韓國演歌文化——「Trot」
韓國傳統演歌「Trot」重新流行？時代經典反而係收視保證？一齊嚟認識韓國Trot文化！
Hello，大家好，我哋係由韓國人每日提供最新韓國旅行資訊嘅Creatrip。
瞭解一個國家自古傳承落嚟嘅藝術文化，例如繪畫、音樂等等，可以睇得出佢嘅底蘊有幾深厚。隨住時間流逝，實體嘅畫作無可避免會褪去原本鮮豔嘅顏色，但無形嘅音樂就可以透過旋律同歌詞做到代代相傳。
韓國軟實力強勁，唔單止係近年席捲全球嘅韓流文化，甚至連傳統演歌「Trot」都成為咗最近嘅大勢。大家又知唔知乜嘢係Trot？等我地喺下面同大家介紹啦。
韓國Trot文化
Trot嘅起源
韓國傳統演歌Trot（트로트）係朝鮮半島流傳已久嘅流行音樂，最早可以追溯至20世紀初嘅大韓帝國末期。Trot既唔係朝鮮式古代演歌，亦唔係日本演歌，更加唔係民謠，係韓國特有嘅演歌體制，喺當時可以話流行程度同現今嘅韓國流行音樂不相伯仲。
早期嘅Trot以長音階中減去Fa（4）、同Si（7）剩餘嘅五音長音階（Do、Re、Mi、Sol、La），同埋短音階中同樣減去Fa（4）、Si（7）嘅미야코부시（都節），亦因為節拍嘅關係，會有種好「接地氣」嘅獨特感。而經過時間演變，現今嘅Trot唔止有五音階，仲有七音階、敘事曲、搖滾等各種唔同嘅節奏，非常多樣化。
李蘭影〈木浦的眼淚〉（1935）
事實上，Trot嘅發展初期都遇上咗日本殖民時期，受西方同時仲有錄音設備影響嘅日本文化流入韓國，都造成Trot喺演繹方式上有唔同嘅變化。不過有部分韓國人就認為，嗰個時期嘅Trot唔可以稱之為Trot，而係一種結合西方、日本同當時嘅韓國地域色彩嘅流行樂。
不過因為主要受到日本嘅歌謠影響，韓國嘅演歌同日本嘅演歌可以話係有一定嘅相似程度。雖然已經脫離咗日本嘅統治，但睇翻當時嘅作品都仲可以感受到當時嘅親日主義，所以唔少韓國人都批評嗰陣嘅歌曲唔可以稱之為韓國本土嘅Trot。
南仁樹〈哀愁的小夜曲〉（1937）
不過有人解釋當時韓國嘅情況的確好難衍生符合本土韓國特色嘅音樂，畢竟受到日本帝國思想嘅高壓統治，韓國本土文化被扼殺，歌曲內容親日同帶有日本特色都算係逼不得已。所以韓國普遍都以1950年代，韓戰結束、脫離日本統治作為分水嶺，Trot正式喺呢個時期開始發展。
李蘭影〈木浦的眼淚〉（1935）
韓國Trot文化
Trot嘅發展
南仁樹〈離別的釜山停車場〉
1950年代，韓國脫離日本統治、再加上韓戰結束之後，雖然韓國Trot仍然具有日本帝國主義嘅色彩，但喺政府同民間團體努力試圖消除日本嘅痕跡之下，終於都創造出韓國獨有嘅演歌特徵。
呢種樂體逐漸受到大眾認同，喺當時嘅韓國樂壇佔據住主流地位，亦都成為韓國人普遍認同嘅Trot。1954年，亦都係韓戰之後，由李海燕前輩發表嘅〈斷腸的彌阿里嶺路〉就被喻為韓國Trot最經典、象徵離別嘅歌曲。
李海燕〈斷腸的彌阿里嶺路〉（1954）
而喺1970年代，韓國民謠（民歌）盛行之前，Trot可以話有非常亮眼嘅成績。因為啱啱50年代經歷完韓戰，呢個時間點令好多充滿悲傷、離別情懷、但又有堅強意志嘅Trot成為當代名曲。呢個時候嘅Trot都逐漸喺韓國大眾化，脱去日殖時代嘅影響，注入韓國本土嘅情感，唔再係日本演歌嘅附屬品，反而正式成為韓國嘅代表音樂之一，可以喺歷史上繼續流傳落去。
Trot比起而家嘅K-pop，當中包含嘅感情更加豐富，更加多感嘆詞，但係音調突兀嘅高低變化又比較少，所以更加考驗歌手對情緒嘅掌握。因為Trot嘅歌詞有包含愛情、離別同埋思鄉嘅愁緒，亦都有輕快、具有韓國各地方特色嘅歌詞，咬字要運用親切嘅方言語調同音階。仲帶有韓國國樂嘅旋律，所以可以喺Trot入面絕對可以明顯感受到一種鄉土情感。
李海燕〈斷腸的彌阿里嶺路〉（1954）
韓國Trot文化
Trot嘅黑暗時期
MBC《大學歌謠祭》（1988）
喺1970至80年代韓國民歌開始出現，雖然有被認為係Trot嘅分支或者係非主流嘅Trot，但民歌嘅急速發展仍然壓縮咗Trot嘅生存空間。喺嗰個時代，韓國社會運動席地而生，韓國人充滿住「要令國家變得更好」嘅情緒。Trot作為舊時代哀傷、惆悵嘅代名詞，自然漸漸變得唔受歡迎，去到90年代呢種情況就更加嚴重，韓國人甚至稱之為Trot最黑暗嘅時期。
除咗敘事曲（類似而家嘅流行樂），當時被認為係Trot界最頂尖嘅歌手都開始創作含有較少Trot色彩嘅專輯。甚至乎有舞蹈、嘻哈組合嘅出現，後嚟韓國樂壇開始被10至20代青少年主導，踏入21世紀就演變成今日嘅K-pop天下。
韓國Trot文化
Trot嘅文藝復興
雖然Trot未至於完全絕跡，仲有好多Trot嘅歌手努力咁製造Trot風格嘅歌曲，不過主要受眾已經變成中老年嘅韓國人。因為隨住時間過去Trot已經唔符合年輕一代嘅口味，而且Trot嘅歌詞悲苦嘅形象已經根深蒂固，比較後生嘅Trot歌手已經越嚟越少產出，得返啲中老年有一定數量聽眾嘅歌手繼續延續Trot嘅命脈。
張允瀞《天啊！》（2004）
不過21世紀嘅時候開始有啲轉變，20歲出道嘅歌手張允瀞，喺24歲發行佢第一張專輯嘅時候就用呢種韓國傳統演歌作為佢發展嘅方向，突破性獲得極高嘅人氣。除咗張允瀞，朴尚哲、朴玄彬、洪真英等等新世代Trot歌手都令沉寂已久嘅Trot界有返啲生氣。
雖然K-pop仍然係主流，影響力唔可以相提並論，不過Trot嘅舞台喺韓國唔同地區都依然有相當高嘅人氣。甚至好多K-pop歌手都有推出過同Trot相關嘅歌曲，廣告同綜藝節目都令越來越多年輕人接觸呢種韓國傳統嘅演歌文化。
韓國Trot文化
Trot嘅新高峰
林英雄（來源：TV朝鮮）
喺呢個網絡時代，選秀同綜藝節目令所有世代都開始關注Trot。嶄新嘅Trot以有趣嘅歌詞同歡樂嘅節奏，再加上越來越多人因為表演Trot而獲得極高嘅關注，呢一類嘅「舊文化」就開始吸引主導流行嘅年輕人嘅目光。
有調查機構就發現，喺2017至2018年，網絡對於Trot嘅提及量並無太大變化，不過由2019年開始就由13.6萬暴增到24.4萬。「Trot」嘅搜尋量更加係增加咗10倍，有成37.9萬次嘅記錄。
劉三絲
最近嘅大勢綜藝《玩什麼好呢？》仲有《Mr. Trot》嘅熱播（尤其《Mr.Trot》仲試過有超過35%嘅收視率），呢啲綜藝節目對於推廣Trot文化可以話係功不可沒。劉三絲（Trot歌手身份嘅劉在石）、林英雄（《Mr.Trot》冠軍）呢啲新生代Trot歌手嘅誕生。同埋《Mr.Trot》入面重新演繹過往略顯老氣嘅歌曲成功吸引大眾目光，復古同懷舊潮流興起正式成為韓國嘅主流，令唔少元老級嘅Trot歌手都重新獲得關注。
羅勳兒（來源：KBS）
被稱為「Trot皇帝」嘅歌手羅勳兒，甚至時隔15年，即係今年2020年喺KBS舉行咗中秋特別演唱會，獲得歷史性嘅收視紀錄，釜山收視超過38%，連首爾都突破30%。
韓國Trot文化
Trot嘅未來？
有人表示，Trot喺韓國嘅流行恐怕只係曇花一現，因為多數粉絲都只係鍾意特定嘅歌手而唔係出於對呢種音樂嘅熱愛，有其它以Trot為主題嘅音樂節目雖然係收穫好評但收視率唔算亮眼，更加印證咗呢種說法。
繼《Miss Trot》同《Mr. Trot》嘅大成功，各大電視台都紛紛推出Trot主題嘅選秀。頻密嘅選秀帶來嘅後果就係人才耗盡，節目壽命縮短，所以Trot選秀都令人擔心會唔會步上偶像選秀嘅後塵。
林英雄（來源：TV朝鮮）
呢種情況就好似當年《PRODUCE 101》大成功之後，《The Unit》、《MIXNINE》、《Under Nineteen》等偶像選秀節目一套接一套製作嘅情形。《Miss Trot》完全可以睇作《PRODUCE》第一季、《Mr Trot》就係《PRODUCE》第二季嘅男子版。
世界上每個國家嘅歷史同文化，都會無可避免地隨住時間流逝漸漸被大眾丟淡，又或者係進化成其它形式繼續傳承。Trot就係直到有人意識到呢種韓國嘅演歌文化唔可以消失，所以再度進行創作，引起大眾關注。Trot熱潮退去之後，就需要尋找下一項復興嘅文化。
現役當紅偶像參加呢一類節目，又或者向粉絲表演Trot，都係一種文化傳播嘅形式，引起其他受眾嘅關注，令Trot呢種演歌繼續流傳落去。
以上就係韓國演歌「Trot」文化嘅介紹，唔知大家有無對Trot更加多了解？希望大家鍾意呢次嘅介紹，我哋下次再見～
如果有更多想知嘅內容，都可以隨時留言或者dm話俾我哋知：）
Instagram：creatrip.hk