韓國米酒推薦
韓國除咗燒酒之外，仲有最具特色嘅米酒「馬格利」，下次嚟韓國必試呢幾款！
Hello，大家好，我哋係由韓國人每日提供最新韓國旅行資訊嘅Creatrip。
韓國人出曬名鐘意飲酒，除咗燒酒受歡迎之外，韓國米酒（馬格利）都一樣咁受歡迎，佢比啤酒更加香醇，又冇燒酒咁強烈，今日小編就要介紹呢款韓國傳統米酒俾大家參考。
韓國米酒差異
馬格利同東東酒嘅差異？
東東酒
唔知大家有冇聽過咩係東東酒（동동주）呢？其實佢係大米或糯米蒸煮後浸喺水中發酵，維持一定溫度，經過長時間發酵之後再重複動作，雜質沈澱之後，上層最清澈嘅液體就係「東東酒」，佢最大特色就係會飲到米粒，所以亦有人會叫佢做「浮蟻酒」（부의주）。
至於馬格利（米酒）初期係被稱為混沌酒（훈돈주），因為佢係拎缸中底層，將所有米粒壓碎、過濾後整成嘅液體，顏色相對會比較睇落去混濁。
韓國米酒口味
1. 長壽馬格利（6%）
呢款係韓國人最常飲嘅米酒（馬格利），味道係有啲碳酸同微甜嘅香氣，碳酸味唔係人工添加，而係自然發酵產生而成嘅。
呢款米酒好易入口，同韓國煎餅一齊食，簡直就係絕配，因為碳酸較重，亦有唔少韓國人鍾意將佢同水果撈埋一齊飲，做成馬格利雞尾酒。
2. 大發馬格利（6%）
呢款係小編好鐘意飲嘅大發米酒，同樣都係好易入口，飲起嚟好清爽而且唔會話好甜，但有一啲啲澀味，唔少年輕人都鍾意飲佢。
3. 優麴生馬格利（6%）
呢款係普通款米酒入面，飲起嚟澀味最少，最滑同爽嘅一款。如果一開始唔太敢飲米酒嘅朋友，建議可以先試吓呢款，味道唔會太濃，好多人都會一試就愛上。
4. 都家生馬格利 （6%）
呢款係全羅南道嘅老字號品牌，採用100%韓國米進行低溫發酵，飲嘅時候會覺得好清爽同有種甜味，沉澱物相對比較少，喺今年（2021年）仲換咗新包裝（左邊），希望可以進攻年輕人市場。
5. 砥平馬格利（5%）
砥平馬格利最出名就係佢分咗兩隻色，藍色「生（생）」係用大米做，飲嘅時候會有啲果香，令人會忍唔住飲完一啖再一啖，而橙色「生」係用蕎麥米酒，味道偏向傳統，唔會有太多碳酸，兩者都有佢哋獨特嘅味道。
6. 麴醇堂馬格利 （4%）
麴醇堂馬格利之所以會咁出名，係因為佢哋推出咁好多唔多水果口味，咁多款口味當中，小編最鍾意飲香蕉味，唔會太甜好濃郁，令人忍唔住好快飲完一支。
除咗香蕉味之外，桃味亦都係好受歡迎，好香桃味，唔會太甜，加上酒精濃度超低，飲幾多都唔怕醉。
7. 栗子馬格利（6%）
栗子口味係小編最推薦，除咗馬格利本身嘅味道之外，栗子嘅香味都好濃，感覺就好似食緊真栗子咁，而且呢款栗子米酒唔會太甜，如果冇飲過韓國米酒嘅朋友，小編都幾推薦大家買呢款。
韓國馬格利配煎餅
喺韓國有一個講法係落雨就要食煎餅同飲米酒（因為雨聲好似煎緊餅嘅聲），聽落真係好特別同神奇，唔知大家又有冇喺韓國食過呢？
以上係小編推薦嘅韓國米酒，有原味同好多其他口味，希望大家下次嚟韓國嘅時候試下啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk