韓國手信推薦清單
手信唔淨止零食！韓國手信推薦清單，送俾同事朋友都夠得體！
- 護膚品&化妝品
- 即食麵
- 零食
- 料理包/醃製食品
- 水果乾/乾貨
- 人蔘
- 棉被
- 韓國酒
- 咖啡&韓國傳統茶
- 傳統手信
- 藝人週邊
- 襪
- Starbucks限定產品
- 文具精品
- 明信片
- KAKAO FRIENDS
- 手機配件
Hello，大家好，我哋係由韓國人每日提供最新韓國旅行資訊嘅Creatrip。
韓國旅行真係好多嘢好買，不論係食嘅、飲嘅、著嘅、用嘅都買唔晒。不過有時大肆宣告自己去咗韓國玩，帶咩手信俾上司同事、姨媽姑姐都會諗爆頭。小編整理咗啲韓國旅行嘅手信清單，仲有一啲「嚟韓國買就啱晒」嘅手信，快啲save低，去掃番啲手信俾親朋好友啦！
韓國Shopping必備😉
韓國手信推薦清單
護膚品&化妝品
就算唔買嚟做手信，相信好多女士們嚟韓國應該都會為買唔少化妝同保養品㗎啦！韓國美妝價錢加埋退稅，真係超級抵，平過入口去香港嘅價錢一大截。
韓國化妝品都有唔少品牌，價錢都合理，而且夠高質，想化返個韓妝，一定要買返盒！
如果送護膚品或化妝品怕對方用唔慣或過敏，基本嘅潤唇膏、hand cream等等，都係唔錯嘅選擇。
韓國好多面膜都超補水，每次小編朋友嚟韓國，都會掃好幾盒面膜返去！通常喺Olive Young、Lalavla就可以搵到唔同品牌嘅面膜，如果怕買一盒有負擔，買一塊試完覺得OK，再大量入手都冇問題。提提大家Olive Young逢3、6、9、12月都會做大減價，記住唔好錯過啦！
即食麵
可能好多人都會覺得香港超市明明都有韓國即食麵買，點解嚟到都仲要買？因為唔少人食過對比之後，都覺得味道好唔一樣，而且有啲款只有韓國先有得買！
有啲款式可能因為太好賣，成日都好少見到佢嘅蹤影，如果一見到一定要拎返幾包！
買幾款唔同口味嘅即食麵返去，分晒送俾朋友做手信，相信朋友收到都會好開心！
零食
韓國零食成日都會出新口味，好推薦大家去當地超市大量入手，因為好多時都會有促銷活動，可以用好平嘅價錢就買到。
近呢幾年呢種杏仁超受歡迎，有勁多款味，例如有芥末、焦糖、粟米等，配返支啤酒，真係好食到令人停唔到口！而且通常都會有Party Pack賣，好啱買返去派街坊XD
料理包/醃製食品
韓國呢啲簡易料理包相當方便，只要加熱水或者放入微波爐叮一叮就可以，方便得嚟又好味。
옥션
另外最近又唔少人都會去韓國超市買醃製食品返去，喺香港都可以食到正宗韓國味啊嘛！
旅行嘅時候都可以安坐家中等超市送貨？
水果乾/乾貨
好多人嚟到都會去南大門買唔少水果乾同乾貨返屋企，特別係士多啤梨乾，脆到好似零食咁嘅口感，再帶有微酸嘅果香，忍唔住要食完一啖又一啖！
另外呢啲番薯乾，都係唔少人嚟到都會買嘅產品之一！甜得嚟又有咬口，相信每個人都會鍾意食！
紫菜都係嚟韓國必買清單之一，雖然簡簡單單，不過無論係當零食定用嚟送飯都好正！
點先可以用最抵價錢買到手信返屋企？🤩
人蔘
大家都知人蔘係韓國名產，好多時想買到人蔘又唔知邊度買，小編推薦可以去祭基洞。觀光客成日買嘅乾燥人蔘大約₩50,000至₩80,000，唔同嘅大細會有唔同價格，等級一樣，大家可以根據自己嘅預算去買。
韓國對於食人蔘都好有創意，除咗可以生食，亦可以加牛奶再落少少蜂蜜做成奶昔，或者烤嚟食都OK！不過提提大家提大家經過燉煮、乾燥等加工嘅人蔘可以直接帶返去香港，無須通報。不過新鮮人蔘就唔可以，請喺韓國當地食用。
如果覺得人蔘帶返香港有啲唔方便，亦都可以買呢啲一盒入面散裝嘅紅蔘液，食落簡單又健康。
棉被
韓國棉被其實都好出名，有唔少遊客嚟到買都會買返幾張返屋企！而首爾買棉被最出名嘅地方一定係廣藏市場，因為呢度嘅棉被用料高質、價錢唔貴，甚至有唔同厚度同圖案俾大家揀！
韓國酒
燒酒係韓國代表性酒類之一，價錢一啲都唔貴，如果覺得原味有啲難頂，一開始可以先試佢哋嘅水果味燒酒，而家越出越多款，當做手信都幾唔錯。
如果覺得玻璃樽有啲難帶，韓國仲有出膠樽款，唔需要擔心會唔會易碎。
