江原道交通總整理
之後由首爾想去江原道玩要點搭車？小編整理好各城市KTX/火車/巴士教學！
Hello，大家好，我哋係由韓國人每日提供最新韓國旅行資訊嘅Creatrip。
成日聽人講江原道，不過大家又知唔知呢個地方其實包含好多地區呢？好多韓國人都會趁住放假嘅時候去周圍玩，今日小編整理咗江原道春川、江陵、束草、正東津、鐵原、橫城、平昌、襄陽、原州、東海、三陟交通攻略，由首爾出發，搭火車同巴士都有，同時仲整理咗價錢同優缺點，希望可以幫到之後去江原道玩嘅朋友啦！
本文章更新時間為2021年11月
因為交通資訊可能會有所變更
請以官網時間表同價錢為準
江原道「江陵」交通方式
首爾往江陵KTX火車（最快/最貴）
江陵站
由首爾去江原道「江陵」最快嘅方式就係搭KTX火車，如果之後會去江陵嘅朋友，可以事前喺KTX官網預約，相對價錢會平啲，而且仲可以直接喺首爾站或者清涼里上車，大約坐兩個鐘就會去到。
首爾往江陵嘅巴士（多班次/最平）
- 上車：東首爾巴士客運站（江邊站 / 강변역）
- 票價：₩15,600、₩20,200（成人/單程）
- 時間：約3個鐘（或以上）
江陵客運站（來源：파이낸셜뉴스）
如果KTX一直唔啱時間，可以揀搭巴士，不過缺點就係搭嘅時間會比較耐，甚至唔一定會直達，或者總站就係江陵，因為部份巴士可能會中途轉去其他城市。大家可以直接喺首爾地鐵站2號線嘅江邊站（강변역）嘅「東首爾巴士客運站（동서울종합터미널）」買飛，或者先喺txBus、BusTago等網站訂都可以。
江陵往正東津火車
- 上車：江陵站（강릉역）
- 票價：₩2,600（成人/單程）
- 時間：20分鐘之內
正東津站
由江陵站搭火車去正東津，最快同最平一定係搭「Nuriro號」，一日班次唔多，由江陵站出發時間分別係06:26、07:38、08:36、10:40、14:10、16:25、18:29、20:36，約15至20分鐘車程就會去到，沿途仲可以望到東部海岸風光。
備註：車次時間請以網路、現場系統為準
江原道「春川」交通方式
首爾往春川ITX青春號（最快）
春川站
由首爾要去春川，最快嘅方法就係搭ITX青春號（冇KTX）。另外ITX青春號只可以喺龍山站、清涼里站上車，千祈唔好去咗首爾站。
目前ITX青春號改為需要下載App，或領取實體卡片（上有QR code）當車飛，大家之後搭ITX嘅時候都要留意一下，小編查過用Apps嘅話係唔需要外國人認證，就算係遊客都可以放心使用。
首爾往春川嘅巴士（班次快/平）
- 上車：東首爾巴士客運站（江邊站 / 강변역）
- 票價：₩7,700（成人/單程）
- 時間：約1個鐘40分鐘
春川客運站
其實比起搭ITX青春號，小編個人幾推薦大家搭巴士，一樣都係由首爾地鐵2號線江邊站（강변역）嘅「東首爾巴士客運站（동서울종합터미널）」上車，可以先喺txBus、BusTago等網站訂飛，同ITX嘅時間差唔多，班次仲多。
不過一樣都要提提大家：首爾往春川巴士唔係每一班都係直達，要小心唔好坐過站，如果唔係就會去咗另一個城市。
江原道「橫城」交通方式
首爾往橫城KTX火車（最快/需要轉乘）
橫城站（來源：천지일보）
最快可以去到橫城就係搭KTX，一日大約有10班車，由首爾站上車，大約坐1個鐘20分鐘左右就會到，不過有啲可惜嘅係橫城站距離市區、韓牛街等景點有少少遠，去到之後仲要轉搭巴士或的士。
首爾往橫城嘅巴士（班次快/近市區）
- 上車：東首爾巴士客運站（江邊站 / 강변역）
- 票價：₩11,300（成人/單程）
- 時間：約2個鐘
橫城客運站
同樣先喺先喺txBus、BusTago等網站訂飛，喺首爾地鐵2號線江邊站（강변역）嘅「東首爾巴士客運站（동서울종합터미널）」上車就可以。但缺點就係一日只得四班車（首爾出發07:10、10:10、14:40、17:15），價錢只係平₩2,600，但就要坐多半個鐘以上，但優點就係橫城巴士轉運站喺市中心。
備註：車次時間請以網路、現場系統為準
江原道「束草」交通方式
首爾往束草嘅巴士（唯一交通方式）
- 上車：東首爾巴士客運站（江邊站 / 강변역）
- 票價：₩15,100、₩19,700、₩24,600（成人/單程）
- 時間：約2個鐘10分鐘至3個鐘
束草高速巴士轉運站
束草冇KTX站，由首爾過去最快就係搭巴士。，一樣喺txBus、BusTago等網站訂飛，到地鐵2號線江邊站（강변역）「東首爾巴士客運站（동서울종합터미널）」上車，但要留意佢哋係有₩19,700、₩24,600兩種票價，坐嘅時間差唔多，價錢只係差在於車嘅等級（貴啲啲係Premiun Bus），至於最平嘅就是一般巴士（而且仲會兜一大個圈）。
江陵往束草嘅巴士
- 上車：江陵市外巴士站（강릉시외터미널）
- 票價：₩7,200（成人/單程）
- 時間：約1個鐘10分鐘
江陵客運站（來源：維基百科）
因為唔少人會將江陵、束草行程排埋一齊，會選擇喺江陵玩一日，第二日再去束草，小編都整理好相關資訊。基本上就係喺江陵市外巴士站搭巴士，但注意唔好搭到「共同運輸（공동운수）」班次，因為會兜好耐先到。
江原道「襄陽」交通方式
首爾往襄陽嘅巴士（最快）
- 上車：東首爾巴士客運站（江邊站 / 강변역）
- 票價：₩15,100、₩16,400（成人/單程）
- 時間：約1個鐘40分鐘至2個鐘以上
襄陽客運站
雖然襄陽都有機場，但目前國內線幾乎係冇，大多數人都揀搭由首爾搭巴士去襄陽。先喺txBus、BusTago等網站訂飛，喺江邊站（강변역）「東首爾巴士客運站」上車，大約坐2個鐘就會到襄陽。提提大家，唔一定每一班車終點站都係襄陽，千祈唔好錯過站。
江原道「鐵原」交通方式
首爾往鐵原嘅巴士（最快）
- 上車：東首爾巴士客運站（江邊站 / 강변역）
- 票價：₩10,800（成人/單程）
- 時間：約2個鐘
新鐵原客運站
先喺txBus、BusTago等網站訂飛，喺江邊站（강변역）「東首爾巴士客運站」上車，大約坐2個鐘就會到鐵原新鐵原市外巴士站（신철원 시외 버스터미널）。而小編自己經驗，首爾去鐵原可以網上預訂，但鐵原返首爾就要去現場買。
鐵原「東松」客運站
如果大家有其他行程，可以再去更北嘅「東松室外巴士公用轉運站（동송시외버스공용터미널）」，呢度距離北韓更近，幾乎就係停戰線前，四處都有軍人肅靜氣息（仲有好多軍用店）。
江原道「原州」交通方式
首爾往原州「萬鍾站」KTX火車（班次最多）
萬鍾站（來源：維基百科）
原州附近總共有三個KTX站，而「萬鍾站」KTX班次係最多，一日大約有10班車，而呢度距離觀光客成日會去嘅原州景點（小金山吊橋、Museum SAN）較近，但就離市區較遠。
首爾往原州「西原州站」嘅火車（最抵）
西原州站（來源：나무위키）
比起萬鍾站，西原州站距離原州景點再近啲，除咗KTX（班次唔多）之外，都有一般火車，時間差唔多，票價相對彈性少少。如果由清涼里站上車，最平只要₩5,600，好抵！
首爾往原州「原州站」嘅火車（離市區最近）
原州站（來源：維基百科）
原州站係一般車站，KTX班次停靠次數唔多，但相對較平，而一般火車如果喺清涼里站上車，都只係₩6,200，優點就係距離市區近啲。
首爾往原州嘅巴士（班次最多）
- 上車：東首爾巴士客運站（江邊站 / 강변역）
- 票價：₩7,700、₩10,800（成人/單程）
- 時間：約1.5至2個鐘
原州客運站（來源：維基百科）
小編個人唔太推薦搭巴士到原州，雖然一日有20班車以上，好彈性，而且落車地點就係原州市外公車轉運站（원주시외버스터미널），係市區內，相對方便，但搭一程就要坐1.5至2個鐘。
江原道「平昌」交通方式
首爾往平昌「珍富站」KTX火車（最快）
珍富站
如果遊客去江原道平昌旅行，主要都係喺珍富站（진부역）落車，雖然喺之前仲有個平昌站（평창역），但相對嚟講，珍富站比較靠近市區，而平昌KTX站係以首爾大學平昌校區為主，唔太多嘢行。
另外如果大家有細心留意上面幅圖，可以發現搭KTX可以直接去埋平昌、江陵，係唔係好方便呢？
首爾往平昌嘅巴士（離市區最近）
- 上車：東首爾巴士客運站（江邊站 / 강변역）
- 票價：₩19,600（成人/單程）
- 時間：約2個鐘以上
平昌客運站（來源：維基百科）
雖然一日只係得大約5班車左右，但小編點解仲要整理首爾往平昌嘅巴士呢？因為平昌市外巴士轉運站就位於平昌市區（距離珍富站大約40公里），大家安排行程時，建議Search埋去平昌景點，大概喺珍富站、平昌站、平昌巴士站邊度落會比較好。
江原道「東海」交通方式
首爾往東海KTX火車（最快/班次少）
東海站
東海站自從KTX開通之後，過去呢度變得方便得多，途中仲會經過正東津（但唔經過江陵站），不過東海站KTX班次偏少，小編建議先去江陵玩一轉，再搭一般火車或巴士嚟東海都比較快。
首爾往東海巴士（班次多）
- 上車：東首爾巴士客運站（江邊站 / 강변역）
- 票價：₩19,000、₩24,300（成人/單程）
- 時間：約3個鐘以上
東海客運站（來源：나무위키）
如果KTX往東海班次一直都計唔啱，建議大家可以搭巴士，雖然要坐3個鐘以上，但時間同價錢相對彈性係最大優點。同樣大家可以先喺txBus、BusTago等網站訂飛。
江原道「三陟」交通方式
首爾往三陟的客運（最有效率）
- 上車：東首爾巴士客運站（江邊站 / 강변역）
- 票價：₩20,000、₩25,200（成人/單程）
- 時間：約3個鐘以上
三陟客運站（來源：나무위키）
三陟海邊站、三陟站（火車站）為支線，冇KTX直達，如果要由首爾搭KTX往東海站，再轉支線火車嘅話會相對複雜同哂時間，所以小編只係整理好江原道三陟市嘅客運。
一樣先喺txBus、BusTago等網站訂飛，到「三陟綜合巴士轉運站（삼척종합버스터미널）」之後就係三陟市區，由呢度去三陟其他景點、海邊都幾方便。
以上係小編整理好江原道各城市嘅交通攻略，希望可以幫到之後打算去江原道玩嘅朋友啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk