logo

2023韓國萬聖節慶祝活動現況

韓國人點樣慶祝萬聖節?梨泰院意外發生之後大家對呢個節日態度又有無變?

DefaultProfileIcon
유정언
6 months ago

Hello,大家好,我哋係由韓國人每日提供最新韓國旅行資訊嘅Creatrip


一年一度嘅萬聖節又到啦,雖然萬聖節係一個西方節日,但係韓國人都會慶祝㗎!不過上年(2022年)萬聖節喺梨泰院發生咗嚴重人踩人事故,到底今年韓國人會好似冇事發生過咁繼續慶祝,定係會持保守態度呢?



萬聖節韓文係咩?

韓國萬聖節


因為萬聖節係西方節日,萬聖節嘅韓文都係沿用英文名,叫做할로윈/할로윈데이(Halloween/Halloween Day),發音都大同小異!



韓國人平時會點慶祝萬聖節?

1. 落Club

韓國人萬聖節文化


唔少韓國人一到萬聖節都會約埋一大班朋友去弘大或者梨泰院clubbing。韓國人認為呢個節日就係要同一大班人出去玩,感受一下街頭嘅熱鬧!佢哋會襯著呢啲大節日去club到識新朋友,或者唱下歌、飲下酒同埋跳下舞等等。




2. 化萬聖節妝

韓國萬聖節化妝

萬聖節當然要化返個萬聖節妝容啦!每年萬聖節弘大街頭都會有唔少攤檔,主要都係幫路過嘅你化返一個妝!不過一個妝簡簡單單畫少少圖案都要₩15,000 (約HKD 90),如果你想畫多啲化款嘅話就大概要 ₩30,000 (約HKD 170),其實都算貴㗎!




3. 買萬聖節裝飾

韓國萬聖節DAISO


每年一到萬聖節,各大品牌都會推出同萬聖節有關嘅單品。唔少韓國人一定會去韓國DAISO到買唔同種類嘅裝飾品佈置一下屋企,又或者會買定啲南瓜籃同埋糖打算喺萬聖節當日派糖俾小朋友,唔知大家又有冇買萬聖節裝飾嘅習慣呢?




4. 扮鬼扮馬嚇人

韓國萬聖節

喺熱鬧嘅街頭,你都會發現有好多人會扮鬼扮馬嚟嚇人!韓國人真係好大膽,佢哋真係會扮到喪屍咁,然後喺條街到突然行去你前面大叫!




5. 去鬼屋玩

韓國鬼屋


每年Halloween嘅時候,樂天世界同埋愛寶樂園都會有鬼屋,好多人都會因為想體驗萬聖節氣氛而去主題公園玩!



梨泰院人踩人慘劇回顧


上年(2022年)萬聖節前夕,因為係第一個疫情解封後嘅節日,有唔少人都趁weekend去梨泰院同朋友聚會,而喺10月29號夜晚就發生咗呢件慘絕人寰嘅意外。



大約夜晚10點15分,有好多人聚集喺梨泰院Hamilton酒店附近嘅一條小斜坡上面,當時有人因為後面不斷推,失去平衡而跌低。而因為咁,後面嘅人亦都陸續跌低,喺骨牌效應之下一個疊一個,發生人踩人意外。



因為現場實在有太多人,導致手機信號唔太好,完全通知唔到上面啲人前面發生咩事。但係因為大家都想快啲落去,所以就喺後面不斷向前推,令事態加劇,最後導致151人死亡、82人受傷,當中大部份都係二十幾歲嘅年輕人。



意外發生之後,所有同萬聖節有關嘅活動同party全部都取消曬,而梨泰院商圈亦都生意慘淡,有唔少商戶都因此受到影響。



咁今年萬聖節又會係點?


因為上年發生咗呢件咁嚴重嘅意外,今年韓國社會對萬聖節呢個話題都持比較保守嘅態度。而喺萬聖節前夕,唔少人都有去梨泰院案發現場悼念死者。



平時萬聖節前夕有好多鋪頭都會搞萬聖節限定優惠,或者以萬聖節為主題裝飾同舉辦各種活動,不過今年大家都不約而同地冇搞上述活動,明顯睇得出大家都覺得時機仍然比較敏感。



睇今年嘅氣氛,相信唔會有太多人去梨泰院。網上就有人提議不如今年轉移陣地去弘大玩,而弘大的確有唔少bar同club搞緊萬聖節活動。有見及此,麻浦區區廳喺弘大主要區域掛上橫額,向大眾建議27-31號期間儘量唔好參加萬聖節活動,以免發生同樣意外。



講起萬聖節,當然唔少得主題樂園啦!每年萬聖節韓國嘅主題樂園都會舉辦活動,園區入面都會有各種擺設,等大家可以享受節日氣氛。不過今年樂天世界就冇專登搞萬聖節活動,只係延長咗由9月開始搞緊嘅dark moon主題!

 樂天世界全日通門票


如果想享受萬聖節氣氛,建議大家可以去愛寶樂園,呢度每年都會搞萬聖節特別活動,今年都唔例外!

 愛寶樂園門票

以上就係小編整理嘅韓國萬聖節慶祝活動現況啦,最後提提大家要記住玩得開心嘅同時要注意安全,唔好樂極生悲。




如果有更多想知嘅內容,都可以隨時留言或者dm話俾我哋知:)

 Instagram:creatrip.hk

 Facebook:Creatrip 帶你認識韓國每一面

 韓國代

熱門文章

LoadingIcon
熱門文章