韓國連鎖店特有menu
由漢堡包到雪糕，韓國人都有辦法將佢哋改良成韓國味？
Hello，大家好，我哋係由韓國人每日提供最新旅行資訊嘅Creatrip。
雖然好多連鎖店喺世界各地都有，不過有啲商品只要嚟到韓國，就會被改良符合韓國人嘅口味，有啲只有喺韓國先食到嘅Menu，大家之後嚟又會唔會想試吓呢？
韓國連所店特有menu
1. 麥當勞 - 烤肉漢堡
價格：2,200won （單點）
呢個漢堡由1997年10月開始發售，只有喺韓國先可以食到，為咗迎合韓國人口味，佢中間會搽一層韓式燒肉醬，一直都賣得超好。另外仲有韓國特有嘅蝦堡、李子汁。
2. Burger King - 直火牛肉漢堡
價格：3,900won（單點）
Burger King嘅直火牛肉漢堡所用嘅肉餅除咗口感好之外，味道同食緊燒肉幾乎一樣，特別係韓國地區彥陽出名食烤牛肉，好多人都話食呢個正正就係彥陽嘅味道！
3. Shake Shack Burger - 首爾式烤牛肉漢堡
今年7月為咗紀念韓國Shake Shack Burger 5週年，推出咗限量版「首爾風味烤牛肉漢堡」 （活動期間已經結束），佢同首爾著名烤肉餐廳「Hanilgwan」（한일관）合作，令人印象特別深刻。
4. 韓國好容易會搵到嘅Pizza配料 - 烤肉Pizza
價格： 21,000won（M Size）
唔單止係漢堡，韓國Pizza好多時都會加埋韓式烤牛肉味，幾乎每一間Pizza鋪頭都可以搵到，上面仲會加好多烤牛肉，食嘅時候啖啖肉。
薯條Pizza
價格：19,000won（M Size）
Pizza上面加咩配料每個人口味都唔一樣，不過喺韓國好多時食Pizza，韓國人好鍾意加薯條喺上面，而且超多人買！
5. KFC - 調味炸雞
價格： 8,400won（3塊）
調味炸雞一開始係由美國引入韓國，因為符合韓國人口味，韓國各間炸雞店都有賣調味炸雞，就連KFC都有賣。
6. Mexicana - 水果味炸雞
價格：2個口味 19,000won
平時炸雞唔知大家鍾意食咩口味呢？Mexicana Chicken就好鍾意出啲獨特口味嘅炸雞，就好似有水果味、魷魚海鮮湯味等，鍾意試新口味嘅朋友，會唔會想之後都嚟試吓呢？
甜鮮奶咖啡口味炸雞，一開始推出嘅時候好多人都話唔係好接受到，不過事實上佢味道比想像中好，而且好特別，有好奇心嘅你，之後會唔會想挑戰吓？
7. BR雪糕 - 年糕雪糕
價格：3,200won（單球）
嚟到韓國一定要嘅雪糕點又點少得BR？喺2018年，韓國BR推出咗一款叫做「쫀떡궁합」 嘅雪糕，係黑芝麻雪糕加咗糯米糕，因為係限量口味，唔係成日都可以食得到，不過每一次推出反應都超好，今年9月，喺中秋期間更加推出咗另一款同黑芝麻、花生加糯米糕組合而成嘅雪糕，令人好想去試吓！
8. 糯米口味甜品
1. 雪冰 - 糯米口味刨冰
價格：8,900won
雪冰咁多款口味之中，糯米口味都係經典之一，上面除咗多糯米粉之外，仲有好煙靭嘅糯米糕，就算推出咗咁耐，人氣依然一隻咁高！
2. 雪冰 - 糯米甜品
價格：糯米忌廉蛋包飯（2個）1,500won / 糯米多士 4,500won / 糯米雪糕 4,500won / 糯米蜂蜜牛油麵包 6,000won
呢度有超多款關於糯米口味嘅甜品，每一款都好特別，可以同朋友一齊買幾款share嚟食。
3. 麥當勞 - 蜂蜜牛油糯米口味薯條
價格：2,200won
相信每一次推出shake shake薯條，大家都會想試晒唔同口味，之前韓國就有出蜂蜜牛油糯米口味，食落甜甜地，好特別！
9. Strabucks星茶館 - 블렌드咖啡豆
價格：18,000won（原豆）
今年3月，為咗紀念Starbucks喺韓國成立22週年，喺明洞開設咗一間叫做「별다방」（星茶館）分店。별（Star）喺韓文入面有星嘅意思，而다방（Dabang）係指韓式cafe，有各式各樣嘅咖啡、茶、飲品可以飲。因為韓國人好鍾意飲Starbucks，所以改咗呢個名，當中仲推出咗블렌드咖啡豆，只有喺明洞星茶館同梨大Starbucks Reserve可以買到。
10. 濟州Starbucks限定menu
價格：4,900 ~ 7,500won
雖然韓國有好多間Starbucks，不過要講到最特別，可能就係濟州嘅Starbucks，嗰度有好多飲品寫明「Only Jeju」，其他地方係飲唔到㗎！
另外，仲有啲甜品都只得濟州有，想試特別口味嘅朋友，之後就要去濟州試吓啦！
11. Starbucks - 紅蔘Latte
價格：3,000won
有冇諗過Starbucks會同紅蔘一齊推出飲品呢？呢款紅蔘Latte喺便利店或者超市好輕鬆就買得到，大家又有有冇興趣想試吓呢？
如果大家之後嚟韓國，又想試吓韓國先食到嘅連鎖店Menu，不妨可以試吓以上介紹嘅幾款，之後再話俾我哋知你嘅食後感啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk