南怡島總整理

Hello，大家好，我哋係由韓國人每日提供最新韓國旅行資訊嘅Creatrip。

南怡島無論幾時去都係熱門景點，今日小編整理好關於南怡島嘅所有嘢，有咩值得睇、影、食都有，甚至連點去都有教學，如果之後有計劃去嘅朋友都可以參考吓，話唔定幫到大家唔少㗎！

Plan住去南怡島？

加平「南怡島」簡介

講到南怡島，除咗因為韓劇「冬季戀歌」而出名之外，呢度一年四季都有唔同氣氛，春天去可以賞櫻、夏天去可以同陽光玩遊戲、秋天去可以賞紅葉同銀杏、冬天去可以睇雪景，係唔少人嚟韓國必去旅遊景點之一！ 因為場內大，入去可以租單車走圍走，超寫意！甚至好多人都會連埋附近嘅小法國村、晨靜樹木園一齊去，小編最後仲會介紹一啲優惠Plan俾專屬會員，唔想錯過就要繼續睇埋落去啦！

• 地址：강원 춘천시 남산면 남이섬길 1
• 營業時間：星期日至四 08:00 - 21:00、星期五及六 08:00 - 21:30
• 所需時間：預計需4小時至8小時
• 入場券票價

  普通門票	￦16,000
  優惠門票（中學生、70歲以上長者）	￦13,000
  特別優惠門票 （36個月以上至小學、早鳥票 - 8點前入場、 12月至3月 18:01之後入場、4月至11月18:31之後入場）	￦10,000
  年票（無限入場）	一般顧客￦58,000 子女同伴顧客￦69,000 寵物同伴顧客￦59,000 70歲以上顧客￦49,000

  *入場券已經包埋來回船費及附加稅*
  *20人以上普通團體，可享總金額9折優惠*
  *旅行社/36個月以下幼兒由父母陪同入場免費*
  *幼稚園、小學、中學、福利設施團體（20人以上1人免費，每10個人追加1人免費）*

