2024釜山旅行必去景點推薦

Hello，大家好，我哋係由韓國人每日提供最新韓國旅行資訊嘅Creatrip。

釜山係韓國第二大城市，亦都係繼首爾之後最多外國遊客會去玩嘅城市！到底釜山有咩好玩？有咩景點必去？今日一篇blog幫大家整理好曬釜山旅行攻略，plan行程之前記住參考啦！

釜山旅行必備✨

釜山旅行必去景點推薦

甘川洞 | 甘川洞文化村_{(감천문화마을)}

• 地址：부산 사하구 감천동 10-13
• 前往方法：土城站（토성역）6號出口轉巴士/的士

講起釜山一定唔少得「甘川洞文化村」！呢度被稱為韓國馬丘比丘，山坡上嘅五顏六色屋仔可以話係「甘川洞文化村」嘅標誌！如果大家第一次嚟釜山玩，推薦大家安排半日時間嚟玩，感受悠閒氛圍嘅同時影返幾輯靚相啦！

🔎「甘川洞文化村」詳細介紹

南浦洞 | 南浦洞商圈

• 前往方法：南浦站（남포역）1號、3號、5號、7號出口

南浦洞商圈同西面商圈、釜山大商圈並列為釜山三大商圈，無論係住宿、美食定shopping嘅地方都有齊曬，相信大家都會喺度行到唔知時間XD

南浦洞 | 釜山BIFF廣場_{(부산BIFF광장)}

• 地址：부산 중구 구덕로 44
• 前往方法：札嘎其站（자갈치역）7號出口

BIFF廣場係釜山南浦洞地標之一，1996年嘅時候因為要舉辦釜山國際電影節而建造而成。地下仲有唔少明星嘅手印，大家可以睇吓搵唔搵到你識嘅演員！另外附近亦都有唔少小吃檔，可以試到各種釜山傳統街邊小食！

南浦洞 | 札嘎其市場_{(자갈치시장)}

• 地址：부산 중구 자갈치해안로 52
• 前往方法：札嘎其站（자갈치역）10號出口、南浦站（남포역）2號出口

如果話首爾有鷺梁津水產市場，咁釜山就有札嘎其市場！呢個漁獲市場位於南浦洞商圈對面，因為釜山係一個海邊城市，所以大家可以用更加平嘅價錢喺市場買海鮮，然後交俾樓上餐廳，食返餐新鮮又豐盛嘅海鮮大餐！

南浦洞 | 釜山塔_{(부산타워)}

• 地址：부산 중구 용두산길 37-30
• 營業時間：10:00-22:00
• 前往方法：南浦站（남포역）7號出口、中央站（중앙역）1號出口

首爾有首爾塔、大邱有E-World塔，釜山都有釜山塔！釜山塔位於南浦洞商圈嘅龍頭山公園入面，上到觀景台可以飽覽釜山無死角城市景，鍾意睇夜景嘅朋友們絕對唔可以錯過！

南浦洞 | 富平罐頭市場_{(부평깡통시장)}

• 地址：부산 중구 부평1길 48
• 營業時間：19:30-00:00（每間鋪頭唔同）
• 前往方法：札嘎其站（자갈치역）3號、5號、7號出口

可能會有朋友問：釜山有冇夜市㗎？答案係...有！位於南浦洞附近嘅「富平罐頭市場」，日頭嘅時候係一個普通市集，去到夜晚就會搖身一變成為夜市，專賣又平又地道嘅美食，大家有機會不妨可以嚟掃街！

南浦洞 | 國際市場_{(국제시장)}

• 地址：부산 중구 신창동4가
• 營業時間：09:00-20:00（星期日休息、每間鋪頭營業時間唔同）
• 前往方法：札嘎其站（자갈치역）3號、5號、7號出口

「富平罐頭市場」隔離仲有一個叫「國際市場」嘅市場，呢度就係曾經獲得韓國史上最高分電影《國際市場》嘅故事背景！呢度而家成為咗一個販賣各式生活用品、貨物零件嘅市場，如果大家有睇過呢套戲，嚟到應該會覺得好有親切感。

南浦洞 | 影島大橋_{(영도대교)}

• 地址：부산 중구 용미길9번길 6-45
• 開橋時間：星期六 14:00-14:15
• 前往方法：南浦站（남포역）6號出口

釜山「影島大橋」背後有南北韓戰嘅悲傷歷史，係一個對非常有紀念價值嘅景點。根據2024年最新資訊，釜山影島大橋只會喺每個禮拜六14:00準時開橋，如果你咁啱星期六會喺釜山南浦洞，記住一定要兩點前去到，咁就可以睇到橋樑慢慢升起，路面仲有九隻象徵和平嘅海鷗，相當壯觀！

南浦洞 | 豬腳一條街_{(남포동 족발골목)}

• 地址：부산 중구 부평동2가 (撳我睇詳細位置)
• 前往方法：札嘎其站（자갈치역）3號、5號出口

每個地區同一個料理都有唔同食法，而釜山就出名食涼拌豬腳，加入海蜇、水果同芥末醬油，食落帶甜味亦都更加清爽！釜山札嘎其一帶有條豬腳一條街，如果大家想試地道釜山美食，推薦大家嚟呢度！

海雲台 | 海雲台海水浴場_{(해운대해수욕장)}

• 地址：부산 해운대구 달맞이길62번길 47
• 前往方法：海雲台站（해운대역）3號、5號出口

海雲台海水浴場亦都係釜山必去景點之一，一年四季都超多人。特別係夏天會見到好似上面張相咁嘅陽光與海灘，好多韓國人都會嚟消暑！秋天同冬天大家都可以嚟睇超靚海景，有唔少朋友更加會選擇搭遊艇，喺另一個角度感受釜山魅力！

海雲台 | BUSAN X the Sky_{(부산엑스더스카이)}

• 地址：부산 해운대구 달맞이길 30
• 營業時間：10:00-21:00
• 前往方法：海雲台站（해운대역）3號出口

位於全韓國第二高建築物—— 海雲臺LCT Landmark Tower 嘅「BUSAN X the SKY」係全韓最大型觀景台，高達海拔411.6公尺！嚟到可以眺望釜山大海、後山山景同各種高樓大廈，有一種世界就在我腳下嘅感覺！

「BUSAN X the Sky」詳細介紹

海雲台 | 釜山天空膠囊列車_{(해운대스카이캡슐)}

• 地址：부산 해운대구 중동 948-1
• 營業時間：09:30~（閂門時間每個季節唔同）
• 前往方法：海雲台站（해운대역）3號出口、中洞站（중동역）7號出口

呢幾年釜山最受歡迎嘅景點係喺海雲台藍線公園出發嘅「釜山天空膠囊列車」，呢架列車會一路沿著海雲台海岸線行，沿途可以飽覽釜山海景！推薦大家去到青沙浦之後可以繼續喺附近散步，享受悠閒時光。

海雲台 | 青沙浦_(청사포)

• 地址：부산 해운대구 중동 591-19
• 前往方法：萇山站（장산역）3號出口

搭膠囊列車去到青沙浦之後，就可以見到呢對可愛嘅紅白雙胞胎燈塔，再向前行就會去到「青沙浦天空步道」，係小編最鍾意嘅釜山旅行行程！

海雲台 | 海里團路_{(해리단길)}

• 前往方法：海雲台站（해운대역）2號、4號出口

海里團路位於海雲台站後面，呢度有好多特色Cafe與小店，亦都係韓國後生仔女們會去chill嘅新去處！

海雲台 | Centum City_{(센텀시티)}

• 地址：부산 해운대구 센텀남대로 35
• 前往方法：Centum City站（센텀시티역）10號、12號出口

Centum City係釜山一帶嘅商業重鎮，亞洲最大嘅新世界百貨公司都係位於呢度！各種娛樂、購物需求都可以喺Centum City滿足到！

海雲台 | 電影的殿堂_{(영화의전당)}

• 地址：부산 해운대구 수영강변대로 120
• 前往方法：Centum City站（센텀시티역）10號、12號出口

釜山「電影的聖堂」係釜山電影節嘅舉辦地點，位於啱啱介紹嘅Centum City隔離，影迷們一定要嚟朝聖！

海雲台 | 水營江_(수영강)

• 前往方法：海雲台站（해운대역）2號、4號出口

首爾有漢江，釜山就有水營江！沿岸可以睇到Centum City高樓景觀，推薦大家可以喺度搭遊艇，欣賞無敵夜景！

海雲台 | The Bay 101_{(더베이101)}

• 前往方法：冬柏站（동백역）1號出口

釜山最靚嘅夜景莫過於The Bay 101，水營江沿岸嘅大樓夜晚著燈之後非常壯觀，而且環境夠開揚，係好多人嚟釜山必去嘅景點！

海雲台 | 冬柏島_(동백섬)

• 地址：부산 해운대구 우동 710-1
• 前往方法：冬柏站（동백역）1號出口、海雲台站（해운대역）5號出口

海雲台唔單止得海水浴場，沿住海雲台隔離嘅朝鮮酒店步道行，就可以去到「冬柏島」。喺呢度一邊散步，一邊聽住海浪聲，真係非常寫意（APEC公園都係喺呢度！）。

廣安里 | 廣安大橋_{(광안대교)}

• 地址：부산 수영구 민락동 113-52
• 前往方法：廣安站（광안역）3號、5號出口

釜山最出名嘅大橋就係廣安大橋，每年規模盛大嘅釜山國際煙火節就係喺呢度舉辦㗎啦！推薦大家抽時間嚟廣安海水浴場行吓，欣賞宏偉大橋加釜山海景。

廣安里 | 民樂水邊公園_{(민락수변공원)}

• 地址：부산 수영구 민락동 110-19

鄰近廣安里嘅「民樂水邊公園」係另一個釜山年輕人經常會去嘅景點，佢哋會喺海邊道路坐低休息同食魚生，同時感受海風，真係好chill！

🔎「民樂水邊公園」詳細介紹

西面 | 西面商圈

• 前往方法：西面站（서면역）1號至6號出口

釜山西面亦都係當地人經常會去嘅商圈，有好多餐廳同飲酒嘅地方，亦都有唔少購物品牌進駐西面商圈，鍾意shopping嘅仲可以去埋樂天百貨，如果要book住宿，推薦大家住呢頭！

西面 | 布帳馬車一條街

• 地址：부산 부산진구 부전동 502-22
• 營業時間：18:00-00:00（每間攤檔唔同）
• 前往方法：西面站（서면역）7號出口

釜山西面樂天百貨後面嗰條街有唔少布帳馬車攤檔，每個weekend夜晚都有好多人聚集，大家都可以學韓國人咁叫枝燒酒同幾樣下酒菜，為你嘅釜山之旅增添特別回憶！

🔎「釜山布帳馬車」詳細介紹

西面 | 田浦咖啡一條街_{(전포카페거리)}

• 地址：부산 부산진구 전포대로209번길 26
• 前往方法：西面站（서면역）4號、7號出口；田浦站（전포역）7號出口

西面商圈附近仲有一條咖啡一條街，喺呢度隨便揀一間Cafe入去坐，都可以為你嘅忙碌旅程帶嚟療癒時光，喺度休息好再玩盡佢啦！

機張 | 海東龍宮寺_{(해동용궁사)}

• 地址：부산 기장군 기장읍 용궁길 86
• 開放時間：04:30-19:20

「海東龍宮寺」被譽為全韓國最靚嘅寺廟之一，雖然喺海雲台過去需要差唔多成個鐘，不過可以同時欣賞到海景同傳統寺廟建築，相信大家嚟到都會得到一種療癒嘅感覺，唔會後悔！

機張 | 機張市場_{(기장시장)}

• 地址：부산 기장군 기장읍 읍내로104번길 16
• 前往方法：機張站（기장역）1號出口

釜山「機張市場」係全韓國規模最大嘅水產市場，想食新鮮海鮮記住要嚟呢度！不過「機張市場」固定每個月最後一個禮拜二休息，記住唔好摸門釘啦！

機張 | 釜山樂天世界_{(부산 롯데월드)}

• 地址：부산 기장군 기장읍 동부산관광로 42
• 營業時間：
  • 星期一至五 10:00-20:00
  • 星期六及日 10:00-21:00
• 前往方法：OSIRIA東釜山旅遊區站（오시리아역）1號出口

2022年3月開幕嘅釜山樂天世界係釜山最大規模嘅主題樂園，亦都係釜山的新景點之一。大家可以喺度玩到首爾樂天世界冇嘅機動遊戲，每樣都超級刺激，一家大細都可以玩得開心！

