東大門「Starbucks 京東1960」介紹
傳統市場入面居然都有Starbucks？帶你探訪最新Cafe 「Starbucks 京東1960」！
Hello，大家好，我哋係由韓國人每日提供最新韓國旅行資訊嘅Creatrip。
韓國Cafe靚就唔洗多講啦，除咗本地小店，連Starbucks都勁有特色！講個冷知識俾大家知啦，直至2022年11月，韓國全國有1,750間Starbucks，係全世界第四多Starbucks嘅國家！今日小編就去咗其中一間最近新開冇耐，以戲院做主題嘅「Starbucks 京東1960」，一齊去睇吓啦~
東大門「Starbucks 京東1960」資訊
- 地址：서울특별시 동대문구 고산자로36길 3 3、4F
- 營業時間：09:00 - 22:00
東大門「Starbucks 京東1960」介紹
位於京東市場嘅「Starbucks 京東1960」喺2022年12月15號正式開張，係韓國Starbucks為咗透過將年輕人鍾意嘅文化融入社區，推動世代間交流而新設嘅分店。呢度以60年代嘅戲院為主題，實際上亦都係由服務市民三十載之後廢置嘅京東戲院改建而成。
呢度嘅裝修保留咗京東戲院嘅精髓，真係非常有復古嘅感覺！最特別嘅係呢度每賣出一款嘢食同嘢飲，就會捐₩300俾韓國同伴成長委員會（KCCP），用作協助京東市場發展，振興地方經濟。前排喺Instagram成日都見到勁多人去打卡，今次終於輪到小編去啦！
最近「Starbucks 京東1960」嘅地鐵站係祭基洞站（제기동역），喺2號出口行大約500米就會到！沿途仲可以行埋京東市場，一舉兩得！
行到入市場點睇都覺得呢度唔會有Cafe，原來要上樓上！
入到去會見到一個超大嘅螢光幕，再行入少少就會見到有好多影相位，而且仲有一個密室逃脫區（開放時間：11:00 - 19:00）！
影完相之後終於去到今日嘅重頭戲，就係呢間Starbucks啦！連個入口都睇落勁似一間戲院~
呢間Cafe樓底超高，而且真係超大！呢度總面積係850平方米，總共有143個位，真係想像唔到呢度居然係一間喺傳統市場入面嘅Cafe！小編同朋友平日9:15左右去到，所以都仲有幾多位。
内部裝修
收銀台
一樓座位
二樓座位
二樓俯瞰全景
Live Band區
小編同朋友搵好位之後就落返底層嘅counter睇叫咩食好。
收銀台隔離有提供餐牌，除咗有平時Starbucks賣開嘅餐飲同期間限定飲品之外，仲有「Starbucks 京東1960」限定嘅麵包款式！
大家叫嘢食之前可以睇埋隔離個display再叫，咁就冇咁容易中伏啦。
嚟到Starbucks點可以唔行埋週邊商品Corner啊！
小編去嗰陣係士多啤梨季，所以有超多以士多啤梨為主題嘅商品，同時亦都有韓國傳統主題同情人節限定商品。
週邊商品Corner隔離就有一個Live Band區，聽講呢度每逢星期五、六、日夜晚6點至6點半真係會有Live Band Show可以睇。
叫完嘢食之後小編同朋友就返咗自己位等。「Starbucks 京東1960」另外一個特點係職員唔會好似平時咁大叫你個名或者號碼，而係會投影喺呢兩塊牆上面，大家記住要一直望實啦~
終於攞到嘢食啦！行返位嗰陣記住要小心啲，因為條路都幾長，而且都有好多級樓梯！小編同朋友當然冇執輸，喺度影咗幾張靚相~
小編同朋友今次叫咗「京東1960」分店限定嘅蜂蜜芝士合桃包（₩6,900），期間限定嘅黑米鮮奶（₩6,800）同一杯粉紅草莓星冰爽（₩6,400）。
蜂蜜芝士合桃包睇落係一個好似bagel咁嘅麵包，入面包咗4款芝士，仲會另外提供一包蜂蜜俾你搽嚟食。
切嘅時候有少少硬，所以小編當時覺得應該唔會好食得去邊，不過鹹鹹地嘅芝士，加上煙韌嘅麵包同香甜嘅蜂蜜比想像中夾！個包都幾大吓，細食啲嘅可以同朋友share嚟食。
飲品方面，小編第一杯試嘅係韓國2023新年期間限定嘅黑米鮮奶。聽落好似好怪咁，不過其實係一杯帶有米香嘅鮮奶，幾creamy，上面仲有一層脆米，平時鍾意食米製零食嘅朋友們應該會好鍾意！
粉紅草莓星冰爽又叫做Pink Drink，本身係一款美國嘅Secret Menu，自從2017年喺美國正式出售之後，2022年8月亦都登陸韓國成為常售飲品。士多啤梨嘅甜味加上椰奶嘅香味，非常清新，聽講都好受韓國人歡迎！Pink Drink喺香港都曾經推出過一排，唔知大家又有冇飲過呢？
小編同朋友一致覺得呢幾款餐飲都唔錯，係令人滿足嘅早餐~
小編大概喺Cafe坐到11點，走嘅時候都已經差唔多坐滿，相信weekend一定會更加多人！
總括嚟講，小編認為「Starbucks 京東1960」都幾值得去！呢度裝修夠曬特別同復古，加上呢度嘅限定Menu都幾多樣化~ 而且樓頂夠高，面積又大，唔會俾人一種好翳焗嘅感覺。另外嚟嘅時候仲可以參觀埋樓下嘅京東市場，同時體驗韓國傳統文化！鍾意飲咖啡同去特別Cafe嘅朋友們下次嚟韓國記住要嚟呢度睇吓啦！
Most Unique Starbucks Locations in Seoul
東大門「Starbucks 京東1960」前往方法
祭基洞站（제기동역）2號出口行出嚟。
直行。
一直向前行。
直行去到大十字路口之後過馬路，然後轉左。
直行，你會經過市場外面嘅鋪頭。
右邊會見到京東市場4號入口，轉入去。
向右上方望，你會見到有個Starbucks Logo。
向上行，然後轉左。
之後就會見到「Starbucks 京東1960」嘅入口！
以上係東大門「Starbucks 京東1960」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk