束草「中央市場」介紹
江原道束草「中央市場」美食應有盡有！HKD100都唔使可以食到超多蟹腳同蟹膏炒飯？CP值超高！
Hello，大家好，我哋係由韓國人每日提供最新旅行資訊嘅Creatrip。
韓國有唔同地區，每一個地方都有佢哋獨特之處，不過講到其中一樣共同點，就係當地最大嘅市場都會叫做「中央市場」，如果大家都想了解當地嘅文化，同埋食最地道嘅美食，咁佢傳統市場一定唔會有錯！
束草「中央市場」介紹
속초 중앙시장
- 地址：강원도 속초시 중앙로147번길 12
- 時間： 08:00 - 24:00
位於江原道嘅「束草」係好多韓國人放假時好鍾意去嘅旅遊勝地之一。當地最大傳統市場係「束草中央市場」，同時亦被稱為束草觀光水產市場，距離束草市外巴士轉運站（속초시외버스터미널）只係800米，而鄰近束草高速巴士轉運站（속초고속버스터미널）只有2.5km，算係相當近，無論係行路定係搭巴士或的士都好易去到。束草中央市場門口（上圖）可以一眼睇到每個攤位賣緊啲咩，而且擺放得好整齊。
嚟到嘅旅客大部分都會選擇去中央市場美食街，喺呢度有好多韓國小食，只係望到都令人流哂口水，不過有咁多間，有邊一間係必食嘅呢？小編會逐一為大家介紹！首先第一個絕對唔可以錯過嘅就係魷魚血腸啦！超香而且超好味，唔食會後悔！
小編係週末去到束草中央市場，當日人山人海，為咗食魷魚血腸嘅人超多！
1. Ge-Ssa-Da-Gu（게싸다구）
- 位置：束草中央市場內53號攤檔
店名叫做「Ge-Ssa-Da-Gu」，如果用韓文發音，其實係想講「平到不得了（개싸다고）」，呢度之會咁多人排隊，係因為只要用₩10,000（大約HKD70）就可以食到超好味紅蟹，而且再加₩2,000（約HKD14）就可以食埋蟹膏炒飯，係唔係超吸引呢？
兩份
小編叫咗兩份，老闆會幫大家處理好同切開，食嘅時候好方便，加埋超滿嘅蟹膏炒飯，真係好難相信咁嘅價錢可以食得咁豐富，CP值相當高！如果想食更高等級螃蟹，喺Ge-Ssa-Da-Gu現場可以另外再揀，再請老闆幫手煮，落完單之後拎好收據，等大概45分鐘再返去拎就得，建議大家喺等嘅時候可以去其他地方行吓。
2. 賢泰家炸物（현태네튀김）
- 位置：束草中央市場內12號攤檔後面
最一開始講到嚟束草一定要食嘅係魷魚血腸，雖然喺中央市場好多攤檔都有賣，因為小編想坐底熱辣辣咁食，就揀咗12號攤檔後面嘅「賢泰家炸物」，雖然冇特別點裝修，但望落去簡單得嚟又俾人一種舒服嘅感覺。
左邊係糯米紅豆糕（수수부꾸미）一份₩5,000（大約HKD35），外面口感酥脆，紅豆好甜，適合食完鹹嘢再食佢做調劑。右邊係「魷魚血腸（오징어순대）」一份₩10,000（大約HKD70），將冬粉、蔬菜塞入魷魚中間，沾上蛋液煎熟，同一般食嘅血腸味道好唔同，就算唔敢食血腸嘅朋友都可以試吓，超好味！
3. 萬錫炸雞丁（만석닭강정）
- 位置：束草中央市場內16號攤檔
- 時間：每日 10:00 - 20:00
嚟到束草中央市場又點可以唔試佢哋特產炸雞丁（닭강정）呢？佢哋會喺炸雞上面加少少杏仁片，小編揀咗喺「萬錫炸雞丁」買嚟試食，除咗味道可以揀之外，仲可以揀要骨定去骨，一份大約係₩15,000至₩19,000（約3至4人份）（大約HKD105～133）。
小編揀咗辣味，味道比辛拉麵再辣少少，但好惹味！同上面嘅杏仁片一齊食好夾，好推薦大家嚟到買一份當做宵夜食！除咗萬錫炸雞丁之外，大家亦可以去23號「中央炸雞丁（중앙닭강정）」以及20號嘅「束草炸雞丁（속초닭강정）」。
4. 蒸包隨意吃（찐빵땟거리）
- 位置：束草中央市場內54號攤販
- 時間：每日 09:30 - 19:30、逢星期三休息
「땟거리」係一種方言，形容勉強夾住食嘅意思。而呢間「蒸包隨意吃」原本有賣蒸式麵包，但而家以米酒（馬格利）做成「술빵」為主，係束草中央市場相當熱門店鋪之一，嚟到又點可以錯過呢？
一份₩4,000（大約HKD28）如果只係口痕，一舊可以分到2至3人食。老闆表示呢種傳統麵包係自然發酵，比一般麵包店賣嘅麵包更加健康，「蒸包隨意吃」打出口碑，無論幾時去都係大排長龍，小編都係第二次去先買得到。
5. 蝦子大叔（새우아저씨）
- 位置：束草中央市場內50號攤販
- 時間：每日 09:00 - 21:00、冇指定休息日子，但間唔中星期二、三會休息，去之前可以打電話去問。
如果想食更多炸物，可以去束草中央市場嘅「蝦子大叔」，超多人排隊，重點係佢喺2021年韓國品牌大賞，仲係「束草美食品牌」得獎者添！
6. 各式煎餅
嚟到傳統市場，一定要試各式各樣煎餅（전）！束草中央市場有賣好多款，而且唔少鋪頭都有賣，由泡菜煎餅到芝麻葉煎餅都有，價錢一啲都唔貴，如果真係唔知揀食邊款好，不妨試吓江原道特產「蕎麥煎餅（메밀전병）」。
7. 醬蟹、醬蝦
相信大家都有聽過「醬蟹係白飯小偷」呢個稱號！醬蟹同醬蝦配飯食幾多碗都得，喺束草中央市場隨處可見，而且因為束草係沿海城市，海鮮品質絕對有保證！唔買會後悔！
8. 紫菜包飯
堆成好似一座山嘅紫菜包飯睇見都覺得可愛，口味相當多款俾大家揀，多人去可以每款都買嚟試吓再分嚟食。
9. 乾貨
束草中央市場有唔少將蔬菜風乾，製成果乾嘅攤檔，健康得嚟又天然，飲酒嘅時候配呢啲小食絕對冇得輸！
10. 魷魚麵包（오징어빵）
束草名產，用真嘅魷魚做成麵包
11. 其他種類
除咗小編介紹嘅美食之外，呢度仲有好多攤檔賣韓國農作品，例如100%濟州橙汁，或者新鮮香甜水果、五顏六色蔬菜等，每行一步都會搵到唔少驚喜。
江原道束草以超靚海景而出名，當地美食更加成為韓國人旅遊勝地，想食到好西一定要去「中央市場」，距離首爾唔算遠，之後去韓國不妨都抽少少時間去束草玩幾日啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
