2026最新7款韓國必買手信總整理
飛韓國仲只係買紫菜同面膜返香港就太out啦！話你知今年最興買咩手信啦！
- 韓國手信應該要點揀？
- 2026年最值得買嘅韓國手信有邊幾款？
- 2026最新韓國手信送禮對象推薦
- 買韓國手信之前有咩要注意？
- 韓國手信常見問題FAQ
Hello，大家好，我哋係由韓國人每日提供最新韓國旅行資訊嘅Creatrip。
無論係第一次飛韓國，定定期都會嚟韓國玩，每次諗要買咩韓國手信返屋企送人都係一個煩惱...
而正所謂手信重質不重量，身為大家嘅韓國旅行小幫手，今日就等小編推薦7樣2026年韓國最新潮手信，唔單止可以代表韓國得嚟仲夠特別，而且無論送禮自用都一流嘅韓國手信俾你，夠潮夠新之餘仲夠實用！
喺今日呢篇文章你可以睇到：
- 韓國手信挑選指南
- 購買韓國手信注意事項
- 7樣2026年最流行韓國手信推薦
- 各種韓國手信推薦對象等！
韓國必買手信總整理
韓國手信應該要點揀？
如果你怕買錯手信，最簡單可以先用以下方式分類：
- 送同事/多人分派：揀價錢唔太高、容易分、包裝整齊嘅產品
- 送普通朋友：可以揀香氛、時尚配件、生活用品，會更有個人風格
- 送長輩/正式場合：高級甜品、包裝體面嘅禮盒會穩陣好多
- 送另一半/親密朋友：可考慮設計感較強、帶少少個性嘅品牌
- 買俾自己：可以優先揀實用度高、日常真係會用到嘅產品
如果你行程唔多時間，建議優先去聖水或明洞。聖水比較多有設計感同新潮品牌，明洞就相對方便旅客順路買。
小編自己喺韓國住咗一段時間，每次返香港都會特登揀手信俾家人朋友，所以喺揀禮物方面累積咗唔少經驗。而且小編自己平時都會留意韓國最近流行嘅送禮品牌，以下介紹嘅商品除咗有部分係親身買過、用過或者送過俾朋友之外，亦有參考近期門市同品牌資訊整理，大家下次飛韓國之前可以放心參考！
2026年最值得買嘅韓國手信有邊幾款？
1. newmix coffee(뉴믹스커피)
- 購買地點：聖水、北村、樂天百貨公司明洞本店、漢南洞
- 價錢：₩9,000~₩ 17,900
韓國即溶咖啡係韓國人必備飲品之一，而最近即溶咖啡更加成為韓國最受歡迎嘅手信之一！
無論係喺韓劇、司機食堂、甚至係寫字樓Pantry都可以見到即溶咖啡包嘅蹤影，係唔少人飯後必飲嘅飲品，亦都係放鬆職場壓力嘅良藥。而「newmix coffee」就將呢種韓國人熟悉嘅日常飲品，重新包裝成更有設計感、更加適合送禮嘅版本。
相比一般超市即溶咖啡，呢個品牌最吸引嘅地方係包裝夠新潮、視覺上夠精緻，就算係送俾平時唔算特別飲咖啡嘅朋友，都唔會有種太隨便嘅感覺。
「newmix coffee」嘅即溶咖啡唔會好甜，連平時唔太飲咖啡嘅朋友們都話好飲，對鍾意咖啡嘅人嚟講更加會係一種既懷舊又新潮嘅體驗！除咗基本口味，仲有抹茶、烤栗子、雲呢拿生日蛋糕味、香蕉奶味等較特別嘅款式，對於鍾意試新嘢或者想買得有少少驚喜感嘅人嚟講，會特別有吸引力。
而且大多數產品都係一盒裝、易拎、唔算太重，如果你本身要買幾份分俾同事或者朋友，呢款真係幾實際。
💡小編小貼士：如果你係買俾公司同事或者一班朋友，建議直接揀禮盒裝，包裝完整之餘又方便分派；同時建議大家去實體店試飲之後再揀會穩陣啲！
2. DOUBLE LOVERS(더블러버스)
- 購買地點：聖水旗艦店、明洞旗艦店
- 價錢：₩49,900~₩69,900
「DOUBLE LOVERS」係而家喺韓國討論度好高嘅眼鏡牌子，好多韓國KOL同model都有戴過，如果你想買一份有時尚感、唔會太普通嘅韓國手信，大家可以考慮去佢哋聖水同明洞旗艦店行下！
小編認為佢哋會咁受歡迎，最大因素係呢度嘅眼鏡同太陽眼鏡款式幾多，而且設計路線係有型得嚟唔會太難駕馭，唔似部分潮牌咁太前衛，日常戴都算易襯。
價錢方面一副平均大約₩49,900(49900)左右，雖然唔算超平，但考慮到設計、質感同整體完成度，其實CP值唔差。特別係如果你本身想送俾注重穿搭、影相、造型感嘅朋友，會比一般小手信更有記憶點。
而「DOUBLE LOVERS」聖水旗艦店款式通常比較齊，就算最後未必即場買，都幾值得入去試戴睇吓。小編身邊唔少人都話本身係想買手信俾朋友同屋企人，點知最後買埋自己嗰份，大家有時間記住去行吓啦！
💡小編小貼士：比起大量派街坊，眼鏡同太陽眼鏡比較適合作為一份有心思嘅禮物，不過始終比較睇面型同個人風格，所以如果係送禮，建議優先考慮基本色、鏡框線條簡潔嘅款式！
3. Nuflaat(누플랏)
- 購買地點：聖水「HAUS NOWHERE SEOUL」3樓
- 價錢：₩24,000~₩120,000
「Nuflaat」係韓國最出名嘅眼鏡牌子之一「GENTLE MONSTER」旗下推出嘅生活風格品牌，餐具本身唔單止實用，設計上亦都帶有明顯藝術感，所以成件事會比一般杯碟餐具更有收藏價值。
如果你想買一份唔大路、夠特別，而且一睇就知你真係有用心揀過嘅韓國手信，「Nuflaat」會係好值得考慮嘅選擇。
「Nuflaat」實體店位於今年聖水人氣打卡點「HAUS NOWHERE SEOUL」三樓，行入去就好似去咗美術館睇展咁，每一件餐具都會即刻吸引到你目光。
上面呢款「Nail Collection」係「Nuflaat」嘅人氣系列，喺杯柄同水壺柄位加咗鮮明嘅紅色指甲圖案，成個造型好搶眼，更加有明星喺社交平台上分享過，討論度高。而且同普通大量批發餐具唔同，設計夠特別又唔容易撞款，如果你身邊朋友鍾意設計、藝術或者室內擺設，非常推薦大家買呢個返去送俾佢哋！
不過要注意因為部分商品比較易碎，所以唔太適合需要買好多份手信，又怕行李太多嘢裝嘅朋友們買返去。
💡小編小貼士：HAUS NOWHERE SEOUL大樓嘅5樓係NUDAKE TEAHOUSE，呢間Cafe會用到「Nuflaat」嘅餐具上菜，建議大家去現場感受吓餐具實際使用效果，再決定值唔值得買返去送人；另外如果你行李空間唔多，建議優先揀細件、唔易碎嘅商品！
4. hetras.(헤트라스)
- 購買地點：聖水、明洞、安國
- 價錢：₩8,800~₩64,000
講到送禮安全度高、男女都啱、價錢又唔會太有負擔嘅韓國手信，hetras. 真係幾值得放入名單。
佢係韓國香氛品牌，由香水、擴香、護手霜、洗手液到沐浴露都有，最大優點係香味統一感做得好，同一款香味可以喺唔同地方用到，而且包裝簡潔有質感，一拎上手就唔會有平價雜貨嘅感覺。
通常香港朋友們都會買「hetras.」嘅hand cream做手信，一來單價唔高，二來比較容易送人，唔需要考慮太多尺寸、使用習慣等問題。而且價錢唔貴但香味夠高級，小編同事都有一支，真係每次聞到都會知道係嗰位同事用緊XD
如果對方平時有用香氛產品習慣，擴香同香水都係一個唔錯嘅選擇，而品牌人氣香味 Hotel Wood 就屬於相對穩陣、容易令人接受嘅木質調。氣味優雅，有一種高級酒店大堂嘅味道，唔分年齡同性別都可以用。
就算唔知道自己平時鍾意咩香味，都可以去實體店逐款香味試！2025年開業嘅聖水店無論係平日定weekend都好多人去，如果大家想買夠實用得嚟，包裝簡約有質感嘅韓國手信，非常推薦大家去「hetras.」！
💡小編小貼士：如果你唔知對方平時鍾意咩香味，比起直接買香水，會建議先送hand cream，可以俾對方先試下個香味之餘接受度通常會比較高；另外液體類產品要留意行李安排，如果你準備手提上機，記得先確認容量限制！
5. LADOR(아도르)
- 購買地點：聖水旗艦店
- 價錢範圍：₩18,000~₩40,000
如果你想買一份偏實用型、真係可以日日用到嘅韓國手信，不妨可以考慮最近人氣韓國護髮品牌「LADOR」嘅美髮產品！尤其對於平時有染髮、電髮，或者比較重視髮質保養嘅人嚟講，接受度通常都幾高。而且產品設計極簡，貼近韓國潮流趨勢。
「LADOR」其中一個最受歡迎產品就係香氛髮尾油，質地唔會太厚重，用落完全唔會笠之餘帶有令人放鬆嘅香氣，同時可以令頭髮睇落更柔順有光澤。佢哋最受歡迎嘅香味係檜木味，味道清新乾淨，男女老少都啱用，當禮物送人基本上唔會出錯！
