加平「童話瑞士村」總整理

Hello，大家好，我哋係由韓國人話你知每日最新資訊嘅Creatrip。

可能好多人都聽過春川有一個小法國村，不過大家又知唔知附近其實仲有一個童話瑞士村呢？呢度色彩繽紛，有好多以瑞士做主題嘅博物館，之前《我們結婚了國際版》2PM澤演同台灣藝人鬼鬼、FTIsland洪基同日本藝人藤井美菜都有嚟過取景，如果想知道更多詳情，咁你就要繼續睇落去啦！

加平「童話瑞士村」簡介

童話瑞士村位於京畿道加平，呢度有好多唔同以瑞士為主題嘅展館，當中有芝士館、朱古力館等，雖然只係一個縮細版，但就做到好逼真，令人好似置身喺瑞士咁，如果大家之後都去加平附近，絕對係值得到此一遊嘅好地方。

• 地址：경기 가평군 설악면 다락재로 226-57
• 營業時間：平日 10:00 - 18:00、週末 09:00 - 18:00 （最後入場時間 17:00）
  *可能會因天氣而有變動*
• 入場券票價：成人（20歲以上） ₩8,000、青少年（中學生） ₩7,000、小童（36個月至13歲）₩5,000
• 所需時間：2小時至3小時
• 民宿：2021年8月關閉

加平「童話瑞士村」介紹

去到童話瑞士村，第一步當然就係買入場券，小編係平日去，唔算人多，所以唔需要排隊就已經可以買到飛。

買完入場券之後，會收到小冊子同一張地圖，小冊子入面有每一點景點嘅簡介，而地圖係俾大家跟住點行，不過小編有一個壞消息係，當日小編係4月27號去，但4月30號就會有7個新景點，好可惜冇得同大家逐一介紹 ，不過如果之後小編再去會同大家Update返！

一入到去大家會發現有兩條路，一條係往羊牧場，另外一條係往展覽館，雖然小冊子入面會建議大家先去羊牧場，不過以小編今次親自去過，發現由展覽開始行會方便少少，希望可以俾到大家一個參考。

