益善洞「Cafe Highwaist」介紹
益善洞懷舊復古Cafe！連BTS、BLACKPINK、TWICE都有幫襯過？
Hello，大家好，我哋係由韓國人每日提供最新韓國旅行資訊嘅Creatrip。
講起益善洞，相信大家都會諗起古色古香嘅韓屋、靚靚Cafe同餐廳，而當中最受韓國年輕人歡迎嘅Cafe相信就係今日小編要介紹嘅「Cafe Highwaist（카페하이웨스트）」啦！到底點解呢度會咁受歡迎，日日都要排隊等？
想去首爾最hit餐廳但唔想排隊？
買一套即享10間人氣店鋪即時入場 + 獨家優惠！
益善洞「Cafe Highwaist（카페하이웨스트）」
益善洞「Cafe Highwaist」資訊
- 地址：서울 종로구 돈화문로11다길 18
- 營業時間：9:00 - 22:00
- 小Tips：鍾路3街站（종로3가역）6號出口行2分鐘
益善洞「Cafe Highwaist」推薦原因
- 「Cafe Highwaist」係益善洞最受歡迎嘅Cafe之一，每逢假期同weekend都超多人排隊！
- 古典風格裝修加上超得意擺設，嚟到就好似行咗入童話故事咁！
- 呢度嘅甜品同蛋糕都好出名，主打懷舊復古風格，超有70、80年代英國feel！
- BTS SUGA、BLACKPINK Jisoo、TWICE Jihyo、SNSD Yuri、2AM 珍雲、宋慧喬等超多韓星都有喺「Cafe Highwaist」訂過蛋糕，同偶像食同款蛋糕話咁易！
益善洞「Cafe Highwaist」價錢
Menu | 價錢 |
奶油焦糖鮮奶咖啡 Scotch Latte | ₩7,500 |
忌廉鮮奶咖啡 Cream Latte | ₩7,500 |
愛文芒果梳打 Apple Mango Ade | ₩7,800 |
伯爵奶茶 Earlgrey Milk Tea | ₩7,500 |
熊仔英式鬆餅 Teddy Scone | ₩5,300 |
伯爵Pink Lady蛋糕 Earlgrey Pink Lady | ₩8,300 |
※上述只係部分餐點，詳細Menu請到場參考。
益善洞「Cafe Highwaist」介紹
「Cafe Highwaist」係韓國最出名嘅靚靚Cafe連鎖店之一，相信大部分韓仔韓妹都最少嚟過一次。而益善洞分店就喺景福宮、仁寺洞等首爾著名觀光景點附近，所以都有唔少外國遊客會慕名而來，每逢weekend同假期嘅下晝時間都會見到有好多人喺門口排隊！
益善洞本身就好似一條迷你韓屋村咁，喺咁多間Cafe之中「Cafe Highwaist」嘅歐式建築風格就相對比較突出，幾乎所有經過呢間Cafe嘅人都會忍唔住停低參觀甚至係影相！
呢間Cafe比起附近其他韓屋Cafe更加大、更加有空間感，亦都有唔少位！不過最吸引人嘅當然係呢度嘅裝修，老闆將呢度裝飾到好似1950年代嘅英式廚房咁，每個角落都有好多復古又得意嘅裝飾品，啱曬大家影相打卡~
鋪頭每個角落都超IG-able，唔怪得咁多人都鍾意嚟呢度啦！
呢幾塊古董鏡係「Cafe Highwaist」打卡位之一，大家嚟到記住要影返幾張相啊！
一行到入去就會見到有超多Scone、蛋糕同甜品陳列喺鋪頭中間，又靚又震撼！
身為首爾最出名食Scone嘅Cafe之一，「Cafe Highwaist」提供超多款Scone任君選擇，梗有一款啱你口味。
除咗Scone，其實蛋糕都好受歡迎！呢度嘅蛋糕夠濕潤完全唔會乾，無論係朱古力蛋糕、紅蘿蔔蛋糕、Red Velvet蛋糕等等都有，而且全部都裝飾得好靚好復古，啱曬相機食先！
BLACKPINK Jisoo、SNSD Yuri、宋慧喬 Instagram
有好多韓國明星都會專門搵「Cafe Highwaist」訂造蛋糕，例如BTS嘅Jimin都送咗一個呢度嘅訂製蛋糕俾SUGA，款式夠特別之餘仲好潮！大家仲可以喺BLACKPINK Jisoo、TWICE Jihyo、SNSD Yuri、2AM 珍雲、宋慧喬等等嘅韓星IG見到「Cafe Highwaist」蛋糕嘅蹤影！如果大家都想訂返個，可以撳下面瞭解更多詳情。
大家買嘢Scone同蛋糕嘅時候要先去攞個麵包盤同夾，揀好之後夾落盤度，最後去Counter叫埋嘢飲同俾錢就得（如果想食雪櫃入面嘅蛋糕都可以呢個時候同職員講）！因為款款都睇落好正，有選擇困難症嘅小編真係揀咗好耐XD
最後小編同朋友就揀咗Earl Grey Milk Tea（伯爵奶茶）、Apple Mango Ade（愛文芒果梳打）、Teddy Scone（熊仔Scone）同Earl Grey Pink Lady蛋糕，影落全部都好靚~
Earl Grey Milk Tea ₩7,500
呢個咁得意嘅熊仔樽係伯爵奶茶，茶味夠香夠濃，不過如果直接飲可能會有少少甜。叫呢款飲品嘅時候店員會俾多個裝住冰嘅杯你，所以建議大家可以倒落去飲，會冇咁甜~ 鍾意呢個樽嘅話仲可以帶返屋企留念㗎！
Teddy Scone ₩5,300
嚟到「Cafe Highwaist」就當然要食呢度嘅Scone啦！呢度有好多款Scone，每款口味各有特色，而小編就揀咗呢個超可愛嘅熊仔Scone，聽講係呢度最暢銷嘅甜品之一~ Scone完全唔會乾，而且牛油味好重，加埋呢個造型真係100分！
Apple Mango Ade ₩7,800
夏天當然要飲返杯清爽啲嘅嘢飲啦，呢款愛文芒果梳打酸酸甜甜，不過記住要攪勻先飲啊，如果唔係會太甜！
Earl Grey Pink Lady Cake ₩8,300
呢款蛋糕上面係伯爵茶忌廉，茶味濃得嚟唔會太甜。叫得Pink Lady，呢款蛋糕嘅海綿蛋糕部份真係粉紅色㗎！無論係顔值定味道都非常唔錯，鍾意飲伯爵茶嘅朋友們可以一試！
大家都可以外賣蛋糕同飲品，店員會幫你用呢個復古嘅粉紅紙盒裝住，就咁影都好靚~
今次去完「Cafe Highwaist」益善洞店，終於知道點解有咁多人推薦啦！唔單止環境靚，連甜品同飲品都好高質~ 推薦大家去景福宮、仁寺洞玩之前或者之後嚟埋呢度坐低嘆杯咖啡食件Cake！
益善洞「Cafe Highwaist」前往方法
喺鐘路3街站（종로3가역）6號出口出，然後向出口相反方向行，轉入左邊巷仔。
直行，然後喺第3個路口左轉。
見到分叉路之後行左邊條路。
直行，見到路口之後轉右。
直行多陣就會見到「Cafe Highwaist」喺你右手邊。
以上係益善洞「Cafe Highwaist」嘅介紹，有任何問題請先詳讀呢篇文章。
如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com