飲燒酒通常啲杯都好細個，有好多文具雜貨鋪都有賣cute cute燒酒杯，大家如果行街見到記者買返個返屋企啦！
除咗燒酒之外，米酒都係韓國傳統酒類之一，因為米酒嘅味道冇咁強，對唔少女仔嚟講，會比較易入口，韓國超市有好多款唔同包裝，睇啱可以買返支嚟試。
咖啡&韓國傳統茶
講個冷知識俾大家聽，原來即溶咖啡係韓國人發明㗎！韓國人有幾鍾意飲咖啡相信大家都知道，唔少韓國人都會鍾意買即溶咖啡喺屋企/Office飲，但其實好多遊客嚟到都會大手入貨！
韓國嘅茶都幾唔錯，好似呢啲一甖嘅柚子茶，送俾老人家相當之啱，冬天嘅時候沖番杯嚟飲，身體即刻超暖。
不過如果覺得一甖太重，可以買茶包，帶返去都方便啲，甚至仲有唔同口味可以揀。
傳統手信
呢啲傳統風格嘅貼紙或者鎖匙扣，都係唔少遊客嚟到會買嘅手信之一，通常喺Daiso或者Artbox就可以搵到佢哋嘅蹤影，而且款式都唔少！
另外亦好推薦大家去一啲傳統市場（廣藏市場、南大門市場、仁寺洞等），一樣可以買到呢啲傳統紀念品，不過建議大家行之前，可以格吓價，因為就算同一款產品，唔同舖頭價錢都會有出入！
藝人週邊
KPOP文化影響全球，不過好多商品飄洋過海去到香港之後都會貴好多。
送藝人週邊俾朋友做手信，唔一定要俾好多錢去正版官方店買，便利店、美妝店好常會有相關代言，平平地都可以買到啱嘅禮物！
襪
講到最方便、最慳錢、最唔佔空間嘅韓國手信，就係喺各大商圈同服飾店可以買到嘅襪。每對嘅價錢都好平，而且大家都知，當啲襪拎到番香港賣，就會賣貴幾倍。
呢啲襪仲有好多好可愛嘅造型，一對通常都係₩1,000～₩3,000不等，行街之餘不妨留意賣襪嘅攤位，買番幾對做手信分俾朋友啦！
另外如果大家成日都會手腳冰冷，可以買呢啲睡眠襪，一對係₩2,000~₩3,000不等，小編自己屋企都有幾對，著上腳超暖！
Starbucks限定產品
講到韓國限定，除咗服飾品牌之外，就一定要提Starbucks啦！Starbucks每季都會推出新品，不停推出極具創意嘅週邊商品 。睇到呢啲商品嘅款式，就令人好想買晒返屋企！有啲仲係「韓國限定」，買返個保溫杯送人，相信對方一定會好開心！
文具精品
韓國文具店嘅數量非常多，係呢度揀紀念品，一定可以搵到唔會好貴，對方又鍾意嘅手信。
Masking Tape、筆、簿、襟章都係啲唔會點出錯嘅手信。對於收集控同文具控嚟講，送佢哋幾樣文具商品簡直係投其所好，而且小編個人覺得韓國嘅文具設計真係零舍精緻同靚！
一啲韓國設計師品牌嘅文具雖然單價會貴啲，不過勝在quality夠好，買返去送俾朋友就最好不過啦。
明信片
旅途中，寫幾張有溫暖筆跡嘅明信片，好簡單咁買好郵票放入郵筒，就可以將珍貴又美好嘅回憶帶俾朋友。
好多韓國觀光地同文具店，都會有呢種精緻嘅明信片。除咗買嚟珍藏之外，都可以親手寫幾句寄俾朋友，成為一份最真摯又永不過期嘅禮物。
除咗體積小、又薄，同時更有滿滿嘅韓國味，係最好不過嘅手信。提提大家，如果要喺韓國寄明信片嘅話，一定要喺平日日頭嘅上班時間去郵局買郵票，先可以寄出㗎。
KAKAO FRIENDS
嚟到韓國當然唔少得行嘅仲有Kakao Friends啦！佢哋每次出嘅產品都超可愛。
每一次行完全唔知時間過，唔同角色有佢哋獨有嘅公仔、電器等。
喺弘大、江南、東大門、明洞、蠶室、COEX、永登浦等熱門景點都可以搵到佢嘅官方店添！
手機配件
相信而家好多人都會帶AirPods喺身，韓國有好多AirPods殼都好可愛同有特色。
通常喺街邊，都可以用好平嘅價錢入手，買俾自己或者送俾朋友都唔錯。
另外好多時嚟到韓國都會買手機殼，除咗iPhone之外，Samsung機都有唔少選擇。
以上就係小編為大家整理出嘅韓國手信清單，大家可以save低篇blog，返香港之前記住去掃貨啦！不過其實買咩手信都唔重要，重要嘅係你份心意~
嚟到韓國想大賣特賣？🛍️
如果有更多想知嘅內容，都可以隨時留言或者dm話俾我哋知：）
Instagram：creatrip.hk