恩平韓屋村Cafe「一人一杯」介紹
可以同時睇到恩平韓屋村同北漢山全景！韓屋村Cafe「一人一杯」你又去過未？
Hello，大家好，我哋係由韓國人每日提供最新韓國旅行資訊嘅Creatrip。
相信大部份朋友嚟韓國玩都會宮殿或者韓屋村參觀韓屋，小編個人都超鍾意韓屋俾人嗰種平靜嘅感覺。所以今日小編就諗住介紹一間最近好hit嘅韓屋Cafe俾大家，除咗可以俯瞰韓屋村之外，仲可以睇到北漢山山景！一齊跟小編去返轉啦！
恩平韓屋村Cafe「一人一杯」資訊
- 地址：서울 은평구 연서로 534
- 營業時間：
1、2、3、6樓 | 10:00 - 21:00 （Last order 20:30） |
4、5樓 | 11:00 - 20:00 （Last order 19:00） |
*逢星期一休息（如果星期一係公眾假期，將會照常營業）
- 價錢：₩5,500起
恩平韓屋村Cafe「一人一杯」介紹
恩平韓屋村位於首爾恩平區，因為距離首爾市中心比較遠，而且附近就係北漢山，所以呢度俾人感覺零舍古老同幽靜，嚟到就好似入咗韓國古裝劇入面咁~（聽講好多遊客都覺得呢度靚過北村韓屋村..！）
如果大家有機會嚟恩平韓屋村玩，咁就一定要去埋今日小編要介紹嘅Cafe——「一人一杯」啦！
Cafe「一人一杯」連埋天台總共有6層，入面有超多位，而且每一層都裝修得好靚。
去之前大家當然要先知道每一層有啲咩啦！
- B1/F：傢俬陳列室
- 1/F ~ 2/F：Cafe「一人一杯」（喺counter叫完嘢飲之後職員會直接攞去你個位度）
- 3/F：傢俬售賣處、Cafe「一人一杯」（坐3樓嘅話要喺1樓叫完嘢飲之後自己攞上去）[No Kids Zone]
- 4/F ~ 5/F：餐廳 + Cafe「一人一杯」（飲品、甜品或者嘢食需要一set咁叫，可以直接喺嗰層落單）[No Kids Zone]
- 天台：天空花園（要喺1樓叫完嘢飲之後自己攞上去，如果係喺4/5樓叫set，職員會幫你攞上去）[No Kids Zone]
1樓有點餐區，另外都有幾個位可以坐，不過為咗睇景，大部分人都唔會坐呢層。叫嘢飲嘅時候職員會問你坐邊層，如果你係坐1樓或者2樓，飲品會用玻璃杯上；如果你係坐3樓或以上，飲品會用膠杯上。
呢度嘅嘢食同嘢飲唔算太貴，大部分都係₩5,500~₩8,000左右。呢度嘅甜品睇落都超吸引~
嚟到Cafe 2樓，大家可以睇到裝修非常簡約，整體都係以木調為主，同外面韓屋村嘅景色都相當和諧。小編當日大概中午時候到，都已經坐滿唔少人。
如果要坐2樓，小編推薦大家坐窗邊位，可以一邊飲嘢，一邊欣賞韓屋村同遠處北漢山嘅景色，超寫意~
而且仲可以影到靚相添！
嚟到Cafe 3樓，淨係睇呢度大家可能會覺得冇咩特別，但係再行入少少...
就會見到「一人一杯」最受歡迎嘅影相位！呢層裝修比起下面兩層更加有韓屋嘅感覺，睇IG都會見到有超多韓國人喺呢層打卡影相~
小編同朋友好好彩咁可以坐到窗邊位，藍天白雲加上古老嘅韓屋村同壯觀嘅北漢山，真係點影都咁好睇！
嚟到Cafe就當然要試埋呢度嘅嘢飲啦！小編同朋友分別叫咗百香果梳打（Passion Fruit Ade）同五味子茶（Omija Tea）。
百香果梳打（Passion Fruit Ade）₩7,000
呢杯飲品顔色好靚，上面仲擺咗一朵紫色花做點綴~味道酸酸甜甜，啱曬喺恩平韓屋村玩咗一日之後需要解渴嘅朋友們！
五味子茶（Omija Tea）₩7,000
五味子茶係韓國傳統飲品之一，酸酸甜甜，後面亦都會有少少回甘，而且仲對健康好好，可以淨化體內毒素同消除疲勞！唔想去親Cafe都淨係飲咖啡嘅話可以叫呢款嚟飲~
4樓嘅裝修更加有韓國傳統氣息，大部分嘅位都需要坐地下，大家可以直接喺呢層叫嘢食或者飲品+甜品set。
呢層亦都有呢種類似包廂咁嘅4人座位，中間會用簾隔開，私隱度高！
而呢度就係全個4樓最受歡迎嘅位啦！可以喺高處俯瞰韓屋村同睇到北漢山全景，真係超正超relax~
每層裝修都會有少少唔同，不過都一樣咁靚咁有feel！
5樓仲有戶外座位同一間獨立韓屋仔，入面大概有3張檯，都幾搶手吓。
呢個位夠曬光猛，而且景色都靚，可以話係全間Cafe最啱打卡影相嘅地方之一！
最後去到天台，呢度雖然風景真係好靚，但係位唔太多，而且如果冬天嚟應該會好凍，所以建議大家可以淨係上嚟影幾張相就落返去坐~
總括而言，「一人一杯」飲品價錢唔貴，景色又夠靚，氣氛都好好，係小編會想帶朋友再嚟多次嘅地方！嘆完咖啡之後仲可以去附近恩平韓屋村行吓，欣賞韓國傳統建築同氣氛~
喺恩平韓屋村大家仲可以租單車，附近仲有今年新開嘅「Starbucks THE北漢山」，踩單車嘅話10分鐘就到！
恩平韓屋村Cafe「一人一杯」前往方法
喺Hana高中·三千寺·津寬寺入口站（하나고.삼천사.진관사입구）落車，然後向車尾方向行。
喺第一個轉彎位就會見到「一人一杯」！
以上係恩平韓屋村Cafe「一人一杯」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com