창）
呢度職員相當親切，到呢一刻小編印象都仲超深刻！而韓綜《您盡管問》喺2019年都有嚟過取景！
雖然鋪頭睇落好細間，但只要一到夜晚就超多人嚟食！
小編當時只係叫2人份，但份量相當多！一開始仲會送蒸雞蛋（之後加要 ₩3,000），食到最後當然唔少得嘅就係加多個炒飯啦！
永順家豬腸（영순이네 곱창）
- 地址：서울특별시 종로구 창신2길 3
- 營業時間：13:00 - 01:00、逢星期日休息
- 價格：蔬菜烤腸（야채곱창）₩10,000、鹽烤腸（막창소금구이） ₩13,000
11. 順美家幸福的醬蟹（순미네 행복게장）
嚟韓國又點可以唔食醬油蟹？不過平時覺得太貴，可以嚟順美家幸福的醬蟹食放題，1人都只係₩30,000！
呢度好多位，大家唔需要擔心等好耐，同時醬料最特別係冇用任何味精同人工調味料，而係用咗韓藥同各種蔬菜、水果製成。
呢度唔單止可以食醬油蟹、調味辣蟹，同時仲有醬蝦、炸青蟹、烤鹽蝦、蒸雞蛋、白飯等，同時仲會提供一罐飲品！
順美家幸福的醬蟹（순미네 행복게장）
- 地址：서울 중구 을지로43길 38
- 營業時間：10:00 - 22:00（Last Order 21:00）
- 價格：醬蟹放題（게장 무한리필） 1人 ₩30,000
12. MIES Container東大門店（미즈컨테이너 동대문점）
MIES Container係一間融合咗美式風格嘅餐廳。
呢度更加係一個滿足視覺同聽覺嘅空間，同時食物仲超好味！
小編叫咗呢度嘅兩個主打，食完唔會後悔，推薦大家兩款都要試！
MIES Container東大門店（미즈컨테이너 동대문점）
- 地址：서울 중구 장충단로 13길 20 B1
- 營業時間：10:30 - 21:30（Last Order 20:30）
- 價格：煙肉薯仔芝士Pizza（베이컨포테이토 팬치즈）₩16,500、沙律意粉（샐러드 파스타） ₩15,500
13. 東大門可麗餅爺爺（크레페 할아버지）
東大門可麗餅爺爺喺東大門歷史文化公園站13號出口後面擺檔，只要一到開門時間，就會超多人排隊，材料一賣哂就會閂門。
爺爺唔單止好nice，每一個可麗餅都超多餡料，所以一直以嚟都好受歡迎。
不過提提大家，呢度只接受現金，唔可以用卡俾錢㗎！
東大門可麗餅爺爺（크레페 할아버지）
- 位置：東大門歷史文化公園站13號出口後面
- 營業時間：13:00 - 17:00（材料賣哂會提早閂門）
- 價格：士多啤梨香蕉（딸기 바나나） ₩4,000、士多啤梨忌廉（딸기 생크림） ₩4,500
14. 東大門綜合市場美食街（동대문 종합시장 먹거리 장터）
東大門綜合市場隔離有一條小巷，呢度有賣各種街頭小食，例如辣炒年糕、章魚燒、串燒等，如果再行前啲仲會有一條小巷會賣果汁。
小編特別推薦大家食蔬菜麵包，又甜又爽口嘅沙律，配上香脆麵包、火腿、番茄醬同芥末，呢個組合真係冇得頂！
如果大家唔想食太飽，只係口痕想食啲小食，好推薦大家可以嚟！
東大門綜合市場美食街（동대문 종합시장 먹거리 장터）
- 地址：서울 종로구 종로 5.6가동 종로 248
- 營業時間：平日 10:30 - 22:00、星期六 11:00 - 23:00、星期日13:00 - 22:00
- 價格：回憶蔬菜包（추억의 야채빵） ₩2,500、米飯煎餅（밥플&야끼）₩4,000
15. 瑞山醬油蟹（서산간장게장）
「瑞山醬油蟹」上過好多韓國電視節目，特別係見到MAMAMOO華莎食得咁滋味，真係流曬口水！
真係每隻蟹都勁多蟹膏，睇落勁新鮮，終於知道點解呢度會咁出名啦！呢度嘅醬油蟹完全唔會腥，而且亦都唔會太鹹，一咬落去鮮甜嘅蟹肉就會咇曬出嚟，超正！
瑞山醬油蟹（서산간장게장）
- 地址：서울 동대문구 장한로24길 7
- 營業時間：24小時
16. 明洞一隻雞（명동닭한마리 거성점）
「明洞一隻雞（巨成店）」位於東大門一隻雞一條街，呢度本身就好出名，仲曾經上過兩次電視，一直都有好多人會慕名而來，而且聽老闆講呢度特別多日本遊客嚟食！
呢度最特別嘅係有埋雞腎，好少一隻雞餐廳會有呢個配料揀！食之前整好點雞肉食嘅醬汁，開始滾之後就可以落年糕同雞腎，邊滾邊食，最後再落埋麵，超滿足！
明洞一隻雞（명동닭한마리 거성점）
- 地址：서울 종로구 종로 252-9
- 營業時間：10:00 - 23:00
大家下次去東大門就有更加多餐廳選擇啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk