Hello，大家好，我哋係由韓國人每日提供最新韓國旅行資訊嘅Creatrip。

唔知大家有冇聽過江原道「鐵原」呢一個地方呢？佢位於韓半島中心，一個橫跨南北行嘅城市，曾經係漢城到金剛山嘅交通要地，今日小編就帶大家一齊去睇吓，離北韓最近嘅城市，到底有咩好玩啦！

鐵原交通方式

點由首爾去鐵原？

去鐵原可以搭火車或者巴士，鐵原一共有三個巴士站：「新鐵原市外巴士站（신철원시외버스터미널）」、「東松市外巴士站（동송시외버스공용터미널）」及「瓦水市外巴士站（와수버스터미널）」。

由首爾出發嘅朋友可以喺「東首爾巴士站」或者「高速巴士站」坐車，小編今日要介紹嘅係由「東首爾巴士站」出發到「新鐵原市外巴士站」路線，車程大約係兩個鐘，費用係₩10,800。

每日隔大約一個鐘左右就會有一班車，開車時間如下：06:40、07:20、08:30、10:00、10:50、11:00、12:30、14:30、14:40、16:20，大家可以喺txBus、BusTago等網站事先買飛（網站有韓文、中文、英文、日文揀），出發之前一定要確認好時間。

鐵原一日遊行程推介

1. 孤石亭（고석정）

• 地址：강원 철원군 동송읍 태봉로 1825
• 費用：免費

首先想同大家介紹鐵原八景之一嘅「孤石亭」，因為有特殊地形景色，喺地質方面有好有研究價值。

喺呢個入口入去就會見到「孤石亭」，高大約15米「孤石」係大地被熔岩覆蓋之前嘅基岩，約1億1千萬年前喺地下形成花崗岩，後嚟經漢灘江侵蝕作用形成新河道過程中，重新再露面。

入口行落去之後，沿途可以見到好多韓劇都嚟過取景，例如係像是韓劇《鯊魚》、《那年冬天風在吹》、《醫道》、《朝鮮射手》等。

大概行15分鐘，就會慢慢見到孤石同漢灘江。

上圖係「孤石亭」，喺新羅真平王時期所建，韓戰時期被燒毀過，後嚟又被重建，同時具有地理同歷史意義。

喺度大家可以搭船環江水，近望大自然塑造出嚟嘅奇岩怪石！

2. 孤石亭花田（고석정꽃밭）

• 地址：강원 철원군 동송읍 장흥리 10-2
• 時間：10:00 - 17:00

距離「孤石亭」行15分鐘路程，呢度有一個由舊年秋天就開始超有人氣嘅「孤石亭」花田。

根據疫情防疫守則，入去之前需要先打電話、掃QR CODE同量體溫。

花田大約有33個足球場咁大，被五顏六色嘅鮮花圍住，除咗會覺得好自在之外，喺度打卡更加係一流！

近幾年好受歡迎嘅波波草，呢度都有好多，大家高唔定喺度可以影返張人生照！

除咗同啲花一齊打卡之外，場入面仲設計咗傳統韓屋、唔同藝術品等，同時仲會播Kpop增添氣氛。

小王子除咗釜山有之外，呢度都唔例外，可以坐喺中間一齊打返張卡！

天氣好同有陽光嘅時候嚟打卡，就算遠咗少少，都會覺得超值得！

鐵原嘅代表卡通人物之一係「鶴」，聽講會用「鶴」作為郡嘅代表性吉祥物，係因為「鶴」係世界上珍稀鳥類同有天然紀念物嘅意義，純潔性＋稀有性嘅象徵，嚟度千祈唔好唔記得喺度影返張相啊！

鐵原嘅花田唔係日日都會有，佢哋係根據季節開放，好似今年秋季預計喺10月31號關閉，所以之後有興趣去呢度打卡嘅朋友，一定要check清楚先好出發！

3. 평이담백 뼈칼국수（平易淡白排骨刀削麵）

• 地址：강원 철원군 동송읍 태봉로 1833
• 時間：平日11:00 - 20:00（Break Time 15:00 - 17:00）、週末11:00 - 20:00（Break Time 16:00 - 17:00）