加平「南怡島」介紹

當初小編為咗避開多人時段，大約平日朝早8點15分左右去到，第一步要做嘅事就係買入場券。

不過唔知係唔係因為疫情影響，少外國遊客，當時去到售票處仲未有人。

如果要買入場券，需要用到無人機器，大家可以放心，機器有韓文/英文揀，步驟好簡單，只要揀想買邊款門票，再揀人頭數，之後俾錢就可以。

*提提大家，無人機器只收卡，如果要用現金可能需要問職員。*

如果用無人機器買完入場券，飛上面會有一個QR Code，入場之前掃一掃就OK！

掃完入去之後等上船就可以，以下係船隻運行時間表，大家可以參考一下：

船內部比想像中大，而且都有幾多位。

如果想睇景可以揀企出面，大約坐5-6分鐘，好快就會到。

雖然小編都算早去，不過都比想象中多人入去，加上呢到好大，到步之後小編會建議大家先直行去到服務中心。

南怡島官網

客服中心前面可以拎地圖（當時場內只有韓文/英文版），大家望住地圖跟住行，就唔使怕盪失路！

*網上有多個語言可以下載，如有需要可以參考官網（撳我）*

南怡島必去打卡位

因為南怡島太大，有成46萬平米，就算行足一日都未必行得哂，為咗可以慳時間，而家就等小編同大家介紹幾個必去打卡位啦！

1. 中央紅松路

呢個中央紅松路（波波燈路）可以話係南怡島嘅地標，就算冇去過嘅朋友，都會見過唔少人喺呢個位打卡！朝早同夜晚完全係唔同feel，夜晚會著黃燈，成個氣氛超浪漫！

2. NAMI ISLAND

想一眼知道呢個地方喺邊，最好就係去有地方名嘅位打卡，由入口開始行，唔需要行好耐，就會見到一個大公園。

Instagram：namiisland_naminara

呢度好闊落，同朋友坐喺度野餐，傾吓偈都幾寫意。 小編之前去亦都發現唔少韓國人會帶埋狗仔去，等狗仔都可以跑吓同放電。

3. 水杉路

呢個位同樣都係必去打卡位，如果有睇過《冬季戀歌》絕對會記得呢度，呢度春、夏季都係綠葉，去到秋季有楓葉，冬天落大雪，白濛濛一片相當靚。

大家之後會唔會都想變身男、女主角嚟一場浪漫散步之旅呢？

4. 松坡銀杏路

因為小編去嘅時候係春天，銀杏通常會喺秋天先有，請原諒小編影唔到俾大家睇

不過小編都搵到之前喺同一個地方有影過，大家之後記住一定要喺呢個位打卡！話唔定可以影到人生照！

5. 百楓密苑

呢個地方好大，呢度種植咗好多唔同嘅楓葉，雖然小編係春天去，但仍然可以見到好靚嘅楓葉！如果喺日落嘅時候去，會更加靚！

喺度打卡，話唔定都會好似小編咁影到人生照㗎！

6. 鴕烏之家

嚟南怡島可能成日都會見到松鼠、兔仔走圍走，但大家係唔係冇諗過呢到有鴕鳥呢？

不過大家要小心唔好行得太近或者尖叫，影相都唔好用閃光燈，咁樣會嚇到佢哋，糧食工作人會俾，千祈唔好亂餵佢哋！

7. 南怡島潭三峰

丹陽出名嶋潭三峰，喺南怡島都有一個縮細版，呢到有一條橋，喺度打卡都幾唔錯㗎！

8. 冬季戀歌各地標

以前因為韓劇《冬季戀歌》，而令到南怡島呢個地方更多人熟悉，場內有唔少劇照同打卡位，唔知大家之後又會唔會搵得哂呢？

因為南怡島地圖大，但圖睇落複雜，如果睇唔明，都可以跟住場內指示路牌行，有寫上簡單韓文、英文/中文，慢慢跟住行就可以啦！

南怡島體驗活動

1. 租單車/電動單車

可能大家都會諗，而家韓國周圍地方都有得租單車，點解入到南怡島都要踩？原因係南怡島太大，踩住單車周圍去會方便好多！加上除咗單人，仲有雙人同家庭用，費用如下：

*每日最後租借時間都會唔一樣，請去到現場再留意。*

租電動滑板單車

同單車唔同，呢個係企喺度玩，加上有電，玩嘅時候相對冇咁辛苦。

*每日最後租借時間都會唔一樣，請留意。*

2. 租天空單車

如果覺得普通單車太簡單，咁不如就試吓租天空單車啦！可以喺高空望住南怡島周圍，有風吹過嘅時候，超舒服！

以下係一次嘅費用：

3. 坐共享列車

中央站

呢個共享列車有分兩站，大家可以喺南怡碼頭站或者中央站上車，由10:00開始喺南怡碼頭站出發，大約20分鐘一班，36個月以上統一價格，單程₩3,000坐8分鐘，坐住佢可以睇住南怡島風景，慳返唔少腳骨力㗎！不過小編當日冇見到佢嘅蹤影，如果有需要坐嘅朋友，可以先問客服中心或者打電話去031-581-0143。

4. 坐故事之旅巴士

南怡島官網

一架車大約係可以坐20人，費用係￦7,000，36個月以上統一價格，司機會邊揸車邊講解南怡島嘅一切，好多平時唔會經過嘅地點，都會一次過去哂！

4. 冒險中心

如果係鍾意挑戰刺激嘅朋友，呢度有滑索、木隧道、鞦韆等各種遊戲，適合一家大細嚟玩，不過當時小編去到4月暫時停運，只係得TreeCoaster喺週末同公眾假期有開，如果之後有更新小編會再Update！

5. 摩托艇南怡島壹遊

坐住水艇要遊南怡島一周，最多可以坐五個人，可能因為小編太早去到，當日仲未開，如果之後去到想玩，可以打電話去010-4324-3525問。

南怡島美食/咖啡廳

南怡島有好多美食同Cafe，大家唔需要太擔心，韓式、西式、小食等通通都有！

1. Sonata Café

營業時間：09:00 - 18:00

去南怡島必食嘅一定係糖餅！可能大家之前去都會發現每個人手上都會拎住一個，甜甜地嘅內餡，配上出面酥脆嘅外皮，令人一試愛上！糖餅一個￦1,500、加雪糕就￦3,500。

2. Chicken Skewer

營業時間：N/A

呢間係專賣一啲小食，當中佢哋特別推薦食雞肉串￦3,500同牛油燒粟米￦3,500！

3. Pizza & Pasta

營業時間：N/A

如果想食正餐可以試食佢哋嘅Pizza，睇落都幾唔錯！食物價錢大約平均係￦18,000起，啤酒￦7,000起。

4. SEOM HYAN GGI

營業時間：10:30 - 19:30

唔想食西餐，可以食韓式，呢間SEOM HYAN GGI都有好多嘢可以揀，就連春川炒辣雞（2人份￦28,000）都有。

5. 南門

營業時間：09:40 - 19:30

呢間係專食海鮮蔥餅（￦16,000）同飲米酒（￦5,000），未試過嘅朋友，可以喺度試吓！

6. NAMI SAUSAGE

營業時間：N/A

呢間專食燒香腸（￦4,000），行到攰口痕想少少嘢，都可以嚟呢一間！

7. Swing Café

營業時間：星期一至四 09:00 - 18:00、星期五至日 09:00 - 19:00

南怡島入面超多嘢食，最後小編揀咗去呢間Swing Café，佢有分戶外同戶內，空間大，天氣好坐出面嘆住杯飲品、吹吹風超寫意。小編叫嘅係桃茶（₩6,500）同抹茶鮮奶（₩6,000），味道都算唔錯，坐喺度休息一下最好不過！

南怡島其他便利設施

1. 租BB車

如果大家有帶BB去，呢度可以租BB車，費用係￦3,000， 24個月以下幼兒專用。

2. 免費租輪椅

3. 哺乳室

需要以上服務嘅朋友，可以去客服中心問詳細。

4. 洗手間

場內好多地方都有洗手間，如果人有三急都唔需要太擔心，因為總有一間喺你附近。

5. 超市

營業時間：N/A

一入到南怡島左邊就有一間超市，如果入面餐廳或者Cafe未開，大家都可以喺度買住啲零食食先。

6. 紀念品店

營業時間：N/A

南怡島入面都有紀念品店大家可以買，呢度嘅明信片一張大約₩1,000~₩3,000，大家會唔會想買返張送俾寫完寄俾朋友呢？

7. 儲物櫃

去旅行最緊要就係輕輕鬆鬆，如果帶太多嘢去，可以先擺嘢喺Locker，位置係喺超市隔離，細格一個係₩1,000（₩500X2）、大格係₩1,500（₩500X3）， 只可以俾現金，如果唔夠散銀都唔怕，租Locker空間有機器可以換。

8. 酒店

南怡島官網

大家係唔係估唔到南怡島有酒店呢？預約有2種方法，一個係打電話（031-580-8000），另一個係Naver網上預約（撳我）。

南怡島官網

呢度酒店有分3種（本館、別館、寵物同伴館）

費用以2人為基準：

*因為唔同日子去價錢都會唔一樣，詳情請參考官網*

另外一入去如果唔知點去酒店，可以坐船到步後往右邊行，就會見到呢一個接駁巴士站。

行完南怡島之後想出返去，大家可以喺入嚟嘅時候去返同一個入口走，計啱時間就可以上船啦！

之後小編想同大家介紹南怡島附近有啲咩設施同點樣去！

南怡島附近體驗活動

1. Zip Wire

可能大家都知如果要入南怡島，除咗可以搭船之外，其實仲可以玩空中飛索過去（只得去嘅時候，返出嚟時要搭船）。

• 地址：경기 가평군 가평읍 북한강변로 1024
• 營業時間：夏季09:00 - 18:00、冬季09:00 - 19:00（會因天氣而有調整）
• 費用：₩49,900（1人）
• 時間：每隔30分鐘一次（同一時間最多只可以得4個人體驗）
• 包括：空中飛索（單程）＋南怡島入場券＋南怡島船飛（單程）
• 所需時間：1分30秒，約940m、最高速度30～40km/h
• 限制：體重40kg ～ 120kg（體重限制可能會因天氣而有變，請以現場標準為主。）、身高140cm～200cm
• 預約方法：現場/網上預約（撳我）

