韓國Call的士App 「Kakao T」 教學
想搭的士但係截唔到車？而家唔洗韓國電話號碼都可以輕鬆call到的士啦！
Hello，大家好，我哋係由韓國人每日提供最新韓國旅行資訊嘅Creatrip。
喺韓國旅行，有時候太多行李、或者要去一個搭公共交通工具去唔到，比較偏僻嘅地方嘅時候，相信大家都會想搭的士。不過最近因為好多人都嚟旅行，所以想喺條街度直接截的士都比較難。今日就等小編教大家用「Kakao T」，唔洗韓國手機號碼都可以輕鬆Call的士！
韓國Call的士App「Kakao T」教學
STEP 1. 註冊KakaoTalk帳號
因為「Kakao T」係韓國通訊軟體「KakaoTalk」推出嘅交通App，所以大家需要註冊一個KakaoTalk帳號先可以用到！註冊過程當中系統會要求驗證電話號碼，大家可以用自己本身所在嘅國家/地區嘅號碼。所以小編建議大家飛之前就要先註冊好，嚟到韓國嘅時候就可以順利用到啦！
STEP 2. 安裝「Kakao T（카카오 T）」App
註冊好KakaoTalk之後，就可以撳下面條link Download同安裝「Kakao T」App！
STEP 3. 登入 & 切換系統語言
有KakaoTalk帳號嘅話，大家可以直接用你嘅帳號登入「Kakao T」！不過因為目前「Kakao T」未有提供中文服務，得韓文、英文同日文，所以如果大家唔識睇韓文，可以跟住以下步驟將系統語言換做英文：
1. 打開App之後，撳首頁右下角嘅「人仔」。
2. 碌落下面，然後撳「地球」公仔。
3. 撳「English」就可以成功轉到！
STEP 4. 設定出發地點及目的地
因為「Kakao T」係一個交通App，除咗的士之外仲有好多其他交通選項（例如KTX、高速巴士等等）！不過相信睇到呢度嘅你都係想Call的士，大家可以跟住以下步驟set好出發地點同目的地：
1. 撳左上角嘅「Taxi」。
2. 喺第一行輸入出發地點。
3. 喺第二行輸入目的地。
設定出發地點同目的地嘅時候，大家可以直接輸入地方名或者地址，如果定位唔夠準確，大家仲可以直接喺地圖上面Set！提提大家，雖然呢個App提供英文服務，不過地址翻譯功能可能唔夠完善，所以小編建議大家最好直接複製韓文地址，咁就唔怕會set錯位啦！
STEP 5. 預約車輛 & 揀俾錢方法
輸入好目的地之後，「Kakao T」就會列出各種車型俾大家揀，同時亦都會顯示相應嘅估算價錢，大家可以根據需求選擇。「Kakao T」暫時有提供以下呢幾款選項：
- Venti：大車，適合多人同行
- Blue：由「Kakao」提供嘅的士服務，所有司機都有經過專業培訓，價錢比普通的士貴少少
- Black：高級車型模範的士，提供各種頂級接送服務，係最貴嘅選項
- Deluxe：高級車型的士，比黑色車型低一級
- General Request：會喺出發地點附近幫你任意call的士，無特定車型（通常價錢會最平，不過繁忙時間有可能要等好耐或者叫唔到）
揀好車型之後，就可以根據人數再揀中型（Medium）或者大型（Large）車，中型車可以坐到4個人，車尾箱大約可以放到1件大型行李或者2件小型行李。
下一步就要揀點俾錢，如果係嚟旅行，大家可以揀「Pay to the Driver」，咁就唔洗喺App輸入信用卡資訊，可以直接向司機俾錢！確認輸入嘅資料冇錯之後，就可以撳「Apply」，再撳「Request」，App就會幫你分配的士。
STEP 6. 確認車輛資訊 & 追蹤的士位置
成功Call到車之後，大家就可以睇到相關資訊（司機名、車牌號碼、預計到達時間等），亦都可以喺地圖即時追蹤的士位置，見到佢就到嘅時候就可以準備去上車位置啦！
STEP 7. 俾錢
好似頭先咁講，如果揀咗「Pay to the Driver」，就可以好似平時咁用現金、交通卡或者信用卡俾錢！如果落車嘅時候唔小心攞漏嘢，或者發生任何問題，請保留乘車記錄，然後即時聯絡客戶服務中心，佢哋會幫你聯絡司機。
今次我哋Creatrip成功同韓國超紅卡通人物「BELLYGOM」獨家合作推出交通卡，大家唔單止可以用嚟俾的士錢，仲可以喺韓國所有便利店同部份商店、餐廳俾錢！一到埗韓國30秒內就可以攞到，下載埋Creatrip App仲可以即時check到餘額同交易記錄，令你嘅韓國之旅更方便！
以上就係韓國Call的士App「Kakao T」嘅詳細教學，希望可以幫到大家！
如果有更多想知嘅內容，都可以隨時留言或者dm話俾我哋知：）
Instagram：creatrip.hk