香港人必睇韓國出入境攻略&注意事項（2026最新版）

Hello，大家好，我哋係由韓國人每日提供最新韓國旅行資訊嘅Creatrip。

相信唔少朋友每次去韓國旅行，都係去到飛前幾日先google「韓國入境要咩文件」、「仁川機場點去市區」、「去韓國旅行有咩要準備」等等，亦都有唔少朋友會IG PM小編問相關問題。

小編自己喺韓國住咗超過7年，每年都會嚟嚟去去來回韓國同香港好多次。所以今次決定根據我自己嘅經驗整理出一個timeline，等大家可以一篇文睇曬出發韓國前幾日要做啲咩、到埗韓國之後要做咩、離開韓國前有咩要注意等等！

出發前1~3日

去韓國旅行要帶咩行李？必帶物品Checklist！

小編自己無論去邊個國家旅行，都覺得執行李係一件好難嘅事，成日都怕執漏嘢XD 有啲嘢如果當地買到就還好，但如果係重要嘅行李但唔記得放入喼就真係好大鑊。根據小編多年飛韓國嘅經驗，以下呢幾樣嘢一定要先準備好：

⚠️ 2025年3月起，乘搭韓國航班時行動電源（尿袋）同電子煙唔可以放喺託運行李，必須隨身帶住上機；由2026年4月20號開始，每人最多只可以帶2個160Wh以下嘅行動電源，亦唔可以喺機上使用或充電。

小編自己而家住韓國，所以成日會喺香港補貨，買一堆零食同香港先有嘅嘢返嚟。不過其實韓國對某啲食品入境限制都幾嚴格，大家記住唔好帶以下呢幾樣嘢入境韓國！

• 肉類及肉製品：牛肉乾、肉鬆、臘腸統統唔得，就算係包裝好嘅都唔可以帶入境
• 水果、蔬菜：未經加工嘅新鮮生果、蔬菜一律唔可以帶
• 植物/種子：花草植物、泥土都係禁帶物品

✏️ 香港小編小貼士： 如果唔清楚自己帶嘅物件需唔需要申報，都一律建議行「申報通道」！因為韓國海關會隨機抽查行李，一旦查到有問題物品但你冇申報，罰款會好貴，仲可能影響下次入境記錄。

另外小編收到最多嘅問題應該就係春天/夏天/秋天/冬天去韓國旅行應該要著咩衫！雖然每年特定月份嘅氣溫同天氣狀況都唔太一樣，不過大家可以參考以下文章，大約瞭解你要去韓國嘅時候天氣會係點，執衫都會更加方便！

韓國電子入境申報點填？出發72小時前必做！

以旅遊目的入境韓國嘅時候，如果本身冇外國人登錄證，以前都要填空姐俾嘅紙仔，但由2026年1月1日起，韓國全面實施電子入境申報制度，所有入境旅客都需要喺出發前72小時內完成網上申報。

只要去官方網站上傳護照資料、航班資料、韓國住宿地址就得。過關嗰陣出示護照就得，不過都建議大家申報完畢之後save低記錄，以便不時之需。詳細申報方式可以參考下面呢篇文章，step by step跟住做就得！

✏️ 香港小編小貼士： 網上申請之後有效期只會去到申請完72小時內，例如你2月25號15:00申請，有效期就只會去到28號14:59，記住要喺到期前入境，如果唔係就要重新申請。

咩係SeS自動通關？可以去邊度申請？

SeS係韓國嘅自助出入境系統，同香港e道差唔多！申請完之後唔需要排人工櫃檯，直接行自助通道過關就得，出入境都用得。

只要你年滿17歲、持有免簽證晶片護照（香港護照適用！）、護照有效期有至少6個月以上、過去冇韓國犯罪紀錄，就符合資格申請韓國SeS自動通關。申請完之後只要本護照未過期，每次出入韓國都可以行自助通道！

✏️ 香港小編小貼士： 最近收到唔少朋友DM問BNO護照可唔可以申請SeS自動通關，其實由2026年起英國都被列入符合資格國家名單，但暫時聽到被拒絕嘅case比較多......

想申請SeS自動通關嘅話需要去到仁川機場、金浦機場、濟州機場等韓國主要關口指定辦事處進行。而2026年頭嘅時候，韓國海關將相關服務擴展之入境禁區，過關之前會有一個地方可以即場辦理相關手續，只要提供護照同打指模就得！

你可能會有興趣👇🏻

邊度換韓幣最抵？幫你比較香港同韓國當地匯率！

如果要先講結論，通常去明洞市區找換店可以換到最多韓幣！其實韓國大部分餐廳、便利店、商場等都接受用Visa/Mastercard信用卡，不過如果你張卡海外消費會收一筆都幾貴嘅手續費，所以小編會建議大家換定一筆現金。

香港VS韓國本地換錢比較表

✏️ 香港小編小貼士： 雖然韓國好多地方都可以碌卡，但傳統市場、街邊小食攤位、部分小店仍然係以現金為主，建議身上最少保留3-5萬韓幣現金應急！

最近港幣兌韓幣匯率成日都上上落落，建議大家準備飛韓國之前可以參考Creatrip實時匯率。或者大家亦都可以考慮使用Creatrip仁川機場換錢服務，匯率會好過一般機場銀行，而且係以你預約當日嘅匯率去計，記住匯率靚嘅時候就預約定，當日去到仁川機場指定地點同職員進行交易就得。

小編自己都有試用過呢個服務，因為唔需要專程去明洞都可以換到比機場匯率好嘅價錢，而且唔需要另外排隊，成個過程方便快捷！

前往韓國當日

去韓國旅行有咩APP一定要先下載？

去日本或者泰國等地方旅行，通常有Google Maps同Uber/Grab就可以暢通無阻咁玩；但去韓國旅行呢幾個APP都未必咁方便，小編建議大家一定要下載定以上呢4個APP！

點由仁川機場出首爾市區？交通方式比較

去到仁川機場之後，下一步當然係要諗點出首爾市區。基本上仁川機場去首爾市區不外乎都係搭AREX機場快線、機場巴士、的士或者預約機場包車接送，每種交通方式都各有優點同缺點，好難下定論話邊種最好。

就以小編為例，小編以前住弘大嘅時候通常都會搭AREX一般列車，因為AREX機場快線雖然係最快可以出到首爾站嘅交通工具，但因為唔經弘大，要轉車反而會好麻煩；而家搬咗屋去東大門附近之後，因為附近就有巴士站，所以反而搭機場巴士會更加方便！

大家可以參考以下比較表，睇下今次飛首爾應該搭咩車出市區！

AREX直通車係最多遊客嘅選擇，可以直達首爾站，落車之後就可以轉地鐵去大部分熱門地區。如果係多人同行又行李多，機場包車接送或者的士其實都唔係咁貴，分攤落嚟仲可能抵過搭AREX。

✏️ 香港小編小貼士：如果大家成個旅程都會以公共交通工具代步，比起直接喺機場便利店買T-money交通卡，推薦大家去到首爾市區之後去買氣候同行卡短期乘車券，買一張卡就可以喺指定期間內無限搭地鐵、巴士！

更多參考文章👇🏻

離開韓國當日

行李太多點算？韓國行李托運服務攻略

去韓國旅行一定唔少得購物環節，但係一個唔小心買太多嘢，行李太重唔方便拎，或者航班係下晝/夜晚但Airbnb要提早check-out，要攞住行李去玩太狼狽？呢個時候小編推薦大家用行李托運服務！

韓國行李托運服務分幾種，一種係可以幫你喺首爾市區托運去仁川機場，只要提早預約定，喺指定時間將個喼攞去地鐵站指定服務櫃枱，就可以兩手輕輕去玩。

而另一種係小編自己都有用過，而且覺得好方便嘅海外行李托運服務！提早預約之後可以直接喺市區完成托運同Check-in手續，去到機場唔需要再去攞行李寄艙，可以直接入閘，唔洗排長龍。明洞、弘大、COEX同仁川Paradise City都有分店，想玩到最後一刻嘅朋友們可以考慮呢個方法！

大家亦都可以善用首爾都心機場服務，只要去首爾站買張AREX直通車車飛，就可以入都心機場進行check-in，攞完機票同將行李寄艙之後直接過埋關。過完關就可以搭AREX去仁川機場，去到仲唔洗排隊入禁區，直接行快速通道就得。

