《哲仁王后》食譜
《哲仁王后》越睇越餓...跟中殿娘娘嘅「青瓦台大廚」手藝整韓式料理！喺屋企都可以輕鬆煮？
Hello，大家好，我哋係由韓國人話你知每日最新資訊嘅Creatrip。
＃tvN＃哲仁王后
＃美食＃食譜料理
雖然係搞笑嘅穿越古裝劇，不過tvN韓劇《哲仁王后》已獲得咗好多好評，收視率更加係節節攀升。
故事講述青瓦台大廚穿越返去古代，就憑呢一個背景設定可以估到入面嘅美食鏡頭絕對唔會少，小編就盤點咗劇入面出現過嘅料理，大家睇吓邊一道係最好食？
✨馬上Follow我哋IG
instagram.com/creatrip.hk
《哲仁王后》食譜
1. 三香拉麵
《哲仁王后》喺第三集入面，中殿娘娘飲醉咗，第二朝瞓醒冇胃口，要大廚整一個好似拉麵咁樣嘅醒酒湯，但係煮極都唔滿意，就決定自己嚟整。可以話係當時成個朝鮮、唔係，應該係成個世界第一碗即食麵。
首先，將蔥、青瓜、紅蘿蔔切絲備用。因為故事背景仲未有即食麵，所以中殿娘娘就自己搓麵團、卷成波浪形狀落鑊油炸，成為世界上最早嘅「油炸即食麵」。
再將香料、蔬菜、辣椒等等嘅食材搗碎，磨成粉，過篩之後就係大家熟悉嘅即食麵調味料，最後同啲面一齊煮，好似第一張圖咁樣擺啲蔬菜，再打隻蛋點綴，《哲仁王后》版本嘅拉麵就係咁樣誕生，大家睇完係咪好餓呢？
大廚雖然有怨言，不過因為呢一款朝鮮版本嘅拉麵實在太好食，佢都忍唔住讚不絕口，仲幫呢一款食到三種香氣嘅料理改名叫「三香拉麵（삼향라면）」。
有人睇完呢一段劇情，就話其實係同後嚟韓國最出名嘅拉麵「三養拉麵」致敬。
2. 朝鮮神仙爐
大家有冇聽過呢一個料理？
呢樣係好經典嘅韓國古代宮廷料理「神仙爐（신선로）」，當然都難唔到《哲仁王后》入面嘅青瓦台大廚啦。
其實喺《哲仁王后》入面，省略咗好多烹調呢道料理嘅過程。
關於呢道料理喺《東國歲時記》入面有記載，將炭火擺喺火爐中間燒熱，將煎好嘅牛肉擺入油、醬油、雞蛋、蔥、大蒜入面煮，再喺火爐邊品嚐就叫煖爐會（난로회）；10月起，作為禦寒嘅當節飲食稱為煖暖會（난란회）；至於喺肉入面加入蘿蔔、地瓜、葷菜、雞蛋等熬成醬湯就叫做神仙爐，亦都稱為悅口子湯（열구자탕）。
實際上，神仙爐入面至少會加入切成薄片嘅各種肉類、蘿蔔、豆腐、白肉魚、煎餅、蔬菜、雞蛋、菇類、辣椒、核桃、銀杏等等，透過各種食材一齊烹煮，湯汁飲落就相當之有飽足感，唔怪之得被稱為神仙爐。
雖然《哲仁王后》入面出現嘅神仙爐，並唔係韓國獨有嘅飲食文化，畢竟呢一類火鍋、火爐飲食，最早係喺中國傳入，但韓國的而且確將呢一道料理發揚光大，成為宮廷入面最經典嘅代表性美食之一。
3. 油封式料理
而呢道料理就係《哲仁王后》劇情入面，中殿用嚟收買（？）大王大妃娘娘嘅第一步，齋睇呢一個擺盤，係咪好有米芝蓮嘅感覺呢？
實際上做起上嚟都係非常之花心機，果然係青瓦台大廚先有實力做出嚟嘅料理。
將魚肉切片處理完之後，鋪喺灑滿粗鹽嘅鐵盤上面，用油薄薄咁搽喺魚皮上面，再擺入焗爐入面以低溫慢焗成晚，留住肉汁嘅香氣，同時軟化肉質，食落完全唔老。
另外，另一道中殿娘娘相當之得意嘅料理，就係將牛肉切塊，擺入油鍋入面以低溫油炸成晚，呢種「法國油封式料理」，同樣都俘虜咗大王大妃娘娘嘅心。
睇吓大王大妃娘娘食完之後雙眼發光嘅表情，大家係咪都好想親自試吓張大廚嘅手藝呢？
4. 牛奶麵疙瘩
同樣出現喺《哲仁王后》入面，令人印象深刻嘅料理就係呢一道要攻入面嘅小牛斷食（？）先換嚟嘅牛奶麵疙瘩。
雖然望落係普通嘅麵疙瘩，但其實佢啲麵條係用薯仔整成嘅，食落一定鬆軟又好食。
中殿娘娘拎到珍貴嘅牛奶之後，喺煲入面反覆熬煮，直到變得濃稠，喺其他御膳房嘅廚師眼中，可以話相當之心痛。
灑啲粗鹽，將過咗水嘅麵疙瘩滰乾倒入牛奶鍋入面，朝鮮版本嘅麵疙瘩就咁完成！小編望到又開始肚餓啦。
大王大妃食完雖然滿意，但都略嫌有啲凍咗，反而令中殿靈機一觸諗到「朝鮮式外賣」嘅創業大計（？）都算係一個難得嘅劇情轉折位。
5. 杜鵑花果茶
喺古代，冰係非常珍貴，當時如果人要消暑，通常會用唔同果汁、草藥等等熬成冰涼下火嘅飲品，其中呢一個由御膳房大廚親自製作嘅「杜鵑花果茶」，睇完都令人想喺屋企入面試吓整，當中必備嘅食材就係劇入面所講嘅當令五味子。
將五味子浸開之後過篩，加少少蜂蜜凸顯甜味，加入切片嘅梨同桔，增加清涼感。
因為宮入面冇杜鵑花，就改咗用月見草嘅花瓣沾少少粉，喺熱水入面淥一淥、再過冷河之後擺入碗入面，加入三粒松子仁作為點綴，呢碗「杜鵑花果茶」就咁完成。
大家睇吓啲宮女開心嘅面貌，係咪好想自己喺屋企試吓整呢？
以上就係《哲仁王后》入面出現過嘅料理介紹，有部分料理其實可以試下喺屋企自己整！
唔知大家會唔會同小編一樣，有時候煲煲吓劇，睇到越嚟越餓？
✨馬上Follow我哋IG
instagram.com/creatrip.hk
| 其他延伸閱讀 | |
 韓國小菜文化 |  魚板嘅由來 |