機張 | 竹城聖堂_{(죽성성당)}

• 地址：부산 기장군 기장읍 죽성리 134-7
• 前往方法：機張站（기장역）1號出口轉巴士

位於機張嘅「竹城聖堂」係唔少電視劇嘅取景地，座落喺海岸邊嘅教堂令人有一種好似行咗入童話故事咁嘅感覺。

機張 | 九頭山竹林_{(아홉산숲)}

• 地址：부산 기장군 철마면 미동길 37-1
• 開放時間：09:00-18:00
• 門票價錢：成人₩8,000、5-18歲 ₩5,000、4歲以下免費

機張「九頭山竹林」亦都係人氣電視劇/電影取景地之一，開滿成個山頭嘅竹林帶有古典詩意美感，親眼睇到會更加震撼！

影島 | 白淺灘文化村_{(흰여울문화마을)}

• 地址：부산 영도구 영선동4가 1044-6

如果覺得甘川洞文化村太多遊客嘅話，推薦大家嚟被譽為釜山聖托里尼嘅白淺灘文化村行返轉，喺南浦洞搭車過去都好近！

影島 | 太宗台_(태종대)

• 地址：부산 영도구 동삼동 산29-1

相傳好耐之前，韓國太宗嚟視察嘅時候，一睇就愛上咗呢度嘅景色，至此之後呢度就被稱為「太宗台」！海岸邊經年累月侵蝕而成嘅懸崖同奇岩怪石，加上附近嘅森林同海景造就出嘅景色真係好特別又靚，唔怪得太宗會鍾意呢度！

釜山站 | 希望階梯_{(소망계단)}

• 地址：부산 서구 동대신동2가 87-302
• 營業時間：
  • 星期一至五 07:30-20:00
  • 星期六及日 10:00-17:30
• 前往方法：東大新站（동대신역）5號出口

부산관광공사

喺釜山站行過少少，有一個叫做希望階梯嘅景點，最出名嘅相信就係相入面個單軌列車，好多人都會嚟打卡！不過大家要注意呢部列車係孕婦、老年人同住戶優先搭，記住要做個有公德心嘅遊客啊！

釜山站 | 釜山港_(부산항)

• 地址：부산 동구 충장대로 206
• 前往方法：釜山站（부산역）6號出口；KTX釜山站（KTX 부산역）9號出口

釜山係一個大型海港城市，而釜山港就位於釜山站附近。如果大家會搭KTX離開釜山，又有時間淨唔知去邊好，推薦可以上KTX車站3樓戶外空間，眺望釜山港同廣安大橋景色！

釜山站 | 金敏夫展望台_{(김민부전망대)}

• 地址：부산 동구 영초윗길26번길 11
• 前往方法：釜山站（부산역）5號出口

「金敏夫展望台」大家可能比較少聽過，呢度係釜山人私藏嘅夜景名勝，唔單止可以遠眺廣安大橋，日頭嚟嘅話仲可以享受繁忙都市中難得嘅寧靜，非常寫意。

釜山站 | 釜山市民公園_{(부산시민공원)}

• 地址：부산 부산진구 시민공원로 73
• 開放時間：05:00-00:00
• 前往方法：釜田站（부전역）1號出口

自從BTS成員V喺釜山市民公園影相放上社交平台之後，呢度就成為咗粉絲們嘅朝聖景點，大家記住要嚟打卡啦！

機場 | 大渚生態公園_{(대저생태공원)}

• 地址：부산 강서구 대저1동 2314-11
• 前往方法：大渚站（대저역）1號出口

唔知大家有冇聽過大渚生態公園呢個景點呢？雖然唔太出名，不過呢度一年四季嚟都好靚，春天有櫻花、油菜花睇，秋天就有粉紅芒草，幾時嚟都可以影靚相睇靚景！

🔎釜山賞櫻景點總整理

機場 | 乙淑島_(을숙도)

• 地址：부산 사하구 하단동 1209-1
• 前往方法：下端站（하단역）1號出口

부산관광공사

釜山人想親親大自然嘅時候，大部份人都會選擇去乙淑島！乙淑島秋天嘅時候仲會有粉紅芒草，如果大家咁啱秋天會去釜山，記住唔好錯過啦！

機場 | 三樂生態公園_{(삼락생태공원)}

• 地址：부산 사상구 삼락동 686
• 前往方法：沙上站（사상역）2號出口、掛法Renecite站（괘법르네시떼역）1號出口

釜山「三樂生態公園」係釜山市區最受歡迎嘅賞櫻景點之一，超推薦大家春天嚟！而秋冬天嘅時候亦都可以睇到芒草同侯鳥遷徙嘅風景，如果大家想呼吸新鮮空氣，不妨可以考慮嚟呢度！

