＃北韓＃愛的迫降
＃北韓真實樣貌
＃GLOTRAVEL
本文由專營文化深度遊嘅香港旅遊品牌－GLO Travel、我要真北韓提供授權，請勿任意轉載。
✨馬上Follow我哋IG
instagram.com/creatrip.hk
徐丹家嘅百貨公司係咪真？
《愛的迫降》（來源：Netflix）
《愛的迫降》（來源：Netflix）
《愛的迫降》入面，徐丹（徐智慧 飾）家族嘅百貨公司，喺北韓真係有？有！而且唔止一間。
唔認識北韓嘅朋友，睇《愛的迫降》嘅時候，見到徐丹家族擁有嘅百貨公司，一定覺得好奇怪。
徐家百貨公司嘅規模係平壤最大嘅，各種貨品應有盡有，但北韓唔係社會主義國家嚟㗎咩？
名義上的確係，但北韓呢十幾年嚟已經逐漸市場化，買賣貨品、貿易活動等已成為日常生活嘅一部份。
有朋友留言問，《愛的迫降》 劇入面嘅百貨公司係咪誇大咗呢？
其實冇，今日喺平壤的確有咁大規模嘅百貨公司，我都去過四至五間。
喺四年前，我就分享過遊覽北韓旗艦百貨公司嘅後記：平壤光復百貨公司（介紹請點我）。
今天想介紹嘅係另一間百貨公司，應該冇太多人去過，係平壤最新建成嘅大型百貨──大城百貨公司，舊年先開張。
呢間百貨公司最大特點，係分類仔細，特別設有女裝服飾部門、名貴手錶部、花店、化妝品部、Food Court 等等，種類係全國最多。
每逢北韓領導人去過嘅地方，都會有招牌顯示。呢方面《愛的迫降》學得十足。
《愛的迫降》（來源：Netflix）
大城百貨係金正恩認可嘅高檔次百貨公司。
舊年4月金正恩巡視個陣，就讚大城百貨「商品陳列嘅方法多樣好睇。服務環境同規模、商品質量同品種都達到咗高水平，滿足到朝鮮人民日益提高嘅志向同要求。」
我去過好多個平壤百貨公司，睇得出大城百貨擁有最多嘅凍櫃，賣大量雪藏食物同啤酒。
出名嘅大同江啤酒更係貨源不絕，呢一點喺資源緊拙嘅北韓，叫做相當豪華。
點解北韓今日有咁多商店？
自從90年代北韓大饑荒（官方叫「苦難行軍」）以嚟， 原本嘅公共配給制度已經全面崩潰。
為求生存，北韓人開始喺地下市場做買賣，由於政府確實唔可以再配給足夠食物畀人民。
所以，北韓只好默許貿易發展，後嚟全國上下就發展出多個市場。
研究顯示，北韓官方認可嘅市場多達 404個，有一啲面積比起南韓首爾東大門更加大。
資本主義一旦開始就好難停底，當部份人民富起嚟，只會向政府要求更大嘅經濟自由，北韓就慢慢衍生出「錢主」呢種資產階級。
《愛的迫降》 入面，徐丹一家就係「錢主」嘅代表，佢哋表面仲擁抱共產主義、主體思想，實際上每日都喺度計緊點樣搵得更多，亦唔忌諱崇洋。
《愛的迫降》（來源：Netflix）
正如劇中徐丹聽到母親講英文，不禁問佢：「你以前唔係排斥美帝國主義嘅語言㗎咩？」口是心非，已經係今日嘅北韓新共識。
本文由專營文化深度遊嘅香港旅遊品牌－GLO Travel、我要真北韓提供授權，請勿任意轉載。
其他延伸閱讀 | |
 弘大平壤酒館 |  愛的迫降OST |
