Hello，大家好，我哋係由韓國人每日提供最新韓國旅行資訊嘅Creatrip。

江原道旅行大家可能去得多，不過大家有冇聽過「橫城」呢個地方呢？佢係專出名食韓牛，想食到最正宗嘅韓牛！咁你之後一定唔可以錯過呢個地方啦！

江原道橫城介紹

橫城點解咁出名？

因為橫城地勢險勝 ，有河山環繞，日夜溫差大，所以牛喺嗰度生活會好健康，當地盛產韓牛。好多韓國人同遊客為咗食到最靚同好味韓牛，都會慕名而來。

另外除咗可以欣賞到當地自然風光，仲可以玩到好多有趣活動，例如滑雪或者打高爾夫球。好多人放假都會揀去橫城度假。

由首爾可以點去橫城？

最簡單嘅方法係由首爾站或清涼里站搭KTX去，坐唔使一個半鐘車就可以到，費用大約係13,000韓幣。或者可以揀喺東首爾綜合巴士客運站搭高速巴士去，大約需要坐2個鐘，費用大約係9,000韓幣以上（取決於坐咩類型）。

可以喺以下網土址訂票： Kobus、TxBus、BusTago、Korail

如果去到橫城，因為巴士唔多，小編建議可以租車或者揀搭的士，每一個地方大約係20分鐘車程左右。

推薦行程

1. 橫城湖水路第5條路線（횡성호수길5코스）

地址：강원 횡성군 갑천면 구방리 산164

營業時間：9:00 - 18:00

入場費：2,000韓幣

小Tips：由橫城火車站揸車去大約20分鐘

呢個人工湖步道全長31.5公里，有6條唔同嘅步道，小編揀咗第5條路線，好多人嚟到都會揀呢條，因為佢係咁多條之中最可以睇到獨特景色！

由停車場出發，你會發現一個5號路線地圖嘅小徑，一直沿坐湖邊行就會見到售票處。

每張門票係2,000韓幣，買完之後可以用喺橫城附屬餐廳同其他景點，門票可以等同現金券使用。

雖然小編去嘅時候有落微雨，但一樣可以望到好靚景色，同時有種好放鬆嘅感覺。

2. Maok Nongaeundaejip（마옥논가운데집）

地址：강원 횡성군 횡성읍 성동로 544-12

營業時間：10:00 - 20:00、每個月逢第一個同第三個星期一休息

小Tips：由橫城湖水路揸車去大約15分鐘

呢間餐廳嘅韓文意思係「田間餐廳」，唔少YouTuber同Blogger嚟到試過都讚不絕口，所以小編到跟住去睇吓！只係睇外觀就好似返番去以前年代咁，有種成日喺韓劇會見到取景嘅地方。

餐廳入面有分幾間房，每一間房入面有一兩張檯，同幾個坐墊。

提提大家，呢度會有一個水壺，一上到檯嘅時候唔好掂，因為會太熱，最好等幾分鐘之後先再拎起。

呢度嘅主打菜係막국수（蕎麥麵）7,000韓幣，同편육（片肉）12,000 韓幣起。

片肉1-2人細份（12,000韓幣）、3-4人中份（18,000韓幣）、4-6人大份（25,000韓元）。另外佢哋仲有一款menu叫做메밀전（蕎麥煎餅）。

如果食麵食到一半，可以加呢一個湯，轉做另一個口味。整體嚟講，蕎麥麵同蕎麥煎餅都好好味，大家嚟到都一定會鍾意。

3. 美術館白樺林（미술관자작나무숲）

地址：강원 횡성군 우천면 한우로두곡5길 186

營業時間：10:00 - 17:00、逢星期三休息、星期四只有係公眾假期會開

入場費：20,000韓幣（包括飲品同零食）

小Tips：由Maok Nongaeundaejip揸車去大約15分鐘

顧名思義呢座博物館位於白樺林嘅中央。你會發現呢到有2個展覽室、一個係Studio Gallery，另一個係民宿。 周圍被花草包圍，嚟到呢到你會覺得好舒服同放鬆。

Studio Gallery大家可以入到去飲一杯茶同食小食嘅地方，入到去唔需要另外再俾錢，因為一開始入場券已經包咗，大家只要同職員講飲咩，佢哋就會幫大家整同喺入場券到吸印。

最後小編叫咗菊花茶同梅子茶嚟避雨同取暖，呢到嘅水煮蛋係佢嚟自佢哋現場種植嘅雞，非常新鮮。

Studio Gallery入面仲掛住咗藝人嚟過嘅相，就好似之前韓劇《森林》朴海鎮、曹寶兒都有嚟過打卡，韓綜《兩天一夜》都有嚟取景。

BTS Winter Package 2021 都係喺呢度嘅民宿影！

美術館白樺林係一個可以同時享受自然同藝術嘅好地方，另外仲可以跟住韓星足跡打卡，所以一定要嚟一次。

4. Lake Road 133（호수길133） 

地址：강원 횡성군 우천면 전재호수길 133

營業時間： 10:00 - 20:00、花園開放到20:30

小Tips：由美術館白樺林揸車去大約20分鐘

橫城雖然有好多間Cafe，但講到最多人去嘅應該就係Lake Road 133。

凍美式咖啡（7,500韓幣）、凍鮮奶咖啡（8,500韓幣）、牛角包窩夫（7,500韓幣）

雖然價錢係偏貴咗啲，但可以喺咁靚嘅環境底下嘆咖啡，都係好值得。

喺度睇完咖啡千祈唔好唔記得去花園度散步，左邊有一條小溪，右邊可以睇到瀑布。

望住呢個景真係覺得好療癒，天氣好嘅時候可以坐喺溪邊附近飲咖啡，聽住流水聲，Lake Road 133絕對值得去！

5. 橫城韓牛村（횡성한우마을）

地址：강원 횡성군 우천면 수남로 348

小Tips：由Lake Road 133揸車去大約10分鐘

正如一開始都有同大家講過，橫城係出名食韓牛，就算貴咗啲，嚟到呢度都唔可以錯過。

呢度有一條好出名嘅韓牛村，周圍都可以見到韓牛嘅餐廳。

甚至有啲餐廳入面會見到包住一箱箱，都係要準備寄去全國。

6. Hanaro Mart （하나로마트 동횡성농협）

地址：강원 횡성군 우천면 수남로 356

營業時間： 8:00 - 21:00

想買啲韓牛燒嘅話，可以去Hanaro Mart用超平價格入手，喺超市買完可以拎上二樓餐廳直接燒。每人大約係5,000韓幣， 可以有配菜同燒烤設備，不過而家因為疫情影響，暫時開放。

7. 橫城韓牛百貨店（횡성한우백화점）

地址：강원 횡성군 우천면 수남로 346

營業時間：9:00 - 21:00

喺咁多間韓牛餐廳入面，最後小編揀咗橫城韓牛百貨店，因為佢係咁多間之中當地評價係最好。

一入到去舖頭，大家可以先揀食韓牛嘅邊一個部份，如果唔太識揀，可以問職員。

揀完肉之後，職員就會帶你去入座。牆上面掛滿咗好多藝人嘅簽名，相當之受歡迎。

里肌肉 (Ribeye) 1+

價格：29,000韓幣/ 100g

價格由25,000韓幣起，每100g會再加錢，最主要係取決於揀咩肉類。韓牛有分6個等級，今次小編揀咗1＋，僅次於 1++排第二，所以諗都冇諗即刻拎咗嚟試！

當小編喺揀緊肉嘅時候，職員已經擺好晒所有小菜喺檯，相當之有效率。

大醬湯（된장찌개）

價格： 2,000韓幣

韓國人好鍾意喺食燒肉嘅時候叫一碗大醬湯，價錢一啲都唔貴，好推薦大家都要叫嚟飲。

食韓牛嘅時候大家都可以用生菜去包，之後再加鍾意嘅小菜一齊食。

8. 威利希利渡假村（웰리힐리파크）

地址：강원 횡성군 둔내면 고원로 451

威利希利渡假村係一個綜合景點，對於想玩得開心又唔想周圍去嘅人嚟講，就真係最適合不過！呢度可以滑雪、打哥爾夫球、行山、焗桑拿、唱K等。

價格： 70,000韓幣/一晚 

呢個渡假村已經有30多年歷史，雖然唔算好華麗，但就好乾淨，小編揀咗住Standard A，空間夠大，可以瞓到兩至三個人。

廚房仲有熱水壺、電飯煲、基本餐具等，不過就冇微波爐，如果有嘢想叮可能就要去一樓嘅便利店。呢度冇提供牙刷、牙膏、洗頭水同沐浴露，大家都要自己帶去。

纜車

營運時間：星期日至五：09:00 - 17:00、星期六：09:00 - 19:00、逢星期二休息

價格：成人10,000韓幣、小童（3-12歲）8,000韓幣

搭呢架纜車可以去到公園嘅山頂，可以望到渡假村全景。

同時呢度仲係一個好靚嘅小花園。

亦都可以喺呢個愛心前面打返張卡。

呢度有一個天國的階梯，可以影相Post IG呃Like！

Luge

營運時間：星期日至五：10:00 - 17:00、星期六：10:00 - 19:00、逢星期二休息

價格：14,000韓幣以上

當想落返去嘅時候大家可以揀坐呢架車，邊欣賞公園全景，邊享受坐車快感，相當之有趣！價格會取決於玩幾多次同埋係以咩身份（會員/過夜遊客/訪客），每人14,000韓幣起。

9. 青太山蕎麥麵（청태산막국수）

地址： 강원 횡성군 둔내면 둔내로 68

小Tips：由威利希利渡假村揸車去大約5分鐘

喺橫城嘅其中一間小區，小編發現呢一間青太山蕎麥麵。

蕎麥麵（막국수）
價格：6,000韓幣 

喺上面同大家介紹嘅Maok Nongaeundaejip雖然都好好味，但呢一間更加香好同好味！

薯仔煎餅（감자전）

價格：6,000韓幣

薯仔煎餅比起首爾食到嘅更大份，同蕎麥麵一齊食相當夾。

薯仔湯（감자옹심이）

價格：6,000韓幣

另外仲想同大家推介呢一個薯仔湯，著仔好有咬口，超好味！

10. 奶奶安興豆沙包（할매안흥쌀찐빵）

地址：강원 횡성군 안흥면 서동로 1088

價格： 3,000韓幣@6粒、5,000韓幣@10粒、12,000韓幣@30粒

橫城除咗食韓牛之外，豆沙饅頭一樣都好出名。

饅頭有4種唔同口味：包括有黑米、大麥、紅薯同原味，小編試咗黑米味，雖然冇好濃味，但味道都唔錯。

食之前建議可以加熱，可以用油煎，或者放入蒸籠蒸10分鐘，會更加好味。

11. Hanu & Kanu（하누 & 카누）

地址：강원 횡성군 횡성읍 삼일로 10

營業時間：10:00 - 21:00、每個月逢第一個同第三個星期日休息

價格：1,000韓幣或以上 

呢間Hanu & Kanu距離橫城巴長途巴士客運站10分鐘，喺走之前如果有時間，都可以去買嚟試吓韓牛包。有燒肉味、紅豆味、黑朱古力味等大家揀。

之後如果有計劃去江原道旅行，不妨都可以抽少少時間去橫城，話唔定會搵到好多小驚喜！

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購