Hello，大家好，我哋係由韓國人每日提供最新韓國旅行資訊嘅Creatrip。  

「仁寺洞」係最受歡迎嘅首爾觀光景點之一，可以同時感受到韓國現代同傳統文化之餘，呢度有好多超有特色嘅鋪頭，淨係行街都可以行成日！今日小編就為大家整理咗仁寺洞嘅購物攻略，一齊睇落去啦！

 仁寺洞吃喝玩樂總攻略

仁寺洞購物總整理 | 商場、文化空間

1.  你好仁寺洞（안녕인사동）

• 地址：서울 종로구 인사동길 49
• 營業時間：10:00 - 22:00
• 小Tips：安國站（안국역）6號出口行4分鐘

「你好仁寺洞」係一個結合購物、娛樂同文化嘅複合文化空間，入面除咗有餐廳、Cafe之餘，仲會定期搞展覽，亦都當然唔少得充滿韓國特色嘅鋪頭啦！

小編今日為大家篩選咗幾間呢度值得一去嘅店鋪，去之前記住mark低啦！

銀樹 (은나무)

• 位置：1樓
• 營業時間：10:00 - 20:00 

「銀樹」係一間首飾店，專賣項鍊、戒指、手鐲等等設計獨特嘅珠寶。根據款式同材料，每款首飾價錢都唔同，不過大約由₩29,000起跳。如果想買返件傳統首飾，不妨可以嚟呢度睇吓。

LINE FRIENDS

• 位置：1樓
• 營業時間：平日 11:30 - 19:30、週末 11:00 - 20:30

「你好仁寺洞」1樓呢度有兩間「LINE FRIENDS」，有超多勁cute嘅商品！如果你係LINE FRIENDS或者BT21嘅fans，一定唔可以錯過呢度！

KongKongY畫房 (콩콩이 그림가게)

• 位置：3樓
• 營業時間：平日 12:00 - 18:00、 星期六 11:30 - 19:00、星期日 11:30 - 18:00

如果你鍾意貓狗，嚟到呢間「KongKongY畫房」一定會超興奮！呢度專門買同貓狗有關嘅壁畫、卡、文具同袋，好多都好得意，而且所有商品都係獨一無二，價錢亦都合理（卡 ₩2,000起、其他商品₩4,000起），自用或者送禮都好啱。

YG PLACE

• 位置：4樓
• 營業時間：10:00 - 20:00

YG家族嘅fans們要注意啦！其實「你好仁寺洞」入面都有一間「YG PLACE」，大家可以喺度搵到BIGBANG、iKON、WINNER、TREASURE等等YG旗下藝人嘅專輯同各種周邊商品，當然要買返幾樣嘢做紀念啦！

Orgel House (오르골하우스)

• 位置：4樓
• 營業時間：11:00 - 20:00

「Orgel House」係一間專門買音樂盒嘅鋪頭，無論係可愛定華麗風格嘅音樂盒都有，價錢由₩29,000起跳，都算幾抵。呢度更加提供製作求婚音樂盒服務，大家可以選擇喺音樂盒上面刻字，亦都有賣可以擺放結婚戒指嘅音樂盒，為你嘅另一半準備一份浪漫驚喜啦！

以上就係小編精選嘅「你好仁寺洞」鋪頭，仲有好多鋪頭等緊你去發掘！

2. 人人廣場（쌈지길）

• 地址：서울 종로구 인사동길 44
• 營業時間：10:30 - 20:30（農曆新年、中秋節休息）
• 小Tips：安國站（안국역）6號出口行4分鐘

2004年12月18號開業嘅「人人廣場」被譽爲仁寺洞嘅核心地帶，建築內部呈螺旋型，令到訪人士唔需要行樓梯或者搭𨋢都可以輕鬆行到上頂層。

成棟建築入面有超多賣手工藝品同紀念品嘅鋪頭之餘，仲有提供文化體驗嘅商店，大家一定可以行/玩得盡興！

每一層每一間鋪頭都非常有特色，無論係手袋定裝飾品，有好多產品都係大家喺其他地方搵唔到嘅，靚得嚟夠曬特別。

呢度仲有好多賣紀念品嘅鋪頭，明信片、書、畫等等應有盡有，真係好好行！

而喺「人人廣場」嘅basement，大家可以體驗各種藝術活動，亦都可以喺度買啲藝術作品返屋企。

如果叫小編喺「人人廣場」咁多間鋪頭入面一定要揀一間最鍾意嘅話，應該就係接住落嚟介紹嘅「idus Store」啦！

idus Store (아이디어스 스토어)

