2021年jtbc韓劇推薦
jtbc預訂再創收視記錄？7套2021年開播嘅韓劇！最期待呂珍九、丁海寅、路雲嘅新劇！
Hello，大家好，我哋係由韓國人話你知每日最新韓國資訊嘅Creatrip。
＃2021＃jtbc韓劇
＃韓劇推薦
有線電視台jtbc嘅韓劇係除咗tvN之外，相當有品質保證嘅「韓劇出產機」。
近呢幾年，有線電視台嘅韓劇聲勢更加逐漸輾壓無線電視台，因為tvN、jtbc呢啲非公營企業，係選材上面會比較大膽，更加迎合年輕人嘅口味，成為話題冠軍。
睇返呢兩年嘅熱門韓劇，大多數都係以有線電視台製作為主。2020年就嚟要結束，大家可以期待下嚟緊2021年確定會喺tvN開播嘅韓劇，唔少都係男女神級別嘅合作，真係相當之令人期待啊。
✨馬上Follow我哋IG
instagram.com/creatrip.hk
jtbc 2021年韓劇
1. 《前輩，不要塗那隻口紅》（선배 그 립스틱 바르지 마요）
- 主演：元真兒、路雲、李賢旭、李主儐、李奎翰
喺之前，jtbc嘅《前輩，不要塗那隻口紅》製作組已經公開咗演員圍讀嘅相，呢套劇將會喺2021年播出。
由路雲、元真兒、李賢旭、李主儐、李奎翰主演，《前輩，不要塗那隻口紅》自從今年夏天釋出咗即將製作嘅消息，就吸引咗好多人嘅期待。
路雲喺《前輩，不要塗那支口紅》入面飾演只係得一年資歷嘅新人化妝師，但就有令人淪陷嘅極優秀外表。
佢嘅上司就係由元真兒飾演，同溫柔嘅外表唔同，喺劇入面，元真兒會扮演口吻犀利、同時有領導才能嘅專業化妝師，兩個人會摩擦出點樣嘅火花？
路雲又可唔可以憑呢套劇坐穩新一代年下男神呢個稱號？
除咗愛情線之外，《前輩，不要塗那隻口紅》仲會由其他演技出色嘅演員，表演出艱辛嘅職場現況，相當令人期待。
目前jtbc呢個時段播映緊《Live On》，喺2021年播映結束之後會由《前輩，不要塗那隻口紅》接檔。
2. 《Law School》（로스쿨）
- 主演：金明民、柳惠英、金汎、李姃垠
《Law School》講述韓國最出名嘅法學院出現咗一單殺人事件，教授同學生都成為嫌疑犯，課堂上嘅法學知識同實際上嘅案件進度，將會成為辯證人性同理性嘅攻防，而呢一套劇都被稱為係講述法界人士透過案件嘅生存記錄。
透過《九尾狐傳》引起關注嘅金汎，將會攜手金明民、李姃垠，仲有《請回答1988》入面飾演寶拉嘅柳惠英，展現精湛嘅演技。
即將喺2021年開播嘅《Law School》講述領悟真情、法律同正義嘅過程，真係好令人期待！
3. 《雪滴花》（설강화）
- 主演：丁海寅、智秀、張勝祖、尹世雅、金惠奫、鄭釉珍
要講到jtbc喺2021年最受期待嘅韓劇，莫過於集結咗《天空之城Sky Castle》嘅編劇、導演，同埋丁海寅、BLACKPINK智秀（Jisoo）仲有喺《天空之城》入面嘅一班演技派演員嘅《雪滴花》。
呢套韓劇喺選角嘅時候，因為智秀宣布接演，已經獲得相當之高嘅關注，再加上丁海寅參與演出，令呢套劇嘅話題性更高。
《雪滴花》以1987年嘅首爾為背景，丁海寅飾演全身係血，闖入女子宿舍避開追擊嘅北韓政治犯，撞到由智秀飾演嘅女大學宿生，而佢以為對方係嗰個時代下參與民主抗爭嘅大學生，就不顧危險咁將佢收埋救治，最後仲陷入咗感情。
呢個時代嘅故事背景，淨係聽已經令人覺得好悲傷。
