明洞「Starbucks星茶館店」介紹
之後嚟韓國又有多個新打卡位！韓國新開設獨一無二嘅Starbucks星茶館，相當高級！
Hello，大家好，我哋係由韓國人每日提供最新韓國旅行資訊嘅Creatrip。
相信韓國多cafe呢件事大家都知，不過大家又知唔知首爾住全世界擁有最多Starbucks分店嘅城市之一呢？喺早前3月26號，明洞就開咗一間好特別又獨特嘅星茶館店！小編亦都為大家直擊睇吓佢有咩咁特別，有興趣嘅朋友就要繼續睇落去啦！
韓國星茶館店
- 地址：서울 중구 회현동2가 88 스테이트타워 남산
- 營業時間：平日 07:00 - 22:00、星期六至日 08:00 - 21:00
星茶館就係喺明洞State Tower嘅1樓，呢座大廈亦都係Starbucks office嘅總部，𣎴過大家又會唔會好奇點解會叫「星茶館」呢？ 其實係因為韓國人叫Starbucks嘅花名嚟！
茶館係韓式cafe嘅意思，有各式各樣嘅咖啡、茶、飲品可以飲，不過隨住韓國人越嚟越鐘意飲意式咖啡，呢種茶館就幾乎消失曬。
而呢間分店就係用「茶館」同Starbucks嘅「star」結合而成，聽講Starbucks總部係爲咗感謝一直咁支持嘅消費者而起。喺韓國嘅Starbucks全部都係用地名或者建築物名嚟改店名，好似星茶館咁擁有呢啲特別嘅名真係第一次！
唔單止個名好特別，連裝修一啲都唔馬虎，只係睇入口係唔係都覺得已經好高級呢？
入口位仲有個位專係俾用app落單嘅客人外賣帶走，因為呢度有好多上班族，特別係朝早同Lunch time時間就特別多人。有咗呢個corner除咗可以快啲之外，仲可以避免混亂。
呢度足足有413平方米咁大，相當闊落，亮木色嘅裝修令人睇落特別高檔，再加上牆壁同天花板唔係用直角而係用咗拱形，所以特別靚。設計嘅時候爲咗帶俾人更有韓國嘅感覺，所以故意強調曲線美。
入到去之後最先見到嘅就係長8米，寬4米嘅大型LED牆。聽講係全世界首次設置數碼藝術牆嘅Starbucks。
小編去嗰一日，就展示緊韓國作家李圭泰嘅作品，聽講係表現咗Starbucks咖啡農場Hacienda Alsacia嘅面貌，用呢個方式去睇藝術品真係好新奇有趣！
呢度係星茶館店最受歡迎嘅空間，同其他空間相比，呢度雖然有啲暗，不過就俾到人一種溫馨嘅感覺，中間仲有一個好巨大嘅壁爐。
起初小編以為壁爐嘅火係好似藝術牆咁只係LED燈，不過行近一睇，原來真係火嚟，所以大家行近嘅時候要小心啲！
喺壁爐嘅左手邊都有個好特殊嘅小拱形空間，睇落好華麗。
而另一邊就有落地玻璃窗同幾張枱，同之前介紹嘅場合唔同，張枱好大，好啱喺度用電腦做自己嘢。
座位同座位之間有木造隔板，令到私隱度提升唔少。
呢度有Reserve同Teavana專櫃，Teavana係喺賣場中間嘅小吧台，鐘意飲各種茶同茶底飲品嘅人一定要去呢度叫Teavana嘅飲品！
而且同其他分店好唔同，呢度嘅麵包種類真係有超級多種，就連「楊平DTR店」同韓國第1000個「清潭star店」賣嘅特別menu，呢度都可以買得到。
小編最後叫咗「清潭吉士& Mascarpone蛋糕」（청담 커스터드 & 마스카포네 케이크 ）同「森林冷萃咖啡」（포레스트 콜드브루）。
清潭吉士 & Mascarpone蛋糕 (₩9,600)
小編平時都好鐘意呢種奶油蛋糕，所以諗都冇諗過就即刻叫咗！雖然價錢係貴咗啲，不過真係好好食，如果平時同小編一樣都好鐘意食Cream類甜品嘅話，大家之後嚟一定唔可以錯過！
森林冷萃咖啡 (tall size) (₩5,900)
呢個係由4月13號到6月7號迎接夏季而推出嘅限定飲品，係用濟州島健康嘅有機農抹茶同冷萃咖啡結合，表現夏日森林嘅飲品！飲嘅時候唔會好甜，所以唔鐘意飲太甜嘅人一定要試吓呢款！
以上就係韓國Starbucks星茶館店嘅介紹，真係好推薦大家之後嚟呢度嘆吓！
如果有更多想知嘅內容，都可以隨時留言或者dm話俾我哋知：）
Instagram：creatrip.hk