韓劇收視排行榜
tvN、jtbc出品從來都唔會令人失望，到底2021年Top10又會有邊幾套呢？
Hello，大家好，我哋係由韓國人每日提供最新韓國旅行資訊嘅Creatrip。
每一年都會有唔少韓劇等住大家去追，喺19年播出嘅《愛的迫降》更加係破咗《孤單又燦爛的神：鬼怪》收視率，成為tvN最高收視記錄（21.683%）。
《梨泰院class》、《機智醫生生活》亦喺最後一集交出好成績，成功入到韓劇收視率排行榜頭10名寶座。
不過一山還有一山高，JTBC《夫婦的世界》當時仲未播完，就穩坐韓劇史上最高收視率，最後更加係不負眾人所望，突破《天空之城》收視，創下有線台電視台最高記錄。
咁喺2021年，到底個排行又會邊成點呢？我哋一齊繼續睇落去啦！
韓國收視率計算方式
韓國電視台有分免費以及付費頻道，喺韓國免費頻道分別有MBC、KBS、SBS。付款台就有JTBC同tvN等。
 |  |  |
所以喺計算收視率方面，會分成三大電視台（無線台）收視，以及有線台收視，因為咁可能會有收視率懸殊情況發生；例如無線台收視率第50名為44%，但有線台收視第1名只得28%，收視率上會分成為全韓國，以及首爾首都圈。
韓國有線台收視率排行
備註：排行以大韓民國AGB收視率作準
第12名《機智醫生生活》2020年
- 電視台：tvN
- 收視率：14.142%（第12集）
- 主演：曹政奭、柳演錫、鄭敬淏、金大明、田美都
五位同年嘅醫生，無論係喺職場定係生活中嘅互動，都得到唔少觀眾嘅歡心。呢次係繼《監獄手記》之後嘅新作品，獲得相當好嘅回響，目前第二季亦都會熱播緊，收視率最高達13.151%，有望喺完結前創下新紀錄。
第11名《百日的郎君》2018年
- 電視台：tvN
- 收視率： 14.412% （第16集）
- 主演：都敬秀、南志鉉
D.O.嘅戲劇生涯可以話再次推上新巔峰，同時亦係tvN月火連續劇（星期一、星期二）中，最高收視紀錄（直到呢家都係）。
第10名《黑道律師文森佐》2021年
- 電視台：tvN
- 收視率：14.636%（第20集）
- 主演：宋仲基、全汝彬、玉澤演
喺啱啱五月頭結束咗嘅《黑道律師文森佐》，突破14%收視紀錄，令佢可以排喺有線台收視頭10寶座，而呢一套劇可以話係2021年上半年咁多韓劇之中，討論度最高之一，唔知當時大家又有冇追呢？
第9名《梨泰院Class》2020年
- 電視台：JTBC
- 收視率：16.548%（第16集）
- 主演：朴敘俊、金多美
2020年初最多人討論嘅韓劇除咗有《愛的迫降》之外，當然亦都唔可以錯過朴敘俊同金多美主演嘅《梨泰院Class》啦！收視率屢創記錄，最終以16.548%好成績穩坐歷史收視第9名寶座，亦係JTBC第三名嘅韓劇。
第8名《結婚作詞，離婚作曲(第二季)》2021年
- 電視台：TV朝鮮
- 收視率：16.582%（第16集）
- 主演：成勛、李太坤、朴柱美、李歌領、全秀卿、全盧民
喺排行榜上幾乎只得tvN同jtbc嘅時候，TV朝鮮因《結婚作詞，離婚作曲》而突圍，劇情主要剖析30代、40代、50代男女愛情觀同婚姻。第一季嘅成績雖然只係普普通通，但第二季就有超高收視！直接殺入Top8！目前確定第三季即將製作，唔知到時又會唔會再創新紀錄呢？
第7名《哲仁王后》2021年
- 電視台：tvN
