Hello，大家好，我哋係由韓國人每日提供最新韓國旅行資訊嘅Creatrip。
嚟韓國留學當然唔可以只係死讀書，有時都需要去見識吓，今日就等小編教大家點樣可以喺韓國生活嘅時候玩盡佢啦！
點樣可以喺留學生活玩盡佢？
레포츠（Leisure Sports）
韓國有個concept叫「레포츠」，係「레저」（休閒）同「스포츠」(運動)嘅合成詞，指嘅係喺閒餘時間去做運動或睇比賽，而喺韓國最有代表性嘅運動就有以下呢4個：
1. 職業棒球
4月到10月係韓國職業棒球賽季，首爾嘅蠶室同木洞、大邱、光州、釜山、大田、仁川等地區都有舉辦比賽。韓國有成10隊球隊，呢段期間只要一到週末，無論男女老幼都會去睇棒球比賽。
門票價錢大約由₩8,000至₩60,000不等，唔同嘅棒球場同座位收費都有唔同，有興趣嘅朋友可以參考各球隊嘅官方網站。另外韓國嘅球場係可以一邊睇比賽一邊食炸雞同飲酒，氣氛超正！
2. 職業足球
韓國足球賽季由3月持續到11月，目前韓國每年有12隊球隊爭奪冠軍，另外仲有舉辦國內外球星參加K聯賽全明星賽、慈善賽、主場比賽等各種足球賽事。入場費係₩14,000至₩40,000，詳情可以參考韓國足協網站。
3. 職業籃球
職業籃球係最受歡迎嘅冬季室內運動，由10月開始去到3月都係賽季。韓國男子籃球隊有10隊，女子有6隊，喺職業賽季期間仲會舉辦各種fans meeting，入場費約係₩11,000至₩72,000。
4. 職業排球
職業排球同籃球一樣，係韓國最有代表性嘅冬季室內運動之一，賽季由11月持續到出年4月。排球亦都係奧運會最受歡迎項目之一，選手嘅殺球同扣球技術真係會令人超投入，跟住一齊緊張啊！韓國男子排球球隊有7隊，而女子就有6隊，通常一場比賽嘅入場費係₩10,000至₩20,000。
各種文化活動體驗
1. 睇電影
韓國戲院主要有CGV、Lotte Cinema同MEGABOX，喺全國各地都可以輕鬆搵到。一張戲飛價錢由₩10,000至₩15,000不等，去睇戲當然唔少得要買埋爆谷同熱狗等小食，一邊食一邊睇啦！
2. 睇話劇或表演
大學路（惠化洞）可以話係韓國戲劇表演嘅中心地，呢度可以欣賞到各種話劇、音樂劇、歌劇等表演。如果識聽50%以上韓文都好推薦大家去睇一次！
3. 去博物館/美術館
韓國嘅博物館同美術館遍佈全國，非常多元化，大家可以根據個人興趣去揀自己鐘意嘅主題去參觀。門票價錢都相差幾遠吓，建議大家去之前要先check吓。
4. 睇展覽
韓國定期都會舉辦各種展覽，好多時都會喺The Hyundai、63大廈等多個地方舉行，唔少年輕一代都會去影相打卡，up上Instagram。
只要喺Instagram打전시회（展覽）就會出現各種相關資訊，通常一張門票係₩10,000， 都好值得去睇一次。
5. 去主題公園
韓國因為地方大，好多地區都有主題公園，喺首爾就已經有樂天世界、愛寶樂園、首爾樂園等。特別係著校服去主題公園已經成為一種流行，附近就有唔少租借店，同我哋合作緊嘅江南校服同梨花校服都有優惠，有興趣嘅朋友都可以睇吓！
6. 去汗蒸幕
汗蒸幕應該都係唔少人嚟韓國旅行都會去體驗，基本上入到去會有分熱蒸房、黃土桑拿房、鹽房等，唔單止可以美容，同時對緩解壓力同控制體重都好有效。而且大家去到仲會用毛巾包羊咩咩頭同食雞蛋/飲米水。唔同地區嘅入場費都有唔同，通常由￦10,000至18,000不等。
購物
1. 去傳統市場
首爾以外嘅小城市每隔3至5日就會舉辦一次市集，呢段期間去可以買到當地特產，仲可以睇到同體驗到各種文化活動，加上傳統美食又平又好食，值得去一次！
2. 去shopping
大家應該都知韓國係一個購物天堂，有時平到￦5,000就可以買到一件衫，嚟到真係要小心荷包！
做運動
1. 攀石
近年嚟多咗唔少年青人鍾意玩攀石，因為除咗可以鍛煉身體之外，仲可以識到唔少朋友。
2. 團體運動
可能因為疫情影響，由嗰時開始就多咗人鍾意做運動，特別係Pilates、泰拳、Crossfit等等嘅團體運動真係超受歡迎！大家一起互相鼓勵，除咗可以更加有動力堅持落去，仲可以識到新朋友仔添！
3. 行山
大家可能會覺得行山好辛苦，但係其實每爬完一座山都好有成功感！加上韓國人好鍾意行完山之後去食蔥餅同飲米酒，有啲人甚至會帶紫菜包飯上山頂食，真係一大享受！
4. 去投幣K房
喺韓國去唱投幣K房真係好平，有啲地方仲可以俾你揀唱時間/幾多首，唔單止有韓文歌，仲有中文歌、英文歌、越南文歌等可以唱添！
5. 去玩密室逃脫
密室逃脫呢個活動啱曬學緊韓文同識講韓文嘅你！韓國所有密室逃脫有分超多唔同主題，同韓國朋友一齊去玩唔單止可以訓練韓文，同時仲可以大家一齊合作。
喺韓國留學同生活真係好多嘢玩，如果鍾意夜生活嘅朋友仲可以同韓國人一齊去飲酒，以上嘅活動絕對可以令你留學生活過得精彩同難忘。
參考資料：한국유학종합시스템
以上係「點樣可以喺留學生活玩盡佢？」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
