2024燒肉店推介
召集食肉獸！小編幫你揀好19間首爾燒肉店，嚟韓國一定要食嘅美食清單
Hello，大家好，我哋係由韓國人每日提供最新韓國旅行資訊嘅Creatrip。
嚟韓國最想食，最唔可以錯過嘅應該係燒肉啦！燒到香噴噴嘅五花肉、豬頸肉，又或者係牛肉、烤腸，大家可以揀任食或者單點。小編幫大家揀出最值得去嘅燒肉店，區區都有，唔怕唔方便，大家快啲save底，下次嚟嘅時候統統都試一次啦！
韓國首爾燒肉推薦
1. 荒謬的生肉明洞店（엉터리생고기 명동점）
- 地址：서울 중구 명동4길 23 2F
- 營業時間：11:00 - 23:00
- 價格：₩16,800起/人（任食）
一講到食燒肉，第一時間就會諗起「荒謬的生肉」，佢係韓國好出名嘅燒肉店，一般燒肉店一人份嘅價錢就可以任食，仲要係韓國產嘅豬肉，所以喺競爭激烈嘅燒肉店中，仍然可以突圍而出！呢間燒肉店幾乎每區都有分店，除咗明洞，必去嘅弘大都可以搵到，唔怕唔就腳，仲要係任食，包你食到攬住個肚啊！
2. 站著吃烤肉（연남서식당）
- 地址：서울 서대문구 연희맛로 15
- 營業時間：11:30 - 19:30（Last Order 18:30 ）、星期一休息
除咗上面介紹嘅「荒謬的生肉」，「站著吃烤肉」雖然比較細間啲，但係一樣係人氣超高嘅燒肉店！睇個名就知，入面一個坐嘅位都無，大家都係圍住個爐，企住喺度燒住食，呢個噱頭吸引咗唔少客人。呢間燒肉店營業咗超過60年，到而家仍然好受觀光客歡迎嘅食店，下次嚟一齊去試吓啦！
3. 三層肉的神（삼겹의 신）
- 地址：서울 마포구 어울마당로 111-1 2F
- 價格：₩14,800（1人）
- 營業時間：11:00 - 06:00
擺到靚一靚咁就可以開始燒啦，「三層肉的神」有多款嘅肉，價錢又平，小編覺得大家去弘大值得一試嘅燒肉店，唯一一個缺點就係五花肉有啲肥，但整體嚟講，都係好抵食！
4. 一番地烤腸 新林洞本店（일번지막창 신림동본점）
- 地址：서울 관악구 호암로26가길 43
- 營業時間：16:00 - 00:00、逢星期日休息
- 價格：一番地五花肉+豬腸+梅頭豬800g ₩34,000
首爾大學附近嘅新林洞有間好受當地學生喜愛嘅燒肉店，叫「一番地烤腸」。烤腸配五花肉，軟林林又有啲咬口，真係食一啖就上癮。雖然係任食，但老闆會預先解凍，大家燒嘅時候都方便啲。
5. GoGong（고공）
- 地址：서울 성동구 왕십리로8길 10
- 營業時間：平日 16:00 - 23:00（Last Order 22:00）、週末 15:00 - 22:00（Last Order 21:00）
小編另一間嘅至愛「Gogong」，喺聖水洞纛島站嘅巷仔，舖頭外型係白色嘅小屋，望落一啲都唔似燒肉店，好精緻。價錢雖然相對貴啲，但係味道同質素有返咁上下，絕對同任食嘅燒肉係無得比。小菜好爽口，唔會太重口味，好啱配埋啲肉一齊食，而且嗰度嘅店員仲會幫你燒出最靚、最prefect嘅肉，唔使驚自己手殘燒燶晒。
6. 五道麵屋（오도면옥）
- 地址：서울 중구 수표로6길 27
- 營業時間：11:30 - 23:30
喺乙支路、忠武路一帶有一間叫「五道麵屋」嘅燒肉店，好受當地人歡迎。唔單只有超好食嘅燒肉，仲可以點其他韓式嘅料理，係一間韓食超齊全嘅餐廳。將塊牛肉攤開，用炭火慢慢咁燒，預先用刀𠝹過嘅肉，唔只醃得好入味，仲易燒啲添。
7. 巨大排骨弘大店（통큰갈비 홍대점）
- 地址：서울 마포구 어울마당로 151-1
- 價格：₩15,000起/人（任食）
- 營業時間：12:00 - 00:00
「巨大排骨」喺新村、弘大都有分店，可以任食豬排（有得另外叫五花肉）。塊豬排真係好巨型，大過你同我塊面，就咁睇相，小編都流晒口水。燒五花肉燒到悶？咁就要試下「巨大排骨」啦！
8. 無牛MUSSO（무쏘）
- 地址：서울 마포구 어울마당로 131
- 營業時間：13:00 - 23:00
- 價位：₩24,800/人（任食）
「無牛MUSSO」喺弘大商圈、江南、鍾路都有分店，牛肉嘅質素都唔錯，最令小編印象深刻嘅係牛小排；嗰度嘅小菜係自助形式，不過需要另外加錢。如果大家想任燒牛食，mark底呢間啦！
9. 馬場谷（마장골）
- 地址：서울 성동구 마장로31길 40 2F
- 營業時間：10:00 - 22:00；每第一、第三個星期日休息