- 收視率：13.224%（第12集）
- 主演：申惠善、金正賢
要講到哲仁王后最大賣點，莫過於戲中有超多笑料。雖然係古裝劇，但由現代穿越返番去170多年前朝鮮時代嘅直男靈魂，附上係中殿娘娘身體裡面，真係每一集都令人超期待。
第6名《陽光先生》2018年
- 電視台：tvN
- 收視率：18.129%（第24集）
- 主演：李炳憲、金泰梨、柳演錫、金玟廷、卞約漢
開播之前已經有唔少人討論緊，李秉憲同金泰梨嘅組合真係令人超期待。因為呢套戲令到韓國再次興起復古風潮，至今仍然未減少。
第5名《孤單又燦爛的神：鬼怪》2017年
- 電視台：tvN
- 收視率：18.68%（第16集）
- 主演：孔劉、李棟旭、金高銀、劉寅娜、陸星材
相信唔使小編多講大家都一定有聽過呢套韓劇，唔單止韓國受歡迎，當時香港可以話係即刻多咗好多孔太，當時大家又有冇邊睇邊喊呢？
備註：數據以首爾首都圈收視率作準
第4名《請回答1988》2016年
- 電視台：tvN
- 收視率：18.803%（第20集）
- 主演：李惠利、朴寶劍、柳俊烈、高庚杓、柳惠英、李東輝
講述1988年代首爾雙門洞，小區互相扶持、一齊成長嘅故事。對韓國人嚟講呢套劇確實見證咗佢哋共同走過嘅回憶（30代），笑中帶淚嘅劇情更加係令人超難忘。
第3名《愛的迫降》2020年
- 電視台：tvN
- 收視率：21.683%（第16集）
- 主演：玄彬、孫藝真、徐智慧、金正賢
相信唔少人都希望玄彬同孫藝真可以戲假情真（大家終於許願成功啦！）喺劇入而雖然結局不盡人意，但跨越南北韓愛戀，更令tvN再次刷新最高收視率紀錄。
第2名《Sky Castle》2019年
- 電視台：JTBC
- 收視率：23.779%（第20集）
- 主演：廉晶雅、李泰蘭、尹世雅、吳娜拉、金瑞亨
呢套劇其實係諷刺緊功利主義唯上嘅大韓民國，緊湊劇情加上演員精湛嘅演技，拍嘅當時每日都有唔少人討論緊。
第1名《夫妻的世界》2020年
- 電視台：JTBC
- 收視率：28.371%（第16集）
- 主演：金喜愛、朴海俊、韓韶禧
再創新話題嘅《夫妻的世界》喺最後一集，收視率直接爆28.371%高收視率，呢個數字係前所未見。喺有線台可以超過28%收視率，真係相當驚人，唔知之後又有冇邊套劇會超越到呢個記錄呢？
韓國無線台收視率
無線台韓劇基本上都係10%起跳，但要入到頭10名可以話係一件好難嘅事。加上付費有線台越嚟越普及，近10年嚟竟然冇任何一部無線台韓劇入到頭10名，要講到最近嘅可能已經係《大長今》以57.8%收視坐收第10名。
而無線台收視第1名嘅韓劇，係1997年崔真實、車仁表、宋承憲主演嘅《最愛的人是你》，66.9%收視無人能敵。
但因為無線台收視族群主要都係老人家，所以喺揀題材方面都會較為謹慎，少有有線台破格、探討社會議題等方向。
好多時都係以保守收視族群情緒情節為主，主演嘅人多數係以國民認知度比較高嘅演員為主，大家可能會比較陌生，但偶然都會有驚喜，就好似舊年嘅《山茶花開時》。
呢幾年嘅韓劇都有稍微嘅變動，唔知當中大家又最鍾意睇邊個台呢？小編個人就鍾意睇tvN多，每一次嘅新劇都令到小編好有驚喜。唔知大家又滿唔滿意以上韓劇排名呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
