西村體驗活動總整理
西村附近除咗有景福宮仲有咩可以參觀同玩？一齊撳入嚟了解吓啦！
Hello，大家好，我哋係由韓國人每日提供最新韓國旅行資訊嘅Creatrip。
去西村除咗可以參觀景福宮之外，仲有咩可以做呢？今日小編一一整理好俾大家參考！
西村體驗活動總整理
1. 去參觀景福宮
景福宮建於1395年，被認為係最靚宮殿之一，同時係五座宮殿中最大一座，係好多人嚟韓國旅行必去打卡景點之一。
去景福宮唔可以錯過就係睇守門將換崗儀式，當中守門將換崗儀式1日會進行2次 (10:00、14:00) ，一次大約需20分鐘、光化門把守儀式1日亦都會進行2次 (11:00、13:00) ，一次大約需10分鐘，另外守門軍公開訓練（協生門外）會喺 09:35、13:35表演。
夜晚嚟到呢度又係另一個氣氛，唔少情侶都會嚟打卡！不過提提大家，每日開放時間都會唔一樣，大家去之前要留意吓！
景福宮（경복궁）
- 地址：서울 종로구 사직로 161
- 營業時間： 1-2月 9:00 - 17:00、3-5月 9:00 - 18:00、6-8月 9:00 - 6:30、9-10月 9:00 - 18:00、11-12月 9:00 - 17:00（逢星期二休息）
- 價格：成人 ₩3,000、小童₩1,500（著韓服時免費）
- 小Tips：景福宮站4號出口
2. 去參觀國立古宮博物館
對於鍾意歷史嘅朋友，走到西村一定要參觀埋國立古宮博物館，呢度係免費入場㗎！
呢度收集咗好多同宮殿有關韓國歷史資料，甚至仲可以了解過去景福宮係點嘅樣貌。
同時仲展示唔少古代器物、宮廷器物、皇家印章等，慢慢喺度欣賞！
國立古宮博物館（국립고궁박물관）
- 地址：서울 종로구 효자로 12
- 營業時間：10:00 - 18:00、最後入場時間17:00（1月1號、新年及中秋當日休息）
- 價格：免費
- 小Tips：安國站2號出口
3. 去借韓服著住打卡
去韓國旅行點都要去借韓服喺宮殿走一轉，如果冇咁做過實在太可惜！
只要著住韓服就可以免費入好多宮殿，唔少情侶或者朋友嚟到都一齊會著返套，只要試過一次絕對有一個難忘回憶！
西村附近有好多租借韓服嘅舖頭，當中小編想同大家推薦同緊我哋合作嘅Yes韓服，距離景福站超近，呢度有超過1,000種唔同款嘅韓服，大家一定可以搵返件啱心水！透過我哋預約仲可以有優惠添！
Yes韓服（예스한복）
- 地址：서울 종로구 사직로 133-6
- 營業時間：9:00 - 18:00
- 小Tips：景福宮站4號出口
4. 去機鋪
去旅行嘅主要目的其實好多時都係為咗舒壓，甚至有時可能係為咗追星，小編介紹嘅呢一間機舖，之前Nct就有去過啦！
呢度有夾公仔機、街機等，大家嚟到一定可以玩得好開心！
如果身上冇帶紙幣唔緊要，呢度仲可以用信用卡撳錢出嚟玩添！
Ogin Oraksil（옥인오락실）
- 地址：서울 종로구 옥인길 28
- 小Tips：景福宮站2號出口
5. 去睇展覽
西村有好多展示藝術品嘅地方，當中最受歡迎嘅就係Ground Seesaw，成日會見唔少韓國人sns都會post相。
呢度定期都會有唔同展覽，詳細可以參考佢哋嘅官網。
當時小編去係Yosigo展覽期，係以旅遊做主題，令人印象深刻。
Ground Seesaw（그라운드시소 서촌）
- 地址：서울 종로구 자하문로6길 18-8
- 營業時間：10:00 - 19:00（最後入場時間18:00）
- 價格：成人₩15,000、3-19歲₩12,000
- 小Tips：景福宮站3號出口
6. 參觀青瓦台舍廊房
青瓦台舍廊房距離景福宮好近，如果要去都好方便。
博物館有展示好多關於前總統嘅事，以及青瓦台、韓國文化同景點介紹。2樓仲有一個模擬總統府拍照區，不過好可惜小編去到嘅時候因為暫時裝修而關閉。
呢度每一個角落都有一個扱印仔嘅區，如果想留念，可以喺度扱返個。
好多人嚟到，都會以呢一個鳳凰展翅作為背景影返幅相，相當宏偉壯觀！
青瓦台舍廊房（청와대사랑채）
- 地址： 서울 종로구 효자동 150
- 營業時間：9:00 - 18:00、逢星期一及1月1號休息
- 價格：免費
- 小Tips：景福宮站3號出口
7. 去通仁市場
嚟韓國絕對唔可以錯過行一啲傳統市場，因為呢度可以用好平嘅價錢就食到好好味嘅小食。
呢度同其他市場有啲唔同，就係可以用同錢去買想食嘅嘢，用₩5,000買到一個便當盒同10個銅板。
每一間舖頭上面都會有寫住用幾多個銅錢就可以換到食物，相當之有趣，而且份量都多！
通仁市場（통인시장）
- 地址：서울 종로구 자하문로15길 18
- 營業時間：07:00 - 21:00（每個月逢第三個星期日全場休息）、飯盒cafe 11:00 - 17:00（星期一休息）
- 小Tips：景福宮站2號出口
8. 去行山
韓國人只要一放假就好鍾意去行山，喺首爾其實都好多山可以行！
西村附近就有一個仁王山，如果想搵個地方暫時清靜吓，欣賞首爾自然風光，呢度都幾唔錯！
上到山頂吸吓新鮮空氣，人都會醒神啲！之後嚟韓國，會唔會都想搵一個朝早去行吓山，影吓相打卡呢？
仁王山（인왕산）
- 地址：서울 종로구 무악동 산2-1
- 小Tips：毋岳嶺站1號出口
9. 去洪建翊家屋
洪建翊家屋被認為係首爾民俗文化財產，考慮到建築同文學價值，一入到去就會見到舍廊房（사랑채）同客廳。
2017年作為公共場所對外開放，俾大家入去參觀，有時仲會有特別展覽，入到去可以欣賞到年輕韓國工匠整嘅精美作品，將古今藝術完美結合，有興趣嘅朋友仲可以買嚟做紀念品。
如果大家有時間仲可以喺度慢慢行！ 唔少位都好適合打卡！
洪建翊家屋（홍건익가옥）
- 地址：서울시 종로구 필운대로1길 14-4
- 營業時間：星期二至日 10:00 - 18:00、逢星期一休息
- 小Tips：景福宮站1號出口行大約56m
如果之後去西村嘅朋友，不妨可以參考吓以上嘅行程！
如果有更多想知嘅內容，都可以隨時留言或者dm話俾我哋知：）
Instagram：creatrip.hk