小編試過一次之後，每次行李多都會用呢個方法。不過缺點係只要一入都心機場寄艙同過關之後就唔可以再出返嚟玩，要直接去仁川機場，對於想放低行李之後去參觀或者做最後衝刺嘅朋友們嚟講可能冇咁方便。不妨可以參考埋小編上次去都心機場嘅影片！

View this post on Instagram

要提早幾多去到仁川機場先得？

仁川機場係全球最繁忙機場之一，特別係假期前後，離境大堂都會人山人海。根據小編經驗，如果係普通日子嘅話起飛前2.5-3個鐘頭到就差唔多，但如果係農曆新年、中秋節、聖誕節等長假期，就建議提早3-3.5個鐘頭去到機場，避免出現趕唔切入禁區上飛機嘅情況。

建議大家去機場之前可以先參考Creatrip網站入面嘅仁川機場人流狀況估計數據，大家可以睇到入境大堂同離境大堂各時段預計人流，再調整出發去機場嘅時間。

✏️ 香港小編小貼士： 記住出發前確認清楚你班機係喺邊個客運大樓搞手續同出發，以免出現因為去錯而要去搭接駁車嘅情況，白白浪費時間！

更多有關仁川機場資訊👇🏻

Smart Pass要點申請同點用？

Smart Pass係仁川機場快速離境系統，事先登記護照、臉部數據、機票等等嘅資訊之後，只要掃一掃塊臉就可以讀取登記咗喺系統入面嘅資料，唔洗再人手去掃機票同護照。

小編個人都幾推薦大家事先登記好！只要下載Smart Pass應用程式，根據畫面上指示輸入同登記相關資料數據就搞掂。離境當日只要去排上面呢條專用通道，進行臉部掃描，直接去過機行李同過關就得。

記得上兩年有一段時間仁川機場日日都超多人，咁啱當時需要飯香港一轉，但因為怕會趕唔切上機，所以就事先整定咗Smart Pass，由排隊到入禁區全程唔洗30分鐘就搞掂！不過提提大家，因為登記嘅時候需要輸入機票資料，所以變相每次離開韓國都需要登記一次。

✏️ 香港小編小貼士：Smart Pass同SeS係兩個唔同嘅系統，Smart Pass目的係省略離境時人手掃機票同護照嘅流程；SeS係自動通關系統，令出入境過關嘅時候唔需要排人工櫃檯。兩樣都可以加快出入境流程，記住要分開申請同登記！

Smart Pass詳細登記方法👇🏻

有咩唔可以由韓國帶返香港？

同入境韓國嘅時候一樣，入境香港嘅時候都有部分物品唔可以帶入境或者需要申報。特別係未經加工嘅新鮮蔬果同肉類，仲有部分含韓藥成分嘅藥品都比較容易被忽略，大家記住買手信嘅時候要注意清楚，詳情可以參考香港海關官方網站資訊。

另外去韓國買咗大量化妝品或者護膚品返嚟係冇問題嘅，只要係私人使用分量。但如果係大量同款產品，海關有可能視作商業用途查問。

✏️ 香港小編小貼士：如果想手提泡菜、醬類（大醬、辣椒醬）、化妝品類（爽膚水、乳液、面霜）、牙膏等液體上機，每個容器限100毫升以下，總共1升內就可以，詳情請務必參考機場規定。韓國有新聞報過話每年因為超過指定容量而被沒收嘅泡菜有成11噸，大家如果唔肯定自己買嗰款包裝容量係幾多嘅話建議寄艙！

喺韓國點做退稅？2026韓國退稅攻略！

大家去韓國旅行當然會去shopping，記住買完嘢之後一定要去做退稅！韓國退稅分成即時退稅同事後退稅，顧名思義就係直接喺鋪頭退稅，或者之後要去機場退稅機/櫃檯辦理退稅手續。

去購物之前如果見到鋪頭有TAX FREE / TAX REFUND logo，就可以現場做到退稅。而且上年開始退稅最低金額由₩30,000下調到₩15,000，買少少嘢都可以做到退稅，記住唔好錯過！

不過好可惜由2026年1月1日起，韓國整形外科、皮膚科、牙科美容等醫療美容消費退稅政策結束，所以去醫美診所同牙科診所消費冇得再退稅。

有見及此，Creatrip為大家準備咗「韓國醫美積分回贈活動」！透過Creatrip預約指定醫美診所、牙科診所或者韓醫院之後，上傳收據同填寫評論，即刻可以輕鬆領取最高15%回贈，冇咗醫美退稅都唔會蝕錢！