注意事項：

• 限飲酒人士、孕婦及最近3個月內有做過身體手術、有疾病（發羊吊、高血壓或低血壓）冇得體驗。
• 如果未滿19歲，需由監護人簽名同意先可以體驗。
• 如果因為天氣（落雨、落雪、大風、閃電、故障等）影響，體驗將會延遲或取消，呢個情況吓會100%退款。
• 價錢係冇包個人保險。
• 搭嘅時候身上唔可以帶行李，因為喺天空以高速降下，建議唔好戴帽。

2. 加平Top Land

如果大家有留意韓流，應該都會發現唔少綜藝都有去玩過笨豬跳，如果你都想挑戰膽量，之後就可以嚟玩吓啦！

• 地址：경기도 가평군 가평읍 북한강변로 1044-15
• 營業時間：09:00 - 18:00（Lunch Time 11:00 - 12:00）
• 費用：現場 ₩40,000（1人）、網上預約 平日₩30,000（1人）/ 週末及公眾假期₩34,000（1人）（未包入場券）
• 限制：體重35kg ～ 100kg
• 預約方法：現場/網上預約（撳我）
• 只要到咗加平站/加平客運站打電話（ 001-4881-5510）俾加平Top Land，佢哋會有專車接送參加者。

注意事項：

• 每日09:00前接受當日預約，但只接受網站申請（撳我）。
• 如果天氣惡劣，將會暫停營運。
• 冇年齡限制，但考慮到安全問體，體重需35kg至100kg內。
• 限飲酒人士、有疾病等人士冇得體驗。
• 體驗當日及2日前冇得退款，之後唔同日子退款金額都會唔同，退款需要等1-3個工作天（撳我）。

3. 水上活動

除咗笨豬跳之外，喺加平Top Land仲有水上活動等住大家，男女老少都可以玩，絕對唔會無聊！

• 地址：경기도 가평군 가평읍 북한강변로 1044-15（加平Top Land同一地址）
  
• 營業時間：09:00 - 18:00
• 費用：水上活動有好多款，上圖係2022/4&5月限定優惠，目前官網一個水上項目係₩15,000～，想知道更多資訊，請參考官網。
• 預約方法：現場/網上預約（撳我）
• 只要到咗加平站/加平客運站打電話（ 001-4881-5510）俾加平Top Land，佢哋會有專車接送參加者。
• 注意事項：請以現場為主

