韓國旅行必做嘅事
20件嚟韓國必做嘅事，冇做過都唔可以話嚟過韓國！
Hello，大家好 ，我哋係由韓國人每日提供最新韓國旅行資訊嘅Creatrip。
嚟緊香港開始就放連假，大家又買咗機票準備飛未呢？今日小編就想同大家講吓嚟韓國必做20件事！冇做過都唔可以話嚟過韓國！
韓國旅行必做嘅事
1. 食超邪惡五花肉
嚟韓國必食嘅，梗係燒到吱吱聲，又多油花嘅五花肉啦！平時大家可能怕肥唔敢食，但嚟到韓國唔可以唔試！肥？去完旅行再減啦！
2. 同大叔一齊企喺路邊食小食
天氣涼涼哋，最啱就企係路邊攤食魚糕，好多大叔都會企喺度食㗎！大家咁做就好似當地人一樣，感覺幾爽㗎！
3. 嘗試韓國特色料理
識郁嘅章魚、生牛肉、海腸、魟魚、蠶蛹⋯⋯都係韓國好有特色嘅食物，但對於外國人嚟講可能唔係咁易接受，唔敢去試。如果有機會嘅話，不妨放膽挑戰吓！
4. 汗蒸幕捽死皮
應該唔少人都去過汗蒸幕，但就未必都試過俾人捽過死皮。小編試過一次，見住啲死皮一粒粒咁流出嚟，雖然覺得好丟臉，但捽完之後皮膚真係好滑，大家都可以試吓！
5. 叫外賣
韓國嘅外賣服務業真係好發達，只要撳幾下就叫到餐，仲好快送到！款式包羅萬有，唔只有炸雞，韓餐、中華料理、豬腳、辣炒年糕等小吃，甚至係咖啡甜品，都可以透過外賣app叫到！
6. 漢江公園野餐
INSTAGRAM：sojinii_2
春天、秋天嘅時候，喺漢江公園吹住微風，同三五好友，或者另一半一齊野餐，食炸雞，飲返杯，附近便利店仲有煮即食麵嘅機可以煮到拉麵食，都幾嘆㗎！好多韓國人都會趁天氣好嘅時候嚟到漢江公園野餐，大家都可以試吓！
7. 去Club
韓國嘅首爾弘大、江南、梨泰院一帶有好多club，或者酒吧，想體驗吓嘅朋友可以去high吓，放鬆吓心情，不過都注意人身安全啊！
8. 著韓服
嚟韓國一定會想試嘅傳統體驗之一「韓服」，景福宮附近有好多租借韓服嘅舖頭，設計款式、顏色各有各嘅特式，大家都可以喺揀間啱心水嘅租，著住韓服行傳統嘅宮殿，更加有feel！
9. 著韓國校服
大家睇韓劇都知韓國嘅校服好靚，亦自從《Produce》選秀節目大紅之後開始興起著高中校服嘅體驗。韓國人都好鍾意喺週末同啲朋友，或者係另一半穿著高中校服去樂天世界玩，好似重回18歲嘅感覺，大家下次嚟都試吓啦！
10. 著復古衫
韓劇《陽光先生》掀起復古風，喺益善洞、西大門區紛紛開咗租復古服裝嘅舖頭。喺個充滿傳統氣息嘅小區，著住靚靚嘅復古裝，一定係一個好特別嘅體驗！
11. 喺布帳馬車飲酒
韓國有唔少酒屋俾大家圍埋一枱嚟坐，飲吓酒，食吓簡單嘅下酒菜，好多後生仔都鍾意去吹水、聚吓腳，有一啲係舖頭，一啲係戶外嘅布帳馬車，一到夜晚就好熱鬧！
12. 搭巴士
要好似韓國人咁旅行，最緊要就係要識得搭巴士。搭地鐵有時要轉線，又唔似得香港咁就咁過對面，要上上落落行樓梯，所以有時搭巴士會仲快！首爾都有一啲巴士專用嘅路，減少塞車情況，可以放心！
13. 搵小型超市行
大家可能都去開樂天、emart、homeplus等等大型嘅超市，因為夠大，可以一次過掃貨，但唔好嘅地方就係多人，所以小區入面嘅小型超市都唔錯，少人啲，仲有時會特價嘅水果，或者打折嘅時候，大家下次嚟都可以搵吓小型超市行吓！
14. 買到行李超重
既然講到shopping掃貨，大家最擔心嘅梗係行李超重啦！但係都嚟到韓國啦，冇理由忍手唔買㗎嘛！唔買到行李超對唔住自己啊！
15. 行地下街
除咗大型shopping mall，地下街都係超好行，超好買啲地方！有多到眼花撩亂嘅衫褲鞋襪，中間又有美妝店，價錢又唔貴，滿足晒大家嘅要求！
16. 亂咁行結果盪失路
去旅行人生路不熟，總係有盪失路嘅時候，但係有時咁樣雖然去唔到本來想去嘅地方，但沿途嘅風景，遇到嘅人或事，都可能令人難以忘記，喺一個意外嘅收穫！
17. 去淨係得韓文嘅餐廳
大家肯定經歷過跟住旅遊書去嘅餐廳，有時都好伏！如果舖頭入面得韓國人嘅話，伏味瞬間大減！因為韓國人對食都幾有要求，太難食太貴嘅話，一定撐唔到落去！所以去一啲淨係得韓文嘅餐廳，除咗更加地道之外，仲可以減低中伏嘅機會！
18. 去咗超伏嘅餐廳
不過亦都可能就算去咗得韓國人嘅餐廳，有好多人推薦嘅美食店，但係口味唔啱就係唔啱，咁樣就抱著一試嘅心態就算啦！如果冇中過伏嘅朋友，小編恭喜你！亦都好歡迎大家同小編分享伏店，等大家都避開！
19. 識韓國新朋友
每次嚟韓國，或多或少都會識到新朋友，雖然而家因為疫情影響而冇得見，但耐唔耐問候下對方都係必須嘅，一齊期待之後喺韓國相聚嘅日子啦！
20. ＿＿＿
最後一個要完成嘅清單，就俾大家自行填空啦！大家嚟韓國必做嘅事係咩呢？歡迎同小編分享！
以上就係小編為大家列出20個嚟韓國必做嘅清單，唔知大家完成咗邊啲呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk