聖水洞&首爾林Cafe總整理
韓國人最鍾意去嘅聖水洞Cafe！唔同風格你最鍾意邊一間？
Hello，大家好，我哋係由韓國人每日提供最新韓國旅行資訊嘅Creatrip。
首爾「聖水洞」係韓國最大手工鞋產業區，起因係70年代，工廠開始移往房地價相較平嘅聖水洞，手工鞋產業就喺嗰時開始，所以喺度會見到好多工作坊同各式個人品牌店，唔知係唔係因為咁，多咗好多人會去行街，同時出現好多利用舊有建築物，重新裝修成打卡Cafe！
聖水洞&首爾林Cafe總整理
Rain Report Croissant（레인 리포트 크루아상）
- 地址：서울 성동구 성수이로16길 32 주3
- 營業時間：11:00 - 22:00（Last Order 21:00）
- 前往方法：聖水站（성수역）3號出口行11分鐘
「Rain Report」係一間最近喺Instagram超多人share過嘅Cafe，最大特色係Cafe出面有個area會落假雨，勁有mood！而裝修就主要行高級型格路線，以黑色同植物為主調，影相一流！
聖水洞呢間分店最出名食酥皮麵包同牛角包，如果大家有機會去記住要試！小編都建議大家早少少去，如果唔係就好難搵位㗎啦！
Nudake Seongsu（누데이크 성수）
- 地址：서울 성동구 성수이로7길 26
- 營業時間：11:00 - 21:00（Last Order 20:45）
- 前往方法：聖水站（성수역）4號出口行6分鐘
「Nudake」係韓國超紅太陽眼鏡牌子Gentle Monster旗下嘅Cafe，只可以話不愧係潮牌，呢度嘅裝修同甜品都超特別，同平時喺普通Cafe見到嘅好唔同！
Nudake最出名嘅係上面嗰款抹茶流心牛角包，最近仲推出咗幾款新甜品，如果你鍾意比較新奇有趣嘅Cafe，好推薦大家去！
大林倉庫（대림창고）
- 地址：서울 성동구 성수이로 78
- 營業時間：11:00 - 22:00
- 小Tips：聖水站（성수역）3號出口行6分鐘
「大林倉庫」原本只係一個倉庫，而家改造成現代Cafe，保留過去真實樣貌，呢種工業風格好近現代韓國年青人口味，係呃Like嘅好地方。同時呢度仲係一個畫廊，可以欣賞同買入各種藝術品。
雖然呢度價錢偏貴，不過可以喺咁有feel嘅地方坐低休息，都真係幾正。
Saltbread In Seaside（자연도 소금빵）
- 地址：서울 성동구 연무장길 56-1 1층
- 營業時間：09:00 - 22:00
- 前往方法：聖水站（성수역）3號出口行4分鐘
有留意開韓國流行嘅朋友應該都知道，韓國呢一兩年勁流行食鹽麵包，幾乎每間Cafe而家都有賣！而韓國最出名嘅鹽麵包brand一定唔少得呢間「Saltbread In Seaside（자연도 소금빵）」
呢度嘅鹽麵包外脆內軟，而且勁香牛油味~ 不過要注意呢度冇得堂食，只可以買走。如果大家想食到最新鮮出爐嘅麵包，可以喺09:00、12:30、14:00、15:30、17:00、18:30呢幾個時間去！
Camel Coffee（카멜커피）
- 地址：서울 성동구 성덕정19길 6
- 營業時間：09:00 - 17:00
- 前往方法：聖水站（성수역）3號出口行14分鐘
「Camel Coffee」裝修好特別，有一種復古魅力！
嚟到呢度，推薦大家一定要飲佢哋主打Camel Coffee，真係一試難忘。
Grandpa Factory（카페 할아버지공장）
- 地址：서울 성동구 성수이로7가길 9
- 營業時間：11:00 - 22:00
- 前往方法：聖水站（성수역）3號出口行6分鐘
「Grandpa Factory」老闆洪東熙係韓國著名建築同設置藝術設計師，將呢度打造成聖水洞最靚嘅Cafe，內部分咗四個空間，內部空間好闊落，唔需要擔心冇位。
三文治擺盤擺得好靚，影完相都唔捨得食！加上呢度之前韓劇《黑道律師文森佐》都有嚟取景，有興趣嘅朋友記得去打卡啦！
Dior Seongsu（디올성수）
- 地址：서울 성동구 연무장5길 7
- 營業時間：11:00 - 20:00
- 前往方法：聖水站（성수역）4號出口行5分鐘