相比起純粹得包裝靚但未必好用嘅產品，「LADOR」係屬於實際用落有感、送人又唔算浮誇嗰類型，所以如果你身邊朋友平時有打理頭髮習慣，呢款會係幾穩陣嘅選擇。
呢個牌子喺韓國網上好受歡迎，如果想親身試用產品，推薦大家去聖水旗艦店，聞完香味同試完感覺先之後再買！
💡小編小貼士：比起洗頭水或者髮膜，髮尾油通常會比較適合送人，因為對方平時就算唔係用同一系列護髮產品，都可以搭配使用，比較百搭！
6. Matin Kim(마뗑킴)
- 購買地點：聖水店、聖水旗艦店、島山店、明洞店、樂天百貨店本店等
- 價錢：₩18,000~₩68,000
如果你本身鍾意韓國時尚品牌，相信一定唔會對「Matin Kim」呢個品牌陌生。
呢個品牌近年一直都好有人氣，連喺香港都開埋分店！佢哋最大特色係設計風格夠簡潔，但又唔會太平平無奇，亦唔會限年齡或者風格，屬於容易融入日常穿搭、送人亦唔算太冒險嘅牌子。而且有好多版型係男女共用，所以無論送俾男仔定女仔，都比較容易揀到合適款式。
比起直接買衫，「Matin Kim」嘅銀包、卡套、Cap帽、冷帽、袋同小配件會比較適合帶返香港做手信，因為呢類單品價位相對易接受，而且唔使太擔心尺碼問題。如果你送嘅對象平時本身有留意韓國潮流品牌，收到呢類型配件應該都會開心，因為實用之餘又帶到少少品牌辨識度。
可能大家會覺得反正香港都有，點解要喺韓國買？但喺韓國分店款式會更齊全，特別係可以搵到最近推出嘅款式，而且價錢會平過香港，推薦大家可以抽時間去行行！
小編自己之前都有去過聖水店行過，除咗有服飾系列之外，「Matin Kim」最受歡迎嘅銀包、冷帽、袋同其他配飾、首飾都好齊全。大家可以直接搵一日連埋上面介紹過嘅聖水鋪頭一次過行，買齊送俾家人朋友嘅手信！
💡小編小貼士：淡季貨款有機會減價，如果平時有一直心思思想買嘅產品，可能會趁機以低價入手。
7. atelier POND(아뜰리에 폰드)
- 購買地點：漢南店、江南店、蠶室 Lotte World Mall店、狎鷗亭羅德奧Galleria百貨店
- 價錢：₩31,000~₩84,000
如果你今次去韓國，係想買一份拎得出手、包裝有體面、適合正式送禮場合嘅手信，「atelier POND」會係一個非常穩陣嘅選擇。呢個品牌喺韓國一直有「送俾重要人士嘅甜品」呢種印象，所以唔少人買嚟送長輩、見家長、節日拜訪，甚至商務場合都會考慮。
佢最令人印象深刻嘅，唔單止係甜品本身，而係整體包裝設計，尤其木盒禮盒款式，一睇就比一般零食高級得多。食完之後盒仲可以留返嚟做收納或者擺設，令成份禮物唔止停留喺「食完就冇」嗰種感覺，呢點對送禮嚟講加分幾大。
如果你有時間，仲可以去漢南店嘅Cafe試食佢哋嘅金磚蛋糕、貝殼蛋糕、可麗露等等嘅甜品，食完覺得啱口味可以買返去做手信。如果想買韓國手信俾重要嘅人，「atelier POND」絕對可以列入你嘅考慮list入面！
💡小編小貼士：呢類高級甜品最適合送俾長輩、上司、第一次見面嘅重要對象。不過如果你當日行程仲有好多地方要去，記得留意保存同攜帶問題，避免長時間拎住影響甜品狀態。
2026最新韓國手信送禮對象推薦
上面介紹咗7款2026年最流行買返香港做手信嘅產品，由食物到美髮產品、香氛、流行眼鏡同服飾等等都有！如果仲係唔知道應該要點揀好，不妨可以參考以下表格，今次飛韓國跟住買啦！
食品類
品牌 | 地點 | 價錢 | 推薦送禮對象 |
newmix coffee (即溶咖啡) | 聖水、北村、明洞、漢南洞 | ₩9,000~17,900 (9000~17900) | 送俾一大班同事/朋友 |
atelier POND (高級甜品) | 漢南、江南、蠶室、狎鷗亭 | ₩31,000~84,000 (31000~84000) | 長輩、上司等重要人士 |
時裝類
品牌 | 地點 | 價錢 | 推薦送禮對象 |
DOUBLE LOVERS (眼鏡/太陽眼鏡) | 聖水、明洞 | ₩49,900~69,900 (49900~69900) | 鍾意打扮、追求時尚人士 |
