Hello，大家好，我哋係由韓國人每日提供最新韓國旅行資訊嘅Creatrip。
唔知大家會唔會覺得有時食某樣嘢就一定要配另一樣呢？就好似食炸雞，自然會想配可樂或者係啤酒，韓國有唔少美食都有佢哋絕佳配對，今日就等小編話俾大家知有邊幾款啦！
韓國靈魂美食配搭
1. 五花肉配燒酒
講到食五花肉，除咗有唔同小菜用生菜包住食之外，當然仲要配燒酒！平時大家喺燒肉店食，應該都見過唔少韓國人都會飲勁多枝，比起五花肉，燒酒先係佢哋嘅靈魂拍檔。
2. 炸雞配啤酒
講到炸雞配啤酒呢個配搭，又點可以唔提韓劇《來自星星的你》？當時「炸啤」熱潮可以話風魔全球，當時香港都多咗唔少炸雞舖頭。韓國咁多間炸雞店，邊間係大家至愛呢？
3. 煎餅配米酒（馬格利）
只要一落雨，韓國人就會諗到要食煎餅配米酒（馬格利），因為煎餅喺煎pan上發出嘅「滋滋聲」同雨聲好似，而且比起飲啤酒或燒酒，傳統嘅米酒會更加夾！未試過嘅朋友下次嚟韓國一定要試吓！
4. 小菜配白飯
有時懶起上嚟，香港人可能會食豉油撈飯。但喺韓國，佢哋好鍾意小菜配白飯，因為佢哋小菜一次都會整好多，可以分好多餐食，只要將白飯同小菜用微波爐叮一叮即刻可以當一餐，超方便！
5. 紫菜配白飯
除咗小菜之外，紫菜都唔可以缺少！啱啱煮好嘅白飯，配上香濃麻油紫菜，即刻可以食多幾碗飯！
6. 燒肉配炒飯
對韓國人嚟講，每一道主食（炒肉、燒肉、湯等）食完之後，一定要叫一個炒飯，咁樣先係最完美！
7. 米水（甜米釀）配雞蛋
嚟韓國必需要體驗嘅絕對係汗蒸幕！出完汗，再飲返杯米水同食雞蛋，真係超地道！
7. 炸物配辣炒年糕醬
喺街邊除咗要食魚糕、紫菜包飯同飲魚糕湯之外，當然都唔可以少咗炸物同辣炒年糕啦！韓國人除咗會點鹽食之外，仲會點辣炒年糕嘅醬，兩款都好好味。
8. 拉麵配芝士/蛋/泡菜（辛奇）
韓國人食拉麵嘅時候唔會齋煮，佢哋仲會加芝士或者雞蛋，當然唔少得泡菜（辛奇）啦！
9. 雪濃湯配醃蘿蔔
食雪濃湯會唔會覺得有啲淡？除咗加鹽之外，韓國人仲好鍾意配醃蘿蔔泡菜一齊食。
10. 刀削麵配泡菜（辛奇）
韓國人去食刀削麵，除咗要求麵要好食之外，泡菜（辛奇）亦都相當重要。不過呢啲泡菜比起一般嘅更加濃味，會用咗更多魚蝦醬同辣椒醬去醃，同清淡嘅湯最夾。
11. 豆腐配炒泡菜（辛奇）
豆腐配上炒泡菜（辛奇）係韓國成日會見到嘅家常菜，亦都有好多人都會當佢係下酒菜。泡菜炒過雖然有啲辣，不過同豆腐一齊食可以中和返，好推薦大家試吓。
12. 五花肉配燒泡菜（辛奇）
五花肉除咗同燒酒夾之外，唔少得嘅當然仲有燒泡菜（辛奇）！用五花肉嘅油燒過嘅泡菜（辛奇）都會特別脆同香口，一齊食相當好味。
13. 豬肉湯飯配蝦醬
同雪濃湯相比，豬肉湯飯味道會更重少少，有啲舖頭可能會加辣醬，不過小編覺得最夾嘅始終都係蝦醬！大家去食豬肉湯飯之前可以先試下味，如果覺得唔夠重，可以加少少蝦醬，味道即刻會唔同曬。
14. 血腸湯飯配芝麻粉
大家可以試吓加芝麻粉落喺熱辣辣嘅血腸湯，味道會更加濃郁，一試可能就會愛上！
以上嘅美食都係有佢哋嘅靈魂拍檔，唔知大家仲覺得有冇邊一款都要一齊食先樂味嘅呢？歡迎留言話俾我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