如果由展覽區開始行，就會已經見到有一個超靚嘅打卡位，色彩繽紛嘅屋，令人好似短暫去咗一個童話世界咁。

第一個會去到嘅係Love Story展覽館（2樓係Wine Museum），令人會好期待入到去會聽到點樣嘅浪漫故事發生。

Love Story展覽館

入到去已經可以發現呢度有唔少打卡位，就連之前FTIsland洪基同日本藝人藤井美菜拍《我們結婚了國際版》嘅誓約書都喺度！

Wine Museum

每一個館入面會連埋另一展覽，大家唔好只係行完地下就唔上埋去睇啊！

上到去大家會發現呢度展示咗唔少美酒，同樣會有一個教大家點揀靚酒嘅牆，要點飲、飲咩酒就要用咩杯，呢度都有畫到出嚟，自認係酒鬼嘅你，大家飲嘅時候又會唔會咁講究呢？

第二個館係Swiss Story Hall同Cuckoo Clock。

Swiss Story Hall

Swiss Story Hall係一個可以俾大家更深入了解瑞士呢個地方，同時展示咗瑞士人以前嘅服飾。

Cuckoo Clock

大家應都知瑞士出名整鐘錶 ，呢到有展示瑞士代表「布穀鳥鐘」，以前呢啲鐘只要一到搭半/搭正，鐘上嘅小木門就會自動打開，布穀鳥就會出嚟發出「咕咕」叫聲，相當可愛！

之後係Cheese Story Hall同Heidi Library。

Cheese Story Hall

講到瑞士另一樣出名嘅，當然唔可以唔提芝士啦！雖然瑞士有好多款芝士，但要講到最有代表性，一定係上面有好多圓窿，儲存得越耐，個窿就會越大，味道都特別濃！

Heidi Library

上到Heidi Library，會發現呢度有好多關於飄零燕嘅故事書，除咗韓文版本之外，有好多美文版，大家可以喺度坐底慢慢欣賞。

喺芝士館正對面會有一個小花園，好適合喺度影返幾張相，大家如果行到攰，亦可以喺度稍作休息。

去到第四個館會係Chocolate Story Hall同Edelweiss Gallery。

Chocolate Story Hall

Edelweiss Gallery

瑞士本身都出名朱古力，本身小編都幾期待呢一個展覽館，可惜比想像中細，而且睇嘅嘢都唔算多，有少少失望。

之後順住行會去到第六個館係Message Tree Hall, Campfire Field同Santa Story Hall。

Message Tree Hall, Campfire Field

唔知咁多個節日之中，大家最鍾意邊一個呢？小編個人最鍾意嘅係聖誕節，除咗可以睇燈飾之外，仲可以同朋友一齊開Party，超有氣氛。

Santa Story Hall

韓劇《記憶復仇》

唔知喺度留Message卡，聖誕老人係唔係會幫大家完成心願呢？

另外之前韓劇記憶復仇都有喺度取景，唔知大家又有冇印象呢？

Heidi Bear館

最後一個係Heidi Bear館，入面好細，只係得一個打卡位，呢度有男、女熊仔頭盔各一 ，喺度同另一半影返輯相都幾唔錯㗎！

羊牧場入口

行哂咁多個館之後，繼續行就會見到去羊牧場入口。

提提大家：羊牧場只係會開放到16:40。

一入到去都未係羊牧場，會見到一個露天休息區同Cafe（之後會介紹），大家行到攰都可以喺度坐吓。

要去到羊牧場之前，喺休息區附近有一條瀡滑梯，大家要玩完之會去到！

落到去會見到一個細細地嘅湖，隔離有條樓梯行上去就係！

呢度嘅羊好乖，而且唔臭，大家只要拎住啲糧，佢哋好就會醒咁伸個頭出嚟等大家餵。

羊嘅糧食大家要喺附近買，只要用現金入₩1,000落個紅色筒入面，之後拎右邊一包糧，倒落個兜入面，將膠袋抌落左邊嘅垃圾筒度，咁就可以去餵㗎啦！大家亦都要記住餵完個兜要擺番原位，唔好亂咁抌啊！

除咗羊之外，呢度仲有兔仔同雞，不過佢哋就冇指定嘅糧食，千祈唔好亂咁餵，只係影吓相好啦！

附近有一個細細地嘅公園，如果係一家大細去，小朋友可以喺度玩，放吓電！

之後沿住繼續往上行會見到有雪橇場，不過因為小編係春天去到唔見有，可能要之後等冬天大家先可以嚟玩！

一開始講到4月30號會有多7個景點，當時小編去仲係工程當中 ，所以好多地方都影唔到俾大家睇。 之後小編再去話，一定會再更新俾大家！

加平「童話瑞士村」內有咩食？

當時小編去嘅時候，童話瑞士村內只係得一間Heidi Cafe（30號之後會有多一間戶外Cafe）。

天氣好嘅時候，小編推薦大家可以坐出面，背景有啲小動物模型，喺前面食住打返張卡，完全就好似去咗異國咁！

小編當日試咗佢哋嘅馬鈴薯餅（스위스 뢰스티）₩15,000、士多啤梨鮮奶（딸기라떼）₩7,000、綠茶鮮奶（녹차라떼）₩6,500，所有嘢都係即嘢即整，味道都唔錯，特別想推馬鈴薯餅，好脆同好香，配埋半熟煎蛋一齊食，好好味！

另外入口前面都有一間Blu Shaak coffee，價錢都唔算費，有興趣嘅朋友可以睇吓。

加平「童話瑞士村」其他活動

1. Yodel Song Performance（요들송 공연）

來源：童話瑞士村

Yodel Song係瑞士嘅一種流行山歌，呢個表演只有逢星期六、日先會舉行，一日會舉行兩次，如果之後係週末去，千祈唔好錯過！

• 第一次：12:30（30分鐘表演）
• 第二次：13:30（30分鐘表演）

*落雨嘅話可能會取消*

2. 陶藝體驗

來源：童話瑞士村

5月14號起逢星期六開始會有陶藝體驗。

• 時間：逢星期六 12:00 - 17:00
• 上課時間：1小時至1小時30分鐘
• 課程內容：1）釉燒陶瓷裝飾堂 ₩20,000 - ₩30,000（即日拎走）、2)素燒陶瓷繪畫班 ₩25,000 - ₩30,000（隔1至2個月後去拎/寄韓國國內地址*費用自付）、3）陶藝課₩35,000 - ₩40,000（隔1至2個月後去拎/寄韓國國內地址*費用自付）

2022年4月30號後將會開嘅新景點

1. 農民廚房（파머스 키친）

2. Heidi四季雪橇場（彩虹滑梯） 하이디 사계절 썰매장（레인보우 슬라이딩）

3. 樹林遊樂場（숲속 놀이터）

4. Heidi瀑布（하이디 폭포）

5. 地下彈跳床（언더 그라운드 트램폴린）

6. Heidi樹林公演&戶外婚禮場地（하이디 숲숙 공연장 & 야외 결혼식장）

7. 街頭露天Cafe（스트릿 야외 카페）

點樣去加平「童話瑞士村」？

方法一：

喺清涼里站搭ITX去到加平站（₩5,700），或者由龍山站搭ITX去（₩6,900）。

出到嚟見到巴士站搭12號巴士，喺雪嶽客運站（설악터미널）落車，再轉搭20-1巴士喺童話瑞士村（스위스마을）落車，之後行17分鐘就會到入口。

• 12號巴士運行時間：由加平客運站出發07:10 - 18:30、由雪嶽客運站出發07:50 - 19:10
• 12號巴士班次：130分鐘一班（一日9班）
• 20-1號巴士運行時間：由雪嶽客運站出發07:25 - 18:20、由永川里出發07:45 - 18:40
• 20-1號巴士班次：235分鐘一班（一日5班）
• 費用：一般（現金₩1,500、T-money ₩1,450） /青少年（現金₩1,100、T-money ₩1,010）/ 小童（現金₩800、T-money ₩730）

