2022仁川醬油蟹推介
醬油蟹有「偷飯賊」之稱！仁川醬油蟹TOP 5 餐廳推薦！有一間就連劉大神都去過！
Hello，大家好，我哋係由韓國人每日提供最新韓國旅行資訊嘅Creatrip。
醬油蟹係好多人嚟旅行必美食之一，佢作為韓國五大名菜 ，富含高蛋白同維生素，對身體有好多益處，每一間鋪頭都會配上佢哋獨門醬汁，無論係韓國人定外國人都愛不釋「口」，今日小編就想同大家分享仁川一帶好幾間深受韓國人喜愛嘅醬油蟹名店，有興趣嘅朋友之後都可以去試吓！
仁川醬油蟹推介
1. 黃海醬蟹專賣店（황해게장전문점）
- 地址：인천 남동구 포구로 12
- 營業時間：10:00 - 21:00
位於仁川蘇萊浦口綜合魚市場附近嘅「黃海醬蟹專賣店」，係一間深受當地人歡迎嘅醬蟹名店，因為靠近海港，所以食材相當新鮮，店內牆上掛滿各大電視節目採訪，座位分成一般同坐地式，舊式裝修散發出復古氛圍。
醬油蟹定食（간장게장정식）一人₩35,000（2人份出餐）
套餐有調味醬油蟹、醬油蝦、鮑魚、海鮮清湯、煎餅及各式小菜，超豐盛！
「黃海醬蟹專賣店」嘅醬油蟹喺釀造醬油過程放入生薑、梨、蘋果同菇等材料，醃製2至3天，以去除螃蟹腥味，上面再加洋蔥同辣椒，望落去相當神鮮，加上份量多，食完超有飽肚感。
除咗醬油蟹之外，用紅辣椒粉同桑葉粉、豆瓣醬混合而成特殊調味醬油蟹都好受歡迎，甜甜辣辣，口感好爽。
每一隻肉質豐富、蟹膏夠多，全部都係老闆精挑細選出嚟，將蟹膏同白飯一齊撈埋嚟食，真係令人忍唔住食完一啖又一啖！另外套餐附贈嘅海鮮清湯裡面仲有一隻蟹，可以飲到海鮮甜味，當係解酒湯都相當唔錯！
2. 三代仁川醬蟹（삼대인천게장）
- 地址：인천 동구 금곡로81번길 22
- 營業時間：11:30 -20:30（Break Time 15:00 - 16:00、Last Order 20:00）、逢星期日休息
「三代仁川醬蟹」已經有60年歷史，不過唔好以為呢度好舊，入到去俾人一種好乾淨嘅感覺。
佢哋堅持選用優質延坪島青蟹同國產農產品而聞名，更獲得2021年韓國品牌喜好度評比中，醬油蟹部門中第一。
老闆以長時間釀造醬油醃製蟹醬去除腥味，加上因爲係低鹽蟹醬，客人可以健康享受美味佳餚。醬油口感鮮甜，唔少人會直接將佢撈飯食。
醬蟹定食（간장게장정식）₩25,000
一人份醬油蟹望落新鮮，醬油口味偏甜，每一啖都食到蟹膏，令人好滿足。
調味醬蟹定食（양념게장정식）₩25,000
雖然上面鋪滿辣醬，但其實口味偏甜辣，如果怕腥味嘅朋友，小編建議大家可以食調味醬蟹，味道比較冇咁重。
3. 明賢萬的延坪島醬蟹 黔丹店（명현만의 연평도간장게장 검단점）
- 地址：인천광역시 서구 완정로 172 2F
- 營業時間：11:00 - 22:00
「明賢萬的延坪島醬蟹」喺黔丹站1號出口對面，出到嚟就會見到。
內部夠闊落同乾淨，超多卡位，好有個人空間。
令人最貼心嘅係呢度仲有小朋友玩樂區，大人食飯同時，小朋友都可以玩得好開心。
自助區方面大家可以自己去拎小菜同海帶湯，隔離仲可以自己煎蛋食，超推大家加埋豉油一齊食！