除咗由丁海寅、智秀主導嘅劇情主線，《雪滴花》另一個令人期待嘅原因，就係《天空之城》嘅尹世雅、金惠奫都確定會出演，唔知2021年jtbc最高收視率嘅韓劇會唔會係《雪滴花》呢？
4. 《月刊家》（월간집）
- 主演：庭沼珉、金知碩
同樣會喺2021年上半年喺jtbc播出嘅《月刊家》，圍繞住近期韓國最熱門嘅話題「買樓」。
根據製作組透露，韓劇《月刊家》會對觀眾提出「屋企對於你來講係點樣嘅存在？有乜嘢意義？」呢啲問題，突顯喺現代社會當中關於「樓」或者「屋企」嘅定義。
庭沼珉之前透過作品《惡作劇之吻》、《今生是第一次》，已經累積咗一定嘅知名度同演技認可，將會同tvN《了解的不多也無妨，是一家人》獲得好評嘅金知碩，擦出點樣嘅火花呢？
由庭沼珉飾演嘅生活雜誌〈月刊家〉編輯，一直以來都係畀緊高額嘅屋租，仲會精心咁點綴「人地嘅樓、自己嘅空間」。
直到佢遇到後生嘅時候為咗買樓而努力返工、學習地產知識嘅新屋主：金知碩，持有完全相反價值觀嘅兩個人，會喺《月刊家》入面刺激觀眾思考，小編覺得呢個故事應該都幾有意思㗎。
5. 《怪物》（괴물）
- 主演：申河均、呂珍九、鄭奎洙、千虎珍
jtbc另一套引人注目嘅韓劇，就係將會喺2021年播出嘅韓劇《怪物》。
咁啱撞正呂珍九出道15週年，佢都有喺自己嘅SNS上面上載應援餐車嘅認證照，而隔離塊牌就寫住jtbc金土（星期五、六）韓劇《怪物》，更加令人期待呢套新劇嘅開播！
申河均飾演生活平淡，即將面臨退休嘅老警察，遇到飾演高官之子嘅呂珍九，兩個人為咗搜捕殺人魔而破壞現有嘅法律同原則。
究竟《怪物》所指嘅係社會嘅真實層面？定係人類心入面嘅貪婪同恐懼呢？
《怪物》嘅副標題就係「怪物係邊個！係你、係我，定係我哋？」嘅質問，亦都令人更加期待呂珍九、申河均同埋一班實力派演員鄭奎洙、千虎珍喺《怪物》精湛嘅演出。
6. 《飛吧，蝴蝶》（날아올라라 나비）
- 主演：金香起、崔丹尼爾、吳允兒、沈恩宇、朴柾佑、文太裕、金佳熙
《飛吧，蝴蝶》講述咗髮型設計師同實習生之間嘅故事。
呢個都係韓國嘅電視劇入面，第一套用「美容院」作為背景，刻畫出一套完整嘅故事架構。情節都會圍繞喺「愛」同「努力」嘅過程，可以預想到係令人期待嘅溫馨嘅氛圍。
出演嘅演員亦已經全部落實，都係近年喺網路戲劇、韓劇、電影入面嶄露頭角嘅演員。
呢套《飛吧，蝴蝶》更加係崔丹尼爾時隔近三年，重新回歸小螢幕嘅作品，引發咗唔少嘅話題。
7. 《Undercover》（언더커버）
- 主演：金賢珠、池珍熙、林炯國
jtbc繼《夫婦的世界》，將會喺2021年開播同樣改編自BBC戲劇嘅《Undercover》。
劇情講述咗長期隱瞞真實身份嘅間諜，同埋為咗正義，而成為空降處長嘅人權律師之間嘅故事。
喺《Undercover》入面，為咗對抗強大嘅勢力、同時守護愛情、正義而開始咗激烈嘅鬥爭。
與此同時，兩個人都會持續咁追尋人類嘅多面性，同埋真實嘅是非對錯。除咗夫妻之間嘅猜疑、互信之外，故事都會牽涉到國家政治層面。
而更加令人期待嘅，係金賢珠、池珍熙兩個人嘅合作，係時隔五年再次同台！
以上係七套目前已經確定，jtbc將會喺2021年播出嘅新劇消息同陣容，唔知大家最期待邊套？
話唔定呢啲jtbc嘅新劇，又會刷新有線台最高收視記錄！
等我哋一齊期待下jtbc下年新劇嘅表現啦～
✨馬上Follow我哋IG
instagram.com/creatrip.hk
| 其他延伸閱讀 | |
 tvN2021韓劇 |  韓星藝名由來 |