北村韓屋村11月起實施宵禁
首爾北村韓屋村試行宵禁！下晝5點到下一日10點都嚴禁出入！違反人士仲會被罰重金！
Hello，大家好，我哋係由韓國人每日提供最新韓國旅行資訊嘅Creatrip。
講起首爾韓屋村，大家一定第一時間會諗起北村韓屋村！位於景福宮附近嘅呢條韓屋村係遊客嘅必去打卡之地，更加有唔少朋友們會著住韓服去打卡。不過最近首爾市宣佈會喺呢度實施宵禁，到底幾時開始實施，點解最後會落到需要宵禁嘅地步？
北村韓屋村11月起實施宵禁
Visit Seoul
「北村韓屋村」非常古色古香，由以前開始都已經有好多人去會去呢度參觀同打卡，不過呢個問題疫情過後更加嚴重，造成北村一帶居民嘅困擾。有唔少遊客會擅闖民居，而且更加帶嚟垃圾、食煙同喧嘩等問題，令北村居民頭痛不已。
雖然韓屋真係好靚，但係隨住遊客越嚟越多，造成住戶不便，喺過去呢10年內北村居民數量減少咗27.6%，大約只有6,100人。但係只係喺2023年，到訪北村嘅遊客就已經多達664萬人次，超大對比！
因為遊客造成當地居民生活不便，鐘路區最後喺2024年7月根據《觀光振興法》，將北村劃為特別管理地區。
鐘路區廳
而韓國政府最終決定由2024年11月1號開始試行宵禁，上圖包含北村路5Na街（북촌로5나길）、北村路11Da街（북촌로11다길）、北村路11街（북촌로11길）、北村路11Na街（북촌로11나길）嘅「紅色區域」，每日由17:00至翌日10:00前，將會禁止旅客到訪。
另外，「北村韓屋村」有分為1個黃區同2個橙區，分別係集中監控區同集中過渡區，暫時只會進行觀察。
呢條政策過渡期至2025年2月為止，由3月開始就會正式落實管制，違反人士將被處以10萬韓幣（約100000）嘅罰款。不過如果係呢度嘅居民同鋪頭，或者你間民宿/酒店位於上述範圍內，則不受此限。
경향신문
另外由2026年1月開始，「北村韓屋村」將會實施埋觀光巴士通行限制，只會開放俾一般校車同市區巴士通過，嚴禁旅遊巴同私人包車行駛於北村路、北村路5街、昌德宮1街等區域，避免因為臨時停車而影響交通，希望可以留返一個靚嘅環境俾居民同遊客散步。
大家如果plan住去「北村韓屋村」玩，就記住要避開宵禁時間，如果唔係就可能會摸門釘啦...
如果有更多想知嘅內容，都可以隨時留言或者dm話俾我哋知：）
Mail：help@creatrip.com