4. 射擊

如果大家覺得跳笨豬跳同水上活動太刺激，咁不如就試玩射擊啦！

• 地址：경기도 가평군 가평읍 북한강변로 1044-15
  
• 營業時間：09:00 - 18:00
• 費用：₩4,000（12發）
• 備註：有需要可以直接問職員
  

南怡島附近美食/咖啡廳

1. Cafe/Mart/客服中心

營業時間：N/A

入去南怡島之前會有一間超大型超市連Cafe，如果入到去唔知邊到有超市，都可以喺度買定飲品或少少零食，咁就唔怕入到去冇嘢食啦！

2. Starbucks

營業時間：08:00 - 21:00

如果太早去到，仲未搭到船，附近就有一間Starbucks，有需要嘅朋友，都可以喺度買杯咖啡，嚟迎接一個Good Morning！

3. 炒辣雞一條街

講到春川一定係食炒辣雞！喺南怡島附近就有好幾十間辣炒雞店等住大家，唔食一定會後悔！

• 店名：Mr.炒辣雞（미스터닭갈비）
• 地址：경기 가평군 가평읍 북한강변로 1044-14
• 營業時間：09:00 - 21:00

喺咁多間炒辣雞鋪頭之中，小編最後決定去之前韓綜《歡迎，首次來韓國？》取景過嘅嗰一間，當時都有唔少人喺入面食緊，令到小編都幾期待！

室內夠闊，空間大，而且可以望到出現嘅海景，好治癮，另外一開始上嘅小菜如果覺得唔夠，大家亦可以去Self Bar度拎。

呢度嘅炒辣雞有兩種口味（調味/醬油）（₩14,000一人份），小編當日叫咗兩人份調味原味（可以再揀原味/辣味），整個過程職員都會幫手煮，大家只要等食就可以！原味唔會好辣，用菜包埋蔥一齊食超好味！如果怕辣嘅朋友，可以叫醬油味，大人同細路都啱食！

最後當然要嚟多個炒飯（ ₩3,000）啦！白飯加紫菜加麻油再撈埋啲炒辣雞汁，味道超香，雖然小編只係叫一人份， 但量都好多，兩個人食啱啱好！另外如果唔想淨炒飯，可以另外加芝士，變成芝士炒飯（₩6,000）*

點樣去加平「南怡島」？

南怡島位於京畿道加平、江原道春川交界，雖然行政區上屬於春川，但搭船位係喺加平，今日就等小編一次過教大家點樣去最方便啦！

方法一：

喺清涼里站搭ITX去到加平站（₩5,700），或者由龍山站搭ITX去（₩6,900）。

方法二：

如果覺得ITX啲時間唔太啱，都可以揀坐京春線直接到加平站，佢同ITX唔同係會站站停（即地鐵），假設同樣由清涼里（₩2,150）出發，就要坐大約1小時6分鐘~20分鐘左右（有車可以直去，但有時需要喺上鳳站轉車。*要睇時間表* ），龍山站（₩2,350）因為冇線直去，要先搭中央線去到上鳳站，之後再轉京春線到加平站，時間大約係1小時28~51分鐘左右。

雖然比ITX慢咗啲，不過有一個好處係唔需要另外買車飛，只要用Tmoney啪卡，就可以出/入閘。

以上兩種方法去到加平站，出到嚟之後就會見到的士站，直接同司機講去南怡島（남이섬），坐大約5分鐘就會去到，費用大約係₩5,000內。

如果唔搭的士，小編會推薦大家可以搭A Course循環巴士，只要買一張車飛就可以去哂以上咁多個景點，當中仲會經南怡島，上車位置係由加平火車站出到嚟之後，喺觀光案內（가평군관광안내소）前面。

• 班次：2小時一班
• 首班車：09:25 、尾班車：17:25
• 途經：加平客運站 - 加平Rail Park - 鱉島 - 加平站 - 南怡島 - 金代里會館 - 福長裏三岔路口 - 小法國村 - 虎鳴里 - 清平客運站 - 清平站 - 林草橋前 - 晨靜家族動物園 - 晨靜樹木園
• 費用：成人₩8,000 / 青少年、小童、傷殘人士、軍人、老人家₩6,000、3歲以下免費。
• 使用方法：上車嘅時候向司機買車飛（如果冇位要等下一架），之後會收到一張飛（如果要去其他地方全日都要keep住，之後每一次搭車嘅時候都要向司機出示。）
• 小Tips：大家只要認住粉紅色框標誌，喺前面等車就可以，目前因疫情影響，一日只得2架車會開。
• 詳情：請參考加平郡官網

方法三：

去親南怡島覺得成日要轉車太麻煩？其實我哋都有提供直達去南怡島嘅接駁巴士，大家可以揀喺弘大入口站、明洞站、東大門歷史文化公園站出發。

• 營運時間 : 週末及公眾假期
• 費用：大人/小童￦25,000、未滿36個月嬰兒免費，但唔會另外提供座位
• 車程：由東大門歷史文化公園站為基準去只需1小時30分鐘，到咗之後會布6個鐘俾大家自由時間。
• 詳情：撳我了解更多

