Hello，大家好，我哋係由韓國人每日提供最新韓國旅行資訊嘅Creatrip。

平時喺香港搵路，大家都慣用Google Map，但係喺韓國旅行嘅時候就會發現Google Map其實唔係好work。今日就為大家介紹韓國人用嘅地圖「Naver Map」同教大家點用啦！

韓國「Naver Map」

1. Naver Map基本設定

iPhone下載　Android下載

設定Naver Map語言方法

Naver Map有提供英文同中文（簡體）版，通常你部手機嘅系統係咩語言，Naver Map就會係嗰個語言，但如果下載咗之後發現係韓文版都唔使驚，跟住上面咁撳就可以轉到語言㗎啦！

Naver Map注冊會員 + 登入

轉咗語言之後，大家可以選擇申請一個Naver嘅Account（可以用Line、Facebook、Apple Account直接登入），咁就可以save低鐘意嘅景點，就算用另一個電子裝置都可以隨時睇到。

2. 使用時注意事項

如果想喺Naver Map用中文查地址，大家需要將個地址變成簡體中文先會查到，或者大家可以選擇輸入英文或者韓文地址。經過實測，小編發現最快同最準嘅都係用韓文地址！

不過如果唔知道自己想去嘅地方準確嘅韓文名或者地址都唔緊要，我哋Creatrip網站入面介紹嘅店舖全部都有寫埋韓文地址同舖頭名，俾大家用Naver Map嘅時候可以直接copy and paste，順利搵到點去。

Naver Map除咗會顯示舖頭地址，仲會定時更新營業時間、菜單等等，大家plan行程嗰陣或者去之前可以參考。

3. 點搵去特定地點嘅路線？

如果想知道點去某個地方，輸入完地方名或者地址之後，就會見到右下角有「到達」呢個掣。撳入去，再輸入埋出發地點，就可以睇到好多唔同嘅前往方法。點搭車、點行都會寫得好清楚，就算係想揸車或者踩單車去，你都可以睇到詳細路線㗎！

4. 運用Naver Map嘅搭車方法

巴士

喺Naver Map上面打曬你嘅起點同終點之後，就可以睇到可以搭咩車去啦！撳「公交（巴士）」就會見到有好多種唔同嘅搭車方法，而大家可以揀最少轉乘、最少步行嘅option，慳翻啲時間同腳骨力，仲可以減低盪失路嘅風險。

Naver Map上面會寫埋你要搭個班巴士車費幾錢，同埋巴士入面多唔多人，咁大家可以根據自己嘅情況去選擇搭邊班車啦。

喺地圖上面放大起點嗰part，大家就可以仔細咁睇到巴士站嘅位置，唔使怕搭錯方向。而落車之後，大家就可以跟住地圖上嘅點點行去自己嘅目的地。搭車嗰陣如果怕搭過龍，除咗可以聽巴士報站廣播，最準嘅都係望住Naver Map嗰定位。

  韓國巴士總整理

地鐵

如果覺得Naver Map建議嘅巴士路線麻麻，想搭地鐵嘅話，大家只要撳「地鐵」就可以check到要點搭。

撳入去之後，大家可以睇到地鐵到站時間、要喺邊度上車、要向邊個方向搭，仲會寫喺邊卡可以快啲轉到車或者快啲去到你要去嘅出口添！落車之後再跟住上面建議嘅路行，就可以順利去到目的地㗎啦。

5. Naver Map嘅特別用法

睇閉路電視

大家可能睇Naver Map嘅時候會見到有監視器嘅logo，撳入去可以睇到嗰個地方嘅實時閉路電視，check到嗰度嘅路況之餘，仲可以知道而家天氣點，不過淨係得比較大型嘅路口或者高速公路先會有呢個服務。

搵廁所

人有三急突然好想去廁所，但係附近又冇地鐵站同商場？只要喺Naver Map輸入「公厠」(簡體中文) 或者「공용화장실」(韓文)，就可以搵到最近你嘅公共廁所啦（韓文搜尋結果比較多）。

預計的士錢

想搭的士，但又唔清楚韓國的士跳表係點跳嘅話，大家可以喺Naver Map輸入起點同終點，撳紅色框圈住嘅私家車圖案，就會見到畫面下方嘅的士車費估算。雖然最後都係要睇㗎的士實際跳咗幾多，但係起碼可以有個底，知道大概需要用幾多錢。

  韓國的士總整理

查完整地鐵路線圖

大家如果想check首爾、釜山、大邱嘅完整地鐵路線圖，可以喺紅色圈住嘅地方撳「地鐵路線圖」。要注意嘅係，就算係中文版Naver Map，地鐵路線圖上面嘅站名都會係英文，要再撳入去先會顯示中文。

大家可以喺呢度check到實時嘅地鐵運行狀況同地鐵時間表，甚至仲可以知道由A地鐵站到B地鐵站要點搭、要搭幾耐、要用幾多車錢等等嘅資訊。

以上係小編整理出嘅韓國地圖App「Naver Map」使用方法，大家嚟韓國玩嘅時候不妨參考吓。

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購