首爾夜景餐廳｜I.O.U
韓國首任總統別墅改建而成嘅高級餐廳「I.O.U」，遠眺漢江、汝矣島風景，係人氣求婚熱門餐廳！
Hello，大家好，我哋係由韓國人每日提供最新韓國旅行資訊嘅Creatrip。
好多人嚟韓國都可能係主要想shopping，追星等等，不過亦有唔少人係為咗慶祝紀念日、或者同屋企人慶祝，所以今日小編特別為大家介紹呢間叫「I.O.U」嘅餐廳，無論坐邊個位都可以望到漢江同63大樓，一齊浪漫咁過紀念日或者求婚！不過因為連韓國人都好鍾意嚟，所以記住一定要預約定啊！
首爾夜景餐廳「I.O.U」資訊
- 地址：서울 용산구 원효로1길 16
- 可預約時間：
- 星期一至五 - 午市 11:30-14:00
- 星期一至五 - 晚市 17:00-18:00 / 19:30-20:30
- 星期六及日 - 午市 11:30-14:00
- 星期六及日 - 晚市 17:30 / 20:00
首爾夜景餐廳「I.O.U」推薦理由
- 可以眺望超靚漢江風景嘅高級餐廳，係一間人氣求婚名店！
- 由韓國首任總統李承晚嘅別墅改建而成，背景就喺漢江同汝矣島63大樓！
- 食飯前後可以喺庭院影靚相，為呢個美好夜晚留低深刻回憶！
首爾夜景餐廳「I.O.U」價錢
Menu | 價錢 |
Chef's Course | ₩128,000/人 (128000/人) |
[午市限定] Special Course | ₩68,000/人 (68000/人) |
[午市限定] Pasta Course | ₩39,000/人 (39000/人) |
餐桌蠟燭及鮮花擺設 | ₩150,000 (150000) |
花束(小) | ₩50,000 (50000) |
| 花束(中) | ₩70,000 (70000) |
| 花束(大) | ₩100,000 (100000) |
| 花樽鮮花擺設 | ₩120,000 (120000) |
手工蛋糕 | ₩38,000 (38000) |
※接受1人預約
※同行人士需要選擇同一款套餐
首爾夜景餐廳「I.O.U」套餐餐點
Chef's Course[₩128,000(128000)/人]
2款即烤麵包 蘑菇忌廉湯 薄切生肉配黑松露油 香烤三文魚 辣肉腸意粉 雪葩 西冷牛扒 or 菲力牛扒(+₩10,000/人) 朱古力Brownie蛋糕配紅桑莓蓉 咖啡或茶（紅茶/薄荷茶） ※額外加購西式龍蝦料理(+₩120,000) ※額外加購推薦紅酒 |
[午市限定]Special Course[₩68,000(68000)/人]
2款即烤麵包 蘑菇忌廉湯 海鮮意大利炸飯糰 醃三文魚 肉醬意粉 西冷牛扒 or 菲力牛扒(+₩10,000/人) Tiramisu 咖啡或茶（紅茶/薄荷茶） ※額外加購西式龍蝦料理(+₩120,000) ※額外加購推薦紅酒 |
[午市限定]Pasta Course[₩39,000(39000)/人]
2款即烤麵包 蘑菇忌廉湯 苦苣沙律 醃三文魚 是日意粉 西冷牛扒 or 菲力牛扒(+₩10,000/人) Tiramisu 咖啡或茶（紅茶/薄荷茶） ※額外加購推薦紅酒 |
首爾夜景餐廳「I.O.U」其他服務
餐桌蠟燭及鮮花擺設(₩150,000/150000)
花束(₩50,000起/50000起)
手工蛋糕(₩38,000起/38000起)
首爾夜景餐廳「I.O.U」預約流程
首爾夜景餐廳「I.O.U」注意事項
- 請最少喺3日前完成預約，你亦可以喺30日前進行預約。
- 必須同時選擇餐點，唔可以只預約擺設/花束/蛋糕。
- 同行人士需要選擇同一款套餐。
