益善洞Cafe總整理

Hello，大家好，我哋係由韓國人每日提供最新韓國旅行資訊嘅Creatrip。

「益善洞」係一個1920年代建成嘅韓屋村，位於韓國必去觀光景點之一嘅「仁寺洞」附近。同其他韓屋村相比，呢度更加似一個充滿各種餐廳同Cafe嘅韓屋小迷宮，現代同傳統完美結合，可以話係小編喺首爾最鍾意嘅地方！今日小編就為大家整理咗一個益善洞必去Cafe清單，間間都勁有特色，有計劃去益善洞玩嘅朋友們記住要睇埋落去啦！

益善洞Cafe總整理

清水堂_(청수당)

• 地址：서울 종로구 돈화문로11나길 31-9
• 營業時間：10:30 - 21:00
• 前往方法：鐘路3街站（종로3가역）6號出口行4分鐘

「清水堂」係益善洞最出名嘅Cafe之一，呢間Cafe最有代表性嘅就係門口呢條石橋同圍繞住成間Cafe嘅竹林，加上內部仍然保留住韓屋嘅裝修風格，俾人一種幽靜嘅感覺。呢度嘅餐點價位其實同其他Cafe相比偏貴，不過味道唔錯，最緊要係可以相機食先XD

Cafe Highwaist益善店_{(카페하이웨스트 익선점)}

• 地址：서울 종로구 돈화문로11다길 18
• 營業時間：09:00 - 22:00
• 前往方法：鐘路3街站（종로3가역）6號出口行2分鐘

平時益善洞嘅Cafe大部分都會係傳統韓屋風格，但係「Cafe Highwaist」就好似童話故事入面會出現嘅鋪頭，一行到入去就會見到有超多Scone、蛋糕同甜品陳列喺鋪頭中間！呢度主打懷舊復古風格，超有70、80年代英國feel，而且超多韓星都有喺「Cafe Highwaist」訂過蛋糕，同偶像食同款蛋糕話咁易！（而家有Creatrip特快通行證就唔洗擔心要排隊啦~）

自然島鹽麵包_{(자연도 소금빵&자연도가)}

• 地址：서울 종로구 수표로28길 21-17
• 營業時間：09:00-22:00
• 前往方法：鐘路3街站（종로3가역）4號出口行2分鐘

「自然島鹽麵包」喺韓國爆紅之後，分店開到去益善洞都有！呢度嘅鹽麵包一袋有4個，口感軟熟之餘牛油味香，而且包裝都好文青，影相一流！大家有時間不妨可以堂食，感受繁忙城市中嘅一片幽靜。

Rami Scone_{(라미스콘)}

• 地址：서울 종로구 돈화문로11나길 25
• 營業時間：11:00 - 22:00
• 前往方法：鐘路3街站（종로3가역）6號出口行3分鐘

小編每次經過都會俾「Rami Scone」陳列喺玻璃窗前面嘅scone同蛋糕吸引到！因為有半邊屋頂係玻璃，自然光射入嚟真係好靚，影相一流！特別嘅係「Rami Scone」係益善洞為數不多會提供Vegan餐點嘅Cafe，就算係素食者都可以享受呢度嘅甜品同飲品~

樂園驛_(낙원역)

• 地址：서울 종로구 수표로28길 33-5
• 營業時間：11:30 - 22:30
• 前往方法：鐘路3街站（종로3가역）4號出口行2分鐘

「樂園驛」最特別嘅係門口呢條火車軌，加埋側邊啲蘆葦叢，真係勁似一個古老嘅車站超有feel，相信個個見到都會想停低影相！呢度成日都要排隊等位，特別係因為窗邊位可以望住條火車軌，所以大家都會爭住坐。唯一缺點係因為鋪位比較細，所以枱同枱之間好近，人多嘅時候可能會覺得好逼同俾人聽到曬自己講咩XD

小夏鹽田_{(소하염전 익선)}

• 地址：서울 종로구 수표로28길 21-5
• 營業時間：09:00-21:00
• 前往方法：鐘路3街站（종로3가역）4號出口行1分鐘

Instagram@sohasaltpond

講起益善洞呢一兩年最hit嘅Cafe，一定唔少得「小夏鹽田」！喺門口就可以見到一個模仿鹽田嘅花園仔，仲有一架木製水車，就好似去咗郊外大自然咁！呢度最出名嘅係食鹽麵包，除咗原味之餘仲有黑松露墨汁同明太子等等嘅特別口味，其他甜品同咖啡都夠曬特別！

東柏洋菓店_{(동백양과점)}

• 地址：서울 종로구 수표로28길 17-24
• 營業時間：10:00 - 22:00
• 前往方法：鐘路3街站（종로3가역）4號出口行2分鐘

2017年開張嘅「東柏洋菓子店」係一間日式風格Cafe，裝修復古得嚟氣氛浪漫，一直以嚟都受到好多人歡迎。入面有一張Bar枱，大家可以坐喺度睇住職員調製飲品。而嘢食亦唔係得個睇字，味道都好唔錯！飲品方面小編覺得士多啤梨水果茶幾驚艷，而梳乎厘pancake亦都好軟熟，加埋啲Cream一齊食真係好滿足！

 益善洞「東柏洋菓子店」詳細介紹

MIL Toast House_{(밀토스트)}

• 地址：서울 종로구 수표로28길 30-3
• 營業時間：08:00-22:00
• 前往方法：鐘路3街站（종로3가역）4號出口行2分鐘

平時大家去Cafe都會食蛋糕或者撻類嘅甜品，但係呢間「MIL Toast House」最出名居然係食蒸麵包！聽落好似好怪咁，但係有好多人都會為咗佢哋嘅蒸籠方包而幫襯，去遲咗仲有可能會賣曬食唔到㗎！

 益善洞「MIL Toast House」詳細介紹

Cheese Industry_{(치즈인더스트리)}

• 地址：서울 종로구 수표로28길 33-7
• 營業時間：10:00-22:00
• 前往方法：鐘路3街站（종로3가역）4號出口行2分鐘

如果大家鍾意食芝士味麵包同甜品，咁就一定唔可以錯過呢間「Cheese Industry」啦！成間Cafe真係好似一間芝士工廠咁，四周圍仲有勁巨型嘅芝士，同主題勁夾！餐點方面除咗有芝士蛋糕、酥皮甜品、麵包同餅乾之餘，仲有其他咖啡同甜品，大家仲可以叫埋紅酒/白酒添啊！

以上就係小編為大家整理嘅益善洞Cafe攻略，希望可以幫到大家plan行程！

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購