好多香港人嚟韓國玩都會想去位於聖水嘅呢間Dior Cafe朝聖，BTS Jimin、BLACKPINK Jisoo、NewJeans Haerin仲曾經嚟過參加活動，就算唔入去坐，喺出面打卡影相都係一個唔錯嘅選擇！
Cafe入面裝修以花園為主題，四周圍都好有春天氣息！而餐點方面，Menu會不定期更新，雖然餐點價錢偏貴，但仍然人氣不減、超受歡迎！
Onion（어니언 성수점）
- 地址：서울 성동구 아차산로9길 8
- 營業時間：星期一至五 08:00 - 22:00、星期六及日 09:00 - 22:00
- 前往方法：聖水站（성수역）2號出口行2分鐘
大家都可能有聽過「Onion」呢個大名，原址係1970年代初建，將近50年歲月，曾經係超市、餐廳、維修所或工廠等，每次轉換經營模式，唔需要嘅部分會被拆毀，需要部分就再擴建，令呢度保留歲月痕跡。
「Onion」嘅招牌甜品係Pan d'Or，人氣好高，上面撒上糖粉，就好似一座被白雪覆蓋嘅山，望落好獨特。
Scène（쎈느）
- 地址：서울 성동구 연무장5길 20
- 營業時間：10:00 - 22:00
- 前往方法：聖水站（성수역）4號出口行5分鐘
以全面超大落地玻璃窗吸引眾人目光嘅「Scène」，有兩層好多位，除咗可以喺室內坐之外，天氣好都可以坐戶外區。
食完甜品之後，記得行埋附近地方，除咗影靚相仲可以欣賞一下老闆嘅藝術品擺設。
GLOW（글로우）
- 地址：서울 성동구 아차산로9길 8
- 營業時間：星期一至五 09:00 - 22:00、星期六及日 10:00 - 22:00
- 前往方法：聖水站（성수역）2號出口行4分鐘
GLOW就喺Onion隔離，係一間好溫暖嘅Cafe，裝修得好現代，傢俬同配件整體配搭好和諧，令人會愛上呢度嘅氣氛。
喺度嘆住甜品同咖啡，之後嚟坐底休息過返個溫馨下午啦！
SEOUL ANGMUSAE（서울앵무새）
- 地址：서울 성동구 서울숲9길 3 B1
- 營業時間：08:00 - 23:00
- 前往方法：纛島站（뚝섬역）1號出口行4分鐘
SEOUL ANGMUSAE最近成為大熱，因為Cafe入口有一個彩色牆，大家都嚟呢度打卡，呢種風格同店名「앵무새」（鸚鵡）好似。
呢度嘅甜品一樣都係色彩繽紛，打卡好睇之外亦都好好味，另外呢度仲有提供素食菜單，所以素食主義者去到都可以放心食用。
Mat Cha Cha（맛차차）
- 地址：서울 성동구 서울숲2길 18-11
- 營業時間：11:00 - 19:00（逢星期一及二休息）
- 前往方法：首爾林站（서울숲역）5號出口行9分鐘
如果你係抹茶控，小編推薦大家去呢間「Mat Cha Cha」，喺度可以享受安靜氣氛、度過只屬於自己嘅空間，加埋杯甜忌廉抹茶鮮奶，簡直就係人間天堂。
抹茶鮮奶味道濃郁，好甜好好味，配搭今日甜點，絕對係完美。
Sweden Picnic（스웨덴 피크닉）
- 地址：서울시 성동구 왕십리로5길 9-20 2F
- 營業時間：11:30 - 23:00
- 小Tips：首爾林站（서울숲역）5號出口行4分鐘
Sweden Picnic由首爾林行過去只係需要3分鐘，呢度有種錯覺令人好似去咗野餐咁，如果想同朋友拎吓酒杯傾偈嚟呢度都唔錯。
呢度好闊落，用咗暖黃色去裝修，俾人一種好溫暖同清爽嘅感覺，加上有一個超大嘅窗，有陽光射入嚟更加有去咗野餐嘅感覺。
呢度所有餐點都係用新鮮食材去整，大家可以食得安心。
Fine Waffle（파인와플）
- 地址：서울 성동구 서울숲4길 16-1
- 營業時間：14:00 - 22:00
- 小Tips：纛島站（뚝섬역）8號出口行5分鐘
Fine Waffle位於首爾林咖啡街，係一間出售各種鬆餅嘅名店，價錢都幾平，只睇店面仲以為去咗一間花店咁。更特別嘅係，呢度仲提供野餐設備，等各位可以方便去首爾林野餐。
大家可以直接喺Fine Waffle外賣鬆餅、飲品，再帶去首爾林野餐！
以上係小編整理好嘅聖水洞、首爾林一帶，韓國人最鍾意嘅Cafe，唔知大家最鍾意邊一種風格呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