方法二：

喺加平站出嚟之後搭的士，大約坐35分鐘，費用係₩28,300。

方法三：

如果覺得的士太貴，可以搭B Course循環巴士，買一張車飛就全日去哂咁多個景點，不過唔係由加平站搭，而係由ITX清平站搭起，佢會經過好多主要旅遊景點，但因為疫情影響，而家暫停營運。

• 途經：Jat-Hyanggi Pureunsup Forest Recreation Park - 林草里 - 清平站 - 清平客運站 - 檜谷里 - 童話瑞士村 - The Stay Healing Park - 小法國村
• 費用：成人₩8,000 / 青少年、小童、傷殘人士、軍人、老人家₩6,000、3歲以下免費。

*如果之後有時間表會更新返*

方法四：

如果大家諗住由南怡島去童話瑞士村，小編建議可能會直接搭的士去會比較好，坐大約33分鐘，費用約₩26,800， 再唔係要坐返巴士去加平站，之後跟方法一步驟去。

點樣由加平「童話瑞士村」返首爾？

方法一：

喺童話瑞士村巴士站（스위스마을 정류장）搭20-1號巴士去雪嶽客運站（설악터미널） ，之後再轉搭12號巴士喺加平站巴士站（가평역 정류장）落車，之後再搭ITX返首爾。

方法二：

搭的士去到雪嶽客運站（설악터미널） ，之後搭8005號巴士直到清涼里。

• 途經：有明山 - 雪嶽 - 高速道路 - 樂天百貨店 - 石橋 - 校門十字路口 - 上鳳客運站 - 上鳳站 - 東部市場 - 中浪區 - 三育首爾醫院 - 時兆社三岔路口 - 現代Core百貨店 - 清涼里站換乘中心
• 班次：240分鐘一班（一日5班）
• 費用：一般（現金₩2,900、T-money ₩2,800） /青少年（現金₩2,000、T-money ₩1,960）/ 小童（現金₩2,000、T-money ₩1,960）
• 所需時間： 大約1小時間30分鐘

加平「童話瑞士村」Q&A

1Q. 有冇機動遊戲？

A：冇，不過場內有雪橇場、小型遊樂場，就算冇機動遊戲咁刺激，一樣都可以玩得好開心！

2Q. 之前睇《我們結婚了國際版》有住宿，而家仲有冇？

2A：好可惜由2021年8月起已經關閉咗，雖然冇得住，但喺童話瑞士村場內打卡一樣都好有氣氛！

3Q. 點Plan One Day Tour好？

3A：小編個人覺得如果之後疫情好返，可以跟住上面介紹嘅B Course咁玩會方便啲，因為如果去埋其他出名地方，例如：南怡島，搭巴士已經用咗好多時間，建議分兩日去會好啲，唔介意價錢貴可以搭的士。

4Q. 同小法國村有冇分別？

4A. 以小編個人會比較推薦小法國村，一來場內大啲，有多個劇場睇、餐廳選擇亦都多啲，打卡位絕對係更多！不過童話瑞士村好處係比較少人，唔需要同人逼，亦都可以同小動物互動，完全唔同氣氛。

5Q. 建議幾時去會比較好？

5A. 雖然平日人少啲，但如果想多啲嘢睇，會建議週末去，因為可以欣賞Yodel Song Performance同參加陶藝體驗。

6Q. 建議點樣搭去最方便？

6A. 如果係疫情前，小編會推薦大家搭B Course循環巴士，因為只要買一張車飛就可以去哂咁多個景點，相當方便！不過疫情期間，小編會建議大家搭的士....雖然費用會貴咗啲，但因為巴士班次唔多，而且要等太耐，坐的士輕輕鬆鬆就去到，係最好嘅方法！

以上係關於加平「童話瑞士村」嘅所有相關資訊，希望可以幫到大家，如果有任何疑問，歡迎大家留言話俾我哋知，我哋會盡力一一解答！

一日遊團：

• 高句麗鐵匠村、南怡島、小瑞士村、兩水里（撳我）

另外加平、春川仲有好多景點等住大家，例如：小法國村、南怡島、意大利村、 Lego Land、晨靜樹木園等，有興趣嘅朋友都可以去睇埋我哋嘅介紹。

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購