Matin Kim (時裝精品) | 聖水、島山、明洞等 | ₩18,000~68,000 (18000~68000) | 鍾意韓國潮流時裝人士 |
生活雜貨類
品牌 | 地點 | 價錢 | 推薦送禮對象 |
Nuflaat (設計餐具) | 聖水 | ₩24,000~120,000 (24000~120000) | 鍾意藝術感禮物人士 |
hetras. (香薰類) | 聖水、明洞、安國 | ₩8,800~64,000 (8800~64000) | 男女都啱 |
LADOR (美髮產品) | 聖水 | ₩18,000~40,000 (18000~40000) | 注重頭髮護理、實用派 |
※上述價錢為2026年4月價錢，實際價格會因門市、限定包裝或合作系列而有差異
買韓國手信之前有咩要注意？
買韓國手信之前，其實最重要唔係一開始就諗「邊樣最紅」，而係先諗清楚你係買俾邊個、預算大概去到幾多，同埋自己行程仲有幾多時間同行李空間。因為有啲手信雖然睇落好吸引，但未必適合大量購買；有啲就算包裝靚、送得出手，拎住成日行街或者帶上機時又未必最方便，所以出手之前最好先衡量實際情況。
如果你打算買香氛、護手霜、護髮油或者其他液體類產品返香港，都要順便留意返行李同上機限制。尤其如果你係手提行李上機，容量限制一定要先睇清楚；如果係寄艙，亦都建議包好少少，避免途中擠壓或者漏出嚟。至於甜品類手信，就要考慮埋保存時間、天氣同你當日行程安排，因為有啲產品雖然好適合送禮，但未必啱太早買，否則拎住去幾個地方之後，包裝或者狀態都可能受影響。
仲有一點幾值得留意，就係眼鏡、時尚配件或者香味產品呢類手信，其實都幾睇個人口味。呢類型產品送得好會令人覺得你好有心思，但如果對對方平時風格唔算太了解，最好都係揀相對安全、接受度高啲嘅款式。簡單嚟講，買韓國手信最穩陣嘅方法，始終都係先按送禮對象、用途同方便程度去揀，咁樣會比一味追最紅、最熱門更實際。
注意事項小總結
- 香氛、液體類產品要留意行李容量限制
- 甜品類手信要考慮保存時間同天氣
- 眼鏡、服飾類產品較睇個人口味，不建議太隨便代買
- 如果你時間唔多，建議先按送禮對象分類，再決定買邊款
韓國手信常見問題FAQ
Q1. 2026年去韓國最受歡迎嘅手信係咩？
A：近年比起傳統零食，更多人會揀有設計感、生活感或者品牌感較強嘅產品，例如即溶咖啡禮盒、香氛護手霜、生活餐具、高級甜品同韓國時尚配件。
Q2. 如果想買送同事嘅韓國手信，邊款最穩陣？
A：如果係送同事或者想買幾份方便分派，newmix coffee同 hetras.護手霜都係相對穩陣選擇，價位容易接受，包裝亦夠整齊。
Q3. 邊款韓國手信最適合送長輩？
A：如果係送長輩、上司或者正式場合，atelier POND會比較合適，因為包裝夠體面，而且甜品禮盒本身就較有正式送禮感。
Q4. 韓國香氛產品適唔適合做手信？
A：適合，尤其係護手霜、洗手液、擴香等產品。不過香味始終有主觀性，如果你唔清楚對方鍾意咩味，建議揀接受度較高、單價較低嘅產品（例如hand cream）入手。
Q5. 邊區最適合集中買韓國手信？
A：如果你想集中行較多新潮品牌，聖水會更適合；如果你住喺市中心或者行程唔多時間，明洞會更方便。
Q6. 韓國甜品手信帶返香港方便嗎？
A：一般可以，但要視乎產品保存方式、天氣同你當日行程而定。如果係奶製品較多或較脆弱嘅甜品，建議安排喺旅程尾段先買。
Q7. 如果只得半日時間買手信，應該點揀？
A：建議先按送禮對象分類，再集中去一區購買。想買多樣品牌可考慮聖水；想快手補貨可考慮明洞或百貨公司。
韓國手信而家唔再係揀啲大路款，而係買返啲有品味、而且有韓國特色又實用嘅禮物。下次去韓國旅行，唔好淨係買紫菜同面膜，試下揀啲更有心思、會留低回憶嘅手信啦！
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