• 地址：서울 종로구 인사동12길 12-4
• 營業時間：10:30 - 20:30（農曆新年、中秋節休息）

「idus」係一個非常出名嘅韓國網上平台，邀請咗好多作家入駐，專賣各種各樣嘅小產品，而佢哋其中兩間實體店就係位於「人人廣場」嘅1樓同4樓。

呢度賣嘅所有產品都係手工製造，種類繁多。大家睇吓上面呢款食物鎖匙扣係唔係好得意呢！而且鋪頭入面仲有可以飲咖啡嘅地方，行到攰可以嚟呢度抖返陣再起程。

仁寺洞購物總整理 | 時裝

1. Seukechi (스케치)

• 地址：서울 종로구 관훈동  197-1
• 營業時間：N/A（建議大家下晝去）
• 小Tips：鐘路3街站（종로3가역）5號出口行7分鐘

仁寺洞有賣各種風格嘅衫褲鞋襪，而「Seukechi」係其中一間都幾推薦大家去嘅時裝鋪。入面有賣頸巾、手袋同各式各樣嘅衫，種類繁多。

大部分衫價錢都係₩19,000起，亦都有好多減價商品，用現金俾錢仲會平啲添。

2. Bichnalgwang (빛날광)

• 地址：서울 종로구 인사동길 29
• 營業時間：10:30 - 21:00
• 小Tips：鐘路3街站（종로3가역）5號出口行7分鐘

「Bichnalgwang」賣嘅服裝款式相對上比較年輕同trendy，亦都有賣復古風娃娃裙同外套。

鋪頭店面大，款式多，而且價錢亦都唔貴，無論係衫、褲定裙，大部分都係₩19,000起！

3. ISAE (이새)

• 地址：서울 종로구 인사동길 30-1
• 營業時間：N/A（建議大家下晝去）
• 小Tips：鐘路3街站（종로3가역）5號出口行6分鐘

「ISAE」算係仁寺洞入面比較高檔嘅時裝店，所有產品都係用不含化學物質嘅面料同天然染料製成，令客人用得安心。

以前呢度嘅主要客群係中年人士，但自從翻新之後，風格變得更加年輕，吸引唔少後生仔女們幫襯。價錢方面，一條普通連衣裙大約係₩60,000左右，尚可接受。

4. Mejong (메종)

• 地址：서울 종로구 관훈동 197-4
• 營業時間：09:00 - 20:00
• 小Tips：鐘路3街站（종로3가역）5號出口行7分鐘

「Mejong」專賣帽同頸巾，款式又多又特別，喺其他地方好少會見到。

呢度最大賣點就係所有商品都好平，一頂帽只要₩3,000就可以買到！

5. Aureum (아우름)

• 地址：서울 종로구 인사동길 36
• 營業時間：N/A（建議大家下晝去）
• 小Tips：安國站（안국역）6號出口行6分鐘

「Aureum」係一間頸巾專賣店，無論係雪紡頸巾、真絲頸巾定錦緞頸巾都應有盡有。

價錢亦都非常親民，₩5,000至₩15,000不等，有興趣可以嚟掃幾條返香港~

6. 金銀寶貨 (금은보화)

• 地址：서울 종로구 인사동길 38-1
• 營業時間：10:00 - 21:00
• 小Tips：安國站（안국역）6號出口行5分鐘

「金銀寶貨」係仁寺洞規模比較大嘅飾品鋪，入面有賣帽、頸巾、髮夾、頭箍、耳環等等，成日都會見到好多年輕人喺度shopping。而且價錢實惠，一頂帽₩10,000，一條花花手巾都只係₩6,000。