行到攰係唔係開始都有啲肚餓呢？由「孤石亭」行大約15分鐘，會見到呢度「平易淡白排骨刀削麵」，門口泊滿晒車，而且要拎飛先入到去，可想言之呢度人氣有幾咁高！

舖頭入面雖然都有好多位，不過就完全坐滿人，要等一段時間先可以食，令到小編都有啲期待！

Menu好簡單，有「排骨刀削麵（뼈칼국수）」、「涼拌刀削麵（비빔칼국수）」、「蝦餃（새우만두）」，而一到夜晚會多咗「炒排骨（뼈볶음）」同「辣炒墨魚（매콤갑징어볶음）」。

坐底落完單之後，職員會先送上小菜，有青陽辣椒、洋蔥、泡菜、烤肉醬同特製醬汁。

排骨刀削麵（뼈칼국수）₩10,000

小編叫咗呢度嘅招牌菜「排骨刀削麵」，用咗豬骨去熬製，湯底特別濃郁，因為加咗少少蔥同蛋絲，睇落更加豐富！排骨超嫩，大家可以點特製酸酸辣辣嘅蒜味醬汁，超惹味！喺其他地方絕絕食唔到！保證大家一試愛上～

4. 鐵原 漢灘江銀河橋（철원한탄강 은하수교）

• 地址：강원 철원군 동송읍 장흥리 725-12 
• 時間：09:00 - 17:00、逢星期二休息

食完之後想散吓步，可以嚟度呢個總長180米、闊3米，同時可以容納2,311人嘅「漢灘江銀河橋」，嚟呢度有啲唔方便，建議大家可以由「孤石亭」搭的士去，車費大約係₩3,500左右。

韓國好多天空步道都鍾意用玻璃做設計，行中間相當刺激，銀河橋係一條唔對稱懸索橋，夜晚仲會亮燈，朝早同夜晚去完全係唔同feel！

行完天橋，過到對面岸上坡之後可以見到有一個超大告示牌，上面係講到預計喺2022年會創建展望台園區，相信如果下年真係開，將會成為一個新嘅熱門景點。

雖然交通唔算好方便，但既然去到鐵原，真心推薦大家要嚟參觀。

5. 銀河樹咖啡廳（은하수 카페）

• 地址：강원도 철원군 동송읍 한탄강길 112
• 時間：11:00 - 21:00

行完漢灘江銀河橋，可以順便嚟呢間「銀河樹咖啡廳」坐吓，佢係喺入口附近，同時係嗰度唯一一間Cafe，所以唔使擔心搵唔到。

Cafe有兩層，好闊落，一樓係室外座位區，可以望到銀河橋美景、二樓可以望到銀河橋及附的田野風光。

除咗咖啡、果汁等飲品之外，呢度仲有賣蛋糕、餅乾等，不過最值得介紹嘅係佢哋嘅「Kiss Ring」系列麵包。

「Kiss Ring」系列麵包有芝士、大蒜同藍莓三種口味，一個超大，夠3至4個人一齊share嚟食，小編見到呢度每一檯都會買嚟食！

藍莓鮮奶（블루베리 라떼）₩6,000

藍莓鮮奶係最近新出，每一啖都可以飲到藍莓粒，不過牛奶味道有啲淡，撈勻飲似係飲緊藍莓水？如果下次去到，小編會寧願試第二款....

 Kiss Ring藍莓麵包（Kiss Ring 블루베리빵）₩8,900

Kiss Ring藍莓麵包有超多藍莓醬，同時仲會食到藍莓粒，麵包外層仲有搽咗一層甜甜地嘅醬，食嘅時候真係好幸福，唔怪得幾乎每一檯都有叫！

如果大家之後都有計劃去鐵原，都可以參考小編介紹嘅行程，希望大家會鍾意啦！

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購