詳細參加方法同店鋪清單可以撳下面張圖瞭解更多：

你可能會有興趣👇🏻

去韓國前仲有咩要知？

喺韓國遇到問題點算？打電話去1330就可以解決！

喺韓國旅遊期間如果遇到任何問題，例如搵唔到路、唔知道某個服務地點喺邊、或者遇到緊急情況，可以撥打1330去韓國觀光公社嘅官方旅遊熱線。呢個電話24小時提供服務，更加支援包括英文、普通話在內嘅多種語言。

去韓國值唔值得買旅遊保險？

好多人去旅行都唔買保險，覺得應該唔會咁黑仔。但韓國醫療費用其實唔平，如果係去滑雪、做戶外活動，或者本身身體唔係咁好，小編會建議要買定旅遊保險，以免有咩冬瓜豆腐但冇保障。

小編個人揀旅遊保險嗰陣會留意包唔包醫療費用、行李、財務、旅程取消等保障，但市面上嘅旅遊保險保障範圍雖然夠廣，但係有時候又會覺得好似冇咩用咁。而且申請理賠亦都要喺海外聯絡香港保險公司，或者返到香港之後專登再整，都幾麻煩吓。

所以Creatrip有聯同韓國保險公司一齊為大家打造一份韓國旅行專用保險，等大家可以用最抵嘅價錢，得到最全面嘅保障！今次飛韓國嘅時候可以買定保險，當買個保障同安心。

韓國上網應該開漫遊、買SIM卡定租WiFi蛋？

如果係自己一個或者同朋友兩個人旅行，韓國SIM卡會係最抵、最方便嘅上網方法；如果係一大班人一齊，租WiFi蛋除開會比較平！

小編以前自己嚟韓國旅行都習慣買本地SIM卡，當中最經常用到嘅係LG U+嘅SIM卡。首先因為係韓國三大電訊公司提供嘅，所以網速夠快，而且可以無限上網之餘日數選擇多，仲包埋韓國電話號碼，之後想去韓國餐廳排隊攞籌都更加方便。最重要係如果你係第一次飛韓國，呢張SIM卡拆走晶片之後，卡身本身就係張交通卡，可以買少多張卡更方便！

韓國旅行常見問題FAQ

| Q1. 香港人去韓國需唔需要簽證？

唔需要。香港特區護照持有人可以免簽入境韓國，逗留期限係 90 日。另外K-ETA豁免政策已延長至2026年12月31日，所以現時完全唔需要事先申請任何入境許可。

| Q2. 韓國電子入境申報係一定要做？

2026年1月1日起係強制性嘅，所有入境旅客都需要喺出發前72小時內喺網上完成申報。如果冇做，有可能喺入境審查時需要額外時間處理，影響過關速度。

| Q3. 仁川機場最好幾點到？要提前幾多？

普通時期建議起飛前 2.5-3 小時到達，長假期前後建議 3-3.5小時。出發前可以去仁川機場人流狀況估計數據人頁面查詢當日預計人流。

| Q4. Smart Pass同SeS有咩唔同？點申請？

SeS係針對出入境過關嘅自動化服務，需要喺機場現場申請先可以用到，申請一次就可以用到護照過期/換新護照之前；Smart Pass係針對出境韓國嘅時候掃護照同機票嘅服務，需要預先下載App同登記，去到現場就可以行專用通道入海關區域。

| Q5. 由韓國帶食品返香港有咩要注意？

一般加工食品係可以帶嘅。但新鮮蔬果、未經加工嘅肉類、動植物等需要有檢疫證明，建議唔好冒險帶。

| Q6. 韓國可唔可以用信用卡？要帶幾多現金？

韓國信用卡普及率好高，大部分餐廳、商場、便利店都接受 Visa / Mastercard。但傳統市場、街邊小食等地方仍以現金為主，建議身上保留3-5萬韓幣現金應急。

| Q7. 韓國退稅一定要喺機場先處理到？

唔一定。如果鋪頭有Tax Free/Tax Refund標示，就可以現場直接做退稅，扣除稅項部分，唔需要另外去機場；如果係事後進行退稅，就可以去明洞、弘大指定退稅地點，或者仁川機場辦理退稅。

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！