入面有幾塊掛滿耳環嘅牆，梗有一款啱你心水。

仁寺洞購物總整理 | 紀念品

1. 首爾工藝師 (서울공예사)

• 地址：서울 종로구 인사동길 27-1
• 營業時間：10:00 - 20:00
• 小Tips：鐘路3街站（종로3가역）5號出口行6分鐘

「首爾工藝師」專賣韓國手工藝品同紀念品，無論係扇、書籤、銀包，定係其他商品都應有盡有。

小編上次去就睇中咗呢個首爾著名地標磁石，都只係₩4,000一個，好啱買嚟送禮。

2. 尚古齋 (상고재)

• 地址：서울 종로구 인사동길 37
• 營業時間：09:00 - 21:00
• 小Tips：安國站（안국역）6號出口行6分鐘

如果大家想買啲特別少少嘅紀念品，可以嚟專賣陶瓷嘅「尙古齋」行吓！呢度有賣各種陶瓷碟、花樽、茶杯等等，非常有韓國傳統風情。

上圖嘅陶瓷杯set都只係₩7,000，價錢非常實惠，用喺送禮都好得體。

3. 我們的美 (우리미)

領取優惠券

• 地址：서울 종로구 인사동10길 12
• 營業時間：10:30 - 18:00
• 小Tips：安國站（안국역）5號出口行5分鐘

仁寺洞有好多間紀念品店，但好少好似「我們的美 」咁大部分貨品都係100%韓國手工製造。

呢度嘅杯墊₩5,000一個，全部都係老闆一針一線整出嚟，有紀念價值之餘仲非常實用！Download埋上面張優惠券仲可以有九折優惠，有興趣就唔好錯過啦！

 仁寺洞「我們的美」詳細介紹

4. Nadeulee (나들이)

領取優惠券

• 地址：서울 종로구 인사동길 51
• 營業時間：09:30 - 21:00
• 小Tips：安國站（안국역）6號出口行9分鐘

紀念品專門店「Nadeulee」除咗有賣傳統紀念品之餘，仲有賣同K-pop有關嘅商品。

小編上次去嘅時候買咗呢款用真花整嘅戒指，細嘅只要₩5,000，而大嘅都只係₩8,000！仲有好多好靚嘅商品等緊你嚟發掘！

 仁寺洞「Nadeulee」詳細介紹

仁寺洞購物總整理 | 護膚品、化妝品

1. Nature Republic (네이처 리퍼블릭)

• 地址：서울 종로구 인사동길 11-3
• 營業時間：N/A
• 小Tips：鐘路3街站（종로3가역）5號出口行5分鐘

「Nature Republic」呢個牌子有好多韓國Idol代言過，相信唔少人都有聽過。呢度所有護膚品同化妝品都主打成分天然，唔會對皮膚帶嚟負擔。

呢度都成日會有discount，最出名嘅蘆薈凝膠都可以用好平嘅價錢買到，面膜甚至會有買10送10優惠，有機會行過就唔好錯過呢個優惠啦！

2. WelBas

領取優惠券

• 地址：서울 종로구 인사동길 44 쌈지길 2F
• 營業時間：10:30 - 20:30（農曆新年、中秋節休息）
• 小Tips：安國站（안국역）6號出口行4分鐘

「Welbas」賣嘅所有產品都用咗天然成份去製造，無論係大人定細路都用得，而且有好多種香味可以揀。

當中佢哋嘅主打商品係呢一個「Ice Cream Soap 95g Quti One」，佢哋嘅產品無礦物油、甲醛，亦不含3種鄰苯二甲酸酯、5種重金屬、6種對羥基苯甲酸酯同石油合成表面活性劑，有強力清潔效果之餘，仲可以去除黑頭，保濕同去角質。

呢度提供嘅12種香味分別適合唔同肌膚，職員會好細心咁同大家講解，調配出最啱你嘅產品。撳埋上面條link攞coupon仲可以有9折優惠，千祈唔好錯過啦！

 仁寺洞「WelBas」詳細介紹

以上就係小編為大家整理嘅仁寺洞購物攻略，想去仁寺洞shopping嘅朋友們唔知有冇邊間心頭好呢？

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購