- 只接受體驗3日前取消預約及申請退款，其後恕不受理。
- 體驗當日請準時到達，如遲到10分鐘或以上，預約將自動取消。
- 座位會隨機安排，越早預約可以安排到越好位置，有特殊需求請send email到help@creatrip.com。
- 可以用英文同職員溝通。
- 用餐時間限時2小時。
- 如有任何疑問，請send email到help@creatrip.com查詢。
首爾夜景餐廳「I.O.U」介紹
外觀
呢棟睇落好似普通建築咁，但其實內有乾坤！
而且餐廳入面所有位都可以睇到漢江夜景！一齊跟小編去「I.O.U」睇睇啦！
露天花園
餐廳入口附近有一個露天花園，行入去就會見到㗎啦！
呢度四周圍都有好多植物，天氣好嘅時候大家可以喺度欣賞漢江景色，放鬆身心。
呢度仲有提供三腳架俾大家用嚟影相！
夜景
「I.O.U」最出名就係睇漢江夜景！
早少少去嘅話仲可以睇到日落，超浪漫~
露天花園去到夜晚亦都會開燈，同日頭嘅感覺完全唔同。
大家可以用餐廳提供嘅三腳架，同漢江夜景合照，真係隨便影都靚！
大家食飽之後記住唔好咁快走，喺花園行返陣~
店内裝修
＜櫃檯＞
一開門職員就會好熱情咁歡迎你！只要同職員講你嘅名，確認好之後就會即刻帶你去坐低。
＜2樓＞
上到二樓就可以即刻睇到漢江景！
餐廳裝修整體行木調，燈光柔和，環境夠曬舒服！
2樓最受歡迎嘅位相信一定係窗邊位！喺呢度可以俯瞰到180度漢江全景，仲可以眺望到汝矣島63大廈~
「I.O.U」亦都有獨立房，私隱度高。
＜3樓＞
3樓係閣樓，總共有4張枱。特別係上面呢個位超多人預約嚟求婚！
3樓另一間房裝修非常可愛，而且屋頂係玻璃窗，令成個空間睇落更加開揚。
餐廳亦都有提供BB櫈，就算帶埋小朋友嚟都得！
＜1樓＞
1樓裝修行復古風，同其他樓層好唔同。
因為本身間餐廳比較高，所以就算喺1樓都可以望到漢江。
1樓有大房同細房，就算係一大班人食飯都無問題！
各位男士如果想俾個驚喜女朋友，「I.O.U」亦都有賣花，相信一定可以為你哋留下一個浪漫回憶。
餐飲
Chef's Course - 羊架（約250g）
羊肩肉外層裹上香草脆皮，配上焗薯同用芫茜+薄荷葉整成嘅醬汁，碳烤味濃！
Chef's Course - 香烤三文魚
香烤三文魚扒配藜麥&烤時蔬沙律，加埋蒔蘿乳酪醬夠清新！
Chef's Course - 頂級T骨牛扒
美國頂級T骨牛扒配香草牛油，夠juicy之餘味道濃郁！
(額外加購) 西式龍蝦料理
加拿大新鮮龍蝦配蘋果醋醬汁，加上新鮮沙律，味道配搭好！
Chef's Course - 薄切生肉配黑松露油
用猛火封煎生牛肉，薄切後放上火箭菜同黑松露油，鹹香夠開胃！
Chef's Course - 辣肉腸意粉
西班牙辣肉腸配上Casarecce麻花型意粉，加上蒜片、蒜粒、蒜蓉、香蒜油，香辣夠惹味！
肉醬意粉
紅酒番茄肉醬熬製超過4小時，味道酸甜濃郁！
醃三文魚
用鹽、糖同甜菜根醃製24小時，配上用煙薰三文魚同乳酪整成嘅醬汁，夠開胃！
一邊望住無敵漢江夜景，一邊食西餐，夠曬浪漫！
首爾夜景餐廳「I.O.U」前往方法
喺5號線麻浦站（마포역）4號出口行出嚟。
轉左。
第二個街口轉右。
直行之後你會見到有條分叉路，行左邊嗰條。
繼續直行。
行上斜路。
向上行，你會見到「I.O.U」喺你嘅左邊。
因為斜路比較多，所以建議大家都可以考慮搭的士！不過如果天氣好，大家又想散步，欣賞韓國住宅區景色，行路都只係需要10分鐘！
以上係首爾夜景餐廳「I.O.U」嘅介紹，有任何問題請先詳閱呢篇文章。
如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com
