Hello，大家好，我哋係由韓國人每日提供最新旅行資訊嘅Creatrip。

韓國餐廳其中一個最吸引人嘅地方就係可以任食小菜，不過大家有冇諗過點解每間韓國餐廳都可以供應無限量嘅小菜呢？其實唔係韓國人特別闊佬，係同韓國嘅歷史發展同埋民族性有好大嘅關係。今日就等小編同大家講下小菜可以任食嘅原因啦！

韓國小菜文化

1. 最常見嘅泡菜

飯檯上面最常見嘅韓國小菜就梗係泡菜啦，如果唔係韓國有點會叫做泡菜國呢係咪先！

因為韓國冬天天氣太凍，幾乎都種唔到蔬菜，喺好耐以前啲人就將啲蔬菜醃好，等冬天嘅時候可以有菜食。除咗醃泡菜之外，醃蘿蔔、醃黃瓜都係主流之一，但整體嚟講，都係泡菜最具代表性。

其實泡菜一開頭唔係叫泡菜㗎，原先係叫沉菜。因為一開頭泡菜係需要沉入水裡面醃製。對而家嘅韓國人嚟講，泡菜已係生活唔可以缺少嘅一部分，唔少家庭都會一齊整泡菜，甚至係一次過整一年嘅份量添！

2. 其他常見小菜

除咗泡菜之外，韓國都仲有辣大豆芽、葉菜、葉紫蘇葉等等，甚至有一啲餐廳係會有蛋卷、炒年糕、等等嘅小菜。韓國嘅小菜通常都係好多款，會擺到成枱都係，望上去係好多選擇，好豐盛嘅感覺。

3. 大家仲會唔會自己做小菜？

隨住韓國嘅小家庭數量增加，好多人都會係大事大節一齊整泡菜，唔少長輩都會整好一大堆然後分畀啲離鄉別井嘅仔女。

如果係住喺大都市嘅韓國人，佢哋都會叫幾個家庭一齊，約好一個時間一齊買好大白菜再一齊醃泡菜。對韓國人嚟講，依家泡菜已經唔係因為冬天冇嘢食先整，而係因為食咗咁多年之後對佢有一種情意結，所以就想約埋一啲親戚朋友一齊去整。

韓國人會覺得如果去咗好遠嘅仔女可以食到屋企人親手整嘅泡菜，就可以取代到對屋企嗰種思念。

4. 點解餐廳小菜會係無限量供應？

韓國餐廳最好嘅地方就係可以任食小菜，只要食晒同店員講，店員都好快再畀新一碟，但大家有冇諗過點解會有呢個文化呢？

原來係因為以前韓國嘅經濟未係好好嘅時候，白米同埋泡菜就係最珍貴嘅食材。無論係喺屋企定係喺出面食飯，好多人都會食唔飽，但係又覺得唔可以大聲話再畀一碗白飯我，所以同店員講畀多啲小菜好似冇咁失禮。

好多韓國人都明白當時嘅食材物價比較貴，又知道客人冇咁多錢，所以許可嘅話都盡量會供應小菜比佢哋，所以久而久之呢種情就流傳到依家啦！

5. 點解韓國小菜可以無限量供應？

雖然依家韓國周圍都係任食嘅餐廳，但大家有冇發現其實韓國人都係會食足夠嘅份量，唔會叫太多呢？唔少人食任食嘅時候，都有一個心態係覺得要食返夠本，但其實韓國人都係食一兩輪夠飽就可以！

一開頭有好多韓國人都覺得將小菜無限量供應就會好蝕底，但另外有一班人就覺得呢一種習慣已經流傳咗咁耐，係應該繼續保留返呢一種「情」。

正正係因為咁，依家越嚟越多韓國嘅餐廳都做任食，等呢一種「情」可以流傳落嚟。唔知大家有冇諗過原來係因為呢個原因呢？

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購