Hello，大家好，我哋係由韓國人每日提供最新韓國旅行資訊嘅Creatrip。

小法國村喺2008年開業，直到而家一直都係熱門旅遊景點之一，嚟到呢度好似去咗異國景點咁，今日就等小編為大家詳細介紹一吓呢度有咩咁特別啦！

加平「小法國村」簡介

• 地址：경기 가평군 청평면 호반로 1063
• 營業時間：09:00 - 18:00（最後入場時間 17:00）
• 目前夜晚未有開放，詳細營業時間請參考官網
• 關閉時間可能會因季節同天氣而有所變化。

入場券票價：

*意大利村就係喺小法國村隔離，喺2021年先開放。

• 所需時間：預計需2小時至3小時
• 注意事項：唔準帶寵物入場、禁止吸煙、免費泊車

加平「小法國村」介紹

小法國村位於加平，呢個地方以「鮮花」、「小王子」為主題去設計，等大家嚟到好似轉眼去咗法國咁。

由首爾去相當之方便，之前韓劇《來自星星的你》、《秘密花園》同韓綜《Runningman》都有嚟過取景。

小編揀咗平日去，不過當時都有唔少遊客喺度。 

而家售票處轉左去1號停車場附近，所以大家要沿着斜坡上去再行樓梯先會到。

不過喺度可以一次過買到先法國村同意大利村嘅入場券。

為咗方便起見，小編會建議大家喺售票處先拎地圖，行嘅時候唔會咁易蕩失路，不過當時只有韓文版本。

呢度有分兩個入口，左邊係去小法國村，右邊係去意大利村，如果大家有時間，推薦兩個地方都可以去。

小法國村入面有好多畫廊，每一間房都有唔同嘅故事，大家可以慢慢行深入了解。

1. 露天劇場（室外舞台）

地圖：11號前

露天劇場係一個戶外舞台，用嚟表演嘅地方，呢度可以話係小法國村嘅中間，可以先嚟呢度先影相，之後再去其他地區。

韓劇《來自星星的你》

如果你有煲開韓劇，應該都會發現之前《來自星星的你》有嚟過取景， 甚至仲有男女主角嘅人象牌喺度俾大家打卡。

韓綜《Running Man》

喺《Runningman》開拍初期都有嚟過，當時成員仲邀請埋遊客一齊唱歌跳舞，小編仲好記得係2PM做嘉賓添！ 場景相當有趣，令人好想join埋一份！ 

2. Antiques Flea Market ''Antika"

地圖：32號

呢個係受法國跳虱市場啟發嘅畫廊，入到去會發現有好黃金、陶瓷等。

牆上總會掛咗唔少令人印象深刻嘅藝術品，小編當日去仲見到有老師帶學生去上堂了解法國文化知識。

3. Maison de Marie

地圖：21號

入到去會發現好多藝術品同復古家具，甚至仲有啲著名藝術家嘅畫作，如果你係一位藝術愛好者，應該會幾鍾意呢個地方。

4. Traditional French House

地圖：29號

呢一間係模仿咗擁有200年歷史嘅法國屋。

木製家具、仿古磚同精美裝飾品，吸引唔少遊客嚟到打卡。

5. Beethoven Virus Filming Site

地圖：27號

呢到係2008年韓劇《貝多芬病毒》拍攝地，正因為當時拍完，多咗唔少人知小法國村呢個地方，入到去仲會見到唔少藝人嘅簽名。

除咗木櫈之外，呢度仲有幾張梳化，大家可以喺隔離嘅Cafe買完飲品之後上嚟休息同欣賞美景。

6. Amor Blue

地圖：22號

相信大家應該見過唔少次呢一幅牆嘅出現， 用咗唔同語言去表達我愛你，如果去到嘅朋友記住一定要影返幅啦！

7. Observatory 

地圖：23號

一直上樓梯嘅時候都覺得冇咩好睇，不過如果上到天台，望出去嘅景會係色彩繽紛嘅建築，喺度打卡一流！

8. "Bonjour" Walkway

地圖：24號

沿住呢條山徑下除咗可以親近大自然，仲可以欣賞清平湖嘅景色。

9. Fountain Square 

地圖：13號

呢度有一個迷你噴泉，附近有小食部同賣紀念品嘅攤位，當有陽光射落嚟嘅時候，真係好似置身喺一個法國小村莊咁。

隔離有一條樓梯，企喺度影返張相就啱啦！

10. Saint-Exupery Memorial Hall

地圖：10號

呢個係韓國安托萬·德·聖-修伯里組織設立嘅紀念室。

安托萬·德·聖-修伯里（1900-1944）係一位詩人同時係一位飛機師， 佢最具代表性作品就係《小王子》，嚟到可以彩到佢生平同成就記錄。

呢度可以睇到飛機模型同飛機師服裝。

11. Exhibition of Antique Porcelain

地圖：34號 

呢度係一個展示古董陶瓷嘅地方， 所有作品都做工精緻，令人忍唔住一直望落去。

小法國村體驗活動

*節目時間會貼喺每間屋前面
*小編當時去係6月份，如果想知時間表有冇轉，可以參考官網。
*表演係免費

1. Maison d'Orgel 

地圖：4號

• 八音盒表演
• 演出時間：11:00、13:00、 14:00、15:00、16:00、16:40
• 時長：15分鐘
• 費用：免費

講師會講解（韓文）每一個音樂盒嘅背後故事，同了解每一個音樂盒唔同嘅聲音，如果行到攰嚟坐低聽吓音樂真係幾唔錯，之前Mamamoo都有嚟過添！ 

2. Amphitheater

地圖：11號

• 一般表演
• 演出時間：11:40、13:30、15:30 
• 時長：15分鐘
• 費用：免費

喺呢度可以欣賞唔同表演，例如啞劇，不過主要以當日為主。

3. Théâtre de L'étoile

地圖：2號

由入口開始行就會發現右邊有一個劇院，呢度係講述歐洲童話木偶劇，不過因為疫情影響而家暫停開放。

4. STUDIO 

地圖：32號右邊

只要揀鍾意嘅相，謝謝呢度嘅技術，30秒就可以變成一幅畫。

不過如果想喺度晒相就需要另外俾錢，A4尺寸嘅相框價錢係₩60,000。

5. Petite Slow Mail Box

地圖：32號右邊

費用：寄明信片（韓國國內）₩1,000、（韓國國外）₩1,500

呢度有一個好特別嘅郵筒，佢會收集大家嘅信，每年12月底先會寄出，如果大家想買明信片可以喺小法國村嘅正門、後門，或者紀念品店都有得買。

6. The experience of a fairy tale dress 

地圖：6號

*正在準備中，將會喺2022年1月6號開始提供。

小編去嘅時候好可惜仲未可以借到法國中世紀嘅衫著，不過如果大家之後去應該就會有，到時千祈唔好錯過啦！

7. 集郵拎禮物

場內有唔少印仔，大家一開始可以喺售票處買一本集郵小冊子（₩500） ，之後集齊超過5個郵票，就可以換到一張明信片。

小編最後收到兩張明信片，只要去返售票處就可以換禮物！

小法國村紀念品店

1. 紀念品店

地圖：14號

小法國村入面紀念品唔多，唯一一間就係喺噴泉廣場附近。

呢度有賣明信片、公仔、鎖匙扣、筆記簿、筆等。

小法國村美食/咖啡廳

目前小法國村內部只有賣飲品、雪糕、棉花糖、零食...未有太多選擇。

1. Store

地圖：15號

有賣咖啡、茶等，價錢係₩4,000起。

同時仲有一間LePetit France賣糖，₩4,500/100g。

2. BAOBAB

地圖：33號

飲品₩4,500起、刨冰₩10,000起。

3. Café Fennec 

地圖：26號

呢間係小法國村入面最大嘅Cafe，有賣茶、咖啡、沙冰等各種飲品，價錢由₩4,000起，小食有賣窩夫，價錢係₩3,000起，大家可以揀坐喺出面，或者對面大樓2樓食。

小法國村附近美食

如果想要多啲選擇可以出到去先食，不過因為疫情影響，好多舖頭都暫停開放或者執笠。

1. CU便利店

• 地址：경기 가평군 청평면 호반로 1063
• 營業時間：N/A
• 小Tips：小法國村後門對面

2. Zephyr Coffee（제퍼커피 가평고성리점）

• 地址：경기 가평군 청평면 호반로 1066
• 營業時間：07:00 - 00:00（可能會有變動）
• 小Tips：小法國村後門對面； CU便利店隔離

賣各種茶類同咖啡，價錢係₩3,000起。

3. 33辣炒年糕 清平雪岳店（33떡볶이 청평설악점）

• 地址：경기 가평군 청평면 호반로 1067
• 營業時間：10:00 - 20:00
• 小Tips：小法國村後門

主要賣炒年糕、紫菜包飯、血腸等，價錢係₩5,000起。

4. emart 24

• 地址：경기 가평군 청평면 호반로 1067
• 營業時間：08:00 - 22:00
• 小Tips：小法國村後門

5. Olive（올리브）

• 地址：경기 가평군 청평면 호반로 1067 2F
• 營業時間：10:00 - 22:00（Last Order 21:00）
• 小Tips：emart 24上面

如果想食正餐可以嚟Olive呢度食pizza或者意粉，餐廳好大，有分室內同室外。

小編之前食過呢度嘅PiGorgonzola Pizza（₩22,000）同Carbonara（₩17,000），兩款都好好味！

小法國村酒店

小法國村有為想要喺呢度過夜嘅客人提供酒店服務，房間大細可以容納2至10人，適合小團體或家庭入住，客房以法式風格裝飾，簡約但設施齊全。

*標準 2 - 4 人

• 入住時間：14:00後
• 退房時間：11:00前
• 可以直接喺官網預約
• 注意事項：房價包括小法國入場券，如果要買埋意大利村會入場券會有優惠，房入面唔準煮飯同帶寵物。

點樣去加平「小法國村」？

加平循環巴士

循環巴士只要買一張車飛就可以喺一日去哂南怡島、小法國村、晨靜樹木園等主要旅遊景點。

循環巴士有分A Course同B Course，不過因為疫情影響，B Course目前暫停服務，A Course一日只係得兩架車營運中。

費用：成人₩8,000 / 青少年、小童、傷殘人士、軍人、老人家₩6,000、3歲以下免費。

詳情：可以參考官網

• 使用方法：上車嘅時候向司機買車飛（如果冇位要等下一架），之後會收到一張飛（如果要去其他地方全日都要keep住，之後每一次搭車嘅時候都要向司機出示。）
• 小Tips：大家只要認住粉紅色框標誌，喺前面等車就可以。

由首爾去小法國村

方法1：首爾→加平站→小法國

由清涼里/龍山站搭ITX去到加平站。

由加平站搭當地巴士或循環巴士去小法國村，大約需要20-24分鐘。

• 12號車運行時間：07:00-18:30、班次：130分鐘一班。
• 循環巴士A Course：首班車09:20，尾班車17:20、班次：2小時一班

或者由加平站搭的士去小法國村：大約₩19,400，坐25分鐘。

方法2：首爾→清平巴士站→小法國村

由高速巴士客運站搭巴士去清平巴士站

• 價錢：₩5,200
• 出車時間：06:45、09:15、11:40、13:15、14:15、15:20、16:25、18:10、20:50

由清平巴士站坐當地巴士或循環巴士去小法國村，大約需要20分鐘。

• 30-5號車運行時間：06:20 - 20:00、班次：130分鐘一班。
• 循環巴士A Course：首班車08:30，尾班車17:30、班次：2小時一班

或者由加平站搭的士去小法國村：大約₩18,000，坐24分鐘。

方法3：首爾→清平站→小法國村

由上鳳站搭地鐵去，或者由清涼里/龍山站搭ITX去到清平站。

由清平站搭循環A Course巴士去小法國村，大約需要25分鐘，首班車：8:25，尾班車19:25，2小時一班車。

或者由清平站搭的士去小法國村：大約₩18,400，25分鐘。

2. 由南怡島去小法國村

搭循環A Course巴士去小法國村，₩8,000， 坐大約25分鐘，首班車09:25，尾班車17:25，2小時一班車，或者搭的士₩28,500， 坐大37分鐘。

上車位置：Starbucks對面，認住粉紅色框標誌。

3. 由小法國村返首爾

方法1：小法國村→加平站→首爾

由小法國村搭循環A Course巴士去到加平站（₩8,000，大約30分鐘），首班車08:50，尾班車17:50，2小時一班，或搭的士（₩19,400，大約25分鐘）。

由加平站搭ITX去清涼里/龍山站。

方法2：小法國村→清平巴士站→首爾

由小法國村站搭的士（₩16,400，21分鐘）或坐當地巴士或循環巴士到清平日巴士站（終點站），大約需要20分鐘。

• 30-5號巴士：06:50 - 20:30、班次：130分鐘一班。
• 循環巴士A Course：首班車09:50，尾班車17:50、班次：2小時一班

由清平巴士站搭巴士到高速巴士客運站。

• 價錢：₩5,200
• 出車時間：07:25、09:20、09:50、10:50、12:50、13:50、15:50、18:00、21:10

方法3：小法國村→清平站→首爾

搭的士（₩16,900，22分鐘）或搭循環A Course巴士到清平站，約25分鐘，首班車 11:00，尾班車19:00，2小時一班車。

由清平站搭地鐵去上鳳站，或者由清平站搭ITX去到清涼里/龍山站。

以上係自由行嘅方式俾大家參考，有興趣嘅朋友都可以參考我哋嘅一日遊團：

• 南怡島+小法國村+意大利村（撳我）
• 南怡島+小法國村+意大利村+晨靜樹木園（撳我）
• 南怡島+小法國村+意大利村+鐵道單車（撳我）
• 南怡島 + 小法國村 + 意大利村 + 鐵路單車 + 晨靜樹木園一日遊（撳我）
• The Painters塗鴉秀 & 首爾近郊一日遊（南怡島、小法國村、意大利村）（撳我）
• 南怡島 + 翡翠花園 + 小法國村一日遊（撳我）

另外加平、春川仲有好多景點等住大家，例如：童話瑞士村、意大利村、Lego Land、晨靜樹木園、南怡島等，有興趣嘅朋友都可以去睇埋我哋嘅介紹。

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面 

 韓國代購