河南「Starfield Hanam」介紹
已經行厭哂首爾所有商場冇啲新意？咁小編推薦大家去Starfield Hanam！大人細路都可以行得、玩得超開心！
Hello，大家好，我哋係由韓國人每日提供最新韓國旅行資訊嘅Creatrip。
平時嚟韓國行嘅商場嚟嚟去去都係得嗰幾個冇啲新意？咁小編今日想同大家介紹位於河南嘅一個超大型購物中心，足足有成70個足球場咁大，距離首爾唔算遠，只要搭地鐵就去到，大家可以喺度hea足一日！
河南「Starfield Hanam」介紹
地址： 경기 하남시 미사대로 750 스타필드 하남
營業時間：毎日10:00 - 22:00
小Tips：由河南黔丹山站1號出口出嚟，行大約5分鐘左右就去到。
平時已經行厭哂首爾嘅商場，唔知仲有邊度好去？咁大家之後就可以考慮嚟呢個Starfield Hanam啦！佢喺2016年9月先開幕，足足有成70個足球場咁大，入面主要分咗3個區域，包括係：購物、美食同娛樂，所以全日留喺度都有排行！
商場有6層高，由地下2樓至4樓，而家就等小編逐一為大家講解啦！
4樓
4樓呢度有一個好大型嘅水族館，同埋超高級汗蒸幕加泳池，啱哂一家大細嚟呢度放鬆（不過提提大家，入口係喺3樓。）
雖然當日小編有其他行程，所以冇入到去，不過之後有機會都會想嚟呢度嘆下
另外呢度仲有一個叫做Sports Monster嘅館，可以玩到好多VR、飛鏢、跳床等嘅遊戲，大人2小時係25,000won、小朋友係20,000won，每超過10分鐘就加1,000won，相當之抵玩，相信大人細路嚟度都一定可以玩得好開心。
3樓
3樓主要係賣體育用品，例如大家熟識嘅Adidas、Nike、New Balance等都可以喺度搵到，同時如果行到攰好肚餓，呢度一個超大嘅food court（잇토（Eatopia））。
2樓
２樓主要係賣一啲名牌，或者生活用品嘅地方。
商場內部真係好乾淨，而且好大同闊落，令人行得好舒服
小編當日係平日去唔算好多人，不過之前喺假日去就相當之多，唔少家庭仲會帶埋自己狗狗一齊嚟散步。（呢度係可以帶狗狗自出自入）
1樓
1樓主要係賣潮流服飾，H&M、ALAND、UNIQLO等都可以喺度搵到，同時仲有一條美食街(Gourmet Street) 。
另外仲會見到有唔少攤位展覽（定期會更新），所以每次去都會發現新驚喜！
地下1樓
地下一樓同樣都係有一個大型Food court（Market Locus），喺呢度大家可以食到唔同嘅世界各地美食。同時仲有一個叫做PK Mark嘅超市。
地下2樓
而地下2樓可能係會令大家超興奮嘅Emart！呢度同平時Emart好唔同，規模超大，而且入到去行仲會令人覺得好似係去咗Costco咁，不過佢比Costco有個好係，唔需要俾年費就入得，而且仲可以揀用信用卡俾錢，小編第一次嚟見到咁大間真係有啲嚇親！如果平時覺得首爾超市唔夠大，嚟度呢度可能可以行足大半日
小編覺得Starfield Hanam除咗係一個大型購物中心之外，仲係一個親子嚟到會玩得好開心嘅景點之一，之後嚟韓國旅行，不妨都安排一日嚟呢度玩啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk