首爾夜景推薦
唔好淨係去N首爾塔啦！推薦10個首爾睇夜景場所、韓劇拍攝場地，搭地鐵就去到嘅首爾夜景攻略
Hello，大家好，我哋係由韓國人話你知每日最新韓國資訊嘅Creatrip。
＃首爾夜景＃推薦
＃2019＃韓國夜景必去
大家嚟到韓國旅遊，去到夜晚上會做啲咩呢？
喺酒店同朋友傾通宵叫外賣做宵夜，定係落Club享受一個火熱嘅夜晚？
今天同大家介紹嘅係首爾夜景精選，如果嚟到韓國首爾旅行，絕對唔可以浪費夜晚嘅時間，去我哋推薦嘅睇夜景好地方，享受一個美好嘅夜晚啦。
✨馬上Follow我哋IG
instagram.com/creatrip.hk
首爾夜景：1. 樂天世界塔SEOUL SKY
- 地址：서울 송파구 신천동 올림픽로 300
- 交通：首爾地鐵2號、8號線蠶室站
位於2號線蠶室站嘅「樂天世界塔」，可以話喺首爾地區、唔係，應該話係全韓國最高嘅欣賞夜景嘅地方。
上到去，成個首爾都市圈五光十色嘅夜景一覽無遺，係咪令人好心動呢？
如果唔上去最高嘅SEOUL SKY展望台，都可以喺31樓嘅SKY 31欣賞夜景，免費入場（11:30至22:00）。
不過小編都係推薦大家上去SEOUL SKY睇下，呢度有兩層樓高嘅玻璃牆，可以將首爾夜景一覽無遺。
要睇到靚夜景都需要時間配合，建議大家出發前可要睇下天氣預報。
喺樂天塔都會透過懸浮微粒等數據分析，話比大家知當時嘅能見度係點，非常方便。
首爾夜景：2. 南山N首爾塔
- 地址：서울 용산구 남산공원길 105
- 交通：首爾地鐵4號線明洞站
N首爾塔位於首爾正中心「南山」，所以又被稱為南山首爾塔，地理位置極好，係可以睇首爾夜景嘅好地方。
如果上去N首爾塔嘅展望台，可以眺望首爾燈火通明嘅夜景。
剛剛講過，南山係首爾正中心嘅山，所以呢度可以睇到唔同個角度嘅首爾，真係好正㗎。
如果唔想上去首爾塔，都可以揀爬上南山，由高處俯瞰成個首爾光景。
另外，呢度都有好多浪漫嘅景點，搭配夜色朦朧嘅氣氛，好似置身喺韓劇一樣，好適合情侶嚟。
? N首爾塔南山攻略
首爾夜景：3. 盤浦大橋
- 交通：首爾地鐵3號、7號、9號線高速巴士站
盤浦漢江公園嘅夜景之所以出名，主要係因為呢度嘅月光彩虹噴泉，春、夏、秋三季每日都可以睇到。
喺平靜嘅漢江上，噴泉徐徐噴出，灑出嚟嘅水花喺光影折射之下，就好似一條又一條彩虹一樣。
雖然日頭都會有噴水表演，不過其實更多人係會喺夜晚嚟，一嚟可以欣賞到首爾夜景，二嚟可以睇埋配上音樂同燈光嘅噴水表演。
? 漢江遊艇體驗優惠
首爾夜景：4. 汝矣島漢江公園
- 交通：首爾地鐵5號線汝矣渡口站
首爾汝矣島漢江公園嘅夜景都非常出名，可以話係所有漢江公園入面，最多人鍾意嚟呢度散步、欣賞夜景嘅地方。
而每到十月，汝矣島漢江公園都會有煙花表演，燦爛嘅煙花同首爾夜景結合，係秋季首爾嘅一大盛事。
遇唔上嘅朋友都唔好灰心，可以襯平日冇咁多人，嚟汝矣島漢江公園，欣賞漢江同兩岸建築嘅夜景啦。
? 汝矣島世界煙火節
首爾夜景：5. 麻浦大橋
- 交通：首爾地鐵5號線麻浦渡口站
麻浦大橋其實有另一個名叫生命之橋，因為呢度發生過好多跳橋自殺事件，所以橋上印咗好多鼓勵嘅說話，希望防止再有人跳橋。
呢到嘅鼓勵字句，大多都係寫：「今日過成點啊？」、「有冇咩煩惱啊？」、「唔好傷心」、「你好珍貴」等關心、溫暖嘅說話。
雖然好多韓國人都話，睇咗呢啲句子會更加悲傷(？)。
不過除此之外，呢度係首爾夜景絕佳觀賞地，由麻浦大橋望出去嘅首爾夜景可以堪稱為絕景。
一到夜晚，就可以睇到63大廈同高層建築燈火通明、五光十色嘅夜景。
推薦大家喺日落同夜晚嚟呢度行下，欣賞下首爾夜景，過一個舒適嘅傍晚同夜晚啦。
首爾夜景：6. 首爾主義Seoulism
- 地址：서울 송파동 48-7 6F
- 交通：首爾地鐵9號線松坡渡口站
如果喺首爾樂天塔向下望景觀，滿足唔到你，咁不如換個角度，睇下首爾最高建築嘅夜晚景觀啦！
呢間首爾主義Cafe，可以話係非常出名嘅睇夜景嘅地方。
因為角度超好，可以影到正對住樂天塔嘅相，所以好多人都會喺度打卡PO Instagram。
夜晚嘅蠶室樂天塔會著燈，同周圍嘅商業大廈，形成一個美麗嘅夜景景觀。
呢度夜晚會搖身變成小酒吧，一齊一邊飲番兩杯，一邊享受呢度嘅風景啦!
? 首爾主義探訪記
首爾夜景：7. 駱山公園
- 地址：서울 종로구 낙산길 41
- 交通：首爾地鐵4號線惠化站
位於惠化站、成均館大學、梨花壁畫村附近嘅駱山公園，係好多韓劇嘅拍攝場地之一。
有咁多超紅韓劇嘅加持，駱山公園夜景嘅人氣扶搖直上，浪漫嘅城牆配上首爾夜景，成為好多人必去嘅景點。
由於駱山公園四周，被古代嘅城郭所包圍，沿著步道行上去，配上首爾夜景，可以感受到韓國建築嘅美同歷史嘅痕跡。
夕陽西下，萬家燈火通明嘅夜晚，喺呢個幽靜嘅氣氛，令人有種被塵囂遺忘嘅錯覺，
可以放慢忙碌嘅步伐，行上去高處再向下望，一眼睇晒成個城市。
首爾夜景：8. 首爾古宮殿
景福宮由四月底開始開放夜間入場，所以喺春、夏兩季，就可以睇到限定嘅古宮殿夜景。
尤其係穿住韓服喺夜景入面穿梭，總畀人一種自己穿越番古代嘅錯覺。
大家亦可以去睇下莊嚴嘅光化門，沿住圍牆行，一路行到三清洞一帶。
由青瓦臺上面行落嚟，欣賞古代建築同現代城市氛圍交錯嘅獨特景觀，一定會成為首爾夜景入面最令人難忘嘅回憶。
唔同景福宮、昌德宮，
昌慶宮由2019年起，可以唔洗預約，或者另外購買套票，
只要著住韓服就可以喺夜間開放時段免費入場，大家記得好好把握機會啦!
睇下呢度咁靚嘅古宮殿，配埋月亮同萬里無雲嘅天空，係咪真係有種古裝劇嘅感覺呢？
拋開一定要睇高樓建築才算睇夜景嘅諗法，嚟體驗與眾不同嘅傳統文化啦!
首爾夜景：9. 清溪川
首爾最知名嘅河流，除咗漢江之外就係清溪川。清溪川亦係好多人嚟首爾，一定會去睇嘅夜景之一。
流水襯埋兩邊建築嘅燈光，仲有時不時加入城市藝文展覽、活動，令成個清溪川變得更加生氣蓬勃。
睇下呢啲花燈，喺首爾燈節、聖誕節等重大節慶個陣，清溪川都會擺滿唔同嘅燈飾佈置，
光線折射喺溪水上，多咗一種夢幻嘅氣氛，為清溪川加添咗唔少色彩。
每到夜晚呢度總係有好多成雙成對嘅情侶嚟呢度拍拖睇夜景，真係有唔少韓國夜景名勝都充斥住一對又一對嘅情侶！
不過咁都代表，想要去睇到浪漫夜景嘅地方，跟著佢哋就啱晒啦!
? 首爾聖誕慶典
首爾夜景：10. 63大廈
- 地址：서울 영등포구 63로 50
汝矣島一帶仲有個睇夜景好出名嘅「63大廈」，呢度除咗係一座商辦摩天大樓，都係首爾嘅著名地標之一。
有別於一般大樓，汝矣島63大廈係韓國經濟急速發展嘅代表性建築。
由於喺漢江隔離，光線折線下，建築物反射喺江面嘅倒影十分壯觀，呢度睇到嘅首爾景致都唔錯㗎 。
西海嘅晚霞同漢江兩旁嘅車燈更係63大廈嘅絕景，同其他地方所呈現出嘅首爾夜景唔同，
既可以睇到到廣闊嘅漢江公園，又可以睇到首爾城市嘅燈光。
喺首爾忙碌嘅步伐下，悠閒咁欣賞城市嘅夜景，一定會令你好滿足。
快啲將以上呢啲首爾夜景加入景點清單啦~
祝大家喺韓國旅遊個陣都可以過到一個浪漫嘅夜晚。
咁多位，我哋下次再見。
✨馬上Follow我哋IG
instagram.com/creatrip.hk
| 其他延伸閱讀 | |
 ARTEE人力車 |  韓國優惠券整理 |
 清溪川總整理 |  首爾景觀餐廳 |
 大創本月熱議品 |  首爾旅遊懶人包 |