2024仁川機場美食總整理
2024年最新仁川機場美食總整理！上飛機之前梗係要食盡佢啦！
Hello，大家好，我哋係由韓國人每日提供最新韓國旅行資訊嘅Creatrip。
有時候航班時間好尷尬，或者預早咗去機場但又未食飯，但又唔知道機場有咩食？其實仁川機場由B1/F到4/F都有超多餐廳，無論係想食返餐正宗韓國菜，定係其他國家嘅美食，呢度都應有盡有！小編已經幫大家整理好曬，大家去機場之前記住save低呢篇blog啦！
仁川機場T1餐廳
1. CJ FOODWORLD
- 位置：B1/F中央
- 營業時間：06:30 - 21:30
想食平靚正嘅嘢食，就一定要去位於T1嘅Food court！呢度中、西、日、韓、泰式menu都有，而且有好多位，環境都非常乾淨，可以慢慢邊享受美食邊等飛機。
豬肉泡菜湯+鐵板煎蛋及午餐肉套餐（돼지고기 김치찌개+철판 계란 후라이&스팸세트）₩13,500
小編上次喺度食過呢個泡菜湯，入面勁足料，豬肉都好大嚿，湯本身會有少少偏酸，不過非常啱送飯。
肥牛辣海鮮麵+糖醋肉套餐（차돌 짬뽕+탕수육 세트）₩14,000
呢款辣海鮮麵除咗有海鮮，仲有肥牛片、韭菜同木耳，唔算太辣，而且份量都大，配埋糖醋肉一定夠飽！
肥牛辣拌冷麵+炸雞套餐（우삼겹 비빔국수+닭 강정 세트）₩13,500
想食啲冇咁heavy嘅嘢食嘅話，推薦呢款肥牛辣拌冷麵俾大家！甜甜辣辣好開胃，仲有好多青瓜同菜~ 跟餐仲會有一份炸雞，脆得嚟幾香口。
牛肉湯河+炸雞套餐（소고기 쌀국수+닭강정 세트）₩13,500
牛肉湯河就相對比較普通少少，而且牛肉有啲韌，小編個人唔太推薦。
2. Starbucks
- 位置：B1/F中央
- 營業時間：06:30 - 22:00
仁川機場T1嘅B1/F有一間「Starbucks」，大家可以把握最後買紀念杯嘅機會！（註：出境登機口都有Starbucks同其他Cafe）
3. A TWOSOME PLACE
- 位置：B1/F中央
- 營業時間：06:30 - 20:00
Starbucks隔離亦都有一間「TWOSOME PLACE」，食完飯仲有時間嘅可以喺度食個cake，嘆返杯咖啡。
4. 笑門（소문）
- 位置：4/F美食區西側
- 營業時間：07:00 - 22:00
田螺辣炒豬肉定食（우렁제육쌈정식）₩12,900
仁川機場T1 4樓都有一個美食區，呢度有好多韓式、日式同中式餐廳，仲可以俯瞰到機場內部添~
呢間「笑門（소문）」係韓式餐廳，除咗有常見嘅辣炒豬肉，仲有比較少見嘅田螺料理，唔會太辣，亦都非常有飽足感。
燉雞定食（찜닭정식）₩12,900
喺韓國食燉雞通常都係兩人份起跳，不過呢度係以定食形式賣，所以一個人都可以食到！入面有好多雞肉，鹹鹹甜甜咁勁啱送飯~
5. Pho bay
- 位置：4/F美食區西側
- 營業時間：07:00 - 21:00
6. Omuto tomato Dining
- 位置：4/F美食區西側
- 營業時間：07:00 - 20:00
7. 美好辣海鮮麵（메이하오짬뽕）
- 位置：4/F美食區西側
- 營業時間：11:00 - 21:00
8. 首爾（서울）
- 位置：4/F美食區東側
- 營業時間：06:00 - 21:00
仁川機場T2餐廳
1. 韓食美談街（한식미담길）
- 位置：B1/F
「韓食美談街」位於仁川機場T2嘅B1/F，意思係「充滿美食同故事嘅街道」。呢度賣嘅全部都西韓國菜，無論係校洞辣海鮮麵，定係北倉洞嫩豆腐，有超多韓國各地出名嘅美食都可以喺度搵到。
呢度所有餐牌都會有中文同英文，所以就算唔識韓文都唔需要擔心。大家仲可以用有外語功能嘅自助點餐機叫嘢食，叫完之後記住攞走震動鈴啊！
2. BR雪糕（31冰淇淋）
- 位置：B1/F中央
- 營業時間：09:00 - 21:00
3. PARIS BAGUETTE
- 位置：1/F中央
- 營業時間：06:00 - 20:00
仁川機場T2嘅1樓有PARIS BAGUETTE、Angel-in-us、Starbucks等等嘅Coffee shop，俾各位旅客喺出入韓國之前，可以食少少嘢休息吓。
4. Coffee@Works
- 位置：3/F中央
- 營業時間：06:00 - 21:00
仁川機場T2嘅3樓離境大堂就有呢間Coffee@Works，提供一個舒適嘅環境俾出差公幹或者需要做嘢嘅人工作。
5. FOOD STOP
- 位置：4/F中央
- 營業時間：06:00 - 20:30
仁川機場T2嘅4樓都有韓式、日式同越南餐廳，而FOOD STOP係一間賣蓋飯、豬扒飯同河粉嘅地方，大家可以喺度邊食飯邊欣賞T2嘅景色。
如果有更多想知嘅內容，都可以隨時留言或者dm話俾我哋知：）
Instagram：creatrip.hk