多大浦 | 多大浦海水浴場_{(대대포해수욕장)}

• 地址：부산 사하구 다대동 1552-20
• 前往方法：多大浦海水浴場站（다대포해수욕장역）2號出口

多大浦位於釜山南邊，係釜山1號線嘅盡頭。如果大家plan住嚟，就一定唔可以錯過黃昏日落海景同多大浦夢幻噴泉，體驗同海雲台、廣安里唔同嘅風景啦！

多大浦 | 長林浦口_{(장림포구)}

• 地址：부산 사하구 장림로93번길 72
• 前往方法：長林站（장림역）3號出口

부산관광공사

有釜山威尼斯之稱嘅長林浦口係一個本地小漁港，不過近年居民將漁港附近嘅建築油到五顏六色，唔單止夠cute，仲好IG-able！亦都多得呢幾棟建築，長林浦口也都免除沒落嘅命運。

慶星大釜慶大 | 二妓台_(이기대)

• 地址：부산 남구 용호동 산25
• 前往方法：慶星大·釜慶大站（경성대·부경대역）3號出口轉巴士

二妓台又係一個可以遠離塵囂，貼近大自然嘅釜山景點。沿住步道行一圈大概需要一個鐘頭左右，一齊嚟聽住海浪聲，遠眺海雲台高樓城市景色啦！

慶星大釜慶大 | 文化胡同_{(문화골목)}

• 地址：부산 남구 용소로13번길 36-1
• 前往方法：慶星大·釜慶大站（경성대·부경대역）1號出口

唔知大家有冇去過台灣眷村呢？呢度同眷村一樣，傳統舊式住宅經過改造之後引入各種小店進駐，氣氛夠曬懷舊，同充滿現代感嘅市區又係另一番風味！

慶星大釜慶大 | 五六島天空步道_{(오륙도스카이워크)}

• 地址：부산 남구 오륙도로 137
• 前往方法：慶星大·釜慶大站（경성대·부경대역）1號出口轉巴士

五六島亦都係釜山出名景點之一，兩座海面上突出嘅島嶼非常顯眼。大家嚟到可以行五六島天空步道，欣賞沿岸美景，或者可以自費搭觀覽船，更近距離欣賞五六島英姿。

松島 | 松島海上纜車_{(송도해상케이블카)}

• 地址：부산 서구 송도해변로 171
• 前往方法：札嘎其站（자갈치역）2號出口轉巴士

如果問小編最推薦大家喺釜山做咩，小編會建議大家去搭釜山松島海上纜車！大家有機會上到高空，欣賞四面環海嘅景色，仲可以一眼俯瞰釜山無敵海景，喺另一個角度體驗釜山魅力！

松島 | 松島天空步道_{(송도 구름산책로)}

• 地址：부산 서구 암남동 129-4
• 前往方法：札嘎其站（자갈치역）2號出口轉巴士

如果不敢搭空中纜車，咁就推薦大家喺松島天空步道散步！呢度係釜山三大天空步道當中最出名嘅一條步道，天氣好嘅時候向海岸線方向行，面前會係一片超壯觀嘅蔚藍海景！

金井 | 梵魚寺_(범어사)

• 地址：부산 금정구 범어사로 250
• 前往方法：梵魚寺站（범어사역）7號出口轉巴士

如果大家已經去過幾次釜山，唔知仲有咩景點好去，咁就推薦大家深入釜山深處，去梵魚寺參觀，享受難得嘅寧靜同悠閒。

教大 | 溫泉川_(온천천)

• 地址：부산 연제구 온천천남로 39
• 前往方法：教大站（교대역）4號出口、東萊站（동래역）9號出口

沿住釜山教大地鐵站附近嘅「溫泉川市民公園」行，就會去到溫泉川！呢度同首爾清溪川有幾分相似，係釜山人最愛嘅賞櫻好去處之一！

釜山大 | 釜山大學商圈

• 地址：부산 금정구 부산대학로63번길 2
• 前往方法：釜山大站（부산대역）1號、3號出口

如果想好似當地人咁喺釜山玩，咁就推薦大家去釜山學生們最鍾意去嘅釜山大學商圈！無論係想掃貨定掃街，呢度都可以滿足到你。

去過釜山嘅你，唔知你去過幾多個景點呢？如果未去過釜山，推薦大家可以喺呢個list入面揀幾個鍾意嘅景點去，體驗釜山魅力！

釜山旅行必備✨

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購

Mail：help@creatrip.com