韓國改良食品
只要海外食品嚟到韓國，韓國人都會有辦法將佢哋改良成韓國特色味？
Hello，大家好 ，我哋係由韓國人每日提供最新韓國旅行資訊嘅Creatrip。
今日小編想同大家介紹幾款原本係國外嘅食品，只要傳到嚟韓國，經過師傅改良之後，而家成為大熱，甚至有啲可能係大家嚟到都一定會食嘅小食添！
韓國改良食品
1. 肥版macaron （뚱카롱）
Macaron係法式甜品，但只要嚟到韓國，韓國人就將佢變到好大粒，加勁多餡，所以被稱為肥版Macaron（똥카롱）。雖然冇辦法知道一開始邊個幫佢改呢個名，但唔少賣家為咗更加多人搵到，喺IG店會打肥版Macaron（똥카롱）方便大家見到。
法國糕點師傅曾經評價韓國Macaron具有創新性同獨特性。除咗有原汁原味圓形Macaron之外，仲可以食到雪糕、水果形狀等唔同類型。而且除咗基本嘅朱古力、雲呢拿、士多啤梨等口味之外，仲有伯爵茶、抹茶等。
喺韓國肥版Macaron（똥카롱）受歡迎原因主要有兩個：
1. 韓國人買嘢嘅時候好講CP值。肥版Macaron又大又夠厚，望落唔單只吸引，加上夠多餡，一啖食口感相當豐富，而且仲有飽肚感。
2. 韓國人post IG好重視相嘅質素，所以呢一種肥版Macaron設計可愛得嚟仲要色彩繽紛，打卡呃like一流！
2. 牛角包窩夫（크로플）
呢個窩夫係用牛角包去整，食嘅時候比起一般窩夫食落更加酥脆，自從2018年有一間Cafe推出之後，反應相當熱烈，而家好多地方都會搵到佢嘅蹤影。
3. 年糕蛋糕（떡케이크）
年糕蛋糕係韓國傳統甜品，佢哋將蛋糕嗰層麵包用年糕去取代，忌廉用咗黃豆粉取代。喺2010嘅時候，仲用咗玫瑰嚟做裝飾，比起一般蛋糕，佢食落更加健康，喺重要日子、母親節或父親節嘅時候，經常都會見到佢嘅出現。
而家嘅年糕蛋糕仲會將佢改造成唔同可愛角色，另外再配糯米糕、窩夫、奶咖啡一齊食同飲。傳統嘅年糕蛋糕將佢重新改良，就算後生嘅一代都會鍾意。
4. 艾草、黑芝麻甜品
原本艾草同黑芝麻可能只有韓國傳統食物先會見到，但而家唔少小型Cafe都會慢慢加入呢兩種材料去整成甜品，例如有Latte、蛋糕、雪糕等，呢啲材料比起一般甜品更加健康，食嘅時候一啲都唔會覺得有負擔。
5. 薯仔熱狗（감자 핫도그）
加拿大成日會見到嘅小食有粟米熱狗（corn dog），當中最出名嘅品牌係Pogo，韓國人將呢個改成韓國版本變做Kogo。同一般只得香腸同麵包組成嘅傳統粟米熱狗唔同，韓國仲會加薯仔粒喺出面，食嘅時候有多層口感。另外仲可以配搭多種唔同醬汁一齊食，例如芝士、魷魚墨汁、辣醬等。
6. 調味炸雞（양념치킨）
炸雞被稱為韓國人嘅靈魂食物，但其實最初起源係喺外國。 調味炸雞係1980年代，美國南部傳統炸雞中加入韓國人鍾意食嘅辣醬同甜醬去調味製成。而家除咗紅卜卜嘅辣味之外，仲出咗醬油、大蒜、蜂蜜牛油等多種口味，俘獲咗韓國人嘅味蕾。
7. 軍隊Ria（군대리아）
군대 + 롯데리아（軍隊＋Lotteria）＝ 軍隊Ria，係軍人食嘅漢堡包，大家可以見到所有材料係分開，軍人要將佢哋自製再夾住嚟食。
佢最獨特之處並唔係在於可以自己DIY去整，而係會用到士多啤梨醬或提子醬作為配料。軍隊Ria獨特配方，喺唔少綜藝節都受到關注。而實際上，Lotteria曾經亦都出過呢一個套餐，不過可惜而家已經停咗產。
8. Pizza杯（컵피자）
Instagram： d.d__do__
隨住而家越嚟越多人自己一個住，唔少品牌都會出一人簡單料理，就好似不倒翁佢哋推出咗呢一個Pizza杯，2017年推出，當時已經吸引唔少人去買，只要放入微波爐加熱2分鐘就即刻可以食。
唔知未來仲會有啲咩菜式，韓國人會將佢哋改良呢？只係諗已經覺得好期待！
如果有更多想知嘅內容，都可以隨時留言或者dm話俾我哋知：）
Instagram：creatrip.hk