國產延坪島花蟹定食（국내산 연평도 꽃게장 정식）₩21,900
呢度除咗可以散叫之外，仲有提供醬油蟹放題（白飯另計），1人只係需要₩25,900，就可以食到原味同調味醬油蟹，不過小編食唔到太多，只係叫咗醬蟹定食3隻（₩21,900），2隻係₩15,900。
3隻定食套餐包括2隻醬油蟹、1隻調味醬油蟹、2隻醬油蝦同蟹籽飯；如果怕太多可以只叫醬油蟹、調味醬油蟹各1套餐，裡面一樣有醬油蝦（只得一隻）同蟹籽飯。
延坪島係韓國相當出名青蟹產地，每隻青蟹肉餡飽滿鮮甜，同老闆特製醬汁一齊食超完美！
4. 黃金醬蟹 朱安店（황금게장 주안점）
- 地址：인천 미추홀구 석바위로 49
- 營業時間：星期二至日 11:30 - 20:30（Last Order 19:30）、逢星期一休息
「黃金醬蟹」係一間喺美食大賽中獲獎嘅醬油蟹餐廳。
雖然內部冇話好大，不過都有唔少人慕名而來，甚至好多人仲會叫外賣，或者係寄到屋企。
綜合定食（모둠장정식）₩33,000；醬蟹定食（암꽃게장정식）₩25,000
綜合定食裡面有醃製鮑魚、醬油蝦同醬油蟹、白飯，同時仲有12款小菜同海帶湯，份量多到小編一開始都有啲嚇親。
肥美飽滿蟹膏配上鹹鹹甜甜醬汁真係超合適，食落一啲都唔腥，有一種食完會想再食嘅衝動！
小編另外仲叫多咗個辣味醬油蟹（₩5,000），食落都好鮮甜。
除咗蝦油蟹之外，呢度仲可以食到醃鮑魚。
將醬油蟹同蟹膏內臟一齊撈住食真係冇得頂！不過如果怕味道有啲腥，可以好似小編一咁加啲紫菜喺面，又係另一種風味！
5. 十二籃 松島店（열두바구니 송도점）
- 地址：인천 연수구 신송로125번길 7 이리옴프라자 2층
- 營業時間：11:00 - 21:30、逢星期日休息
「十二籃松島店」係一間獲獎無數嘅醬油蟹餐廳，同時亦被政府認證，衛生方面大家完全唔需要擔心！呢度除咗醬油蟹出名之外，以傳統古法用100%純韓國大豆製成嘅清麴醬，一樣都有唔少人為咗佢而嚟。
店內採光好，除咗有一般坐位區之外，亦有傳統坐式座位同包廂可以揀，對於小團體客人想安安靜靜食返餐就最好不過。
牆上會見到有唔少藝人簽名，就連《無限挑戰》成員都有嚟過，被劉大神認證過嘅餐廳，係唔係更值得去試吓呢？
醬油花蟹兩人份（간장꽃게장）₩70,000
小編叫咗兩人份醬油花蟹，當中包括清麴醬同大醬湯，如果只叫一人份只係得大醬湯。
「十二籃松島店」嘅醬油係由30多種天然成分同藥材純釀造，鹹甜醬汁食落好清爽，搭上鮮嫩蟹肉更加係冇得彈！
清麴醬王牛肉餅（생청국장 왕떡갈비）₩13,000
清麴醬王年肉餅係小編第一次見嘅料理，雖然清麴醬味道聞落好重，但食落又OK！就算平時小編唔敢食清麴醬，試過之後都話正！
清麴醬王牛肉餅有一個特別食法係將年糕排骨、清麴醬、紫蘇葉、配上小菜包嚟食，如果大家都係鍾意食重口味，咁呢個絕對係值得一試！
平時嚟韓國都會去食醬油蟹，如果之後去開仁川，不妨可以參考吓以上幾間！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