點樣由南怡島返首爾？

方法一：

如果一開始喺加平站買咗車飛入去，由南怡島出到嚟搭船地方之後一直直行，就會見到A Course循環巴士站，大家只要對返時間，喺度搭車就可以出返去加平站，之後再搭ITX返首爾。

• 班次：2小時一班
• 首班車：09:15 、尾班車：18:05

方法二：

去巴士站前會先經過的士站，大家可以喺度搭的士去加平站，費用係￦3,800~￦4,500左右，坐大約5分鐘左右就會到，之後再搭ITX/地鐵返首爾。

南怡島Q&A

1Q. 點樣去南怡島係最快？

1A. 去南怡島有好多方法，不過小編最推薦都係喺龍山站/清涼里站搭ITX去到加平站，之後轉的士入去係最快，坐5分鐘內就去到，價錢都係￦5,000內，如果之後同朋友去，咁樣share都平啲！不過如果大家除咗去南怡島之外，仲會去附近地區，小編最推薦搭A Course循環巴士，一張車飛就可以去哂咁多個景點。加上而家疫情影響，循環巴士唔多，有興趣嘅朋友，都可以參加我哋提供嘅一日遊，最底有介紹！

2Q. 南怡島入面餐廳/Cafe/小食貴唔貴？

2A. 小編個人覺得唔算太貴，同出面市區食嘅差唔多，唔需要太擔心，不過難得去到，應該唔會介意好貴嘅。

3Q. 南怡島可唔可以行一日？

3A. 如果只係去打卡、食吓嘢、踩單車基本上4-5小時都可以完，但如果要去哂成個南怡島同慢慢行，通常都要用一日時間！

4Q. 幾時去係最靚？

4A. 其實南怡島一年四季都有唔同景色，如果只揀一個季節去真係有啲可惜。 不過如果要揀其中一個，小編個人會比較推薦冬天，落埋雪嘅話超有氣氛！大家都即刻可以成為《冬季戀歌》嘅男、女主角！

雖然南怡島只係一個島，但其實裡面都幾大，如果每個地方都要認真行嘅話，真係需要用唔少時間，以上係自由行嘅方式俾大家參考，有興趣嘅朋友都可以參考我哋嘅一日遊團：

• 南怡島+小法國村+意大利村（撳我）
• 南怡島+晨靜樹木園（撳我）
• 南怡島+小法國村+意大利村+晨靜樹木園（撳我）
• 南怡島+晨靜樹木園+鐵道單車（撳我）
• 南怡島+小法國村+意大利村+鐵道單車（撳我）
• 南怡島+雪嶽山（撳我）
• 南怡島 + 雪嶽山 + 晨靜樹木園一日遊（撳我）
• 高句麗鐵匠村、南怡島、小瑞士村、兩水里（撳我）
• 草泥馬樂園 + 南怡島一日遊（撳我）
• 草泥馬樂園 + 南怡島 + 鐵路單車一日遊（撳我）
• 草泥馬樂園 + 春川炒辣雞 + 鐵路單車 + 南怡島一日遊（撳我）
• 南怡島 + 小法國村 + 意大利村 + 鐵路單車 + 晨靜樹木園一日遊（撳我）
• LEGO LAND + 南怡島一日遊（撳我）
• The Painters塗鴉秀 & 首爾近郊一日遊（南怡島、小法國村、意大利村）（撳我）
• 南怡島 + 草泥馬樂園 + 晨靜樹木園一日遊（撳我）
• 南怡島 + 翡翠花園 + 小法國村一日遊（撳我）
• 南怡島 + 江村鐵路單車 + 小瑞士村一日遊（撳我）
• 南怡島 + 春川炒辣雞 + 大型汗蒸幕一日遊（撳我）

其他服務

• 南怡島官方接駁巴士（撳我）

另外加平、春川仲有好多景點等住大家，例如：小法國村、童話瑞士村、意大利村、Lego Land、晨靜樹木園等，有興趣嘅朋友都可以去睇埋我哋嘅介紹。

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購