首爾「Starbucks THE 北漢山」介紹
韓國2023全新開幕Starbucks！北漢山無敵山景配限定Menu真係超嘆！
Hello，大家好，我哋係由韓國人每日提供最新韓國旅行資訊嘅Creatrip。
講起韓國，當然唔少得靚靚Cafe啦！特別係韓國人咁鍾意飲咖啡，真係行兩步路就會見到一間Cafe，而且連Starbucks都有好多特別分店~ 今日小編就去咗今年新開嘅「Starbucks THE北漢山」，到底點解最近咁多韓國人都會嚟呢度打卡？想知道就一齊睇落去啦！
首爾「Starbucks THE北漢山」資訊
- 地址：서울특별시 은평구 대서문길 24-11
- 營業時間：07:00 - 22:00
首爾「Starbucks THE 北漢山」介紹
睇到「Starbucks THE 北漢山」呢個名就知道，呢間Starbucks分店開喺北漢山附近，所以可以睇到超靚山景！呢度總共有三層，最頂層更加係一個rooftop，總共有253個座位，規模非常大。
小編個人認為呢度最靚嘅位係天台！上到嚟可以睇到180度無敵山景，唔少人都會以呢個咁壯觀嘅山景做背景影相打卡~
不過唔好話喎，近呢幾年韓國Starbucks真係開咗好多間特色分店，例如係位於北漢江附近嘅「THE北漢江 Reserve分店」同位於京畿道嘅「楊平Drive-Thru店」，全部都係以自然景色為背景，強調咖啡唔單止係嘢飲咁簡單，而係一個體驗，希望可以為忙碌嘅都市人留低一個療癒嘅回憶。
所以小編喺Instagram見到Starbucks喺北漢山開新分店嘅時候，真係超想親自嚟一次！不過坦白講，其實呢度位置比較偏僻（喺京畿道同首爾邊界），大家plan行程嘅時候可能比較難可以加到呢個地方落去><不過交通都算方便，所以有興趣嘅朋友不妨可以去睇吓！
一行入去就會見到賣週邊商品嘅area，有啲更加係呢間分店嘅限定商品！最特別嘅係可能因為呢度鄰近幾個露營場，所以比起其他分店會有更加多同露營相關嘅商品。
一樓都有幾多位，不過如果想睇靚景，建議大家上2樓同3樓！
行入啲就會見到收銀台，就咁睇好似同普通Starbucks差唔多，不過...
行到最入大家可以見到一個超大嘅麵包同甜品陳列櫃，平時喺Starbucks邊有咁多花款啊！更加有幾款嘢食係「Starbucks THE 北漢山」限定，例如係「蘋果批配有機雪糕」同「意大利軟芝士忌廉酥皮包」。
呢度更加有幾款Brunch可以揀，小編同朋友就叫咗Brioche Brunch Set，另外再叫多咗個意大利軟芝士忌廉酥皮包。
二樓嘅位大部分都係面對北漢山嘅，小編當時係朝早去，加上天氣好好，陽光超靚！加上呢度用咗唔少植物裝飾，所以令成間鋪頭好有融入大自然嘅感覺。
如果唔想正對住陽光坐，2樓都仲有其他舒服嘅位~ 頭先提過呢度有253個位，聽落好似好多，但其實好快就滿！小編平日10點去都已經滿曬咁濟，唔好彩可能仲要等位。所以大家如果要嚟，記住預鬆少少時間啦！
上到天台可以360度咁睇到四周圍嘅景色，天氣再暖返啲嘅時候應該會超多人！
天台上面仲有一個打卡位，想影返幾張呃like相就一定要以北漢山做背景，同呢塊Starbucks牌匾合照啦！
嚟到Cafe當然要睇埋餐飲質素點啦！小編同朋友分別叫咗一杯期間限定嘅黑糖燕麥奶濃縮咖啡（₩6,400）同全韓國得5間分店有賣嘅艾草忌廉鮮奶咖啡（₩7,000）。
飲黑糖燕麥奶濃縮咖啡嘅時候，最出嘅反而係灑喺上面嘅肉桂粉味！之後就會飲到黑糖淡淡嘅甜味同咖啡嘅苦味，整體非常夾~
香港好少艾草味甜品，小編都係嚟到韓國先第一次接觸。呢款艾草忌廉鮮奶咖啡嘅艾草味都幾出，有人會覺得幾清新，但係唔鍾意呢陣味嘅人就會覺得係草青味，再加埋Creamy嘅忌廉同咖啡，非常有韓國特色。
除咗呢度個景，其實呢度嘅Brunch都係吸引小編嚟嘅原因。款款睇落都好正咁，不過最後小編揀咗Brioche Brunch Set，因為塊麵包實在係太吸引啦！楓糖味嘅甜麵包加上香腸同蔬菜，鹹鹹甜甜，真係好滿足~
一場嚟到當然要食埋呢度先有賣嘅限定甜品啦！呢個意大利軟芝士忌廉酥皮包超大個，酥皮包入面充滿住意大利軟芝士忌廉，聽落好似好漏，但係有酸甜嘅藍莓醬中和返，小編覺得值得一試！
雖然「Starbucks THE 北漢山」距離首爾市中心都幾遠，不過小編覺得為咗個景真係非常值得！如果大家都想嚟，建議大家可以直接留半日甚至一日喺呢度附近玩~如果鍾意做運動，大家可以去行山，北漢山登山徑入口就喺Cafe附近。或者可以好似小編同朋友咁踩10分鐘單車去恩平韓屋村玩！想知道有咩玩就撳埋下面條link睇啦！
首爾「Starbucks THE 北漢山」前往方法
地鐵3號線舊把撥站（구파발역）→ 巴士（34號/704號）
舊把撥站（구파발역）2號出口行出嚟，向出口反方向行。
行去上圖圈住嘅巴士站（舊把撥2號出口站）。
去到巴士站，搭34號或者704號巴士。
喺北漢山城入口站落車，向車頭方向行。（如果你會搭6號線，亦都可以喺延新川站（연신내역）落車之後轉704號巴士，喺同一個站落車。）
跟住條路靠右直行。
行大約5分鐘。
見到Starbuck指示牌之後轉右。
向前行，然後轉左過馬路。
前面就係「Starbucks THE 北漢山」啦！
以上係首爾「Starbucks THE 北漢山」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com