韓國「NO XX ZONE」現象

Hello，大家好，我哋係由韓國人每日提供最新韓國旅行資訊嘅Creatrip。

大家有冇試過去一啲餐廳或cafe嘅時候，被拒絕入去呢？ 韓國有一啲稱為「NO XX ZONE」 ，限制某啲條件嘅人出入。 不過呢個做法一直都被爭論，今日等小編詳細介紹一吓韓國有邊啲「NO XX ZONE」啦！

韓國 「NO XX ZONE」 現象

「NO XX ZONE」嘅意思

顧名思義，「NO XX ZONE」係限制特定羣體出入嘅空間，主要係餐廳、cafe會咁要求，佢哋會喺舖頭門口前面貼住相關嘅告示。

NEWS1

NO XX ZONE係由2014年左右開始有嘅，呢種限制當然冇法律效力，但因為店主拒絕某啲條件嘅人入場，咁佢哋就唔可以用嗰度嘅設施、服務，所以到而家仍然有好多爭論，有人贊成，亦有人反對！

「NO XX ZONE」 種類

NO KIDS ZONE

주간현대

NO KIDS ZONE係禁止未滿13歲兒童出入嘅空間，係「NO XX ZONE」中最早出現，最廣泛嘅概念。 呢度指嘅唔係酒吧或娛樂場所等法律上禁止兒童出入嘅地方，而係一般嘅餐廳、cafe、電影院等地方拒絕兒童出入。唔只喺弘大、江南等首爾嘅熱門景點，濟州、釜山等人氣旅遊勝地都隨處可見。

일요서울

NO KIDS ZONE 第一次出現，同受到關注嘅原因係2012年發生嘅事。有一位媽媽喺網上抱怨話自己個小朋友被個女仔整瀉嘅熱湯焫傷塊臉，令到嗰個女仔受到網友強烈嘅指責。

동아 DB

但係公開咗CCTV之後，情況就開始逆轉。原來係個細路喺餐廳周圍走，撞到個女仔，先會整瀉啲湯。小朋友喺公共場所跑來跑去，搞到其他人，但父母又唔阻止，反而因為小朋友受傷而調返轉頭鬧對方，公佈事實之後，大家都好驚訝！

上面嘅事件之後，不斷陸續出現啲父母唔制上自己小朋友喺公共場所大叫、亂跑、自己小朋友整爛嘢又唔負責任、喺cafe當眾換尿片等等，帶俾其他人麻煩，甚至如果發生意外，舖頭又要負責任，所以出現咗NO KIDS ZONE，唔少人都贊成。

但亦有人主張，NO KIDS ZONE會令歧視同厭惡小朋友嘅情況更嚴重，佢哋小朋友太細個，咁樣控制佢哋係唔合理，每個人都經歷過童年，喺佢哋成長嘅過程，好需要社會嘅關懷。

NO YOUTH ZONE

「NO YOUTH ZONE」係禁止比小朋友年紀大啲嘅中學生出入嘅地方。 上圖就係釜山某間cafe掛住「NO YOUTH ZONE」嘅指示，寫住：「最近，附近嘅中學生嚟到舖頭，唔單只對住職員（連有禮貌咁叫佢哋唔好都唔理）吸煙、吐口水落地下等無禮嘅行為，仲講粗口鬧職員。 為咗保持店內舒適嘅環境，拒絕中學生入嚟舖頭」

익스트림무비

一啲處於青少年時期嘅學生，鍾意連群結隊咁一齊做啲過份越軌行為，好似會霸枱、鬧事，或者喺舖頭附近禁煙區度吸煙等等，影響到好多人，所以舖頭方面決定禁止佢哋出入，唔賺佢哋錢。

贊成嘅人覺得不良學生唔守規距，理應要禁止出入，呢個係店主嘅權利，亦都係保障其他正常顧客嘅權益。

相反亦都有人認為，因為一部份嘅不良學生，而所有青少年都被禁止出入係歧視，唔應該一竹篙揇沉一船人，而且作為大人應該會係引導佢哋行返正路。

NO STUDY ZONE

식품외식경영

NO STUDY ZONE係為咗防止啲學生留喺cafe度讀書嘅做法。 喺韓國，喺cafe度買完咖啡或甜品之後喺度溫書嘅人叫做「cafe溫書族」（韓文簡稱為「카공족」）。 佢哋鍾意喺公開、帶少少雜音嘅地方度讀書，所以揀嚟cafe。 而且，大部分韓國cafe都咗插頭同速度好快嘅wifi，好方便學習。 大學附近，或者公務員考試學院附近嘅大型cafe都有好多「cafe溫書族」，所以嗰度好多cafe都會設計成適合讀書嘅環境，保持著安靜嘅氣氛。

之但係一般嘅cafe，尤其係個人經營嘅小店，或喺旅遊熱點，遊客比較多嘅cafe，一般都唔歡迎「cafe溫書族」。一般嘅客人叫完嘢食、嘢飲，食完就會走，但係「cafe溫書族」就會長時間霸住咗個位。叫一杯平平哋嘢飲，坐2-3個鐘，甚至全日喺度溫書嘅話，其他客人又嚟唔到，會好影響cafe做嘅生意。

另外，一啲「cafe溫書族」更加會叫其他一般嘅客人靜啲，影響到佢溫書，所以其他客人覺得要睇佢哋眼色，或者會同店主抗議，所以佢哋贊成有NO STUDY ZONE。

相反，「cafe溫書族」覺得自己係堂堂正正咁俾咗錢嚟用呢度嘅空間，一律禁止晒出入係唔合理。雖然有啲「cafe溫書族」係會影響其他客人，但其實好多都會知道自己會坐好耐，所以過一陣會再買第二杯嘢飲，或者係專搵一啲已經有讀書氣氛嘅cafe。

NO TUBER ZONE

上面告示寫住「禁止喺餐廳入面進行拍攝YouTuber/BJ等個人節目，對嚟食飯嘅普通客人越嚟越唔方便，所以禁止喺餐廳內拍攝個人影片。」好似咁唔俾拍攝自己影片嘅YouTuber同實時直播嘅BJ出入嘅地方叫做「NO TUBER ZONE」。 Youtuber同BJ拍攝舖頭，喺網上發佈嘅話，照計會有宣傳效果，有更多人嚟，咁點解會有舖頭禁止呢？

大多數NO TUBER ZONE 嘅舖頭都係好出名嘅地方，如果去拍片，一定程度上保證咗瀏覽量，所以好多YouTuber同BJ都會去呢啲舖頭度拍攝。 問題係一啲YouTubers同BJ喺未經許可嘅情況下拍片，影響舖頭嘅客人同店員，佢哋唔單只因為拍片/直播時製造噪音，打搞人哋安靜食飯嘅時間，仲成日會未經許可就拍廚房或者其他客人，仲有一啲YouTuber以宣傳為藉口要求免費用餐。

세계일보

為咗自己嘅點擊率同利益而令經營舖頭嘅老闆、店員帶嚟損失，又影響普通客人，所以好多人都歡迎NO TUBER ZONE。 之不過有啲Youtuber認為，俾影食物相upload去SNS，但禁止拍攝更受歡迎嘅影片，好矛盾。 另外有指，認真拍片，唔影響其他人嘅Youtuber都一律被禁係唔公平嘅做法。

NO BELIEVER ZONE

뉴시스

NO BELIEVER ZONE係舊年COVID-19而出現嘅新 NO XX ZONE。 舊年COVID-19喺韓國2-3月同8-9都發生過大流行，兩次大流行嘅共同點都以宗教集團，第一次係喺韓國嘅異端新天地教會，第二次係新教會。當時全國民衆都盡最大努力遵守防疫守則，但相關教會嘅教徒就唔遵守，去大型禮拜同舉行集會，冇配合政府嘅調查，導致當時疫情擴散得非常嚴重。

뉴스핌, 오마이뉴스

所以舊年，韓國嘅異端同基督新教嘅形象跌落谷底，因為佢哋嘅自私，令所有人遭受巨大損失，而且無視防疫守則，一直出席教會嘅人用同一個空間，可能會感染病毒嘅不安感亦擴散開來，因此教會附近嘅餐廳都禁止出入教會嘅人。

贊成 NO XX ZONE 嘅立場

1. 商家嘅自由

贊成NO XX ZONE嘅人認為，舖頭嘅運營方針係經營舖頭嘅人嘅自由，好似上面提到嘅NO KIDS ZONE、NO YOUTH ZONE、NO STUDY ZONE、NO TUBER ZONE、NO BELIEVER ZONE等特定羣體好明顯會造成損失，為解決呢啲問題，老闆有權安排處理。

另外，韓國憲法第15條保障咗包括選擇職業在內嘅營業自由，經營者設立NO XX ZONE係佢哋嘅選擇，其他人唔可以反對。

2. 顧客嘅權利

2019年市場調查專門企業embrain trend monitor以全國1000名成年人為對象進行有關「NO KIDS ZONE」嘅問卷調查時，10個人當中有6個人（66.1%）贊成NO KIDS ZONE，其中75.3%嘅人（可以重複回答）指「作為客人，有權唔要受到不便或損害」。

唔單只NO KIDS ZONE，上面介紹過咁多個NO XX ZONE嘅例子中可以睇到，除咗老闆，連普通顧客都會覺得唔方便。如果冇其他有效嘅方法，為咗保障普通顧客，禁止佢哋係正確嘅做法。

3. 擴大消費者嘅選擇

有人認為多咗NO XX ZONE係擴大消費者選擇自由嘅方法。 例如，鍾意氣氛熱鬧cafe嘅人可以揀NO STUDY ZONE嘅cafe，喜歡安靜cafe嘅人可以去無設NO STUDY ZONE嘅cafe。或者按自己嘅安全考慮，揀去一啲NO BELIEVER ZONE嘅餐廳。

反對 NO XX ZONE 嘅立場

1. 歧視某特定羣體

反對呢種NO XX ZONE嘅人認為呢種做法會加深歧視。 2017年，韓國國家人權委員會指出，NO KIDS ZONE係冇合理理由而針對年齡嘅歧視行為。營業嘅自由應該得到保障，但要排除特定羣體時，應該要有適當嘅理由。

뉴시스

以禁煙區為例，禁菸區係為咗其他市民健康而設立嘅禁止「吸煙行為」空間。如果因爲係禁煙區，而禁止吸煙者入場，或者一般認為成年男性吸煙嘅機率高，而禁止成年男性出入，咁係咪一個正當嘅做法呢？

好似咁屬於嗰個羣體嘅人咩都冇做到，但一律被禁止使用服務，係一種歧視。

2. 加深對特定羣體嘅厭惡感

如果NO XX ZONE好似而家咁喺社會持續擴散嘅話，對特定羣體嘅印象就會固定落嚟，但事實上並唔係所有嘅小朋友都會喺公共場所大聲呼喊，唔係所有嘅中學生都冇禮貌，唔係所有嘅宗教人士都缺乏市民意識。 專家表示，好似NO XX ZONE一樣，每當出現某種社會矛盾時，唔係解決嗰個問題，而係一刀切咁將佢哋排除在外，只會令社會某啲羣體嘅矛盾越嚟越嚴重。

대구신문

因為上面提及嘅原因，最近一啲餐廳用「NO BAD PARENTS ZONE」來代替「NO KIDS ZONE」。NO BAD PARENTS ZONE係拒絕一啲唔教自己小朋友禮貌同顧及他人嘅父母。呢個表達比NO KIDS ZONE更好，一方面冇歧視所有小朋友，另一方面認同咗小朋友喺成長過程中係會可能犯錯，強調錯誤唔係喺小朋友身上，而喺唔加以教導同控制嘅父母身上。

今日小編同大家介紹咗最近韓國NO XX ZONE嘅文化，小編認為呢個做法原意係好，短期內亦見到效果，不過長遠嚟講，社會嘅分歧可能會越嚟越嚴重。大家對NO XX ZONE有咩睇法呢？歡迎留言分享！

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購