韓國人票選首爾地標
原來韓國人覺得首爾最出名嘅地方係...！
Hello，大家好，我哋係由韓國人每日提供最新韓國旅行資訊嘅Creatrip。
講起韓國大家都一定會諗起首爾，但係講起首爾大家又會諗起咩呢？外國人眼中嘅首爾同韓國人眼中嘅首爾又有咩唔同？
韓國人票選首爾地標
相信有9成嘅朋友嚟韓國旅行都係去首爾，唔知大家覺得最有代表性嘅地標係邊度？首爾嘅魅力又係咩呢？
早前首爾市以超過35,000名首爾市民為對象，進行咗「2023首爾調查」，而喺琴日公佈咗相關調查結果。
根據數據顯示，有48.3%住喺首爾嘅韓國人都認為漢江係首爾最有代表性嘅地標，而第二至四名就分別係光化門（36.1%）、傳統宮殿（32.3%）同嘅N首爾塔/南山塔（17.2%）。
對比起2010年嘅結果，漢江由第四名直接跳到冠軍寶座，而傳統宮殿就由第一名跌到落第三名，證明韓國人對首爾地標嘅諗法同概念都開始改變。
연합뉴스
實際上首爾市亦都開始喺漢江舉辦更加多國際性活動同設置更多體驗項目，例如4~5月有無人機表演、6月會設置熱氣球俾市民同遊客可以喺高空欣賞漢江夜景，仲會開設水上巴士服務等等，將漢江打造成首爾地標。
咁住喺韓國嘅外國人又係點睇㗎呢？調查結果顯示，第一名係光化門廣場（45.9%）、緊隨其後嘅係傳統宮殿（41.4%）、東大門設計廣場DDP（25.6%）同漢江（23.1%）。
對外國人嚟講，相信光化門廣場同景福宮等等充滿韓國歷史文化同特色嘅景點先係最能夠代表首爾嘅地標！每年景福宮、昌慶宮等等嘅宮殿都吸引無數遊客到訪，大家仲可以順便租埋韓服，可以體驗古代風情之餘，仲可以影靚相，話俾人知：我去咗韓國！
另一方面，調查入面亦都有問到受訪者覺得首爾有啲咩魅力。首先喺城市可及性方面，大部份人都認為首爾交通網絡夠發達，搭公共交通工具都可以周圍去。同香港一樣，首爾都有一個四通八達嘅地鐵系統，而且用交通卡搭車轉乘巴士仲有優惠，對居民同遊客嚟講都非常方便！
而喺城市便利性方面，因為首爾無論係購物定美食選擇都包羅萬有，喺首爾吃喝玩樂都唔會厭。無論係大家每次嚟韓國都會去嘅弘大、明洞、東大門等等嘅人氣地區，定係最近韓國後生仔女們鍾意去嘅聖水、龍山都有超多唔同菜系嘅餐廳、Cafe同商店（重點係打卡一流XD）。
오마이뉴스
最後喺城市環境方面，大家都覺得首爾最大嘅魅力係夠安全，就算夜晚一個人喺街度行，或者去Cafe嘅時候將貴重物品放枱頭都唔會有人偷！
留言話分享俾大家知你覺得首爾最有代表性嘅地標係邊度，你又最鍾意首爾邊個魅力啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