講到韓式燒肉，一定唔可以唔記得韓牛！如果去馬場洞韓牛巿場嘅話，小編真心推介「馬場谷」，食過一次就令小編畢生難忘。肉嘅顏色同雪花都好靚嘅馬場谷韓牛，可以話係小編食過咁多韓牛之中最好食嘅人11++最高等級燒肉，半熟或者全熟都係咁令人驚豔，大家一定要試吓！
10. 熟達豬肉 文來本店（숙달돼지 문래본점）
- 地址：서울 영등포구 문래북로 33
- 營業時間：11:30 - 22:00（Break Time 15:00 - 17:00）
「熟達豬肉」係一間高質素嘅韓國燒肉連鎖店，價錢係貴啲，但係食過嘅話一定唔係後悔。嫰口又唔韌嘅五花肉，小編食過幾次，水準一直有保持到，而且賣嘅肉比較高級，服務都比較好，大家可以放心咁傾偈，唔驚燒燶啲肉。
11. 二層家 光化門店（교대이층집 광화문점）
- 地址：서울 종로구 삼봉로 95
- 營業時間：11:00 - 23:00
喺鍾閣、光化門附近嘅「二層家」，嗰度嘅燒肉真係好令人難忘，小編食過一次，到而家都好記得嗰個味道。想要試吓當地人都愛嘅燒肉店，就要去藏身喺巷仔度嘅「二層家」啦！只要你去幫襯，仲會免費送你一鍋海鮮湯添！
12. 河南烤肉店（하남돼지）
小編亦好推薦喺各區都有分店嘅韓國燒肉連鎖店「河南烤肉店」。雖然唔係任食，但係佢嘅份量超足，塊肉超厚，價錢亦算合理。想食到又厚又多雪花，肉質又靚嘅五花肉，一定要嚟「河南烤肉店」。
13. 金德厚的牛小腸庫 弘大本店（김덕후의곱창조 홍대본점）
- 地址：서울 마포구 와우산로 51-9
- 營業時間：15:00 - 00:00
- 價格：₩26,800/人（任食）
「金德厚的牛小腸庫」喺新村同弘大都有分店！呢間嘅優點係提供四種內臟，亦好高質，同一般任食嘅無得比。力推俾大家嚟試下，小編真係好鍾意呢間燒肉店！
14. 江南豬肉商會 弘大店（강남돼지상회 홍대점）
- 地址：서울 마포구 홍익로5안길 28
- 營業時間：11:30 - 00:00
- 價格：₩14,900/人（任食）
弘大嘅「江南豬肉商會」都係最近好紅嘅燒肉店，唔單只有五花肉，仲有其他肉可以揀，唔同嘅plan有唔同嘅肉，又可以升級揀炸雞。嚟「江南豬肉商會」可以一次過滿足你又想食燒肉，又想食炸雞嘅兩個願望。
15. 集式炭火吃到飽 中谷店（장터참숯무한리필 종곡점）
- 地址：서울 광진구 긴고랑로 52
- 營業時間：12:00 - 23:00（Last Order 22:00）
- 價格：₩16,900/人（任食）
「集市炭火吃到飽」係小編覺得超抵食嘅燒肉店，₩16,900就食到五花肉、牛五花、豬皮、豬排等等，味道仲好正添！
16. 錢通 徽慶店（돈통 휘경점）
- 地址：서울 동대문구 이문로 58
- 價格：₩14,900/人（任食）
慶熙大學附近都有一間超爆抵食嘅燒肉，叫「錢通」，同一般任食嘅價錢差唔多，但係提供超多款肉，仲有魷魚、牛五花、雞臀、菜等等，而且仲會送大醬湯。慶熙大、外大嘅學生成日都會去，大家去開嗰邊睇櫻花都可以去呢間燒肉店試下！
17. 精肉食堂 東大門店（동대문정육식당）
- 地址：서울 종로구 종로46길 7
- 營業時間：星期一、星期三至日 24小時；星期二00:00 - 03:00
提到東大門，大家可能淨係諗起shopping，其實仲有深受當地人愛戴嘅燒肉店「精肉食堂」。啲肉好新鮮，價錢亦都幾抵，豬、牛都有，而且係24小時營業，玩夜咗都唔怕無嘢食！
18. 新村食堂 新村店（새마을식당 신촌점）
- 地址：서울 서대문구 연세로2길 6
- 營業時間：11:20 - 21:30 （Last Order 21:00）
有追開白種元老師嘅話，就應該唔會對「新村食堂」陌生，佢係白種元老師嘅品牌之中排前三名。價錢抵，仲係用炭火直燒，超有風味。相信好多人都食過，唔晒多講，就算未食過，跟白種元老師就一定唔會有錯！
19. 豬肉大學（돼지 대학교）
- 地址：서울 마포구 독막로 15
- 營業時間：平日 15:10 - 23:50（Last Order 21:50）、週末 12:10 - 23:50（Last Order 21:50）
- 價位：₩15,900/人（任食）
唔想去弘大咁逼人，可以揀去附近人流比較少嘅合井，6號出口前有間叫「豬肉大學」嘅燒肉店，小編食完一次就念念不忘，同普通嘅燒肉唔一樣，陣碳香味好濃，因為店家會事前喺外面用木頭烘過，仲有一個特點係，年糕鍋都係任食㗎！
以上就係小編為你精心挑選嘅首爾燒肉店，唔知邊間啱大家心水呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk